Lukas 1
1
Pandahuluan
1Teofilus am terhormat, banyaa urang am jarii manulis hal-hal totang Yesus am tajadi diantara dirii, samahkan am jarii dijanjikan laii Allah. 2Rang manuliskan peristiwa-peristiwa iyah samahkan am dilaporkan laii urang-urang am manjadi saksi sejak awal. Para saksi mata itii araalah pelayan-pelayan am mangabarkan kabar totang peristiwa-peristiwa iyah dan mamarahkannya ka dirii. 3Laii iyah, satelah Teofilus kanirii jarii manyelidik dengan saksama sagalaa sasuatu am tajadi sejak awal. Jadi aku mamutuskan bahwa aku jam harus manulis laporan am akurat akan kolai. 4Supayaa kolai bujur-bujur yakin bahwa apa am kolai palajarii araalah bujur.
Malaikat mangabarkan baritaa totang ka lahiran Yonanes Pembaptis
5Pada masaa Herodes Antipas, Raja provinsi Yudea araa saurang imam banama Zakharia. Inya termasuk lalam kalompok imam am diboriinama manurut namaa Abia. Zakharia, biniinya jam keturunan mulaa imam Israel am petama banama Harun, namanya araalah Elizabet. 6Zakharia dan Elizabet hidup jujur di paharap Allah. Rang taat mangaruh sagalaa hal sasuai dengan am di parintahkan Allah. 7Namun, Elizabet hontaa tahuu maganungng laii iaa tamanang, sahingga rang nua hontaa mahompu anaa. Salain iyah Elizabet dan Zakharia jarii tuhaa.
8Suatu arii Zakharia agii malayani sabagai imam di paharap Allah, laii kalompoknya am batugas malayani Allah di dangau Allah. 9Para imam manurut kabiasaan rang am biasanya mangaruh undian honii manentukan sapaa am akan batugas malayani ka dangau Allah. Kali itii Zakharia am tapilih tamaa di lalam dangau Allah akan manutung dupa ka tingii mezbah. 10Metuh Zakharia agii manutung dupa, banyaa urang am araa di luar dangau Allah am badoa ka Allah. 11Metuh Zakharia baaraa di lalam dangau Allah, saurang Malaikat utusan mulaa Tuhan mampailakan diriinya ka Zakharia. Malaikat utusan Tuhan iyah badirii di sisi kanan meja homan para imam manutung dupa atau mezbah iyah. 12Zakharia mailaa malaikat utusan Tuhan iyah dan iaa amat golaa. 13Tatapi Malaikat utusan mulaa Tuhan iyah bapaner: “Zakharia, umet golaa, sebab Allah jarii manongar kolai badoa ka Tuhan. Ikam dan Elizabet, biniimu akan mandapatkan saurang anaa kalaki. Ikam harus mamorii namanya Yohanes. 14Ikam akan mangaruh Ikam amat bahagia dan banyaa urang akan amat senang metuh Iaa lahir. 15Sebab Tuhan akan menganggapnya sabagai urang am paling penting. Inya hontaa tahuu marai anggur atau minuman baalkohol am bukannya, dan Roh Kudus am akan turun atas diriinya bahkan metuh lalam kanungngan sahompan Inya dilahirkan. 16Sabagai hasilnya, iaa akan mamimpin uras urang ka turunan Bangsa Israel baulang ka Tuhan Allah rang. 17Yohanes akan manjadi saurang am mahompu Roh dan kuasa samahkan Nabi Elia saurang juru bapaner akan Allah. Iaa akan manyahelu kadatangan Tuhan, mamparsiapkan urang-urang akan kadatangan-Nya. Inya akan mandamaikan ompai dan anaa, dan inya akan magubah pikiran am hontaa taat akan manarima hikmat ilahi.” 18Lalu Zakharia bapaner ka Malaikat utusan mulaa Tuhan iyah: “Macam apa aku dapat pacayaa bahwa apa am ikam parahkan iyah akan bujur-bujur tajadi? Aku dan biniiku jadi amat tuhaa, macam apa biniiku tahuu manganung dan mahompu anaa.” 19Malaikat utusan mulaa Tuhan iyah manjawab: “Namaku Gabriel am malayani Allah dan Allah jarii mautus aku manaing pantal mulaa Tuhan dan mamarahkan kabar baii tontang ka lahiran Anaanya. 20Botii dongarkan! Apa am jarii aku parahkan ka kolai pasti akan tajadi, waktu am jarii Tuhan tentukan. Tatapi laii kolai hontaa pacayaa akan pantalku itii, Allah akan mangaruh kolai bisu dan hontaa dapat bapaner. Ikam hontaa akan dapat bapaner sampai anaamu lahir!” 21Samantara Zakharia dan malaikat utusan Tuhan agii bapaner ka lalam dangau Allah, urang-urang am di luar masih manantii Zakharia dan rang tagiat laii Zakharia tingal di lalam dangau Allah, dengan waktu am paling lamat mulaa am biasanya. 22Metuh maluar, Zakharia hontaa dapat bapaner dengan rang. Kemudian urang-urang ingat bahwa iaa jarii mailaa sasuatu ka lalam dangau Allah mulaa Tuhan, di dangau Allah iaa jarii mangaruh kode honii jarinya ka rang tatapi totap hontaa tahuu bapaner. 23Satelah jarii batugas di dangau Allah. Zakharia pulang ka dangaunya di Provinsi Yudea.
24Satelah babarapa lamat, Elizabet manganung dan salama lima bulan iaa hontaa maluar ka homan umum. 25Iaa bapaner: “Ilalah apa am jarii Tuhan karuhkan ka aku akhirnya, pada arii-arai itii Inya jarii mampailakan dukungannya. Inya mampalakukan aku dengan baii dengan mahilakan asa malu di antaraa uras urang banyaa salamaa itii bahwa aku tahuu mahompu saurang anaa.”
Kabar totang kelahiran Yesus
26Metuh Elizabet jarii mangandung salama onam bulan, Allah mautus Malaikat utusan mulaa Tuhan am banama Gabriel am malayani Allah ingkas ka kota am banama Nazaret di provinsi Galilea. 27Iaa ingkas mandatangi saurang labini bujang am banama Maria. Maria batunangan dengan saurang kalaki am banama Yusuf, mulaa ka turunan Raja Daud. 28Metuh Malaikat utusan Tuhan iyah sampai di dangau Maria, inya bapaner: “Salam! Tuhan amat baii hatii ka kolai, dan Tuhan menyertaimu! Kolai bujur amat di berkati di antaraa para labini.” 29Tatapi Metuh Maria manongar apa am di parah Malaikat utusan Tuhan iyah, Maria manjadi bingung. Maria batanyaa lalam hatiinya totang artii salam iyah. 30Lalu ujaa Malaikat utusan mulaa Tuhan iyah bapaner ka Maria: “Umet golaa, hai Maria, sebab Allah jarii bermurah hatii ka kolai. 31Dongarkan itii, ikam akan manganung dan akan barana saurang anaa kalaki dan Ikam harus mamori namanya, Yesus. 32Inya akan manjadi urang am takenal dan urang-urang akan manimainya Anaa Allah am Maha Tingii atas sagala mahluk. Tuhan akan manjadi-Nya Raja atas umat-Nya, samahkan leluhurnya Raja Daud. 33Yesus akan manjadi Raja atas keturunan Yakub salamanya. Iaa hontaa akan basaa bahonti mamimpin Karajaan Allah.” 34Kemudian Maria batanya ka Malaikat utusan mulaa Tuhan iyah: “Macam apa aku dapat manggora anaa sedangkan aku masih bujang?” 35Malaikat utusan mulaa Tuhan iyah bapaner: “Roh Kudus akan datang ka kolai, dan kuasa Tuhan akan manjadi-Nya Raja atas umat-Nya.” Artiinyaa, kakuasaan Allah am Maha tingii akan malindungi ikam saponuhnya dan iyahlah manyebabkan ikam nganung. Laii iyah bayii am Kudus akan lahir akan kolai, am dijoku Anaa Allah. 36Dan izinkan aku mamarahkan kolai sasuatu. Kaluargamu, Elizabet binii imam Zakharia dan inai Yohanes Pembaptis jam akan mahompu bayii kalaki, meski jam iaa jarii amat tuhaa. Urang-urang mamarahkan bahwa iaa hontaa akan basaa mahompu anaa, tatapi iaa jarii mangganung salama onam bulan. 37Sebab uras hal iyah tajadi Laii Allah tahuu mangaruh manurut kahonaanya. 38Lalu Maria inai Yesus manjawab: “Biarlah uras am ikam parahkan iyah tajadi ka aku, sebab aku itii hamba Tuhan.” Lalu Malaikat utusan mulaa Tuhan iyah ingkas maningalkan Maria.
Maria dan Elizabet
39Babarapa waktu kemudian, Maria inai Yesus basiap-siap dan ingkas dengan copat ka suti kota di dataran tingii ka provinsi Yehuda homan Zakharia tingal. 40Metuh Iaa sampai di dangau Zakharia saurang imam am marupakan ompai mulaa Yohanes Pembaptis, iaa mamori salam ka Elizabet binii imam Zakharia dan inai Yohanes Pembaptis. 41Dan Elizabet binii imam Zakharia dan inai Yohanes Pembaptis manongar Maria inai Yesus mamori salam dan bayii am araa ka lalam kandungan Elizabet tiba-tiba bakanyah. Kemudian Elizabet di ponuhii kuasa Roh Kudus. 42Lalu Iaa basoruu dengan basuka cita ka Maria dan mamanerkan: “Maria, Allah jarii mamoriikan kasih karunia am lobih bakah ka aku dibandingkan dengan labini manih jam. Dan Allah jarii bakahona ka anaaku am akan aku lahirkan. 43Aku marasa amat terhormat laii Ikam, Inai mulaa Tuhanku datang mangunjungiku. 44Metuh aku manongar salam mulaa Ikam, anaa di lalam kandunganku manyukul porutku dengan amat senang. 45Ikam bauntung laii ikam percaya bahwa apa am Tuhan parahkan ka Ikam bujur-bujur tajadi.”
Nyanyian pujian Maria
46Kemudian Maria inai Yesus manjawab mahonii suti nyayian,
“Dengan sagonap hatii Aku mamuji Tuhan.
47Saluruh hidupku basuka cita dengan Allah Panyalamat hidupku,
48Laii Inya jarii mailaa kaadaanku, hambanya am rendah hatii.
Nampara botii uras genarasi akan manyokuu Aku di berkati.
49Laii Allah am Maha Kuasa jarii mangaruh hal-hal am luar biasa akan aku. Namaa-Nya araalah Kudus.
50Tuhan akan mampailakan belas kasih-Nya salama-lamanya ka rang am pacayaa dan malayani-Nya.
51Iaa jarii mangaruh perbuatan-perbuatan am bakah dengan Kuasa-Nya.
Iaa malobakan urang-urang am sombong dan bapikir bakah totang dirii rang kanirii.
52Iaa jarii manyingkirkan para pemimpin am mulaa homan kakuasaan rang,
Tatapi Inya jarii menghormati urang-urang am rendah hatii;
53Tuhan jarii magonyangkan urang-urang am kaporan dengan hal-hal am baii,
Tatapi Inya jarii mausir urang-urang sugih tampa mamori rang apa-apa.
54Allah jarii bajanyii manolong uras urang ka turunan Bangsa Israel,
Hamba-hamba-Nya dengan maingat janyii-Nya akan mampailakan kasih satia-Nya ka Abraham dan uras keturunannya akan salama-lamanya.
55Dan samahkan am dijanyi Allah, Allah jarii mamonuhi janyii am jarii Allah karuh ka hiaa umbuh dirii ka
Abraham araalah ompai bangsa Israel dan ompai umat am baiman salama-lamanya!”
56Satelah iyah, Maria inai Yesus tingal dengan Elizabet salama kira-kira toluu bulan dan kemudian pulang ka dangaunya di Nazaret.
Ka lahiran Yohanes Pembaptis
57Kemudian tibalah waktunya bagi Elizabet binii imam Zakharia dan inai Yohanes Pembaptis honaa barana, dan iaa barana anaa kalaki. 58Metuh urang-urang am tingal di damping dangaunya dan anggota kaluarganya manongar bahwa Tuhan jarii mampailakan belas kasih dan sihaailah Elizabet dengan mamoriinya saurang anaa kalaki, maka rang marayakan kelahiran anaa ka lakiinya. 59Metuh babiyaa iyah baumur delapan arii, para tetangga dan kaluarganya bakumpul honaa marayakan sunat anaa kalaki Zakharia saurang imam am marupakan ompai mulaa Yohanes Pembaptis. Rang mangira bahwa namanya araalah Zakharia, laii iyah araalah namaa ompainya. 60Tatapi inai anaa iyah bapaner ka rang: “Hontaa, dirii harus mamori namanya Yohanes pembaptis.” 61Kami baharap kolai mamori namanya dengan namaa kaluargamu dan hontaa araa kaluargamu am mahompu namaa iyah. 62Kemudian rang mamori isarat ka ompai bayii iyah Zakharia, macam apa iaa manimaii namaa bayiinya iyah. 63Zakharia mamintaa suti papan homan manulis, dan iaa manulis di papan iyah: “Namanya Yohanes.” Uras urang am mailaa apa am ditulis laii Zakharia, rang urasnya heran. 64Tiba-tiba Allah memulikan kamampuan Zakharia honii bapaner dan iaa manampara mamuji Allah. 65Uras tatangaa rang di ponuhii rasa hormat am lalam ka Tuhan dan urang-urang am tingal di saluruh bagian perbukitan di provinsi Yudea mamanerkan uras peristiwa itii. 66Uras am manongar totang paristiwa iyah bapikir totang rang dengan heran. Rang bapaner: “Pasti bayii itii akan tumbuh manjadi urang am amat penting.” Rang bapaner camiyah laii jelas sakali bahwa Tuhan menyertainya.
Nyanyian pujian Zakharia
67Dan Zakharia saurang imam am marupakan ompai mulaa Yohanes Pembaptis di ponuhii laii kuasa Roh kudus dan iaa mamarahkan pantal mulaa Allah. Zakharia bapaner.
68“Sagalaa puji bagi Tuhan, Allah am disembah laii uras urang ka turunan bangsa Israel.
Laii Inya pasti akan datang dan manebus umat-Nya.
69Tuhan akan mautus sasaurang am akan manyalamatkan dirii.
Inya akan manjadi keturunan hamba-Nya, Raja Daud.
70Itiilah am Allah janyikan akan inya karuh, malalui Nabi metuh hidup di zaman hariah.
71Inya manyadia jurus salamat akan dirii akan manyalamatkan dirii mulaa musuh-musuh dirii
Dan mulaa uras am gili ka dirii.
72Iaa mangaruh iyah akan mampaila cinta kasih-Nya ka hiaa umbuh dirii
dan akan mampaingat perjanyiian Tuhan dengan Abraham am inya karuh dengan rang.
73Laii perjanyiian Tuhan dengan Abraham,
Araalah ompai bangsa Israel dan ompai umat am baiman dan basumpah dengan hiaa umbuh dirii Abraham.
74Bahwa dirii akan di salamatkan mulaa kuasa musuh-musuh dirii,
Supayaa dirii dapat malayani Allah tampa golaa.
75Itii araalah janyii-Nya am diborikan ka hiaa umbuh dirii, Abraham.
Sahingga dengan macam iyah dirii tahuu hidup bebas mulaa dosa dan bujur di paharap-Nya saumur hidup dirii.
76Dan Ikam, anaa-Ku, urang-urang akan ingat bahwa ikam araalah Nabi am Maha Tingii atas sagala mahluk.
Ikam akan manyahelu kadatangan Tuhan dan mamparsiapkan urang-urang akan kadatangan-Nya,
Sahingga rang akan siap metuh Tuhan akan manjadi-Nya Raja atas umat-Nya.
77Aku akan manolong umat-Nya maingat bahwa Tuhan akan datang akan manyalamatkan rang dengan maafkan dosa-dosa rang.
78Laii Allah honaa menyelamatkan dirii,
Iaa ponuh dengan belas kasih dan rahmat. Sebab iyah Iaa mautus Jurus salamat mulaa Sorga homan Allah dan Malaikat-malaikat tingal akan manolong dirii.
79Inya akan manolong rang am hidup di lalam kasulitan, kasusahan dan am golaa matii.
Sahingga rang dapat hidup dengan damai barotaa Tuhan.”
80Anaa iyah, tumbuh dewasa dan jiwanya manjadi kuat. Yohanes tingal di daerah am hontaa araa berpenghuni metuh iaa Dewasa. Kemudian iaa manampara bakotbah di paharap uras urang ka turunan bangsa Israel.
Currently Selected:
Lukas 1: ATV
Highlight
Copy
Compare
Share
Want to have your highlights saved across all your devices? Sign up or sign in
Tamuan Bible by Beyond Translation is licensed under Creative Commons Attribution-ShareAlike 4.0 License.
