Kyenesis 14
14
Abram Lafũ Lot Nkpa.
1Obe onwii kamɛ diawa alɛ Amrafel Sinar#14.1 Sinar ninle Babel kasɔ nɛ batii ɔka, Ariok Elasar batii ɔka, Kedorlaomer Elam batii ɔka ku Tideal Goim batii ɔka 2lataka kakpɛ di Bera Sodom batii ɔka, Birsa Gomora batii ɔka, Sinab Adma batii ɔka, Semeber Seboim batii ɔka ku Bela (okpoo wɔ nfɛ bɔɔlɛɛ ni Soar) batii suoto. 3Baka ba mmle bamuu lalaasi di Sidim ɔtaata nfa ninle (mba lekpo nɛ). 4Lefosi alɛɛ anyɔ amu baasiɛ di ɔka Kedorlaomer kalɔ, kafɔɔ di lefosi lɛlɛɛ tiɛfa kamɛ baataka baayila nwɔ di suoto.
5Di lefosi lɛlɛɛ naafa kamɛ yi, ɔka Kedorlaomer ku baka bamba ba niabla ni onwii lakyɛ baalalenkee Refait batii di Astero Karnaim, Susit batii di Ham, Emit batii di Sawe Kiriataim 6ku Hori batii di kobokote okpoo di Seir dialaase bia El Paran diɛtɛɛtɛɛ ni ɔfaafuu. 7Ninfɛ baamunikĩi basifi En Mispat (nfɛ bɔɔlɛɛ ni Kades), ni baalenkee ntɛɛ nwu sekpoo simuu ninle ni Amalek batii ku Amori batii ba niasiɛ ni di Hasason Tamar kafɔɔ nɛ.
8Ninfɛ di Sodom batii ɔka, Gomora batii ɔka, Adma batii ɔka, Seboim batii ɔka ku Bela batii ɔka (nfɛ bɔɔlɛɛ ni Soar) ladie baawa kakpɛkɔ di Sidim Ɔtaata nɛ. 9Baayila di Kedorlaomer Elam batii ɔka, Tidal Goim batii ɔka, Amrafel Sinar batii ɔka ku Ariok Elasar batii ɔka suoto, baka bana ba mmle latɔkpɛko baka banɔɔ. 10Di Sidim Ɔtaata nwu nkpo suoto yi, ama abiɔ kpinwu late. Nioso obe wɔ di Sodom ku Gomora baka latootoso ni yi, batii lɛma bawo lakpa baabuo kaamɛ, bayɛntɛle latoso baasifi kobokotee osi. 11Baka bana nwu nkpo layɔ Sodom ku Gomora batii asaa amuu ku alesaa lɛma baasifiko. 12Baamufũ Abram maatɛ nɔɔ obi Lot wɔ niasiɛ ni kafɔɔ di Sodom, baayɔ asaa nɔɔ amuu baasifiko.
13Otii onwii niafe ni labatɔkɔ Abram, Hebri otii nwu ɔlaa wɔ mmle. Di obe nwu kamɛ Abram lasiɛ di Mamre wɔ niale ni Amori otii awoso kplɛ ɔlɔɔkɔ, aale ni Eskol ku Aner obilɛma, baabla kanya kanwii ku Abram. 14Obe wɔ di Abram lanu alɛ beemufũ ni ɔnantii nɔɔ yi, ni aasiisa batii alafa atiɛ lefosi banɛ ba baalofo ni di leyo nɔɔ, aatuo ma ni kakpɛ ni aati ma aalaadu Dan okpoo nɛ. 15Obe wɔ kaakyɛ lawo nii, Abram lasɛ batii nwu di akudi, baabuo ma di suoto, baati ma baakpɛ ma baalaadu Hoba di Damaskos osuku kaatoo. 16Aafũ asaa ya amuu baayɔ nii, aakpaa ɔnantii nɔɔ Lot kafɔɔ ku asaa nɔɔ amuu, kuɛ basanko ku batii bule aawako.
17Obe wɔ di Abram ntɔlaalenkee ni Kedorlaomer ku baka ba niabla ni onwii ku nnwɔɔ, ookple anwa ni leyo yi, Sodom ɔka lakyɛ aalaakyakako nwɔ di Sawe Ɔtaata(manlɛɛ ni Ɔka Ɔtaata).
Melkisedek Lawii Abram Lɛyɔɔ
18Ninfɛ di Melkisedek Salem ɔka layɔ bloblo ku nta aawako nwɔ nɛ. Yaa wɔ Ninlenke ni oletatɛ aale. 19Ni aawii Abram lɛyɔɔ aabuɛ alɛ,
<<Yaa wɔ Ninlenke ni ɛɛbla ni osi ku kasɔ,
awii Abram lɛyɔɔ.
20Biwii Yaa wɔ Ninlenke ni lɛyɔɔ,
nnwɔ niɛyɔ balo lɛfɔ eekpee fɔ ni ninnɛɛ kamɛ.>>
Ninfɛ di Abram layɔ asaa nwu amuu lefosile aatɔɔ nɛ.
21Ninfɛ di Sodom ɔka latɔkɔ Abram alɛ, <<Yɔ batii nwu fatɛɛ, faata asaa nwu awɛ di ɔkyɛ lɛfɔ.>>
22Kafɔɔ Abram latɔkɔ Sodom ɔka alɛ, <<Ntookplesa nnɛɛ katoo lɛka ntam lɛta Saate, Yaa wɔ Ninlenke ni ɛɛbla ni osi ku kasɔ 23nlɛ, namafũ lɛsaa le ninle fɔ ni lele kuninwii nkyeko ɔkyɛ lɛfɔ, bia okũ ee katokota, fiɛ faababuɛ falɛ <Ami niɛbla Abram saawɛntɛ.> 24Namafũ lɛsalɛsaa, diediki alesaa ya baatii nii lale ni ku basuɔtɔ ba niakyɛ ni kakpɛ ku ami, dile ni Aner, Eskol ku Mamre. Mma yi, yɔ kalekɔ lɛma fata ma.>>
Currently Selected:
Kyenesis 14: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
