Kyenesis 21
21
Isak Lelofo.
1Saate nwu lanyuma kanya ka aanii ni ku Sara, ni di Saate nwu labla aata Sara fɛ mmle okle aatɔkɔ nwɔ ni nɛ. 2Sara labalaka lɛmɛ ni aalofo obisuɔtɔbi aata Abraham di obe wɔ atoobe ɛɛkpasɔ nii, di obe wɔ kamɛ tutuutu di Yaa labuɛ aatɛ nii. 3Ni di Abraham latika obisuɔtɔbi wɔ di Sara lalofo aatɔɔ ni leyooto alɛ Isak nɛ. 4Obe wɔ di Isak lafũ ni ayi anɛ, ni di Abraham lakyɛlɛnsa nwɔ suoto fɛ mmle di Yaa lakpee nwɔ ni kufiofa nɛ. 5Abraham lafũ alɛɛ kɔlafa fiɛ baalofo obisuɔtɔbi nɔɔ Isak baatɔɔ.
6Ninfɛ di Sara labuɛ alɛ, <<Yaa ntɔɔtɛɛ sɛma, otii lele kafɔɔ nienu ɔlaa wɔ mmle kamamankoe.>> 7Abuɛ aakyakaa alɛ, <<Owe niate aasɛ kɔlaafɔ di Abraham suoto alɛ Sara kata obi lɛnyɛɛ annyɛɛfu? Kafɔɔ ntoolofo osuɔtɔbi lɛtɔɔ di obe wɔ atoobe ɛɛkpasɔ nii.>>
Abraham Latososa Hagar Ku Ismael.
8Obisɔ nwu lamuɔ aabudi lɛnyɛɛ, dii le di Isak labudi ni lɛnyɛɛ yi, Abraham lale dii kplɛ ninwii aatɔɔ. 9Kafɔɔ Sara lanya alɛ obi wɔ di Hagar, Egipte otii nwu lalofo aata ni Abraham latɔɔma nwɔ nii, 10ni aatɔkɔ Abraham alɛ, <<Tososa ɔlanle sanko nwu ku obisuɔtɔbi nɔɔ nwu. Diekye ɔlanle sanko nwu obi dilɔbale atesaa ku obi nii Isak.>>
11Ɔlaa nwu ditamɛnɛmɛnɛ Abraham ta obisuɔtɔbi nwu oso. 12Kafɔɔ Yaa latɔkɔ Abraham alɛ, <<Tanta ɔlaa nwu labuo fɔ suoto ta obisuɔtɔbi nwu ku ɔlanle sanko nwu oso. Nu ɔlaa lele di Sara lɛtɔkɔ fɔ, diekye diefe ni di Isak suoto di banantii lɛfɔ makye. 13Ɔlanle sanko obi nwu kafɔɔ, mata kale ndie kankye kamɛ nɔɔ, diekye obi lɛfɔ ale.
14Abraham lataka ku kolesɛtũ aayɔ alesaa awo, aakpete ntu di dikuuku aata Hagar, ni aayɔ aatika nwɔ di nimuusi nɛ. Ni aadiki nwɔ osuku ku obi nwu nɛ. Ni aasifi aalaatookyikyii Beerseba ɔfaafuu nɛ.
15Obe wɔ di ntu ntooloo ni di dikuuku nwu yi, ni aayɔ obi nwu aalaatensa di kawesee kanwii kalɔ nɛ. 16Ni aasifi aalaasiɛ di ɔlɔɔkɔ fɛ okuma lɛtaa lekyo nɛ. Ni aabuɛ aatɔkɔ suoto alɛ, <<Namafuo osiɛ onyu obi nwu akpi.>> Obe wɔ aasiɛ ni ninfa ni aafaa kaku nɛ.
17Yaa lanu obi nwu kaku, ninfɛ di Yaa tɔkyɛntɛ lalɛɛ Hagar di osi aakaalɛ nwɔ alɛ, <<Be lɛsaa dile Hagar? Tanyɛkɛ; Yaa ntoonu obi nwu kaku di obe wɔ ate ni ninfa. 18Laakɛnkɛ obi nwu faklee di nnɛɛ lɛfɔ kamɛ, diekye kamabla nwɔ kale kplɛ.>>
19Ninfɛ di Yaa latikiti Hagar anu ni aanya ditubiɔ nɛ. Ninfɛ aakyɛ aalaadu ntu aakpete di dikuuku nwu kamɛ, ni aata obi nwu lanyi nɛ. 20Yaa lasiɛko obisɔ nwu nkpo aamuɔ, aasiɛ di ɔfaafuu nwu aabakple kpantɛ kplɛ. 21Obe wɔ aasiɛ ni di Paran ɔfaafuu nwu kasɔ, ɔya lamiɛ ɔsanko di Egipte kasɔ suoto aatɔɔ.
Abraham Ku Abimelek Labla Onwii.
22Di obe nwu nkpo kamɛ, ni di Abimelek ku bakpɛtɛ nɔɔ ɔnɔɔfo Fikol labatɔkɔ Abraham alɛ, <<Yaa nsiko fɔ di lɛsaa biala fɔɔbla kamɛ. 23Ka ntam ninfũ fatɛɛ di Yaa anu falɛ flabakyɔnkyɔ mi diidii ku babi nii ku banantii nii, alɛ fabale mi sifutulɛ ku kasɔ ka mmle suoto fasi ni fɛ ɔfɔɔ, fɛ mmle okle lale fɔ ni sifutulɛ.>>
24Ninfɛ di Abraham labuɛ alɛ, <<Lɛka.>>
25Ninfɛ di Abraham lakakatɛ di ditubiɔ le di Abimelek bakpɛmblatɛ lafũ ni ku suoto osie aatɔkɔ Abimelek nɛ. 26Ninfɛ di Abimelek labuɛ alɛ, <<Nin-ye otii wɔ niabla ni lɛsaa nwu nkpo. Diidii faditɔkɔ mi, miɛ ko konu ɔlaa wɔ mmle nɛ.>>
27Nioso Abraham layɔ bafoso ku banankyue aata Abimelek, ni di akyuu lɛma anyɔ baanii kanya nɛ. 28Ninfɛ di Abraham ladiki bafoso sanko bakuɛnsĩ aase lete nɛ. 29Ni di Abimelek lakaalɛ Abraham alɛ, <<Bafoso sanko bakuɛnsĩ nwu feediki feese ni lete kasɔ mɔ?>>
30Ni aatɔkɔ nwɔ alɛ, <<Fũ bafoso bakuɛnsĩ nwu nkpo fakyeko ɔkyɛ nii, dietuo fɛ kamaadiyilasaa alɛ ami niakutu ditubiɔ nwu nkpo.>>
31Nkpo oso bɔɔlɛɛ lɛba nwu nkpo alɛ Beerseba#21.31 Lɛsɔdiki ninle alɛ kanya ninii dibiɔ. nɛ. Diekye lɛba nwu nkpo di akyuu lɛma anyɔ baanii kanya nɛ.
32Di obe wɔ batooloo ni kanya onii nwu nkpo di Beerseba, Abimelek ku bakpɛtɛ nɔɔfo nɔɔ Fikol lakple baasifi Filisti batii kasɔ suoto. 33Ni di Abraham lasɔ kowoso ko manlɛɛ ni tamarisk di Beerseba, ni aalɛɛ Saate, Yaa wɔ Ninaa ni Kaloo leyooto ninfa nɛ. 34Ninfɛ di Abraham lasiɛ di Filisti batii kasɔ suoto aaklɛ nɛ.
Currently Selected:
Kyenesis 21: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
