Kyenesis 20
20
Abraham Ku Abimelek
1Abraham ladie di Mamre aasifi kasɔ ka di kalakasɔ, ni aalaasiɛ di Kades ku Sur obo nɛ. Ni aasiɛ di Gerar kɛɛkɛ nɛ. 2Ninfɛ di Abraham labuɛ di ɔsɔfɔ Sara suoto alɛ, <<Obiloo sankobi ale.>> Nioso Abimelek, Gerar ɔka lata baakpaa Sara baawako nwɔ.
3Kafɔɔ Yaa lasɛɛsa Abimelek kɔlaafɔ ku kakyɛ aatɔkɔ nwɔ alɛ, <<Fɔɔwa ɔbakpi di ɔsanko nwu fɛɛkpaa ni suoto, diekye santɛ ale.>>
4Kafɔɔ di obe nwu kamɛ Abimelek diitenko nwɔ. Nioso aabuɛ alɛ, <<Saate, ni fabawɔɔsa kale ka ninankpi ni lɛpɔɔ? 5Nnwɔɔ niatɔkɔ mi alɛ, <Obiloo sankobi ale>, ni di ɔsanko nwu kafɔɔ labuɛ alɛ, <Obiloo suɔtɔbi ale nɛ.> Otu biene kamɛ labla nle mmle, ninkpi lɛpɔɔ.>>
6Ninfɛ di Yaa latɔkɔ nwɔ kɔɔlaafɔ kamɛ alɛ, <<Nwaako, n-ye nlɛ otu biene kamɛ faabla nle mmle, nioso ninanta fɔ fabla okpile di suoto nii nɛ. Nioso ninanta fɔ fatenko nwɔ nɛ. 7Nioso kplesa ɔsanko nwu nkpo fata ɔsa, diekye Yaa ɔlaa buɛtɛtɛ ale. Abapɛ ɔlaa anta Yaa diisi lɛfɔ faanwɛ nkpa. Kafɔɔ nse faakplesa nwɔ fatɔɔ, ni kɔtafɔ fantofo nlɛ minko asaa lɛfɔ amuu bibakpi.>>
8Abimelek lataka ku kolesɛtũ aalɛɛ banɔɔfotii nɔɔ ni aatɔkɔ ma lɛsaa le niawa ni fɛɛ nɛ. Nioso banɔɔfotii nwu layɛkɛ baafensa. 9Ninfɛ di Abimelek lalɛɛ Abraham ni aakaalɛ nwɔ alɛ, <<Be lɛsaa fɛɛbla wo nkpo nɛ? Ɔmɛnkpile lɛbla fɔ fiɛ fɔɔta okpile kplɛ wɔ mmle nwa di suoto nii ku sɛka kalekɔ nii suoto? Lɛsaa le manambla nii, nni fɛɛbla mi nɛ.>> 10Ninfɛ di Abimelek lakaalɛ Abraham alɛ, <<Be lɛsaa oso fɛɛbla lɛsaa le mmle nwu nkpo?>>
11Ninfɛ di Abraham ladiki kanya alɛ, <<Lenyu nlɛ Yaa lɛyɛkɛ nnaa di lɛba le mmle, ni babalo mi ta ɔsɔfɔ nii oso. 12Nwaako kafɔɔ, obiloo sankobi ale, teemi obisankobi ale, kafɔɔ diele yaami obi ale, fiɛ ale mi ɔsɔfɔ. 13Obe wɔ di Yaa latɔkɔ mi alɛ ndie ni di teemi leyo nintɔɔkyɛ ni ɔfɔɔkpoo yi, ni latɔkɔ nwɔ nlɛ, <Nyɛɛ nyaami, kakɔ lele buɔkyɛ yi, faabuɛ falɛ, <<Obiloo suɔtɔbi ale.>> > >>
14Ninfɛ di Abimelek layɔ bafoso ku banankyue ku balanle suɔtɔ ku basanko aata Abraham nɛ. Ni aakplesa ɔsɔfɔ nɔɔ Sara kafɔɔ aatɔɔ nɛ. 15Ni di Abimelek latɔkɔ nwɔ alɛ, <<Kasɔ nii ninle nka nɛ, siɛ kaakɔ lele ninlɛ fɔ.>>
16Ninfɛ aatɔkɔ Sara alɛ, <<Kɔyɔ koto fututu kakpe nta nnwɔ falɛ ale ni obilee suɔtɔbi fɛ ntu kokpeesato di batii lee bamuu anu, diotuo alɛ faakpi ni lɛpɔɔ.>>
17Ninfɛ di Abraham lapɛ ɔlaa aata Yaa di Abimelek ku ɔsɔfɔ nɔɔ ku balanle sankobi nɔɔ asi alɛ Yaa kafukuti ma selofofɔtɔ alɛ baakple manlofo nɛ. 18Diekye Saate lanii olofofɔtɔ biala di Abimelek leyo alɛ kulaabudi obi ta Abraham ɔsɔfɔ Sara oso.
Currently Selected:
Kyenesis 20: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
