Di Mulakata 1

1Jaji di mulakata memen, duniaan nanna galung suanen dapanyunyuaang kole’a Alatala. 2Jaji tutulanna kenang. Di mulakataan kosanpi jalu atuntuan. Kosan jalu arabator. Andian poang inang awan danum bajalamen yang tabolong-bolong. Ibona danumen inang araun poang jaluun. Jaji Sumangata Alatala dinen malayang-layang maruangina inang ibona danumen.

3Jaji dabele kole’a Alatala araun. Jaji barik manjarum Alatala, “Adariko jalu arawangen,” ingka kenang. Jaji barik adari jalu arawangen. 4Jaji dabele dinen jalu arawangen kole’a Alatala, maam dabelena. Rabarik jalu arawangen dinen dapasilaanang nanna jalu araunen. 5Yang jalu arawangen dinen daasan asoon. Jalu araunen daasan malamen. Jaji tampus barik malamen nanna asoon, dinen iasan aso yang mulakataan.#1:5 Ilalam adat Ibraniin, na’an tagiling tanggalen tanga’ malamen awan daiki’. Tagilinga tanggala tau Ibraniin di tasulupa matasoon.

6Jaji barik manjarum bapi Alatala, “Danumen dinen arung ipasilaanang. Arung idintarai,” ingka kenang. 7-8Jaji kenang tapat, danum dinen daintarai. Jalu paintaraien dinen daasan barik suanen. Jaji barik maro ibo di galung suanen dinen andian danum. Maro inyaungenpi andian danum. Jaji tampus barik malamen nanna asoon, dinen iasan aso yang kaduaan.

9Jaji barik manjarum bapi Alatala, “Danum yang inyaunga galung suanen arung ipasilao’ang,” ingka. “Arung timbul jalu akaringen,” ingka kenang. Jaji kenang tapat. 10Jaji jalu yang akaringen dinen daasan barik tana’. Yang danumen dinen daasan jawaan. Jaji dabele jalu dinen kole’a Alatala, maam kausa dabelena.

11Jaji manjarum bapi Alatala, “Jaji tana’en, painsaluanangko ambata jalu tio’en. Arung asuli inang ambata baranana jalu ambua’en, ambata baranana jalu tio’en yang pandeen barasel itiang banyia’, ambata akat bua’en,” ingka kenang. Jaji kenang tapat. 12Minsaluan barik gulungan jalu tio’en. Asuli inang ambata baranana jalu ambua’en, ambata baranana jalu tio’en yang pandeen barasel itiang banyia’en, ambata akat bua’en. Andian bua’ diri’a, andian tolang diri’a maira baranana. Jaji dabele ambata jalu dinen kole’a Alatala, maam kausa dabelena. 13Jaji tampus barik malamen nanna asoon, dinen iasan aso yang kataluun.

14Jaji barik manjarum bapi Alatala dinen, “Arung adari jalu parawangiin di suanen manyuro’ silaan barik asoon nanna malamen. Jalu parawangiin dinen kutiang tanda tanggal mainto’ itamuna asoon, itamu musimen, itamu pataunanen,” ingka kenang. 15“Yang jalu arawangen dinen itiang parawangi galung suanen mainto’ arawang paitana di duniaan,” ingka kenang jaruma. Jaji kenang tapat. 16Jaji dapolana dinen dua baranana. Baraa duana poangsi yang seraan akeke’ kakapit. Yang baraa’en dinen datiang matori di asoon. Yang akeke’en dinen datiang matori di malamen. Andian bapi dapolaan gulungan ambata bintangen. 17Rabarik samuana dinen dapalakat inang di galung suanen mainto’ arawanga duniaan. 18Dasuro’ matori asoon nanna malamen mainto’ silaanna arawangen nanna araunen. Jaji dabele ambata jalu dinen kole’a Alatala, maam kausa dabelena. 19Jaji tampus barik malamen nanna asoon, dinen iasan aso yang kaampaten.

20Jaji manjarum bapi Alatala, “Ilalam danumen inang arung kasuangan, arung andian isi’a bayu’. Kenang bea inyaunga galung suanen, arung andian bayu’ burung mainsapen urait kalaut,” ingka kenang. 21Jaji dapola barik inang ambata lauk baraa’en yang tio’en di danumen, ambata baranana inatang yang lembak-lembak aranananga di danumen. Dapola ambata baranana burungen. Jaji dabele ambata jalu dinen kole’a Alatala, maam kausa dabelena. 22Jaji samuana dinen dapaba’i kole’a Alatala, daberkati, “Arungkin aranak insang bayu’ mainto’ kasuanganna danum jawaan. Burungpi arung aranak insang bayu’ maisi’i inyaunga galung suanen,” ingka kenang paba’ina. 23Jaji tampus barik malamen nanna asoon, dinen iasan aso yang kalimaan.

24Mamin dinen manjarum bapi Alatala, “Dari tana’en inang arung katio’an ambata baranana inatangen, gulungan inatang batiin, gulungan inatang bajinaken, gulungan inatang meleten,” ingka kenang. Jaji kenang tapat. 25Dapola kole’a Alatala inang ambata baranana inatang batiin, ambata baranana inatang bajinaken, ambata baranana inatang meleten. Jaji dabele ambata jalu dinen kole’a Alatala, maam kausa dabelena.

26Jaji manjarum barik Alatala, “Se’ mamolaki’ mantuari yang sabalu’en nanka’, yang manyuliin lo’ka’,” ingka kenang. “Ipola iki’ yang pande bakuasaan ibona gulungan ambata jalu pakaji’en inyaunga galung suanen. Bakuasa barik ibona ambata gulungan lauk di danumen, ambata gulungan burung di suanen, ambata gulungan inatang bajinaken, ambata inatang meleten,” ingka kenang. 27Jaji inang lalo dapolana barik mantuariin kole’a Alatala. Jaji dapola barik balu’ Alatala diri’a. Dapola babakaan, dapola babainyeen yang sabalu’en nanna.

28Jaji barik Alatala manjarum paba’ina lo’da’ anak mantuariin, daberkati, “Na daikin di’en arung aranak insang bayu’ sampai apano’ barik duniaan. Arungkin mangkam ibona gulungan ambata jalu pakaji’en inyaunga galung suanen, ibona ambata gulungan lauk di jawaan, ibona gulungan ambata burung di suanen, ibona gulungan ambata inatangen,” ingka kenang.

29Jaji Alatala manjarum bapi paba’ina lo’da’ anak mantuariin, “Samuana dinen ambata baranana jalu ambua’en, ambata jalu andianen tio’ di umaan, ambata bua’ kayuun, kudunjukang kausa lo’in anak mantuariin. Pande kausa ikaan. 30Poangsi ambata daunna dinen kudunjukang kausa lo’a gulungan inatangen di duniaan. Ambata gulungan burungen, ambata gulungan inatang lamba’en, ambata gulungan inatang mamatak nyawaan, samuana to’ angkaan daunna dinen,” ingka kenang. Jaji kenang tapat.

31Jaji dabele kole’a Alatala gulungan jalu dapolaan laun-launna dinen, maam jaji dabelena. Jaji tampus barik malamen nanna asoon, dinen iasan aso yang kaanamen.

Currently Selected:

Di Mulakata 1: EBE

Highlight

Copy

Compare