ESODƆS 28
28
Yaa Latuo Mmle Baakaa Ni Olebatatɛ Akpeele
1“Ta balɛɛ obilee suɔtɔbi Aron di Israel batii kamɛ bata fɔ, ku babisuɔtɔbi nɔɔ Nadab ku Abihu, Eleasar ku Itamar, alɛ baabla mi ɔkpɛ fɛ olebatatɛ 2Kaa akpeele klekle fata obilee Aron, batɔɔ katoo ɔtakatɛsa ku dibu. 3Tɔkɔ nnɛɛ kamɛ bakpɛmblatɛ ba bamuu lɛta ni lɛsaatofo di ɔsaabla nwu nkpo okle suoto falɛ, bakaa akpeele bata Aron, baadiki nwɔ base lete alɛ aabla mi ɔkpɛ fɛ oletatɛ. 4Nnya akpeele ya okle baakaa ni: Ntɛɛditikasaa, simu akpeele, akpeelekyɔ, akpeele wua makpee mantɛ ni kasɔ beeloso nii, dibula le mannii ni disi ku ofiamɛ. Bakaa akpeele klekle ya mmle bata obilee suɔtɔbi Aron ku babisuɔtɔbi nɔɔ, alɛ baabla mi ɔkpɛ fɛ olebatatɛ. 5Ta ma bayɔ koto sɛɛle kɔfa seleteku ku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ bablako akpeele nwu ɔkpɛ.
Letembi Le Baakaa Ni Simu Akpeele Nwu Nkpo
6“Ta otii wɔ nin-ye ni abula oloso nwaa ayɔ koto sɛɛle kɔfa seleteku ku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ losole akaa simu akpeele nwu. 7Aawɛ amuusi nkyɛ nnyɔ, aakaa di akɔ nwu anyɔ alɛ baamufũ mankyasa. 8Aayɔ dibula nwu okle eeloso ni ku koto sɛɛle kɔfa seleteku ku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ losole abla ofiamɛ nwu ku simu akpeele nwu diɛbla ninwii.
9“Faayɔ afuɔ ya bɔɔlɛɛ ni oniks anyɔ, faawola fadiki Yakob babisuɔtɔbi ayooto batika. 10Di mmle balekatũ batika nii, di difuɔ ninwii suoto ayooto akuɔ, di difuɔ nyɔɔfa suoto kafɔɔ ayooto akuɔ bule. 11Faawola Israel babisuɔtɔbi ayooto fatika di afuɔ nwu anyɔ suoto di mmle okle di afuɔwolatɛ mbla ni. Faayɔ koto sɛɛle fatika di afuɔ nwu atokosi fakyisa. 12Faayɔ fakaasa di simu akpeele nwu amuusi suoto fɛ ninyuma afuɔ di Israel babisuɔtɔbi suoto. Ayooto nwu atika di Aron amuusi suoto di SAATE nwu anu fɛ dinyumasaa. 13Faayɔ koto sɛɛle batika atokosi. 14Faayɔ koto sɛɛle nwaa anyɛnɛ anyɔ, beeloso ni fɛ okũ fakpee di anyɛnɛ nwu fakpee di simu akpeele amuusi nwu.
Ntɛɛditikasaa Nwu Ɔbla
15“Ta kɔnɛɛ kamɛ kpɛmblatɛ nwaa aloso ntɛɛditikasaa nwu nimatuo ni Yaa dibiesaa. Bla ni fɛle simu akpeele nwu okle ku koto sɛɛle kɔfa seleteku ku bluu ku nse niɛbla ni fɛ ɔsɛɛ ku sɛsɛɛle bɔmbɔ ku sibiene fɛnɛnɛɛ losole. 16Bla ni asi ana kyɛkyɛ, faamu ni di akyuu anyɔ. Lɛkaana dibla anɛɛkpa anaasĩ, lɛblɛfɛ kafɔɔ dibla anɛɛkpa anaasĩ. 17Faayɔ afuɔ ya niefũ ni kɔya fakaasa di ele ɛna kamɛ. Di ole kasale faakaasa afuɔ ya manlɛɛ ni rubi ku topas ku beril; 18di ole nyɔɔfa kaasa afuɔ ya manlɛɛ ni tukuoise, safir ku emerad; 19di ole tiɛfa kaasa afuɔ ya manlɛɛ ni yakint, agate ku ametist; 20di ole naafa kafɔɔ kaasa afuɔ ya manlɛɛ ni krisolite ku oniks ku yaspa. Afuɔ ya mmle amuu yɔ koto sɛɛle fatika di atokosi fakyisa. 21Afuɔ nwu abla lefosi-anyɔ, difuɔ ninwii Israel obisuɔtɔbi leyooto ditika. Afuɔwolatɛ awola lefosi ayo anyɔ nwu ayooto atika, difuɔ ninwii kɔna kunwii leyooto ditika fɛ nsũ lɛtɛsaa.
22“Yɔ koto sɛɛle nwaa Faloso ayɛnɛ fɛ okũ bakpee di ntɛɛditikasaa nwu suoto. 23Bla koto sɛɛle nkɔnii nnyɔ fata ni, faayɔ fakpee di akɔ nwu anyɔ di ntɛɛditikasaa nwu suoto. 24Faayɔ koto sɛɛle anyɛnɛ nwu anyɔ fakpee di nkɔnii nwu di akɔ nwu di ntɛɛditikasaa nwu suoto. 25Anyɛnɛ nwu nkpo nnya nnyɔ nwu kayɛntɛlekɔ kafɔɔ, faayɔ famufũ di amuusi nkyɛ nwu di simu akpeele nwu sitũ. 26Bla koto sɛɛle nkɔnii nnyɔ fakaasa di akɔ anyɔ nwu bule di ntɛɛditikasaa kamɛ atokosi lɛkyɛ dikaako ni simu akpeele. 27Bla koto sɛɛle nkɔnii nnyɔ fakyakaa fakaasa di amuusi kɔkyɛ kalɔ di simu akpeele nwu sitũ, di nfũ beediki ni simu, diɛ simu akpeele nwu ofiamɛ osi lɛkyɛ. 28Ntɛɛditikasaa nkɔnii nwu, bayɔ banii di simu akpeele nwu ku seleteku bluu bakpee di ofiamɛ nwu, alɛ ntɛɛditikasaa nwu dilaakpa didie ni di simu akpeele nwu suoto.
29“Obe lele di Aron lebuo di Kakleklekɔ nwu kamɛ, Yakob babisuɔtɔbi ayooto kamatika nwɔ di otu suoto di ntɛɛditikasaa nwu suoto di Yaa dibiesaa nwu suoto fɛ dinyumasaa di SAATE anu dinaa ni kaloo. 30faayɔ kafɔɔ asaa ya anyɔ di oletatɛ nwu mayɔ antoonyu ni Yaa dibiesaa manlɛɛ ni Urim ku Tumim#28.30nnya niale asaa anyɔ ya di olebatatɛ layɔ baatoowolaa ni Yaa dibiesaa kamɛ nɛ fakpee di ntɛɛditikasaa nwu kamɛ. Mmle okle diatika ni di Aron otu suoto obe lele ɛɛkyɛ SAATE nwu anu. Mmle okle di Yakob babisuɔtɔbi ayooto katika ni di Aron otu suoto, di Yaa dibiesaa nwu suoto di SAATE nwu anu obe lele.
Yaa Latuo Mmle Baabla Ni Olebatatɛ Akpeele Bule
31“Akpeelekyɔ ya suoto babakpee simu akpeele nwu mantika nii, yɔ seleteku bluu faloso dibula nwu, 32faadiki disi kapeekɔ nintɛɛ. Faaloso simu nwu atokosi fakyisa, mmle okle di simu nwu nkpo dilababɛ nii. 33Di akpeelekyɔ nwu nkpo kalɔ atokosi yi, yɔ seleteku bluu ku nse niɛbla ni fɛ ɔsɛɛ ku sɛsɛɛle bɔmbɔ faloso awosobi ya ninte ni fɛ goowa abi fakaasa fakyisa, faayɔ koto sɛɛle nwlonwlo fakpekpee seebo. 34Koto sɛɛle nwlonwlo nwu nkpo ku awosobi nwu ninte ni fɛ goowa amana akpeelekyɔ nwu nkpo atokosi akyi, kanwlonwlo kɔwa nii, lewosobi ntootika. 35Aron akpee akpeele nwu nkpo nse ɔɔbla ɔkpɛ di Lɛkpaayo Klekle nwu kamɛ di SAATE anu. Mmle okle babatoonu ni nwlonwlo nwu nkpo diwi ku nse oodie anwa kayi, alɛ alaakpi ni.
36“Yɔ koto sɛɛle nwaa fɛɛbla ni lakataa fawola fadiki akpanasaa ya mmle fatika: KLEKLE DIƐƐTA SAATE NWU. 37Faayɔ oleteku bluu famufũ faklee, diɛkaa di disi diniisaa nwu sitũ. 38Diɛkaa di Aron katũ obe lele, alɛ aafũ Israel batii bamuu sikpile asaaɔta ankleklesa nya, be okle dile. Dikaa di Aron katũ obe lele alɛ asaaɔta lɛma kabuo SAATE nwu anu.
39“Yɔ oleteku biene fɛnɛnɛɛ faloso akpeele wua mankpee mantɛ ni kasɔ ku disi diniisaa nwu. Di asaalosotɛ kafɔɔ aloso ofiamɛ nwu akpee sɛlɛ. 40Faaloso kafɔɔ akpeele wua nwu mankpee mantɛ ni kasɔ ku sifiamɛ nwu ku disi aniisaa nwu fata Aron babisuɔtɔbi baata ma katoo ɔtakatɛsa ku dibu. 41Nse fatɔɔkaa akpeele nwu nkpo feekpee obilee suɔtɔbi Aron ku babisuɔtɔbi nɔɔ feeloo yi, faapɛ ma ɔfɔɔ ku nnɔnyi fadiki fase. Faakleklesa ma alɛ baabla mi ɔkpɛ fɛ olebatatɛ.
42“Kaa akpeele biene mantɛ ni kasɔ fata ma. Akpeele nwu akaana, aadie ma di ɔtɔ alaase ma di atĩ, alɛ baalaanya ma lɛkyɔtɔ. 43Aron ku babisuɔtɔbi nɔɔ, bakpee nya obe lele bababuo Lɛkpaayo le Mansi ni ee nse boofe oleɔta akyikye nwu katũ alɛ bɔɔlaata ole di Kakleklekɔ nwu, mmle okle dinaakple okpile kuta ma balaakpi ni.
“Nle mmle dile kufiofa kuta Aron ku banantii nɔɔ dinaa ni kaloo.
Currently Selected:
ESODƆS 28: SNW
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
