Kyenesis 42
42
Yosef Babilɛma Lakyɛ Egipte Baalaaya Atitabi
1Obe wɔ di Yakob lanu alɛ atitabi nkpe ni di Egipte kasɔ yi, ni aakaalɛ babisuɔtɔbi nɔɔ alɛ, <<Obe oso bisi bionyu bawo di anu nkpo?>> 2Aakple aabuɛ alɛ, <<Lenu alɛ atitabi nkpe di Egipte. Bikyɛ nfa biɛlaaya awo biwako wo, di mmle buasiɛ ni nkpa munaakpi ni.>>
3Nioso Yosef babilɛma suɔtɔbi lefosi nwu lakyɛ baalaaya atitabi di Egipte. 4Kafɔɔ Yakob ditatuna alɛ Benyamin, Yosef obilɛma bisɔnle atikanko babilɛma, diekye aatɔɔyɛkɛ alɛ lɛsaa kpile lewo kamanaabla nwɔ. 5Nioso Israel babi lasiɛ di batii ba niakyɛ Egipte baalaaya ni atitabi kamɛ. Diekye kɔka lawɛ di Kanaan kasɔ kafɔɔ.
6Di obe nwu kamɛ Yosef niale Egipte kasɔ nwu kanyayilatɛ, otii wɔ niatoosunsũ ni atitabi aatɔɔta ni batii bamuu. Nioso obe wɔ di Yosef babilɛma lakyɛ baalaabuo nii, baawakosa suoto kasɔ, baase ntũ kaasɔ baatɔɔ. 7Kafɔɔ di Yosef lanya ni babilɛma suɔtɔbi, aatofo ma, kafɔɔ aabla fɛ aaye ma, aakakatɛko ma osie osie. Ninfɛ aakaalɛ ma alɛ, <<Ɔfɛ biekye?>>
Ni baadiki kanya alɛ, <<Kanaan kasɔ buokye buɔwa atitabi ɔya.>>
8Kuntɛ Yosef latofo babilɛma yi, mma batatofo nwɔ. 9Ni aanyuma alaafɔ nɔɔ ya aasɛ ni di suoto lɛma nɛ, ni aatɔkɔ ma alɛ, <<Ɔtɛtɛɛ biɛwa wo! Biɛwa bilɛ biɔbanyu nse bubafuo suoto loo ɔta nse kakpɛ ledieko wo.>>
10Ni baadiki kanya alɛ, <<Oowo, saate nii! Atitabi di bakpɛmblatɛ lɛfɔ lɛwa ɔya. 11Otii onwii babisuɔtɔbi bule. Batii biene di bakpɛmblatɛ lɛfɔ nle, diele ɔtɛtɛɛ buɔwa.>>
12Ni aatɔkɔ ma alɛ, <<Oowo, biɛwa bilɛ biɔbanyu nse bubafuo suoto loo ɔta nse kakpɛ ledieko wo.>>
13Kafɔɔ baadiki kanya alɛ, <<Bakpɛmblatɛ lɛfɔ yi, osuɔtɔ onwii ninsi ni di Kanaan babisuɔtɔbi bule, babilɛma suɔtɔbi lefosi banyɔ buale. Obisɔnle nkpe di teewo ɔkyɛ, onwii kafɔɔ nsinnaa.>>
14Ni di Yosef latɔkɔ ma alɛ, <<Ɔlaa wɔ lɛtɔkɔ ye ni nte nkpo: Ɔtɛtɛɛ biɛwa! 15Nwaako di Farao lɛnya asi ni nkpa, Nnya mmle babasɔ ye mannyu ni: bilɔbadie ninfũ bisifi diediki obilee osuɔtɔbi bisɔnle nwu lɛwa ninfũ fiɛ. 16Bikpee obilee onwii kaamɛ lee aalaakpaa obilee suɔtɔbi nwu awako; kamayɔ babule lee ntɛ leeyoo katenkɔ, munnyu nse nwaako ɔlaa biobuɛ. Nse biɛwako nwɔ, ni di Farao lɛnya asi ni nkpa, ni ɔwa biɛwa wo ɔtɛtɛɛ!>> 17Ni di Yosef lamufũ bamuu lɛma aasiɛsa ayi atiɛ nɛ.
18Di dii tiɛfa, Yosef latɔkɔ ma alɛ, <<Bibla di mmle lɛtɔkɔ ye ni kanya biɛwɛ nkpa, diekye otii wɔ ninyɛkɛ ni Yaa nle: 19Nse batii biene bile, ni bidiɛ obilee suɔtɔbi onwii asiɛ di leyo katenkɔ, di babule lee bitɔɔkyɛ biɛlaayɔ atitabi bikyɛnko leyo lee batii ba di kɔka kolo ni. 20Kafɔɔ nse biokple minwa nfũ biɛkpaa osuɔtɔbi lee bisɔnle biwakoe, mmle kamafũ ɔlaa nwu nnu ni, di mmle minaakpi ni.>> Ni baatuna alɛ bababla di nkpo kanya nɛ.
21Ni baabuɛ nimma nimma alɛ, <<Nwaako obiloo suɔtɔbi oso bɔɔnanfi wo kootoko nɛ. Buanya dibuo le kamɛ aasiɛ ni di obe wɔ aatootikiti wo ni lekoto di nkpa nɔɔ disi, kafɔɔ butanu; nni oso di dibuo le mmle kɔwa wo di suoto nɛ.>>
22Ruben ladiki kanya alɛ, <<Ntatɔkɔ ye nlɛ bitambla okpile di osuɔtɔbi nwu suoto? Kafɔɔ bitanu! Bitɔɔnya, nunua dikpeni buofũ ntɔ nɔɔ letoko nanfi.>> 23Batatofo alɛ Yosef konu ma sele, diekye otii niatoodiki kasɔ aatɔɔta ma di sele lɛma kamɛ.
24Ni di Yosef ladiɛ ma aasifi aalaawi kaku, kafɔɔ aakple aawa aabakakatɛko ma. Ni aata baamufũ Simeon baanii di anu lɛma nɛ.
Yosef Babilɛma Lakple Baasifi Kanaan
25Ninfɛ di Yosef latɔkɔ bakpɛmblatɛ nɔɔ alɛ bayiisa bakotoku lɛma ku atitabi, baakplesa obiala lɛma koto futuutu batika ma di atitabi nwu osi di bakotoku lɛma kamɛ. Aatɔkɔ ma kafɔɔ alɛ bata ma alesaa ya babale ni di osuku. Baabla nkpo baata ma ni sɛmaa, 26ni baanii atoo lɛma baatika di babɔkɛɛ lɛma ba nintuka ni atoo suoto, ni baasifi nɛ.
27Di lɛba le baate ni ku kakyɛ, onwii lɛma lafukuti kotoku nɔɔ alɛ ookusii atitabi anta bɔkɛɛ nɔɔ wɔ nintuka ni atoo, ni aanya koto fututu nɔɔ di atitabi osi di kotoku kamɛ nɛ. 28Ni aatɔkɔ babilɛma suɔtɔbi alɛ, <<Beekplesa koto fututu nii bɛɛtɛɛ, nya kũ di kotoku nii kamɛ.>>
Ɔfɔɔ lasifi ma, baamunikĩi baanyu bawo ku ditũtũkũ baabuɛ alɛ, <<Obe ninle nle mmle di Yaa lɛbla wo ni nɛ?>>
29Obe wɔ baabuo ni ote lɛma Yakob nfũ di Kanaan kasɔ, baatɔkɔ nwɔ ɔlaa wɔ omuu niawa ma ni di suoto. Baatɔkɔ nwɔ alɛ, 30<<Osuɔtɔ wɔ ninle ni saate di kasɔ nwu suoto lakakatɛ ko wo osie osie aabla wo fɛle kasɔ nwu buɔwa ɔtɛtɛɛ. 31Kafɔɔ buatɔkɔ nwɔ bulɛ, <Batii biene bule; diele ɔtɛtɛɛ buɔwa. 32Lefosi basuɔtɔbi banyɔ buale, ote loo onwii. Onwii nsinnaa, obisɔnle kafɔɔ nkpe ku teewo di Kanaan kasɔ.>
33<<Ninfɛ di osuɔtɔ wɔ ninle ni saate di kasɔ nwu suoto latɔkɔ wo alɛ, <Nnya nle mmle mayɔ ntofo nse batii biene bile ni: Bidiɛ obilee suɔtɔbi onwii di ɔkyɛ nii ninfũ, biɛyɔ atitabi bikyɛnko leyo lee batii ba di kɔka kolo ni. 34Kafɔɔ bikpaa obilee bisɔnle biwakoe nintofo nlɛ diele ɔtɛtɛɛ biɛwa kafɔɔ batii biene bile ni.
Ni madiki obilee suɔtɔbi nta ye, minsunsũ asaa di kasɔ loo suoto.> >>
35Baanyɛɛnɛ ni atitabi di bakotoku lɛma, obiala lɛma koto fututu dikudi lasiɛ di kotoku nɔɔ kamɛ! Di mma ku ote lɛma baanya ni koto akudi nwu, difu lapɛ ma. 36Ni di ote lɛma Yakob latɔkɔ ma alɛ, <<Bitɔɔta babi nii leyu. Yosef nsinnaa, Simeon nsinnaa, nunua biomiɛ bilɛ bikpaa Benyamin kafɔɔ. Ami nfɛ nikonu dibuo!>>
37Ninfɛ di Ruben latɔkɔ ote alɛ, <<Faafuo babi nii nwu banyɔ olo nse ninkplesa Benyamin nwako fɔ. Yɔ nwɔ fakpee mi ninnɛɛ, makplesa nwɔ nwako.>>
38Kafɔɔ Yakob labuɛ alɛ, <<Obisuɔtɔbi nii dilɔbatikanko ye akyɛ; diekye obilɛma ntookpi lete nɔɔ nintoobu nɛ. Nse lɛsaa lɛlaabla nwɔ di osuku wɔ biofe nii, bibatɛɛ nkpi ku disi pule nsifi kasɔ kamɛ ku sɛnyaami.>>
Currently Selected:
Kyenesis 42: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
