Kyenesis 15
15
Yaa Labuɛ Aatɛ Alɛ Abata Abram Obi.
1Di obe owo sɛmaa, Saate nwu ɔlaa lawa kuata Abram di odiki otuo kamɛ alɛ:
<<Abram, tanyɛkɛ.
Ami ninle fɔ kubidifũnsaa,
letota lɛfɔ kamapɔ kpinwu.>>
2Kafɔɔ Abram labuɛ alɛ, <<Oo! SAATE Kplɛ, be leetota nwu nkpo kamabla mi di obe wɔ nnaa ni obi? Otii wɔ nimale mi ni atesaa ninle Elieser, Damaskos otii nwu.>> 3Ni di Abram labuɛ alɛ, <<Faatɛɛ obi kuonwii, kpɛmblatɛ nii leeyo nimale mi atesaa.>>
4Ninfɛ di Saate latɔkɔ nwɔ alɛ, <<Osuɔtɔ wɔ mmle dilɔbale fɔ atesaa, kafɔɔ afɔ omu kafutu lɛfɔ kamɛ obi nimale fɔ atesaa.>> 5Ni aakpaa nwɔ aasifiko kayi ni aatɔkɔ nwɔ alɛ, <<Takatɛsa anu faanyu osi, faaka awɛntrɛbi nse fabafuo ɔka. <<Ni aatɔkɔ nwɔ alɛ, <<Nkpo di banantii lɛfɔ mapɔ nɛ.>>
6Abram lafũ aanu, ni di Saate nwu lanya alɛ ale otii tinini nɛ.
7Ni aakple aatɔkɔ nwɔ alɛ, <<Ami ninle Saate wɔ niakpaa fɔ lakyeko ni Ur ku Kaldean, nlɛ kɔyɔ kasɔ ka mmle nta fɔ kanle fɔ atesaa.>>
8Kafɔɔ Abram labuɛ alɛ, <<Oo Saate wɔ ninsiko ni suoto, be nimale dituosaa alɛ kabale mi atesaa?>>
9Nioso Saate latɔkɔ nwɔ alɛ, <<Yɔ nankyue sanko sɛɛle wɔ nintoofũ ni alɛɛ atiɛ, tie sanko wɔ nintoofũ ni alɛɛ atiɛ, dikũnumuu le nintoofũ ni alɛɛ atiɛ, ablonuma ku lɛlaapɔɔbi fawakoe.>>
10Abram layɔ asaa nwu amuu aawako nwɔ, aablasa ma di akyuu anyɔ, aayɔ kakyɛ biala aatɛ di kawo ɔlɔɔkɔ, kafɔɔ bakansiɛ nwu mma, atablasa ma di nkyɛ nnyɔ. 11Ninfɛ di bakansiɛ ba ninkyɔkyɔfɛ ni sina labatoosoo di sina nwu suoto nɛ, kafɔɔ Abram latososa ma.
12Obe wɔ nfɛ di kufĩ kofe ni kamɛɛkɔ, ni di Abram labuo di sɛkyɔsĩ, aakyɔsĩi aasifi kamɛ, ni di ditũnu kplɛ yɛkɛle latĩi nwɔ suoto nɛ. 13Ninfɛ di Saate latɔkɔ nwɔ alɛ, <<Kɔtafɔ fantofo nwaa nlɛ, banantii lɛfɔ male bafɔɔ di kasɔ ka ninanle ma ni kale suoto, bababla balanle mambla ma amumu alɛɛ alafa ana. 14Kafɔɔ mananfi kale nwu nkpo batii babasumu ni fɛ balanle kootoko, ninni sɛmaa babadie ninfa ku lɛsaawɛ kplɛ. 15Kafɔɔ afɔ yi, fabasifi waawa anɛ nfũ ku atoko ɔkyɛ ole, fababe, fankpasɔ, fiɛ fabakpi. 16Di kɔna naafa kamɛ fiɛ babakple manwa nfũ, diekye Amori batii sikpile diidu nfũ kananfi ma ni kootoko.>>
17Obe wɔ di kufĩ ntɔɔmɛɛ kaayi ntɔɔwɔfɔ ni yi, dibukii ku ɔtɔ kɔɔyɔ kodie ni ku atɔkɔnii lakyɔɔ diabafe di sina nwu baatɛ ni sebo. 18Dii nwu nkpo di Saate lanii kanya ku Abram aabuɛ alɛ, <<Banantii lɛfɔ lɛyɔ kasɔ ka mmle lɛta diɛyɔ ni di Nil okle kotoko di Egipte, diɛlaase ni di Eufrate okle kplɛ nwu kotoko. 19Nka ninle kasɔ ka di Keni batii, Kenisi batii, Kadmoni batii, 20Hiti batii, Perisi batii, Refait batii, 21Amori batii, Kanaan batii, Girgasi batii ku Yebusi batii nsi nɛ.>>
Currently Selected:
Kyenesis 15: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
