Tutulan Karajana Imamen 18
18
Adat lo’a basa na’anen atuntu
1Jaji manjarum i Yahuwe lo’a baki’ Musa, 2“Awa jarumku’ di’en lo’da’ ambata anak kanturunanna baki’ Israel. Iak lalo di’en i Yahuwe, Alatala yang isembaan ikin. 3Ada’ lola’anina basada’ tau Mesiren inang di kosan lalako’injo dinen. Ada’ bea ilola’aniin basada’ tau di negeri Kana’an, kosan inde kuawanin dinen. 4Daikin arung malola’ani ukum adatku’, arung ilola’ani parintaku’, kole’a iak lalo di’en i Yahuwe, Alatala yang isembaan ikin. 5Lola’ani parintaku’, lola’ani ukum adatku’, kole’a tau malola’aniin ukum adatku’, dinen yang tio’en. Taantalinganin, kole’a iak lalo di’en i Yahuwe yang manjarumen.
6-18“Jaji kenang parintaku’ lo’in babakaan. Na’ankin pande malola’ tindo’ lo’a sairun siapit-apiten. Lola’ani ikin parintaku’ kole’a iak lalo di’en i Yahuwe yang manjarumen.
“Maam indu’ diri’ka’, maam indu’ baruka’ ada’ sitindo’anen nanna. Basa awan dinen tentu pawa’-awa’ani lo’a ama’ka’. Ada’ bea sitindo’anen nanna ampe’ induka’, kapi sairun saata ama’ka’, kapi sairun saata indu’ka’, kapi babainye yang dalaan kole’a kamoka’ sairun saata ama’ka’. Ada’ sampaiki’ pawa’-awa’aniin lo’a. Mamin lalo ampe’ indu’ka’.
“Ada’ malola’ tindo’ka’ lo’a anaka ama’ka’ nanna bainye baruna. Daia mamin padari sairunka’. Ada’ bea malola’ tindo’ka’ nanna sairun saatka’ atau sairun jaitka’. Kapi sarilao’ ama’, kapi sarilao’ indu’, kapi iparanakang inang di saonu, kapi iparanakang di sao tauen, na’anki’ pande sarilao’ tindo’ nanna. Ada’ bea malola’ tindo’ka’ lo’a bainyena sairun saatka’. Dinen tentu pawa’-awa’ani lo’a sairunka’. Kenang bea ati’en tio’pi bainyeka’ na’anki’ pande’ mala bainye lo’a sairun saata bainyeka’ itiang madu’a.
“Ada’ malola’ tindo’ka’ lo’a babainye dua paanak atau dua paampu. Kole’a dinen lalo sairun sikainso’anen nanna babainye dinen. Dinen lalo yang basa salakaan. Ada’ bea malola’ tindo’ka’ lo’a anak inantuka’. Daia mamin padari anaku ampunaan. Na’an bea pande malola’ tindo’ka’ nanna ampu’ka’. Tentu diri’ka’ bua yang ipawa’-awa’aniin ti’en ampu’ka’ ipolaan awan dinen.
19“Awan bainyeka’ nanga mondoka kotora, ati’en nampi atadang kamamase’a, ada’ idinso’i itiang sibasanan nanna. Awan dinen atoran nanna bainyeka’, ai lagi’ ti’ babainye bokanen. Samuana na’an pande idinso’i ati’en nampi tadang kamamase’a.
20“Ada’ manyiuken bainyena kawannu. Basa dinen manyuro’ kotor lo’u, manyuro’ ajau’ di jolona aroku’.
21“Ada’ pamindaraanga anakin lo’a jalu isembaan dinen asan yang Molok. Dinen lalo yang pajau’en lo’a asanku’ Alatala yang isembaan ikin. Taantalinganin, kole’a iak lalo di’en i Yahuwe yang manjarumen.#18:21 Tauen biasa manutung anaka tio’-tio’ sampai mate di tanganna surang kale Molok.
22“Ada’ mamola basa sitindo’anen babaka sama babakaan, balu’ babaka polaang kalena babainyeen. Basa awan dinen manyuro’ kagaring-garingen.
23“Ada’ sibasanan babaka sinjaman nanna inatangen. Basa awan dinen manyuro’ kotor poang lo’in di jolona aroku’. Babainyeenpi ada’ akadeng ijolona inatangen suro’ basai kalena lo’a. Dinen lalo basa parabor-raboren poang kaleka’ lo’a kabiasa’an mantuariin.
24“Samuana ambata gulungan basa dinen ada’ ilola’ani. Manyuro’ kotor poang lo’in di jolona aroku’. Kole’a awan dinen lalo basana ambata suku lalako’en di negeri Kana’an dinen, yang to’ kururu ona’ suro’ arari ijolona aronin. 25Tana’da’ dampe padari ajau’ di aroku’ kole’a basada’ dinen, ialalo kudukuma iak. Mondok tana’ negerida’ dinen kusuro’ painsaluanang lo’a panduduka. Tungan jalu damunta’ang rabarik daruruna. 26Poangsi daikin ada’ awan dinenna basanin. Arung ilola’ani ambata parintaku’, ambata gulungan ukum adatku’. Kapi tau barasal nannin, kapi tau bokan yang lalako’en nannin, samuana kupase’ang pakai basa manyuro’ kagaring-garingen dinen. 27Kole’a samuana basa dinen, dinen lalo basa dapakaien kole’a tau lalako’en di negeri di’en ijolonin. 28Ti’ ikin bapi manyuro’ ajau’ lo’a tana’ negeri di’en, daikinpi daruru bea awan ira ambata suku ijolonin. Awan lalo munta’en maruaren dari baba’a, awan dinen bea daruarangin dari tana’a.
29“Intain poang mawaan basa manyuro’ kagaring-garingen dinen, tau dinen arung putus hubunganna nanna uranga. 30Lola’ani ikin paba’iku’. Adat ikagaringen dinen yang dapakaien kole’da’ ijolonin ada’ ilola’anina. Ada’ kotorina kalenin nanna basa awan dinen manyuro’ ajau’ ijolona aroku’. Arung ilola’ani parintaku’, kole’a iak lalo di’en i Yahuwe yang isembaan ikin yang manjarumen lo’in.”
Currently Selected:
Tutulan Karajana Imamen 18: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
