Di Mulakata 2
2
1Ialalo barik akaus adari duniaan nanna galung suanen nanna gulungan ambata isi’a.
2Jaji barik tampus aso yang kaanamen, aso yang katujuun, Alatala sangarian barik. Kole’a akaus mamin karajana. 3Jaji barik aso yang katujuun dinen dalaanang kole’a Alatala lo’a aso yang bokanen, daberkati.
Ibaliki tutulanna Alatala mamolana mantuariin
4Jaji inang de’i nanga dapanyunyuaanga duniaan nanna galung suanen, kenang tutulanna. Jaji di nanga dapolana kole’a Alatala Yahuwe#2:4 Ilalam jarum Ibraniin asanna Alatala datulis indi’angen, Yahowaih elohim. Ratina elohim dinen, Alatala. Yahowaih dinen tulisa barik kole’ka’ ilalam jarumka’, Yahuwe. Na, asan tapata Alatala ialalo i Yahuwe. Poangsi waktu datulisa rabarik turun-manurun kole’a tau Yahudiin, laan tulisanna. Dala hurup konsonan dari Yahuwe, (Y,h,w,h), laloang dala hurup pokal dari Adonai (a,o,a,i). Dapis hurup pokal barik antarana hurup konsonanen, padari Yahowaih. Ilalam basana rabarik okan lagi’ Yahuwe yang daasanen kole’da’, daasan barik Adonai. Kenanga dinen, itiang manyagai mainto’ na’anna dasan asanna Alatala nanna sembarangan. Ratina adonai dinen, biasa dala tanda hormat lo’a tauen, biasa bea dala asan lo’a Alatala (Adonai). Ilalam Alkitab Bahasa Indonesia dalola’ani bua kabiasa’an tau Yahudiin dinen, dasalini Adonai, padari Tuhan. Laloang datulis TUHAN nanna hurup baraa’en. TUHAN nanna hurup baraa’en dinen, dala tanda kole’a dinen lalo asan tapata Alatala. Poangsi daikam marasa labi maam ipakai asan tapata. Kole’a mamin jaruma Alatala lo’a baki’ Musa di Palapasang 3:15, arung kenang ingka, asanna lo’a tauen turun-manurun. Jaji ratina i Yahuwe dinen, Iak laloon Iak. inang, 5ambata gulungan rimputen dinen, ambata jalu tio’en di umaan, kosan jalu tio’. Kole’a Alatala Yahuwe nampi manyuro’ sauranen mamasa’i tana’en. Kenang bea kosanpi mantuariin itiang aparuk inang. 6Suma poang itiang mamasa’i tana’en, andian lapoang ambun inaiten dinen laloang alao’ diaset. Dinen lalo yang mamasa’iin gulungan tana’en. 7Maminna dinen, inang lalo dala barik tana’en kole’a Alatala Yahuwe, dabator padari mantuariin. Mamin dari mantuariin laloang darusu dinen di ingara dasuro’ mamatak nyawaan dinen mantuariin, tio’ barik. Ialalo barik aranyawana dinen anak mantuariin.
8Jaji barik andian tanaman dapolaan kole’a Alatala Yahuwe, mamola tanaman di Eden dinen, di bagian timuren. Jaji anak mantuariin yang dapolaan dataro’ inang. 9Jaji di tanamanen dinen dasuro’ tio’ ambata baranana akat kayuun. Tio’ ambata akat kayu maamen ibeleen iki’ di mataka’, ambata akat bua’ banyanyamen. Jaji andian inang itanga’-tanga’ tanamanen akat bua’ duaan. Yang akata seraan, bua’a dinen, bua’ pangatio’en. Yang akat kaduaan, bua’a dinen, bua’ panamuangen ratina basa ajau’en nanna basa maamen. Kenang bua’a akat kayuun duaan dinen.
10Jaji barik di Eden dinen andian sunge. Sunge dinen yang mamasa’iin tanaman Eden dinen manyuro’ maamen tana’a dinen. Jaji sunge dinen maminna minsaluan lo’a tanaman Eden apampang ampat barik. 11Asanna sunge yang seraan, Pison asanna. Sunge Pison dinen areang di daerah Hawila. Inang di daerah Hawila bayu’ amas 12yang maamen. Andian bea inang bayu’ garu bedolah nanna batu inda krisopras. 13Asanna sunge yang kaduaan, Gihon asanna. Sunge Gihon dinen silengkong-lengkongan areanga di daerah Kus. 14Asanna sunge yang kataluun dinen, Tigris asanna. Sunge Tigris dinen areang di daerah Asur maro timur. Sunge yang kaampaten dinen Eprat asanna.
15Jaji mantuari dinen yang dapolaan kole’a Alatala, dataro’ inang di tanaman Eden. Dataro’a inang datiang panuntuani tanaman dinen, mainto’ aparuka inang. 16Jaji barik Alatala Yahuwe mamarinta lo’a, “Angkaanko indi’ang. Samuana ambata bua’ indi’angen pande ikaan kausana iko,” ingka kenang i Yahuwe. 17“Suma kuparintaangen poang lo’u, di’en akat bua’ seraan yang iasanen bua’ panamuangen ratina basa ajau’en nanna basa maamen, na’an pande ikaan iko,” ingka kenang i Yahuwe, “Ati’enko angkaan bua’ dinen, asona ikaanna iko, aso dinen bua matenu,” ingka kenang i Yahuwe paba’ina lo’a mantuari yang dasuro’ lalako’en inang.
18Jaji manjarum barik Alatala Yahuwe, “Na’an maam ti’ kakalena dinen babakaan. Labi maam kupola bapi itiang tumbalianna, itiang panggulungi,” ingka kenang. 19-20Jaji ambata inatangen yang dapolaan mamin dari tana’en dinen kosanpi kausa asanna, ambata inatang lamba’en di tana’en, ambata burung mainsapen di suanen. Jaji daawa kausa lo’a babakaan to’ dabele ati’en ai kalo’a asanna kira baranana. Jaji babakaan yang masanen dinen asanna ambata gulungan inatangen. Daasan asanna ambata inatang bajinaken, ambata gulungan inatang batiin, ambata gulungan burungen. Ai poang asanna kole’a babakaan dinen, dinen lalo asanna. Poangsi mole’ lo’a babakaan dinen, kosan dadua’ang inang tumbalianna.
21Jaji barik Alatala Yahuwe, dapatindo’ dinen babakaan de’i. Sampai maam tapat tindo’a. Na’an datamu jaluun. Jaji barik patanga’an tindo’ maama dinen babakaan, darabut tolang rusuka sabala’. Barik dinen dapalaliti dinen belean lukana. 22Jaji barik dakaraja tolang rusuka dinen padari babainyeen. Jaji babainyeen dinen baru’ dawa lo’a babakaan dinen de’i. 23Jaji barik asading dinen babakaan laloang dakitana dinen babainyeen, “Adu,” ingka, “di’en lalo tumbalianku’en,” ingka kenang. “Daia tolanga dinen dari tolangku’. Isina dinen dari isi’ku’ bua. Daia dinen to’ kuasan babainye. Kole’a barasala dari nanna babakaan,”#2:23 Ilalam jarum Ibraniin, mainso’ unyina asan babainye Ish-sah atau Is-shaw nanna asan babakaan Ish. ingka kenang babakaan mangitana lo’a. 24Ialalo ratina babakaan arung marantang tamatoana, arung dapasera nanna bainyena. Yang duaan okan lagi’ dua. Ipasera barik. Kenang ratina.#2:24 Ratina babaka arung batanggung jawap lo’a bainyena, barik bainyena dinen okan lagi’ tanggung jawapa indu-amana. Induna-amana babaka nanna babainyeen na’an pande mator lo’da’. Manjarumi pande.
25Jaji ira dua lakunyeen dinen tulendang poang. Kosanpi kajau’anen, kosanpi jalu dakawa’angen.
Currently Selected:
Di Mulakata 2: EBE
Highlight
Copy
Compare
Share
Want to have your highlights saved across all your devices? Sign up or sign in
Copyright New Tribes Mission 1997
