ESODƆS 6
6
1Ninfɛ di SAATE nwu latɔkɔ Mose alɛ, “Mia nfɛ fabanya lɛsaa le kamabla ni Farao nɛ: Diekye kɔnɛɛ siene nii mata anta ma mansifi; diekye kɔnɛɛ siene nii mata antososa ma andiki di kale nɔɔ kamɛ.”
Yaa Lalɛɛ Mose
2Yaa latɔkɔ Mose kafɔɔ alɛ, “Ami ninle SAATE nwu nɛ. 3Ladiki suoto latuo Abraham ku Isak ku Yakob fɛ Yaa wɔ Ninlenke ni, kafɔɔ ntata ma baatofo nlɛ leyooto nii ninle SAATE nwu. 4Labla kanya ninii nii kafɔɔ ku mma nlɛ kamayɔ Kanaan kasɔ ka baasiɛ ni fɛ bafɔɔ nta ma. 5Mia kafɔɔ ntoonu Israel batii atuuni ya bootũuni ni di Egipte batii lɛbla ma ni balanle. Ntoonyuma kafɔɔ kanya ninii nii nwu.
6“Nkpo oso tɔkɔ Israel batii falɛ: ‘Ami ninle SAATE nwu nɛ, kamadiki ye di Egipte batii amumu kamɛ. Kamata ye mindie di sɛlanle se beekpee ye ni kamɛ. Madiki ye ku kɔnɛɛ siene nii ku sɛkpɛ se niɛbla ni ɔkpɛ n-yɔ nnanfi ma kootoko. 7Kamabla ye batii nii bamu, n-le ye Yaa. Ni bibatofo bilɛ ami ninle ye SAATE Yaa wɔ niadiki ye ni di Egipte batii amumu kamɛ. 8Ni kamakpaa ye nsifiko kasɔ ka laka ntam nlɛ kamayɔ nta ni Abraham ku Isak ku Yakob. Kamayɔ nta ye fɛ atesaa lee. Ami ninle SAATE nwu nɛ.’”
9Mose latɔkɔ Israel batii ɔlaa wɔ mmle kafɔɔ batanu nwɔ ɔlaa, diekye nnɛɛ lafɛɛ ma ta dibuo le kamɛ baasiɛ ni di sɛlanle nwu kamɛ oso.
10Ninfɛ di SAATE nwu latɔkɔ Mose alɛ, 11“Tɔɔkyɛ, falaatɔkɔ Farao Egipte batii ɔka falɛ ta Israel batii nwu badie kaale nɔɔ kamɛ basifi.”
12Kafɔɔ Mose latɔkɔ SAATE nwu alɛ, “Nse Israel batii diloonu mi ɔlaa, ni lɛ di Farao kamanu mi ɔlaa di obe wɔ ninoofuo ni ɔkakatɛ nwaa?”
Nnya Mose Ku Aron Kɔna
13Ninfɛ di SAATE nwu lakakatɛko Mose ku Aron aakpee ma Israel batii ku Egipte batii ɔka Farao nfũ, aakpee ma kufiofa alɛ bakpaa Israel batii badieko di Egipte.
14Nnya mba mmle niale ayo lɛma banɔɔfo nɛ.
Ruben babisuɔtɔbi, Israel obisuɔtɔbi kasale, niale Hanok ku Palu Hasron ku Karmi. Mma mmle niale Reuben nfaabi nɛ.
15Simeon babisuɔtɔbi niale Yemuel, Yamin, Ohad, Yakin, Sohar ku Saul wɔ niale ni Kanaan ɔsanko obisuɔtɔbi. Mma mmle niale Simeon nfaabi nɛ.
16Mba mmle niale Lewi babisuɔtɔbi ayooto di mmle baalofo ma ni kanya nɛ: Gerson, Kohat ku Merari. Lewi lafũ alɛɛ kɔlafa afosi atiɛ alɛɛ akuɛnsĩ.
17Gerson babisuɔtɔbi di nfaabi kanya niale Libni ku Simei.
18Kohat babisuɔtɔbi niale, Amram, Ishar, Hebron ku Usiel. Kohat lafũ alɛɛ kɔlafa afosi atiɛ alɛɛ atiɛ.
19Merari babisuɔtɔbi niale Mahli ku Musi.
Mba mmle niale Lewi nfaabi di mmle okle kanya baalofo ma ni nɛ.
20Amram layɔ ote ɔsankobi lɛma Yokebed wɔ nialofo ni Aron ku Mose aatɔɔ nii. Amram lafũ alɛɛ kɔlafa afosi atiɛ alɛɛ akuɛnsĩ.
21Usiel babisuɔtɔbi niale Kora, Nefeg ku Sikri.
22Usiel babisuɔtɔbi niale Misael, Elsafan ku Sitri.
23Aron layɔ Eliseba wɔ niale ni Aminadab obisankobi di obilɛma sankobi lale ni Nahson, ni aalofo Nadab, Abihu, Eleasar ku Itamar aatɔɔ nɛ.
24Kora babisuɔtɔbi niale Asir, Elkana ku Abiasaf. Mba mmle niale Kora batii nfaabi nɛ.
25Aron obisuɔtɔbi Eleasar layɔ Putiel obi sankobi onwii, ni aalofo Pinehas aatɔɔ nɛ.
Mba mmle niale Lewi leyo kamɛ batii banɔɔfo, kafaabi di kafaabi kanya nɛ.
26Aron wɔ mmle ku Mose wɔ mmle di SAATE nwu latɔkɔ alɛ, “Bikpaa Israel batii nwu bidieko di Egipte di nfaabi lɛma kanya.” 27Mma niale batii ba niakakatɛ baata ni Farao, Egipte batii ɔka di Israel batii ɔkpaa odieko di Egipte kasɔ suoto nɛ. Mose ku Aron wɔ mmle diale nɛ.
SAATE Nwu Lakpee Mose Ku Aron Egipte Ɔka Nfũ
28Obe wɔ di SAATE nwu lakakatɛ aata ni Mose di Egipte yi, 29aatɔkɔ nwɔ alɛ, “Ami ninle SAATE nwu. Tɔkɔ Farao, Egipte ɔka nwu lɛsaa biala lɛtɔkɔ fɔ ni.”
30Kafɔɔ Mose latɔkɔ SAATE nwu alɛ, “Obe wɔ ninoofuo ni ɔkakatɛ nwaa, lɛ di Farao kamanu mi ɔlaa?”
Currently Selected:
ESODƆS 6: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
