DEUTERONOMY 7
7
Bosate Mɔmɔ Kaɖe
1Mose ɔɣere Israel mabi sɔ: Si Bosate mi Ɣaa ɔkɔ mi ɔbɔ i karɔ̃ ga mito mibo miafɔ iso ne, ɔto ɔ̃asa nɖebi mama maturi gbodzoo ɔɖi i kã iso i mi katɔ̃. Nɖebi me mikɔdzɛ mɛ lomɔ miɖo mi fiɛ miba ɔle miɖo mi ana. Nɖebi mɛgbe maturi nɖe ma Xitise gu ma Girgasise gu ma Amorise gu ma Kanaanse gu ma Perizise gu ma Xivise gu ma Yebuse. 2Si Bosate mi Ɣaa ɔsu maturi magbe ɔpia i mi nrɔɔ̃ ɔle ame fiɛ miɖe ma iso ne, miɖue ma ɔɖuɖu pelepele. Midaabaragu ma kanyakawɛ̃ ndamu kumiwɛ̃, si midaanyɔ ma nnya. 3Midaayiri so ku ma kuwɛ̃. Midaatã mi mabibirɛrɛĩ si mayiri ma mabibirɔ̃gomi ɣee ma mabibirɛrɛĩ si mayiri mi mabibirɔ̃gomi. 4Ala mato maafirikira mi mabibirɛrɛĩ maisibasiai me. Mato maakɛlɛ maasumu aɣɔ mama. Si iba kumɛɔ ne Bosate to ɔ̃anagu mi sikpã ɔwɔra mi ɔluwɛ̃. 5Nnɛgbe ilɛ sɔ miabara ma ne: Mibiɛ ma isɔrɛkusege, si mibiɛ ma ata sekelea, misɛ̃ Asera kuɣɔrɔ̃go sidziri mitu mifere i karɔ̃ si mitsuedza ma arapɔa. 6Ala maturi sekelea miɖe mitã Bosate mi Ɣaa. Bosate mi Ɣaa ɔɖi mi ɔtã so i kayiiso maturi ɔɖuɖu ame, sɔ miɖe ɔ̃ maturi, ɔ̃ mare nyaare.
7Iiɖe sɔ misi miɖo kayiiso nɖebi maturi mama ɔso, i Bosate ɔsu ɔ̃ kuɖuɛ gbaã ɔtã mi fiɛ ɔɖi mi ɔtã so ɣɛɛ ne mi loisi ɖuɖuuɖu, i karɔ̃ iso maturi ɔɖuɖu ame. 8Ɣɛɛ ne ala Bosate ɔɖuɛ mi fiɛ ɔbara i ɔ̃ ndamu mɛ ɔkã ɔtã mi mawa ɔso. Ɔɖi mi ku ɔle siare ɔbɔrɛgu i sisande karɔ̃ ame. Ɔɖi mi ɔbɔrɛgu i Egipte Igarakpakpa ɔle kayirinɔ. 9Ne ɔso mitsue sɔ Bosate mi Ɣaa ne, Ɣaa ɔɖe. Ɣaa ɔnukuarese ɔɖe fiɛ ɔsɛ ɔɖi ɔ̃ ndamu kuɖuɛ, ɔte mma nsɛ maɖuɛ wũ fiɛ masɛ mabara i ɔ̃ mmara iso siɣekparɛ kukpi. 10Ɣɛɛ
mma lotsiri wũ ne, ɔto ɔ̃akpadzɛ̃ ma kutsue ɔwɔra ma ɔluwɛ̃.
Ɔ̃ibarekama kɔraa sɔ ɔ̃akpadzɛ̃ mma lotsiri wũ kutsue.
11Ne ɔso minyɔ kukaakɔ sɔ mibara i mmaraisi gu asɛ̃ra gu mmara ara wa loɣere mi nɔme iso.
Kusɛkusɛ Ala Atsue Ikã Ɔso
12Si minɔ mmara mɛgbe fiɛ mibara i me iso kukaakɔ ne, iyɔ Bosate mi Ɣaa to ɔ̃abara i ɔ̃ ndamu kuɖuɛ iso fiɛ ɔ̃aɖuɛ mi gbaã, lɛ kumɛgɔ ɔkã ndamu ɔtã mi mawa awe. 13Ɔto ɔ̃aɖuɛ mi fiɛ ɔ̃afere mi kusɛkusɛ fiɛ ɔ̃atã misi. Ɔto ɔ̃afere mi kusɛkusɛ miɣe mabi gbodzoo. Ɔto ɔ̃afere mi kukpɛkɔ̃ kusɛkusɛ, sɔ miana ɔraɖui ɔsi gu ndã ɣɛtɛ gu nnɔĩ ana. Ɔto ɔ̃afere mi kusɛkusɛ, sɔ miana manantsuĩ abi gu masɛrɛrerɔ̃ abi masi gbodzoo. Ɔto ɔ̃afere mi kusɛkusɛ gɔgbe i karɔ̃ ga ɔɣɛ ɔsɛ ku ndamu, sɔ ɔ̃atã mi mawa fiɛ ɔto ɔsu ɔtã mi. 14Mato maafere mi kusɛkusɛ maɖo maturi mama marere i kayiiso. Mi marɛrɛ̃ ɣee marɔ̃go iibaɖe malɛma ɣee mi mabɔi kuwɛ̃ iibaɖe malɛma. 15Bosate iibatã ɔnyɛ ɔba i mi iso. Ɔ̃ibatã ɔnyɛ lalaa wɔ igbã minya i Egipte karɔ̃ iso ɔba i mi iso. Ɣɛɛ ɔto ɔ̃atã iba i mi matsirise ɔɖuɖu iso. 16Ikote sɔ miawɔra maturi ɔɖuɖu ma i Bosate mi Ɣaa ɔsu ɔpia i mi nrɔɔ̃ ɔle ame. Midaanyɔ ma nnya fiɛ midaasumu ma aɣɔ. Si mibara ne ito iatã mibo i kata ame.
17Mito miaɣere so sɔ, "Maturi magbe ba ɔle maɖo bo. Nda boabara fiɛ boasa ma boɖi?" 18Ɣɛɛ midaanigã ma. Minyigi nnɛ i Bosate mi Ɣaa ɔbara Igarakpakpa gu ma Egiptese ɔɖuɖu. 19Minya ku mi mɔmɔ anɔmi sinyɛpɛ̃ siare gu awawã akparĩra gu ara wa mba ɣii gu Bosate mi Ɣaa kɔrɔ̃ teterea gu ɔle siare wɔ ɔsu ɔɖi mi ɔbɔrɛgu. Bosate mi Ɣaa to ɔ̃abara mma ɔɖuɖu mito minigã kiniɔ, lɛ ɔbara ma Egiptese awe. 20Bosate mi Ɣaa to ɔ̃asese matɔbɛ i ma ndɛ̃, gbɔgbɔɔgbɔ miawɔra ta mma lokuti fiɛ matere mawɛrɛ. 21Midaati mikpakpa ala ma iti. Ala Bosate mi Ɣaa wɔ mpia i mi ndɛ̃ ne, Ɣaa wɔ lomɔ fiɛ ɔɖe ifɔ̃ra ɔso. 22Bosate mi Ɣaa to ɔ̃asa nɖebi mɛmɔ ɔɖi i mi katɔ̃ kɛkɛĩ kɛkɛĩ. Maibatã mi ɔri sɔ miwɔra ma ɔɖuɖu ɔluwɛ̃, ala si iba kumɛɔ ne, kuputubɔi lalaa to kuasi fiɛ kuaki kulɔ mi. 23Ɣɛɛ Bosate mi Ɣaa to ɔ̃asu maturi ɔpia i mi nrɔɔ̃ ame. Ɔto ɔ̃akpɔkpɔtɔra ma gbɔgbɔɔgbɔ miawɔra ma. 24Ɣaa to ɔ̃asu ma magara ɔpia i mi nrɔɔ̃ ɔle ame. Ne mito miaɖue ma iyɔ mato maaɣara ma. Kuwɛ̃ iibawo ɔta ɔya i mi iso. Mito miawɔra ma. 25Mitsuedza ma aɣɔ kumiamia. Midaawe ɔrakolo mitã sikãfudza gu sikãrɛtɛa dzɛ mpia i wã iso, si midaasu wã mitã so. Si iiɖe ngbɔ ito iaɖe lɛ kata itã mi ala Bosate mi Ɣaa ɔtsiri ne ɔso. 26Midaasu anyanyara mibɔ i mi ayo, si iiɖe ngbɔ ne mi wũ, lɛ wã ne, maaɖi mi masɛ ise matã iwɔra. Mitsiri wã si misɛ̃ wã alasɔ maɖi wã ise masɛ matã iwɔra.
Currently Selected:
DEUTERONOMY 7: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
