DEUTERONOMY 6
6
Ɖuɛ Bosate Fɔ Ɣaa
1Nwagbe nɖe mmaraisi gu asɛ̃ra gu mmara mɛ i Bosate mi Ɣaa ɔtã me sɔ lote mi ne. Si miabara i me iso i karɔ̃ ga mito miawara Yordan ɔwore miafɔ. 2Ɔwi kumɛgɔ mipia ngbã ne, mi gu mi mabi gu mi mawatɛtɛ si mianigã Bosate mi Ɣaa. Mibara i ɔ̃ mmara gu asɛ̃ra wa ɔɖuɖu lotã mi iso si miana isoɣɔ ku ngbã tagbaraa. 3Israel kaɖe, minɔ, si minyɔ so kukaakɔ mibara i mmara iso. Si mibara ngbɔ ne ialɛgu mi fiɛ miaɣe misia gbaã i karɔ̃ sɛɛ ku iɖa iso lɛ Bosate bo mawa Ɣaa ɔɣɛ ɔsɛ mi.
4O Israel, kaɖe minɔ: Bosate, bo Ɣaa ne, Bosate ɔwɛ̃saã ɔɖe. 5Ɖuɛ Bosate fɔ Ɣaa ku fɔ ɔtu ɔɖuɖu ku fɔ ɔkala ɔɖuɖu gu ku fɔ ɔle ɔɖuɖu. 6Mmara mɛ nto lotã mi nɔme si miwe i mi situ ame. 7Mite mi mabi mmara mɛgbe. Miki i me ame si mipia i iyo, si misɛ i ɔri iso, si mirɛ gu si mita. 8Minyi me misia i nrɔɔ̃ gu si minyi misia i atɔ̃gbo iso lɛ akparĩ. 9Mitsɛrɛ me misia i mi ayo akui sidziri iso gu mi kuyogodɔ̃ iso.
10Si Bosate mi Ɣaa ɔkɔ mi ɔbɔ i karɔ̃ ga iso ɔkã ndamu ɔtã mi mawa, Abraham, Isak gu Yakob, ɔto ɔ̃asu karɔ̃ ku simagɛ̃siare dzɛ lobɛ fiɛ sito simɔ pia, iiɖe mi loɖaɛ sɛ̃, ɔtã mi. 11Ne ayo ame to ayigu iyo ame ara sɛɛ wa iiɖe mi lopia wã i ayo ame. Atubiɔ wa iiɖe mi lokuri wã pia. Wainnkpɛkɔ̃ gɔ iiɖe mi lokpɛ̃ kɔ̃ pia gu nnɔĩ adziri siwĩ fiɛ iiɖe mi lopia wã pia. Iyɔ mito miaɖe araɖea fiɛ miami. 12Minyɔ so kukaakɔ sɔ miibaɣara Bosate wɔ loɖi mi ɔbɔrɛgu i Egipte karɔ̃ iso, sisande karɔ̃ ame.
13Minigã, Bosate mi Ɣaa, misumu ɔnɔwɛ̃ pɛ. Mikã ndamu i ɔ̃ ɔnɔwɛ̃ iyere iso. 14Midaasiai maɣaa mama, nɖebi mama maturi ma loki malɔ mi aɣɔ. 15Ala Bosate mi Ɣaa, nwɔ mpia i mi ndɛ̃, Ɣaa wɔ nsɛ ɔkpɛ̃ sirerɛ ɔɖe. Ɔto ɔ̃anagu mi sikpã gbaã, iyɔ ɔ̃awɔra mi ɔɖi i karɔ̃ iso. 16Midaala Bosate mi Ɣaa minyɔ lɛ kumɛgɔ mibara i Masa awe. 17Minyɔ sɔ mibara i Bosate mi Ɣaa, mmara iso. Si mibara i asɛra gu asɛ̃ra wa ɔtã mi iso. 18Mibara ira sɛɛ gu ibɔlɔlɔa i Ɣaa anɔ, si ialɛgu mi fiɛ miakɛlɛ miafɔ karɔ̃ sɛɛ ga i Bosate ɔɣɛ ɔsɛ ku ndamu sɔ ɔ̃atã mi mawa. 19Bosate to ɔ̃asa mi matsirise ɔɖuɖu ɔɖi i mi katɔ̃ lɛ ɔɣɛ.
20Si fɔ ɔbibirɛrɛĩ ɔkarɛ-ɔ ku ɔwi wɔ nto ɔba ame sɔ, "Be nɖe asɛra, asɛ̃ra gu mmara ara wa i Bosate bo Ɣaa sɔ mibara karɔ̃?" 21Ɣere wũ sɔ, 'Boɖe Egipte Igarakpakpa masande ɣɛɛ Bosate ɔɖi bo ɔbɔrɛgu i Egipte karɔ̃ iso ku ɔ̃ kɔrɔ̃ ame ɔle siare. 22Bo mɔmɔ bonya awawãra akparĩ gu ara wa mba ɣii - ara siare gu afɔ̃ra wa i Bosate ɔsu ɔpɛ ala Egipte karɔ̃ gu ma Igarakpakpa gu ɔ̃ iyomaturi ɔɖuɖu. 23Ɣɛɛ ɔɖi bo ɔbɔrɛgu i Egipte karɔ̃ iso, ne ɔkɔ bo ɔbɔ, ne ɔsu karɔ̃ ɔtã bo lɛ kumɛgɔ ɔɣɛ ɔsɛ ku ndamu, ɔtã bo mawa awe. 24Bosate ɔɣere bo sɔ bobara i asɛ̃ra ɔɖuɖu wagbe iso. Si bopia Bosate bo Ɣaa kuwarɛ ku kunigã. Si boana isaruɛ ɔwi biara fiɛ boawe ngbã lɛ kumɛgɔ ise bo nɔme awe. 25Si boɣara so bomɔɛ̃ mmara ɔɖuɖu boto i Bosate bo Ɣaa anɔ lɛ ɔɣere bo ne, ito iaɖe bo sibɔlɔlɔ."
Currently Selected:
DEUTERONOMY 6: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
