Di Mulakata 6
6
Anak mantuariin insang kaya kajau’anna
1Jaji barik insang bayu’ anak mantuariin di duniaan, bayu’ bea anak babainyeen daparanakangen. 2Jaji ira kanturunan tau paduliin lo’a Alatala, dabele barik anak tau bokanen, gulungan anak babainyeda’, maam kausa batora dabelena. Jaji dala barik datiang bainyena, bele poang kamainya’anna. 3Jaji barik manjarum i Yahuwe, “Anak mantuariin di’en mawa panamu diri’a lapoang. Bapu’ Sumangatku’ panaaten. Na’an kupalaloang awan dinen ulu’-ulu’. Suma kupalaloangpi de’i lo’a dinen anak mantuariin sampai saratus dua pulo’ taunen,” ingka kenang manjaruma i Yahuwe.
4Jaji nanga sarilao’a tau paduliin lo’a Alatala nanna babainyeen de’i, sarata mandua’ang anak, waktu nanga dinen andian bea dinen suku baraa balangkeen dinen yang iasanen raksasa. Andian bea imundina tatakda’ dinen. Ia bea suku dinen yang dasanen kole’a tauen, tau yang baraniin, tau yang ikatakutangen.
5Jaji barik i Yahuwe mamele lo’a duniaan, saja ajau’ jaji ambata basana tau di duniaan. Samuana ambata pikiran atena, manuju lo’a jalu ajau’en lapoang. 6Jaji manasal jaji i Yahuwe kole’a dapolana anak mantuariin di duniaan. Susa tapat atena. 7Jaji manjarum barik, “Gulungan anak mantuariin di’en yang kupolaan, to’ kutampusi. Mainto’ akausa mate yang ibona tana’en. Gulungan inatangen, gulungan jalu meleten, gulungan burung mainsapen, kuduno’ samuana. Manasalak jaji kole’a kupolana,” ingka kenang jaruma i Yahuwe. 8Poangsi baki’ Nuh dinen dakamainya’i kole’a i Yahuwe.
9Jaji kenang tutulan tio’a baki’ Nuh dinen. Samuana dadaran tio’a, kosan sabangonen nanna, yang kosanen kasala’anna. Tau tapaten dinen baki’ Nuh, tau tio’ sarilao’ nanna Alatala. 10Jaji barik launna tio’a baki’ Nuh, talu anaka. Babaka taluna. Asanna anaka dinen i Sem, i Ham, i Yapet.
11Jaji ka’ada’an ibona tana’en di’en mamin bauruk di arona Alatala. Garang kausa kole’a kajau’anda’. 12Alatala mamele inang, mamin bauruk ka’ada’anna. Kole’a ambata anak mantuariin mamin polaang kalena kajau’an. 13Jaji barik manjarum Alatala lo’a baki’ Nuh, “Maminak mala kaputusan. To’ kutampusi barik, kukausang gulungan anak mantuariin dinen nanna galung duniaan. Kole’a dunia di’en garang kole’a bayu’a kajau’anda’ dinen,” ingka kenang.
14“Jaji daiko barik, arung polaang kalenu timbauen. Timbauen dinen dari kayu yang bananasen. Ilalama barik arung ipolaang sapata,” ingka kenang. “Jaji insaluanna dinen itagi nanna karuwinen, kenang bea ilalama. 15Ukura dinen arung kenang. Langkena arung 133 meter. Buka’a arung 22 meter. Akadenga inait arung 13 meter kole’u,” ingka kenang daasanna lo’a baki’ Nuh. 16“Arung ipolaang iko loang anginna 44 senti kuliling antara siringen nanna kaki tudunga. Arung ipolaang bea iko mambanganna sasabala’ poang. Ipolaang bea iko tingkata, talung tingkat,” ingka kenang.
17“Na, dinen lalo kusuro’anga kenang lo’u, kole’a daiak to’ kupamondokang danum raa’en manyapui kausa tana’ di duniaan. Maam poang mantuari atau jalu bokanen, samuana yang mamatak nyawaan yang inyaunga galung suanen to’ kuduno’ kausana,” ingka kenang. 18“Poangsi daiak sibaya’ak nannin. Daikin dua lakunyeen nanna anakin nanna bainyena aranakin to’ isuro’ intama ilalam timbauen mainto’ daikin dinen tio’kin,” ingka kenang.
19“Jaji daikin barik kupaba’ang lo’in. Samuana dinen gulungan inatangen awa ikin kausa nannin, iawa dua-dua nanna lakunyena kira baranana. Ikatio’ nannin inang di timbauen. 20Ambata gulungan inatang yang mainsapen, ambata inatang lamba’en, ambata gulungan inatang yang meleten nanna lakunyena to’ mondokang kalena lo’in mainto’ ikatio’a ilalam timbauen.
21“Kenang bua dinen soal jalu kaanen, awa kausa ikin kira baranana mainto’ andianna jalu ikaan ikin nanna gulungan inatangen,” ingka kenang paba’ina Alatala lo’a baki’ Nuh.
22Jaji barik samuana dinen dalola’ani kausa kole’a baki’ Nuh, awan bua paba’ina Alatala.
Currently Selected:
Di Mulakata 6: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
