Kyenesis 17
17
Suoto Ɔkyɛlɛnsa Kanya Onii Ɔsaabla
1Obe wɔ di Abram lafũ ni alɛɛ afosi anaasĩ alɛɛ anaasĩ yi, Saate nwu ladiki suoto aatuo nwɔ ni aabuɛ alɛ, <<Ami ninle Yaa wɔ Ninkpe osie nlenke nii, nu mi ɔlaa alɛ faawo nimu. 2Ni kamata nlɛ kanya nii onii nsiɛ di munkofɔ ntɛɛ nta banantii lɛfɔ mpɔ kpinwu.>>
3Ninfɛ di Abram lafuusa anu kaasɔ, ni di Yaa latɔkɔ nwɔ alɛ, 4<<Konii kanya ka mmle ku afɔ. Fabale nnle kpinwu kote. 5Blɔbasinlɛɛ fɔ Abram, leyooto lɛfɔ nfɛ ninle Abraham, diekye ntɔɔbla fɔ nnle kpinwu kote. 6Mata banantii lɛfɔ mpɔ kpinwu, mabla fɔ nnle kpinwu, baka madie mankye kamɛ lɛfɔ. 7Kamanii kanya ka mmle di munkofɔ ntɛɛ ku banantii lɛfɔ ntɛɛ. Kabale kanya ninii le ninaa ni kaloo nimate kanta ni kayi kamaa banantii lɛfɔ kpinwu. Kanya ninii nwu ninle alɛ kamale fɔ Yaa ku banantii lɛfɔ ba nikɔwa ni sɛɛmaa Yaa. 8Kanaan kasɔ nwu suoto kamuu fale ni ɔfɔɔ, kamayɔ ka nta afɔ ku banantii lɛfɔ kanle ye atesaa ya ninaa ni kaloo; male ma kafɔɔ Yaa.>>
9Ninfɛ di Yaa latɔkɔ Abraham alɛ, <<Afɔ yi, mufũ kanya ninii nwu nkpo faklee, afɔ ku banantii lɛfɔ ba nikɔwa ni kaayi kamaa yi, biklee kanya ninii nwu nkpo. 10Nle mmle ninle kanya ninii le konii ni munko fɔ ku banantii lɛfɔ bamuu, biamufũ minklee ni nɛ: Dikpeni osuɔtɔ biala kaamɛ lee lɛkyɛlɛnsa suoto#17.10Lebudi lɛsɔkɔsɔkɔ . 11Dikpeni bɛɛkyɛlɛnsa nwɔ suoto fɛ nsũ lɛtɛsaa di kanya ninii le ninsi ni munko fɔ ntɛɛ. 12Banantii lɛfɔ ba babalofo ni kaayi kamaa, obisuɔtɔbi biala nintoofũ ayi anɛ dikpeni bɛɛkyɛlɛnsa nwɔ suoto, diɛkyakaa ni di mba beelofo ni di leyo lɛfɔ ee mba baaya ni ku koto fɛ balanle mananle fɔ ni banantii. 13Mba beelofo ni leeyo lɛfɔ woo, mba faaya ni ku koto, dikpeni bɛɛkyɛlɛnsa ma suoto, alɛ kanya ninii nsũ ɔtɛ wɔ mmle katika ye di suoto dinaa ni kaloo. 14Osuɔtɔ lele ninankyɛlɛnsa suoto, eesĩ alɛ ɔlɔɔkyɛlɛnsa suoto yi, baadiki nwɔ di batii nɔɔ kamɛ; diekye eesĩ kanya ninii nwu ɔbla.>>
15Yaa lakple aatɔkɔ Abraham alɛ, <<Ɔsɔfɔ lɛfɔ Sarai nnwɔɔ yi, disinnaa alɛ faalɛɛ nwɔ falɛ Sarai; leyooto nɔɔ nfɛ ninle Sara. 16Kamawii nwɔ lɛyɔɔ, nwaako abalofo obisuɔtɔbi anta fɔ. Kamawii nwɔ lɛyɔɔ aamakple nnle kpinwu kɔya; baka madie mankye kamɛ nɔɔ.>>
17Abraham lafuusa anu kaasɔ; ni aama aabuɛ kaamɛ nɔɔ alɛ, <<Baalofo obisuɔtɔbi manta otii wɔ nintoofũ ni fɛ alɛɛ kɔlafa? Sara kafɔɔ kamalofo obi di obe wɔ atoofũ ni alɛɛ afosi anaasĩ? 18Ninfɛ di Abraham latɔkɔ Yaa alɛ, <<Ni ta Ismael asiɛ di lɛyɔɔ lɛfɔ nwu kamɛ!>>
19Ninfɛ di Yaa labuɛ alɛ, <<Nwaako, ɔsɔfɔ lɛfɔ Sara malofo obisuɔtɔbi anta fɔ, fantika nwɔ leyooto falɛ Isak. Kamanii kanya ku nnwɔɔ ku banantii nɔɔ ba nimawa ni kaayi kamaa dinnaa ni kaloo. 20Di Ismael suoto kafɔɔ yi, ntoonu fɔ ɔlaa: Nwaako kamawii nwɔ lɛyɔɔ, matɔɔ anlofo anwɛ banantii kafɔɔ ampɔɔsa. Abale lefosi baka banyɔ kote, mabla nwɔ kafɔɔ anle kale kplɛ. 21Kafɔɔ kanya ninii nii nka yi, Isak suoto dibatika, obi wɔ di Sara kamalofo anta fɔ ni lɛlɛɛmba naakpa wɔ okle.>> 22Obe wɔ di Yaa ntooloo ni Abraham ɔkakatɛko yi, aasifi osi aadiɛ nwɔ.
23Dii nwu nkpo kale ni di Abraham lakpaa obi nɔɔ Ismael ku batii ba bamuu baalofo ni leeyo nɔɔ ee mba aaya ni ku koto nɔɔ, osuɔtɔ biala di leyo nɔɔ aakyɛlɛnsa ma suoto, fɛ mmle di Yaa latɔkɔ nwɔ ni nɛ. 24Abraham lafũ alɛɛ afosi anaasĩ alɛɛ anaasĩ fiɛ aakyɛlɛnsa suoto. 25Obi nɔɔ Ismael kafɔɔ lafũ lefosi alɛɛ atiɛ. 26Abraham ku obi nɔɔ Ismael, dii ninwii nwu kale baakyɛlɛnsa banyɔ lɛma nwu suoto nɛ. 27Osuɔtɔ biala di Abraham leyo ku mba baalofo ni leeyo nɔɔ ee baaya baakyeko ni bafɔɔ nfũ, baakyɛlɛnsa ma suoto ku nnwɔɔ.
Currently Selected:
Kyenesis 17: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
