Matius 5

Mantuari balu' ai dauntungiin kole'a Alatala?

Lk. 6:20-23

1Jaji barik i Yesus mamele tau bayu'a dinen, inait daia lo'a ukiten laloang aduduk inang. Mondok bea palola'a. 2Jaji maminna mondok ira inait, daia barik manjarum parajari lo'da',

3“Iki' yang mainya'en pakeke' kaleka' di arona Alatala, yang na'anen marap lo'a kamaaman diri'ka', bauntungki'. Kole'a tau balu' dinen lalo yang to' dapadari panduduk kangkamanna Alatala,” ingka kenang manjaruma.Lk. 15:18-19.

4“Iki' yang ajau'en nyawaka', yang susaan, bauntungki'. Kole'a tau balu' dinen lalo yang to' dapamaamen nyawana,” ingka kenang i Yesus.Yes. 61:2.

5“Iki' yang mainya'en alowe' ateka', bauntungki'. Kole'a tau balu' dinen lalo yang ampuna kausana ona',” ingka kenang manjaruma i Yesus.Msm. 37:11.

6“Iki' yang baraa'en nyawaka' to' pasasaui nyawana Alatala, bauntungki'. Awan tau akaringen nyawana bainginen to' mainyum, awan tau mase'en batanga bainginen to' angkaan, ti' awan dinen raana nyawaka', bauntungki'. Kole'a tau balu' dinen lalo to' mandua'ang kamainya'anna dinen,” ingka kenang i Yesus lo'da'.Yes. 55:1-2.

7"Iki' yang mainya'en mangamase'i lo'a tauen, bauntungki'. Kole'a tau balu' dinen lalo yang to' dakamase'iin," ingka kenang i Yesus.

8"Iki' yang bareseen ateka', bauntungki' kole'a tau balu' dinen lalo ona' to' maitaan lo'a Alatala," ingka kenang i Yesus.Msm. 24:3-4.

9"Iki' yang mainya'en mawa pasikule'angen, bauntungki'. Kole'a tau balu' dinen lalo to' iasanen ona' anaka Alatala.

10"Iki' yang, daparinsa'iin kakaru', dakalibakang tau kole'a malola'anika' lapoang lo'a panamuna Alatala, bauntungki'. Kole'a tau balu' dinen lalo ona' yang to' padari panduduk kangkamanna Alatala.1Ptr. 3:14.

11"Ti' ikin palola'ku' datamu kole' tauen, dapajau' barik, daparinsa'i barik, dapanganung-nganungi barik, bauntungkin.1Ptr. 4:14. 12Arung sasau nyawaka'. Arungki' mangasuang nyawa kole'a baraa ona' opa'ka' di Surga. Kole'a awan dinen lalojo gulungan panjaruma Alatala daparinsa'ina kole'a tauen," ingka kenang i Yesus lo'da'.2Taw. 36:16; PalPa. 7:52.

Andian ratina katio'anka' antarana anak mantuariin

Mk. 9:50; Lk. 14:34-35

13Jaji manjarum i Yesus, “Daikin di'en kuasan sia'en. Jaji awan lalo sia'en yang bagunaan, daiki'pi arung baguna lo'a tauen. Poangsi ai lo'a sia'en ti' na'an barik masin? Ai lo'a polana manyuro' mole' masin rabarik? Na'an ikule'. Kosan barik ratina. Itampeang poang iki'. Dalat poang kole'a tauen,” ingka kenang i Yesus lo'da'.Mk. 9:50; Lk. 14:34-35.

14“Daikin di'en lalo yang jalu arawangen antarana anak mantuariin. Awan lalo banuaan yang ipaduduken ibona ukiten. Na'an ikule' ilamun.Yoh. 8:12; 9:5. Pakita lapoang arawanga kole'a tauen. 15Awan lalo palita yang ikatio'en dinen, tentu na'an itongopi nanna basikomen. Palita yang ikatio'en tentu ipaduduk ibona dudukanna. Tentu itiang parawangi tau ilalam saoen.Mk. 4:21; Lk. 8:16; 11:33. 16Jaji awan dinen bua daiki' arawangka' paitana lo'a tauen. Arung paita lapoang basaka' yang maamen, mainto' dapudina Ama'ka' yang di Surga kole'a tauen. Kenang ratina,” ingka kenang i Yesus lo'da'.1Ptr. 2:12.

Tujuanna Ukuma Alatala ipadari barik

Lk. 6:27-36

17“Daiak di'en ada'kin manyangkaan lo'ku' mondokku' to' maunjang lo'a Ukuma baki' Musa, maunjang gulungan pangajaranna panjaruma Alatala yang ijoloon. Okan. Daiak mondokku' di'en to' kutiang padari lo'a samuana yang maminen dajarumang kole'da'. 18Daiak di'en manjarumak tapat-tapat lo'in. Launna andianna suanen, launna andianna duniaan, gulungan jalu dajarumangen dinen na'an to' anyap. Samuana yang jalu dajarumangen dinen to' adari kausa. Gulungan urup, gulungan titik yang di Ukuma Alatala, to adari kausana,” ingka kenang.Lk. 16:17. 19“Jaji maam-maamki', ada'ki' pebelang parintana Ukuma Alatala. Arung ipaduli samuana,” ingka kenang.

“Jaji kenang, umpamana andian tau malawanen lo'a Ukuma Alatala, yang parajariin bapi lo'a tauen mawa malola'ani basana dinen, tau balu' dinen ona' to' iasan akeke' di kangkaman Surga. Kapisi ukum sera yang dalawanen, kapisi ukum na'anen penting kalo'aan, tetap ia ona' daasan akeke'en di kangkaman Surga kole'a basana dinen,” ingka kenang. 20“Na, gulungan toa adat agamaan, gulungan tau Parisiin kalo'a palin kuat malola'aniin lo'a Ukuma Alatala. Poangsi daiak manjarumak lo'in, daikin malola'aninin lo'a panamuna Alatala arung labi-labi lo'a gulungan toa adaten, lo'a gulungan tau Parisiin. Na'an kenang, na'ankin ona' dari panduduk kangkaman Surga. Kenang ratina,” ingka kenang i Yesus lo'da'.

Ada'ki' arasiin

Lk. 12:57-59

21“Pangajaran lo'a tau ijoloon dinen mamin lalo idalinga ikin,

Ada' mauno'en. Intain mauno'en to dalao' ukum, Pal. 20:13; Ul. 5:17.

ingka kenang pangajaranen. 22Poangsi daiak di'en kuterangang bapi lo'in. Arasiki' poang lo'a arasairunka', mamin lalo pande ilao'i ukum. Rabor-raborko, iki' lo'a, mamin lalo pande iawa idurusi. Kosan rati tio'u, iki' lo'a, pandeki' lalo itampeang lo'a Neraka,” ingka kenang lo'da'.

23“Jaji kenang. Daiki' mawaki' pamindara#5:23 Pamindara – Arungki' parandam kole'a pamindara yang daawaan kole'a tau Israel dinen na'an sama nanna pamindara yang daawaan kole'a ambata arabaki'ka' tau Embaloh. Pamindara yang daawaan kole'a tau Israelen adalah jalu dasuro' kole'a Alatala mulai di buku' Mulakataan (Kejadian) 3:21; 4:1-5; 8:20-21; 12:7; Im. pasal 3-7 dll. Tujuanna pamindarada' dinen kenang. “Ti' kosan dara' tumbang, kosan ampon dosaan.” Ibr. 9:22 Ratina, dara' inatangjo dinen itiang manyauti dosana urang Israel mainto' ira na'an dadua' arasina Alatala. Dakaraja awan dinen sampai mondok Tau Dabayaangen, ialalo Yesus yang mateen di kayu salip dinen itiang manyauti dosana tau bayu'en. Kenang ratina pamindara yang tapatenjo. inang lo'a kas pamindaraan di saona Alatala, awan yang dasuro'en ilalam Ukuma Alatala. Barik mondok indinang, iparandam iki' andian sairunka' yang na'anen sikule' nanka', yang ajau'en nyawana lo'ka'. Ati'en mamin awan dinen, ada' ijolo mawa pamindaraan. 24Pamindaraka' dinen irantang poang ijolo inang di biringa kas pamindaraan. Manyariki' tajolo pasikule'ang kaleka' nanna sairunka' dinen. Baru' barik iawa pamindaraka' dinen. Kenang yang maamen,” ingka kenang i Yesus lo'da'.

25“Ti' andian tau mawa panakara lo'ka', nampika' to' daawa lo'a paurusen, arungki' babariar maurusiin manyari sikamaaman. Na'an kenang, tentu daawaki' tapat lo'a paurusen. Paurusenpi dinen to' manyera lo'ka' lo'a tanganna polisiin, daapiski' di sao ukumanen. 26Manjarumak tapat-tapat, maminki' barik daapis ilalam sao ukumanen dinen, ti' nampi akaus ibayar iki' gulungan adaten, nampiki' dapat minsaluan,” ingka kenang lo'da'.Lk. 12:57-59.

Ada' ateka' mangaingini lo'a bainye tau

Mk. 10:11-12; Lk. 16:18

27“Mamin idalinga ikin pangajaranen,

Ada' manyiuken, Pal. 20:14; Ul. 5:18.

ingka kenang. 28Poangsi daiak kuterangang bapi lo'in, mainya' to' manyiuk, mataka' poang yang bainginen, batak nyawaka' dinen mainya' to' mainso'i lo'a babainyeen, maminki' lalo malawan ukum dinen ilalam ateka'. 29Jaji kenang, ati'en mataka' katoen mawa lo'ka' badosa, labi maam ikekes poang itampeang. Dari pada mantuarika' itampeangen sakala lo'a Banua Apiin, maam alit gulunganna yang itampeangen.Mat. 18:9; Mk. 9:47. 30Kenang bea tanganka' katoen yang mawaan lo'ka' badosa, itatak poang dinen tanganka', itampeang. Dari pada mantuarika' sakala itampeangen lo'a Banua Apiin, maam alit gulunganna yang itampeangen,” ingka kenang.Mat. 18:8; Mk. 9:43.

31 “Andian bapi pangajaran tau ijolo, Tau to' sarak nanna bainyena arung mameang tajolo surat sarak, Ul. 24:1-4.

ingka kenang.Mat. 19:7; Mk. 10:4. 32Poangsi daiak manjarumak lo'in na'anki' pande sarak. Tau to' saraken dinen, daia dinen manyuro' badosa lo'a bainyena, manyuro' sisiuk ti' na'an bainyena tajolo badosaan sisiuken. Kole'a babainye idunjangen dinen, ti' siala baru nanna babaka bokanen, okan lagi' lakina. Dinen lalo siuka. Kenang bapi andian ona' tau sialaan nanna bainyena yang idunjangen dinen, daiapi manyiuk,” ingka kenang i Yesus.Im. 21:7; Mal. 2:13-16; Mat. 19:1-12; Mk. 10:11-12; Lk. 16:18; 1Kor. 7:10-11.

Daiki' ada'ki' mala saksi lapoang itiang pakarasang lo'a jarumka'

33“Kenang bapi pangajaran lo'da' ijoloon mamin idalinga ikin,

Ti'ki' mamin pakarasang jarumka' itiang manatap bayaka' nanna Alatala, ada' panganung-nganungen. Bayaka' lo'a Alatala arung tetap iparandam, Im. 19:12; Bil. 30:2; Ul. 23:21.

ingka kenang. 34Poangsi daiak laan. Daiak manjarumak lo'in, ti'ki' manjarum, ada'ki' sakali mala saksi itiang pakarasang lo'a jarumka' mainto' daparasaya'i tauna. Ada' kapisi banua Panyunyuaan, iki' kenang. Kole'a inang lalo dudukanna Alatala.Yes. 66:1; Mat. 23:22; Yak. 5:12. 35Ada' dinen kapisi galung duniaan, iki' kenang kole'a dinen lalo latan kakina. Ada' bea kapisi banua Yerusalem kole'a inang lalo banuana rajaka' yang palin baraa'en kuasana.Yes. 66:1; Msm. 48:3. 36To' iasan iki' kapisi uluka', ada'. Kosan daiki' kuasaka' manyuro' uwanen atau nanarum bukka'. 37Ti'ki' manjarum, manjarum lapoang kenang. Ti'ki' masan tapat, tapatla. Ti'en na'an, na'anla. Andian poang itambai lo'a dinen, dinen lalo barasalen dari nanna tau palin ajau'en dinen,” ingka kenang lo'da'.

Ada'ki' manyari balasanen

Lk. 6:29-30

38“Pangajaranen lo'da' andian bea idalinga ikin,

Ti' tau marusak matana gulunganna dinen, arung ibalas isuro' arusak bapi matana. Ti' tau marusak isina gulunganna, ibalas isuro' arusak bapi isina, Pal. 21:24; Im. 24:20; Ul. 19:21.

ingka kenang. 39Poangsi daiak laan bapi. Daiak manjarumak lo'in, ada'ki' manyari balasan ti' tau arasala'en lo'ka'. Ti'en andian tau manampar lindo'ka' katoen, ikoengang bapi dinen lindo'ka' kayoko'en ipalaloang poang kaleka' datampar bapi sabala'. 40Andian ona' tau to' mawa lo'ka' idurusi, ti'ki' idukum isuro' mameang sapeka', arung imeang bapi ampuroka'. 41Ti' andian tau tentaraan mamaksa lo'ka' manyuro' mamben bebe'a satu kilometer, arung iamben iki' dua kilometer. 42Ti' andian tau to' mamita jaluun lo'ka', arung imeang iki'. Ada'ki' mamase'angen ti' tau to' mainjam lo'ka'. Arung iparuarang iki',” ingka kenang manjaruma lo'da'.

Arung sama rata pangasaangka' lo'a tauen

Lk. 6:27-28,32-36

43“Jaji andian bapi idalinga ikin pangajaranen,

Gulungan kawanka' arung ikasaang iki', poangsi ambata musuka' arung ikalibakang iki', Im. 19:18; Ams. 25:21-22.

ingka kenang. 44Poangsi daiak kujarumang lo'in, musuka' arung ikasaang iki'. Ambata tau yang parinsa'iin lo'ka' arung ido'aang iki', 45mainto' sama awan Ama'ka' di Surga, mainto' manyulika' lo'a. Ti' daia, sama rata maama lo'a tauen. Awan sisiaken, dameang lo'a tau maamen, dameang bea lo'a tau ajau'en. Kenang bea sauranen, dameang lo'a tau tapaten, dameang bea lo'a tau na'anen tapat. Kosan bedana. 46Asi lo'a, daiki' ti'ki' mangasaang poang lo'a tau mangasaangen lo'ka', lo'a musuka' na'an, andian opa'ka'? Tentu kosan. Gulungan panarima' sukaienpi dinen ka' kenanga basana lo'a tauen. 47Mainya'ki' poang sijarumanen nanna arakawanka', na'an lo'a tau bokanen, ai lo'a silaanka' nanna tau bokanen? Tentu kosan. Tau na'anen paduli lo'a Alatalapi ka' bea kenanga. 48Daiki' di'en arung tio' barese awan lalo Ama'ka' yang di Surga. Kenang ratina,” ingka kenang i Yesus lo'da'.Im. 19:2; Ul. 18:13.

Currently Selected:

Matius 5: EBE

Highlight

Copy

Compare