Di Mulakata 8

Danumen mulai sorot

1Jaji barik Alatala na’an malilu’ lo’a baki’ Nuh nanna gulungan inatangen yang tagurungen ilalam timbauen, ambata gulungan inatang batiin, ambata gulungan inatang bajinaken. Dasuro’ tapuput barik soanginen di duniaan manyuro’ sorot barik danumen. 2Tagurung barik danumen iaset nanna yang iawa’en. Tadang barik sauranen.

3Jaji insang sorot dinen danumen. Akaus barik saratus lima pulo’ asoon dinen, mulai to’ kurang barik danumen. 4Laloang di bulan tuju, aso katuju belasen takalang barik timbauen di antarana ambata ukit Ararat. 5Mamin dinen insang sorot bapi danumen sampai mondok lo’a bulan sapulo’en. Rabarik di bulan sapulo’en, aso seraan, pakita barik ambata tompok ukiten.

6Jaji ampat pulo’ aso maminna dinen, dabae’ kole’a baki’ Nuh dinen palawaken yang dapolaan. 7Dajaput sera dinen burung kakao’en, dapainsap. Jaji burung dinen mainsap urait, mainsap kalaut sampai akaring barik tana’en. 8Maminna dinen dajaput bea sera burung merpatiin, dapainsap bea mainto’ datamuna sorota danumen nanna nampina sorot. 9Poangsi burung dinen na’an dapat manando’ kole’a tana’en lagi’pi kasapuan kausana. Jaji mole’ lo’a baki’ Nuh. Rabarik burung dinen dajaput, dawa mole’ ilalam timbauen.

10Maminna dinen barik darungi bapi tuju aso, dapainsap bapi dinen burung merpatiin. 11Jaji pamamalam andian dawa mole’ dinen daun kayu saitun yang baruun dapupul dari daanna. Jaji datamu barik kole’a baki’ Nuh andianna danum sorot. 12Maminna dinen darungi bapi tuju aso, dapainsap bapi burung merpatiin, kosan mole’ burung dinen.

13Jaji barik nanga umura baki’ Nuh mamin mondok anam ratus satu taun, di bulan sera, aso seraan, inang akaringa barik danumen. Dabae’ barik dinen tudung timbauen kole’a baki’ Nuh, dabele, akaring barik tana’en. 14Mamin dinen, di bulan dua, aso dua pulo’ limaan, baru’ bakaras tana’en.

15Jaji manjarum barik Alatala lo’a baki’ Nuh, 16“Na barik, minsaluankin nanna araanakannin. 17Gulungan ambata inatangen yang tio’en inang nannin painsaluan. Palapas kausa gulungan ambata burung, gulungan ambata inatangen, gulungan ambata jalu meleten. Mainto’ dinen asulina, mainto’ dinen aranaka insang bayu’,” ingka kenang jaruma Alatala lo’a baki’ Nuh.

18Jaji barik maminna dinen minsaluan ari baki’ Nuh nanna aranaka. 19Dapainsaluan bea dinen barik gulungan inatangen, ambata jalu meleten, ambata burungen, gulungan ambata jalu pakaji’en di tana’en. Kira baranana akaus minsaluan nanna gulunganna.

20Jaji barik baki’ Nuh minsaluan dari timbauen dinen, dapola barik kosan pamindarana. Jaji dari barik dinen kosan pamindarana, dala sapa dua dinen ambata inatang yang bareseen, yang pandeen isambeli kira baranana. Dawa bea ambata burung yang bareseen. Dasembeli barik. Datutung inang dinen kole’a baki’ Nuh itiang pameanga lo’a i Yahuwe.

21Jaji dabau barik kole’a i Yahuwe jalu datutungen di kosan pamindarana baki’ Nuh, maam bauna. Jaji manjarum barik di atena, “Jangka’a di’en kutukina tana’en kole’ku’ katagal kajau’anna anak mantuariin. Kole’a saja kenanga memen pulikana anak mantuariin dari akeke’a sampai mondok di baraana. Manuju lapoang lo’a jalu ajau’en. Poangsi na’an barik kutampusi samuana jalu yang tio’en awan yang maminen dinen,” ingka kenang. 22“Launna andianna duniaan di’en na’an tadang ambata musima. Samuana to’ andian. Andian musim masaken, andian musim matamen. Andian musim aduruken, andian musim adinginen. Andian maam asoon, andian ajau’ asoon. Andian asoon, andian malamen. Samuana to’ andian salangke-langke andianna duniaan di’en,” ingka kenang jaruma i Yahuwe manjaruma di atena.

Currently Selected:

Di Mulakata 8: EBE

Highlight

Copy

Compare