Kyenesis 1
1
Kayi Ɔbla Kasɔ Kakyekɔ
1Di kasɔ kakyekɔ Yaa labla osi ku kasɔ. 2Di obe nwu kamɛ, kasɔ ditawɛ letembi kuniwii, kaate kafukuti, ditunu latĩi ntu be niate ni kaasɔ nwu anu, ni di Yaa Ninwuna latookyi di ntu nwu anu nɛ.
3Ni di Yaa labuɛ alɛ <<Ta dikpa>> ni diakpa nɛ. 4Ni di Yaa lanya lɛkpa nwu alɛ dilɛ, ni aasɛ lɛkpa nwu ku ditunu ntɛɛ nɛ. 5Ni di Yaa lalɛɛ lɛkpa nwu alɛ <<Dii,>> ni aalɛɛ ditunu nwu kafɔɔ alɛ <<Kakyɛ>> nɛ. Ninfɛ kaale laloo, ni kaasɛ, dii kasale nɛ.
6Ni di Yaa labuɛ alɛ, <<Obo kute di ntu ntɛɛ, kuɛsɛ ntu be ninkpe ni di osi ku kasɔ ntɛɛ.>> 7Nkpo oso Yaa labla obo kuasɛ ntu be ninkpe ni di obo nwu kalɔ ku mbe ninkpe ni di osi ntɛɛ. Ni diawa kaanya nɛ. 8Ni di Yaa lalɛɛ obo nwu alɛ, <<Kolo>> nɛ. Ni kaale laloo, ni kaasɛ, dii nyɔɔfa nɛ.
9Ninfɛ di Yaa labuɛ alɛ, <<Ntu be ninkpe ni koolo kalɔ disi di lɛba ninwiii, di kasɔ kosole kadie.>> Ni diawa kaanya nɛ. 10Ni di Yaa lalɛɛ kakosolekɔ nwu alɛ, <<Kasɔ>>, ni aalɛɛ ntu be niasi ni lɛɛba ninwii alɛ, <<Lekpo>> nɛ. Ni di Yaa lanya alɛ dilɛ nɛ.
11Ninfɛ di Yaa labuɛ alɛ, <<Ta kasɔ kakɔntɔ sɛfa bokoboko, sɛfa se nintika ni abi ku awoso ya nintika ni abi ku abi ninya ate ate kaasɔ.>> Ninfɛ diawa kaanya nɛ. 12Ni di kasɔ lakɔntɔ sɛfa bokoboko, sɛfa se nintika ni abi ku awoso ya nintika ni awosobi ku abi ninya ate ate nɛ. Ni di Yaa lanya alɛ dilɛ nɛ. 13Ninfɛ kaale laloo, ni kaasɛ, dii tiɛfa nɛ.
14Ninfɛ di Yaa labuɛ alɛ, <<Ta sɛtɔ sidie di kolo suoto, siɛsɛ dii ku kakyɛ ntɛɛ, alɛ aale atuosaa ya nimate antootuo ni obe, ayi ku alɛɛ, 15alɛ siale sɛtɔ di kolo suoto sintɔɔkpa di kasɔ suoto.>> Ni diawa kaanya nɛ. 16Nioso Yaa labla ɛtɔ kplɛ ɛnyɔ, nnwɔ niemuɔ kulenke ni alɛ kuabla ɔkpɛ di dii kamɛ, nnwɔ niebiibii ni kafɔɔ alɛ kuabla ɔkpɛ di kakyɛ. Aabla kafɔɔ awɛntrɛbi. 17Yaa labla ɛtɔ nwu di kolo suoto alɛ siakpa di kasɔ suoto, 18alɛ siabla sɛkpɛ di dii ku kakyɛ kamɛ, sinsɛ lɛkpa ku ditunu ntɛɛ. Ni di Yaa lanya alɛ dilɛ nɛ. 19Ninfɛ kaale laloo, ni kaasɛ, dii naafa nɛ.
20Ninfɛ di Yaa labuɛ alɛ, <<Ta asaa ya ninkpe ni nkpa ateate ayii ntu nwu kamɛ, di bakansiɛ baflɛlɛtɛ bafe di kasɔ osi di kolo anu.>> 21Nioso Yaa labla ntu kamɛ babɔkɛɛ-kplɛ ku asaa ya ninkpe ni nkpa, ankyɛ ni nintu kamɛ ate ate, ku bakansiɛ ate ate ku atembi lɛma. Ni di Yaa lanya alɛ dilɛ nɛ. 22Ninfɛ di Yaa lawii ma lɛyɔɔ aabuɛ alɛ, <<Bilofo, biɛkpɛ biyii lekpo ntu kamɛ, bakansiɛ kafɔɔ bakpɛ bayii kayi.>> 23Ninfɛ kaale laloo, ni kaasɛ, dii nɔɔnle nɛ.
24Ninfɛ di Yaa labuɛ alɛ, <<Ta asaa ya ninkpe ni nkpa ate ate adie akye kasɔ kamɛ, babɔkɛɛ sele ku asaa ya ninkpɔkɔ ni kaasɔ suoto ku babɔkɛɛ ba ninkpe ni abe biala ku atembi lɛma.>> Ni diawa kaanya nɛ. 25Yaa labla babɔkɛɛ ba ninkpe ni abe ku atembi lɛma, babɔkɛɛ sele ku atembi lɛma, ku babɔkɛɛ ba bamuu ninkpɔkɔ ni kaasɔ ku atembi lɛma. Ni di Yaa lanya alɛ dilɛ nɛ.
26Ninfɛ di Yaa labuɛ alɛ, <<Bita bubla otii di letembi loo kanya, aadie wo, aale sɛsaate di lekpo kamɛ kɔkpaku suoto ku bakansiɛ ba ninflɛlɛtɛ ni ku babɔkɛɛ sele di kasɔ kamuu suoto ku babɔkɛɛ ba ninkpe ni abe suoto ku babɔkɛɛ ba bamuu ninkpɔkɔ ni kaasɔ suoto.>>
27Nioso Yaa labla osuɔtɔ di nnwɔɔ omu nɔɔ letembi kanya;
di Yaa letembi kanya aabla nwɔ;
osuɔtɔ ku ɔsanko aabla ma.
28Yaa lawii ma lɛyɔɔ ni aatɔkɔ ma alɛ, <<Bilofo biɛkpɛ biyii kayi biele ka sɛsaate. Biele sɛsaate di lekpo kamɛ kɔkpaku ku kɔfɛɛfɔ kamɛ bakansiɛ ku asaa ya ninkpe ni nkpa ankpɔkɔ ni kaasɔ suoto.
29Ninfɛ di Yaa labuɛ alɛ, <<Lɛyɔ ɔfa biala nintika ni abi kaasɔ kamuu suoto ku kowoso biala ninkpe ni abi kaamɛ lɛta ye; alɛ aale ye alesaa. 30Kafɔɔ babɔkɛɛ ba ninkpe ni abe bamuu ku bakansiɛ bamuu kɔɔfɛɛfɔ kamɛ ku babɔkɛɛ ba bamuu ninkpɔkɔ ni kaasɔ suoto ku asaa amuu ya ninkpe ni nkpa, lɛyɔ sɛfa kɔnle lɛta ma fɛ alesaa.>> Ni diawa kaanya nɛ.
31Ni di Yaa lanya asaa ya amuu aabla nii alɛ ɛɛtɛ alɛ. Ninfɛ kaale laloo, ni kaasɛ, dii kuɔnle nɛ.
Currently Selected:
Kyenesis 1: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
