Pangiraan Suku Israel 23
23
1Jaji manjarum barik i Bileam, “Polaangak kosan panutung pamindaraan tuju bayu’a. Sarata kamasang itiang lo’ku’ sapi laki tujuun nanna domba lakiin tuju,” ingka kenang. 2Jaji dalola’ani jaruma i Bileam kole’a i Balak. Laloang karaja sama ira duaan mamola pamindarana sera sapi, sera domba maira kosanna pamindaraan dinen.
3Jaji manjarum barik i Bileam lo’a i Balak, “Indi’angkopi ijolo ibiringa pamindaranu. To’ kapi’ang kaleku’. Ungka’en mondok i Yahuwe pasidua’ang kalena nanku’. Bele kupamondokang jaruma lo’u. Ai poang yang dajarumangen lo’ku’, dinen tetap kujarumang bua lo’u,” ingka kenang i Bileam lo’a i Balak. Jaji lamba’ barik lo’a kosan balangkeen yang kosanen rimputa atau kayuna.
4Jaji mondok lalo i Yahuwe pasidua’ang kalena nanna i Bileam. Jaji manjarum i Bileam, “Mamin kukamasang kosan pamindara tujuun. Maira kosan pamindaraan mamin kupamindaraang sera sapi lakiin, sera domba lakiin,” ingka kenang lo’a i Yahuwe.
5Jaji saru’ang kalena i Yahuwe lo’a i Bileam manyuro’ manjarum. Jaji manjarum, “Mole’ balikko lo’a i Balak mawa jarumku’ dinen,” ingka kenang.
6Jaji mole’ balik i Bileam lo’a i Balak, sidua’ nanna akadengen inang di biringa pamindarana nanna ambata gulungan tau bapangkaten di negeri Moap. 7Jaji manjarum i Bileam pamondokang jaruma i Yahuwe dinen,
“Dalaak dari Aram kole’a i Balak raja Moap dinen yang lalako’en di gulungen ukit maro timuren.
“Se’,” ingka, “mangutuki anak kanturunanna i Yakub di’en. Pajau’ko lo’a kanturunanna i Israel,” ingka kenang lo’ku’.
8“Poangsi ai lo’ku’ mangutukiin lo’a tau na’anen dakutuki kole’a Alatala? Ai lo’ku’ pajau’en lo’a tau na’anen dapajau’ kole’a i Yahuwe?
9“Mameleak lo’da’ dari batu balangkeen, kukita balu’ tau laanangen kalena lo’a ambata gulungan negeri bokanen itiang malola’ lo’a i Yahuwe. Na’an pasiamaang kalena nanna negeri bokanen.
10“Intain dakule’en maitung kanturunanna i Yakub yang awan lalo kutu tana’en bayu’a? Kapisi saperampat poang dari anak kanturunanna i Israel, na’an ikule’ ikira. Mainya’ak mate awan baki’ Yakub, mate awan tau yang tapaten tio’a,”
ingka kenang jaruma i Yahuwe yang dapamondokangen kole’a i Bileam.
11Jaji manjarum barik i Balak lo’a i Bileam, “Ai kenang maam-maam mamolanu lo’ku’? Daiko kusuro’ko mondok lo’a di’en, kusuro’ mangutuki lo’a musuku’. Bajao’ko to’ mangutukiinko, ipamaan kakaru’ iko!” ingka kenang manjaruma lo’a i Bileam.
12“Ai, na’an itamu iko?” ingka kenang i Bileam, “Arungak manjarumang jaruma i Yahuwe yang dasuro’angen lo’ku’,” ingka kenang manyautina i Bileam.
13Jaji manjarum bapi i Balak, “Se’ tamba nanku’ lo’a kosan bokanen. Dari inang paita bua tau Israelen poangsi na’an akaus ikitaan. Sapadua poang yang paitaan. Dari inang poangko mangutukiin lo’da’ itiang manggulungi lo’ku’,” ingka kenang. 14Jaji daawa barik lo’a tana’ Pengintai di tompok ukit Pisga. Mondok inang barik dapola bapi kosan pamindara tujuun laloang dapamindaraang sera sapi lakiin nanna sera domba lakiin maira kosan pamindaraan.
15Jaji manjarum bapi i Bileam lo’a i Balak, “Indi’angkopi ijolo ibiring kosan pamindaranu. To’ pasidua’ang kaleku’ak nanna i Yahuwe inang,” ingka kenang.
16Jaji mondok i Yahuwe pasidua’ang kalena nanna i Bileam, saru’ang kalena i Yahuwe lo’a i Bileam manyuro’ manjarum. Jaji manjarum, “Mole’ balikko lo’a i Balak mawa jarumku’ dinen,” ingka kenang.
17Jaji mole’ balik i Bileam lo’a i Balak, sidua’ nanna akadenga inang di biringa pamindarana nanna ambata gulungan tau bapangkaten di negeri Moap. Jaji mangatoani i Balak, “Ai de’i jaruma i Yahuwe lo’u?” ingka kenang.
18Jaji manjarum i Bileam pamondokang jaruma i Yahuwe dinen,
“Se’, taan talingannu Balak. Mandalingako anaka i Sipor.
19“Alatala daia okan awan iki’ mantuariin yang mainya’en panangung-nganung. Okan awan anak mantuariin yang pandeen palinang pikiranna. Ti’ mamin kenang jaruma, kenang tapat mamolana. Ti’ mamin andian bayana, tetap dapamatang.
20“Maminak daparinta dasuro’ lo’ku’ mamberkati. Kenang, jalu maminen daberkati na’an dapat kupalinang,”
....................
ingka kenang jaruma i Yahuwe yang dajarumangen kole’a i Bileam.
25Jaji manjarum barik i Balak lo’a i Bileam, “Tadangko manjarumen. Ada’ kutukina, ada’ bea ipamaama,” ingka kenang.
26Jaji manyauti i Bileam, “Ai memen manjarumku’ lo’u. Ai poang yang dasuro’angen lo’ku’ kole’a i Yahuwe, arung dinen kulola’ani,” ingka kenang manjaruma lo’a i Balak.
27Mamin dinen manjarum bapi i Balak lo’a i Bileam, “Se’, kuawako lo’a kosan bokanen. Ungka’en daparuarangko kole’a i Yahuwe mangutuki lo’da’ dari kosan dinen,” ingka kenang. 28Jaji daawa i Bileam barik kole’a i Balak lo’a tompok ukit Peor. Dari inang paita daerah kosanen jalu tio’, tana’ atolangen.
29“Polaangak kosan panutung pamindaraa tuju bayu’a,” ingka kenang i Bileam. “Sarata kamasaang itiang lo’ku’ sapi lakiin tuju nanna domba lakiin tuju.” 30Jaji dalola’ani jaruma i Bileam kole’a i Balak. Laloang dapola pamindarana sera sapi, sera domba maira kosan panutung pamindaraan dinen.
Currently Selected:
Pangiraan Suku Israel 23: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
