Kyenesis 18
18
Saate Labuɛ Atɛ Alɛ Abata Abraham Obisuɔtɔbi
1Saate ladiki suoto aatuo Abraham di Mamre kowoso kplɛ nwu ɔlɔɔkɔ wɔ aasiɛ ni di lɛkpaayo nɔɔ kayoko di kakũ lebe. 2Di Abraham latakatɛsa anu aanyu nii, ni aanya basuɔtɔ batiɛ banwii layila batakyo nwɔ ni. Obe wɔ aanya ma nii, ni aapɛsɛwa aakye lɛkpaayo nɔɔ kayoko nwu aalaakyakako ma, ni aapɛ akunkyi aase katũ kaasɔ nɛ.
3Ni aatɔkɔ onwii lɛma alɛ, <<Saate nse faale mi sibualɛ yi, ni tanwaalɛ kpɛmblatɛ lɛfɔ faafe. 4Bitɛɛ nwako ye ntu kɛɛkɛɛ, di bamuu lee bifoto nkpaa biɛtɛ ɔnyɛɛ di kowoso ko mmle kalɔ. 5Biɛtɛɛ nwako ye alesaa awo bile, biekpee suoto ɔnyɛɛ fiɛ biesifi di obe wɔ bitɔɔwa ni kpɛmblatɛ lee nfũ.>>
Ni baatɔkɔ nwɔ alɛ, <<Lafe! Bla fɛ mmle feebuɛ ni.>>
6Nkpo oso Abraham lapɛsɛwa aasifi Sara nfũ di lɛkpaayo nwu kamɛ. Ni aabuɛ alɛ, <<Pɛsɛwa faakusii nnaafũ muɛmuɛ lɛfɔ nwu nkpo ɛkɛkɛ etiɛ faanwɔtɔ fafiɛ bloblo owo.>>
7Ninfɛ di Abraham latoso aasifi banankyue nɔɔ kamɛ, ni aamufũ lɛnankyuebi le ninlɛ nii, aayɔ aata kpɛmblatɛ nɔɔ aalo aafiɛ ni diabe nwaa. 8Ninfɛ aayɔ nankyue nnyɛɛntu kpɛnkpɛ ku mbe niate ni kyololo aakyakaa di nankyue sina fiɛle nwu nkpo aabase ma kaatũ nɛ. Kafɔɔ nnwɔɔ omu nɔɔ aayila ma di ɔlɔɔkɔ koowoso nwu kalɔ di obe wɔ baatoole ni alesaa nwu.
9Ninfɛ baakaalɛ nwɔ alɛ, <<Ɔfɛ di ɔsɔfɔ lɛfɔ Sara nkpe?>>
Ni aabuɛ alɛ, <<Asi di lɛkpaayo nwu kamɛ.>>
10Ninfɛ di onwii lɛma latɔkɔ nwɔ alɛ, <<Nwaako kamakple nwa ni ɔkyɛ lɛfɔ lɛlɛɛmba naakpa okle, ɔsɔfɔ lɛfɔ Sara kamalofo obisuɔtɔbi.>>
Sara kafɔɔ latoonu ɔlaa nwu di lɛkpaayo nwu nkpo kayoko di osuɔtɔ nwu sɛmaa. 11Abraham ku Sara ntoobe kofokofoko batɔɔkyɛ sitũ nwaa kafɔɔ di alɛɛ kamɛ. Sara kafɔɔ ntoofe kolofo. 12Nioso Sara lama di suoto nɔɔ kamɛ aabuɛ alɛ, <<Ntoobe lɛkpasɔ ni mmle di saate nii kafɔɔ ntooobe nii, kamakple nnya ɔmɛnɛfɛ di bawo otenko kamɛ?>>
13Ninfɛ di Saate lakaalɛ Abraham alɛ, <<Be oso di Sara kɔma ambuɛ alɛ, <Kamafuo obi olofo nwaako, nua wɔ mmle ntoobe ni?> 14Lɛsaa lewo nkpe osie dilenke Saate nwu ku ɔbla? Lɛlɛɛmba naakpa okle kamakple nwa ni ɔsɔfɔ lɛfɔ Sara kamalofo obisuɔtɔbi.>>
15Sara latɔɔyɛkɛ, nioso aalaa aabuɛ alɛ, <<Kpaoo nimma.>>
Kafɔɔ aatɔkɔ nwɔ alɛ, <<Kubio, fɛɛma.>>
Abraham Latikiti Lekoto Di Sodom Disi.
16Obe wɔ di basuɔtɔ nwu nkpo lataka alɛ boosifi ni, baakyɔɔ anu Sodom, ni di Abraham lakpeeko ma nkpaa alɛ ɔɔtɛ ma osuku nɛ. 17Ninfɛ di Saate nwu nkpo labuɛ alɛ, <<Kayɔ lɛsaa le kamabla ni nkookaa Abraham? 18Diekye nwaako Abraham kamale kale kplɛ ku nka ninkpe ni osie, babawii nnle mmuu kafɔɔ lɛyɔɔ kaasɔ ka mmle suoto diefe ni di suoto nɔɔ. 19Diekye lediki nwɔ nlɛ aatuo babi nɔɔ ku leyo nɔɔ batii alɛ baakyɔɔ Saate ɔlaa atoko mambla asaa tinini ku n-ya niewo nii, alɛ Saate mata alɛ lɛsaa le aabuɛ aatɛ alɛ abata ni Abraham kawa kanya nintɔɔ.>>
20Nioso Saate latɔkɔ Abraham alɛ. <<Ntoonu asaakuu ya batoobuɛ beekyeko ni Sodom ku Gomora batii suoto. Sikpile lɛma ntoosii ɔpɔ. 21Nkpo oso kosoo nkyɛ nfa ninaanyu nse asaakuu ya lanu alɛ bɔɔbla ni nte nkpo. Nse kute nkpo, ee kuote nkpo kamatofo.>>
22Ni di basuɔtɔ nwu banyɔ lamunikĩi baakyako Sodom otoofe nɛ. Kafɔɔ Abraham lakple aayila di Saate anu. 23Ninfɛ di Abraham lakpukuti atɛɛtɛɛ nwɔ ni aakaalɛ alɛ, <<Ni fabawɔɔsa batii ba ninte ni tinini ku bakpiletɛ fankpɔtɔɔsa? 24Ni nse batii afosi anɔɔ nte tinini di okpoo nwu, faawɔɔsa nwu? Flaanya nwu nyaami ta batii afosi anɔɔ nwu oso? 25Ninfũ nnu nlɛ fababla nkpo alɛ, faawɔɔsa batii ba ninte ni tinini ku bakpiletɛ fankpɔtɔɔsa. Lɛ oso fiɛ faananfi batii ba ninte ni tinini ku bakpiletɛ kootoko kyɛkyɛ. Ninfũ nnu nlɛ fababla nkpo! Otii wɔ ninle ni kayi kamuu kantɛ dilaabla lɛsaa di osuku kanya?>>
26Ninfɛ di SAATE nwu latɔkɔ nwɔ alɛ, <<Nse lɛwɛ batii ba ninte ni tinini afosi anɔɔ di Sodom okpoo yi, kamanya nwu nyaami ta mma oso.>>
27Ninfɛ di Abraham lakple aabuɛ alɛ, <<Nunua ntɔɔwɛ sɛkambi kɔkakatɛko Saate, nu ninanle lɛsalɛsa kafɔɔ kudu ku ntɔ̀ yi, 28ni nse batii banɔɔ ledie di batii tinini afosi anɔɔ kamɛ mɔ? Fabawɔɔsa okpoo nwu nkpo omuu ta batii banɔɔ oso?>>
Ninfɛ aabuɛ alɛ, <<Nse lɛwɛ batii afosi ana batii banɔɔ yi, namawɔɔsa nwu.>>
29Ni aakple aakaalɛ alɛ, <<Ni nse fɛɛwɛ batii afosi ana ninfa mɔ?>>
Ni aabuɛ alɛ <<Ta batii afosi ana nwu oso namawɔɔsa nwu.>>
30Ninfɛ aakple aabuɛ alɛ, <<Saate, lekoto tannya ɔblɔ faakpeekoe lo! Tɛɛ nkple nkakatɛ. Ni nse fɛɛwɛ batii afosi atiɛ mɔ?>>
Ni aabuɛ alɛ, <<Namawɔɔsa nwu nse lɛwɛ batii afosi atiɛ ninfa.>>
31Abraham labuɛ alɛ, <<Nunua ntɔɔwɛ sɛkambi kɔkakatɛko ni Saate, ni nse fɛɛwɛ batii afosi anyɔ ninfa mɔ?>>
Ni aabuɛ alɛ, <<Ta batii afosi anyɔ nwu nkpo oso, namawɔɔsa nwu.>>
32Ninfɛ aabuɛ alɛ, <<Saate lekoto tannya ɔblɔ faakpeekoe lo! Tɛɛ nkple nkakatɛ ninwii pɛ. Ni nse fɛɛwɛ batii lefosi mɔ?>>
Ni aabuɛ alɛ <<Ta batii lefosi nwu nkpo oso, namawɔɔsa nwu.>>
33Obe wɔ di Saate nwu ntɔɔkakatɛko Abraham eeloo nii, aasifi aadiɛ nwɔ, ni di Abraham lasifi leyo nɛ.
Currently Selected:
Kyenesis 18: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
