ESODƆS 40
40
Lɛkpaayo Klekle Nwu Nkpo Ɔkyasa Ku Okleklesa Nini
1Ninfɛ di SAATE nwu latɔkɔ Mose alɛ, 2“Sesee lɛkpaayo klekle nwu, lɛkpaayo le mansi ni di kɔwɛntɛ kasale dii kasale suoto. 3Faayɔ Kanya ninii lɛlakaa nwu fase kaamɛ, faayɔ leyo kamɛ dibula nwu fasaka fatĩi ni. 4Faayɔ opunu nwu nkpo fase kaamɛ, faayɔ asaa ya amuu babablako ni ɔkpɛ di opunu nwu suoto fatika. Faayɔ kandiɛ ditikasaa nwu fase kaamɛ, faayɔ bakandiɛ nwu fatika ni di suoto. 5Faayɔ koto sɛɛle oleɔta akyikye nwu babatoofiɛ ni oluufii fase di kanya ninii lɛlakaa nwu sitũ, faayɔ kayokontũ dibula nwu fasaka di lɛkpaayo nwu kayokontũ.
6“Faayɔ ofiɛ asaaɔta oleɔta akyikye nwu fase di lɛkpaayo klekle nwu, lɛkpaayo le mansi ni di kayokontũ anu. 7Faayɔ ntu ɔsɛfɛ nwu nkpo fase di Lɛkpaayo le mansi ni ku oleɔta akyikye obo, faakusii ntu fakpete kaamɛ. 8Faabla kaflɔkkɔ fakyisa ni faayɔ kayokontũ dibula fasaka di kaflɔkɔ nwu kayoko.
9“Faayɔ ɔfɔɔ ɔpɛ nnɔnyi nwu faapɛ lɛkpaayo nwu ɔfɔɔ ku lɛsaa biala le ninsi ni kaamɛ; faakleklesa ni ku asaa ya amuu ninsi ni kaamɛ, ni dibabla klekle. 10Faapɛ ofiɛ asaaɔta oleɔta akyikye nwu ɔfɔɔ ku asaa ya amuu mamblako ni ɔkpɛ; kleklesa oleɔta akyikye nwu ni dibakple lɛsaa le nieklekle dilenke nii. 11Faapɛ ntu ɔsɛfɛ nwu ku lɛsɔse nɔɔ ɔfɔɔ fabla nya klekle.
12“Faakpaa Aron ku babisuɔtɔbi nɔɔ fawako Lɛkpaayo le mansi ni kayokontũ, baakpeesa ma ntu. 13Faayɔ akpeele klekle nwu fakpee Aron, faapɛ nwɔ ɔfɔɔ fakleklesɔɔ alɛ aabla mi ɔkpɛ fɛ oletatɛ. 14Faakpaa babisuɔtɔbi nɔɔ kafɔɔ fawako faayɔ akpeele ya mankpee mantɛ ni kasɔ faakpee ma. 15Faapɛ ma ɔfɔɔ fɛ mmle okle faapɛ ni ote lɛma ɔfɔɔ, alɛ baabla mi ɔkpɛ fɛ olebatatɛ. Ɔfɔɔ ɔpɛ wɔ mmle kale nsũ lɛtɛsaa ninta ma ku banantii lɛma alɛ olebatatɛ ɔkpɛ wɔ mmle kale ma ɔkpɛ dinaa ni kaloo.” 16Nioso Mose labla lɛsaa biala fɛ mmle okle di SAATE nwu lakpee nwɔ ni kufiofa.
17Nioso baakyasa Lɛkpaayo nwu di dii kasale, di kɔwɛntɛ kasale, di lɛlɛɛ nyɔɔfa kamɛ. 18Di obe wɔ di Mose lakyasa Lɛkpaayo nwu nkpo aaloo nii, aayɔ asɔse nwu aase di nyilakɔ lɛnya, aayɔ n-yokontũ sewoso aakpee, aayɔ selenle aakpekpee, aayɔ akpaka kafɔɔ aasesee. 19Ninfɛ aafukuti Lɛkpaayo nwu dibula atĩi, ni aayɔ asi abansaa aatika nɛ, fɛ mmle okle di SAATE nwu lakpee nwɔ ni kufiofa nɛ.
20Ninfɛ aayɔ afuɔ nkyɛ nnyɔ nwu di kufiofa nwu latika ni aakpee di kanya ninii lɛlakaa nwu kamɛ nɛ. Ni aayɔ sewoso nwu babayɔ mantɔɔkɛnkɛ ni lɛlakaa nwu aatũ nɛ, ni aayɔ katĩita nika kafɔɔ aatĩi nɛ. 21Ninfɛ aayɔ Lɛlakaa nwu nkpo aalaase di Lɛkpaayo nwu kamɛ, ni aayɔ leyo kamɛ dibula nwu nkpo aasaka aatĩi kanya ninii lɛlakaa nwu nkpo fɛ mmle okle di SAATE nwu lakpee nwɔ ni kufiofa nɛ.
22Mose layɔ opunu nwu nkpo aase di Lɛkpaayo le Mansi ni kamɛ di katoo kasɔ lɛkyɛ di leyo kamɛ dibula nwu sitũ. 23Ni aayɔ bloblo nwu aatika di SAATE nwu anu fɛ mmle di SAATE nwu lakpee nwɔ ni kufiofa nɛ.
24Ninfɛ aayɔ kandiɛ ditikasaa nwu aase di Lɛkpaayo le mansi ni diɛ opunu nwu kakyɛ nyɔɔfa di kala lɛkyɛ di Lɛkpaayo nwu kamɛ nɛ. 25Ninfɛ aayɔ bakandiɛ nwu aatika ni di suoto di SAATE nwu anu, fɛ mmle okle di SAATE nwu lakpee nwɔ ni kufiofa nɛ.
26Mose layɔ koto sɛɛle oleɔta akyikye nwu aase di Lɛkpaayo le mansi ni di leyo kamɛ dibula nwu anu. 27Ni aafiɛ oluufii kɔnɔkɔnɔ di oleɔta akyikye suoto fɛ mmle okle di SAATE nwu lakpee nwɔ ni kufiofa nɛ. 28Ninfɛ aayɔ kayokontũ dibula nwu aasaka di Lɛkpaayo nwu kayoko nɛ.
29Ninfɛ aayɔ ofiɛ asaaɔta oleɔta akyikye nwu aase di Lɛkpaayo le mansi ni kayokontũ nɛ. Ni aata ofiɛ asaaɔta ku alesaa asaaɔta, fɛ mmle okle di SAATE nwu lakpee nwɔ ni kufiofa nɛ.
30Ni aayɔ ntu ɔsɛfɛ nwu aase di Lɛkpaayo le Mansi ni ku oleɔta akyikye nwu obo ni aakusii ntu aakpete kaamɛ aata okpe nɛ. 31Ninfɛ di Mose ku Aron ku babisuɔtɔbi nɔɔ lablako mi ɔkpɛ baafoto nnɛɛ ku nkpaa lɛma nɛ. 32Manfoto nkpaa obe lele bababuo Lɛkpaayo le Mansi ni ee nse bɔɔtɛɛtɛɛ oleɔta akyikye, fɛ mmle okle di SAATE nwu lakpee ni Mose kufiofa.
33Ninfɛ di Mose labla kaflɔnkɔ aakyisa lɛkpaayo klekle nwu ku oleɔta akyikye nwu nɛ. Ni aayɔ kayokontũ dibula aasaka di kaflɔnkɔ nwu nkpo kayoko nɛ. Ninfɛ di Mose laloo ɔkpɛ nwu omuu ɔbla nɛ.
SAATE Nwu Lɛkpa Layii Lɛkpaayo Nwu Kamɛ
34Nfanwu, lelokonkyɛ labatĩi Lɛkpaayo le mansi nii, ninfɛ di SAATE nwu lɛkpa labayii Lɛkpaayo le Mansi ni kamɛ nɛ. 35Mose ditafuo Lɛkpaayo le Mansi ni kamɛ obuo, diekye lelokonkyɛ nwu latĩi ni, SAATE nwu lɛkpa kafɔɔ layii lɛkpaayo klekle nwu kamɛ pɔ.
36Di Israel batii osuku lɛma nwu nkpo omuu ɔkyɛ kamɛ yi, obe lele di lelokonkyɛ nwu nkpo lɛtaka di lɛkpaayo klekle nwu nkpo nsintɛɛ, mma kafɔɔ mandie mansifi. 37Kafɔɔ nse lelokonkyɛ nwu nkpo diɛtaka, mma kafɔɔ manndie baasifi, diɛlaase di dii le diɛtaka nii. 38Nioso SAATE nwu nkpo lelokonkyɛ latotika di lɛkpaayo klekle nwu nkpo nsintɛɛ di dii kamɛ, kafɔɔ ɔtɔ nsiɛ di lelokonkyɛ nwu nkpo kamɛ di kakyɛ, di Israel batii bamuu anu, di osuku lɛma nwu nkpo omuu ɔkyɛ kamɛ.
Currently Selected:
ESODƆS 40: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
