Di Mulakata 9

Alatala sibaya nanna baki’ Nuh

1Jaji barik Alatala paba’i lo’a baki’ Nuh saranakaan, daberkati, “Aranakkin insang bayu’ mainto’ apano’a inyaunga galung suanen kole’a anak mantuariin,” ingka kenang.

2“Awan ambata gulungan inatangen, samuana to’ atakut barik lo’u. Gulungan inatang batiin, gulungan burung, gulungan jalu meleten, gulungan lauken kudunjukang samuana dinen lo’u. Tiang daikin samuana. 3Awan ijoloon yang kumeangen lo’in itiang jalu kaannin suma poang ambata akat jaluun. Na, awandi’enpi barik ambata jalu yang tio’en, yang jalu pakaji’en kumeang bea lo’in. Pande kausa ikaan, untu’in kausana,” ingka kenang Alatala paba’ina lo’a baki’ Nuh.

4"Poangsi kujarumang lo’in, yang inatangen ti’ andianpi dara’a, na’an pande ikaan. Kole’a di dara’a, inang lalo nyawana. Kupase’ang ikaan ti’ nampi maruar dara’a. 5Kenang bea dara’a anak mantuariin, nyawana kujagai. Intain mauno’en lo’a anak mantuariin tetap ibalas bua idukum mate. Kenang bea lo’a ambata inatangen yang mauno’en lo’a anak mantuariin, tetap iduno’. 6Intain painsaluanen dara’a anak mantuariin, yang mauno’en lo’a, arung ibalas idukum mate bea daia kole’a anak mantuariin. Ratina kenanga, anak mantuariin kupola balu’ diri’ku’, ialalo kubalasa iak ti’ iduno’.

7“Jaji daikin arungkin araanak bayu’ inyaunga galung suanen mainto’ apano’a barik kole’a anak mantuariin,” ingka kenang jaruma Alatala lo’a baki’ Nuh.

8Jaji barik manjarum bapi Alatala lo’a baki’ Nuh saranakaan, manjarumang bayana. 9“Jaji daiak di’en kupola bayaku’ nannin turun-manurun, 10ikin nanna ambata inatang tio’en inang nanninen, gulungan burungen, gulungan inatang batiin, gulungan ambata inatang nannin dinen yang minsaluanen dari timbauen de’i. 11Jaji kaputusan bayaku’ kurantangen nannin kenang. Daiak barik na’anak lagi’ mauno’ lo’in anak mantuariin nanna inatangen nanna danum raa’en. Jangka’a lalo dinen baraana danumen sampai arusak kausa duniaan,” ingka kenang jaruma Alatala darantang kaputusan bayana nanda’.

12-13Jaji manjarum bapi Alatala manjarumang tanda bayana, “Di’en barik ona’ andian tatara’ uwe kutaro’ ibo di domen. Tanda sibayaku’ nannin yang tio’en di duniaan, ambata anak mantuariin nanna ambata jalu mamatak nyawaan turun-manurun. 14Jaji ona’ ti’en kusuro’ bakaya domen ibona duniaan, paita bua ona’ tatara’ uween inang. 15Kukita ona’ dinen tatara’ uween iboen, inang lalo kuparandama bayaku’ lo’a gulungan anak mantuariin, nanna gulungan ambata inatang tio’en di duniaan. Na’an lagi’ to’ baraa danumen sampai atampus gulungan jalu mamatak nyawaan. 16Ati’en mamin timbul dinen tatara’ uween ibo di domen, kukita laloang kuparandam bayaku’ yang salaun-launaan dinen lo’in gulungan jalu mamatak nyawaan di duniaan,” ingka kenang. 17“Ialalo tanda bayaku’ lo’in ambata jalu mamatak nyawaan di duniaan,” ingka kenang jarum bayana Alatala lo’a baki’ Nuh.

18Jaji barik anaka baki’ Nuh dinen yang minsaluanen dari timbauen, baki’ Sem, baki’ Ham, baki’ Yapet. Anaka baki’ Ham dinen ialalo baki’ Kana’an. 19Anaka baki’ Nuh lalo dinen yang manurunang lo’ka’ samuaka’ yang tambor-amboren ibona tana’en.

Baki’ Kana’an dakutuki

20Jaji baki’ Nuh dinen mulai barik aparuk. Dalam aparuka dinen, yang datanamen dinen kobon anggur. 21Jaji barik bua’ anggura dinen dapola danum barik, dapola jalu balasa. Barik dinen dainyum, mangalo barik dinen uluna. Jaji lalako’a di kakalang palamba’a inang, diri’a dinen tulendang. 22Rabarik dakita dinen kole’a baki’ Ham amana dinen baki’ Kana’an. Jaji dajarumang lo’a arasairunna duaan dinen, 23baki’ Sem nanna baki’ Yapet. Maminna barik ira mandalinga awan dinen, dala barik kain ampuro dinen kole’da’. Daawa di babangda’ duaan barik lamba’ sonsorot datiang maumbuni tulendanga amana. Dakoengang poang dinen lindo’a alibaka mamele lo’a amana yang tulendangen.

24Jaji barik asading dinen yang baki’ Nuhen, maam barik uluna, datamu barik basa ajau’a anaka yang imundiin dinen. 25Jaji barik dakutuki ampuna dinen, anaka baki’ Ham, “Ikutuki i Kana’an dinen. Padari suro’anna arasairunnuko, suro’an yang palin akeke’en pangkata,”

ingka kenang. 26Mamin dinen andian bapi jaruma, “Ipudi i Yahuwe, Alatala yang dasembaan kole’a i Sem. Arung i Kana’an padari suro’anna i Sem. 27Kangkamanna i Yapet to’ insang baraa insang bakuasa. I Yapet to’ sarilao’ lapoang di banuana i Sem. I Kana’an arung padari suro’anna,” ingka kenang mangutukina lo’a anaka baki’ Ham.

28Jaji barik di maminna danum raa’en, balaunpi tio’a baki’ Nuh. Tiga ratus lima pulo’ taunpi tio’a. 29Jaji barik mondok di matena, mamin sumilan ratus lima pulo’ taun umura, baru’ mate.

Currently Selected:

Di Mulakata 9: EBE

Highlight

Copy

Compare