DEUTERONOMY 16
16
Kukpi Ɔtakuwarabo
1Mose ɔɣere Israel mabi sɔ: Minyigi Abib#16.1 Abib: Kuwa ɖeakatɔ̃ i Israel maturi ikɔ awa ame kiniɔ ne ipia i kiniɔ kuwa ɖeakatɔ̃ gu kuwa tɛare ame. kuwa si miɖe Kukpi ɔtakuwarabo iyi mitã Bosate mi Ɣaa. Ala Abib kuwa ame i Bosate mi Ɣaa ɔkɔ mi ɔbɔrɛgu i Egipte karɔ̃ iso ku kasɛ̃ ame ɔso. 2Misɔrɛ sɛrɛrerɔ̃ ɣee nantsuĩ mibɔrɛgu i wã akuri ame lɛ Kukpi ɔtakuwarabo isɔrɛ mitã Bosate mi Ɣaa i kakɔi kawɛ̃ ga i Bosate aaɖi ɔtã ɔ̃ Iyere. 3Midaaɖe ne ku, boɖoboɖo wɔ mapia inyagɛ̃kua i kame ɣɛɛ ayi akɔdzɛ ne miɖe boɖoboɖo wɔ maipia inyagɛ̃kua lɛ inyɛwe boɖoboɖo, ala mirui i Egipte karɔ̃ iso ku siwa. Si miasu minyigi ɔwi wɔ mirui i Egipte karɔ̃ iso i mi agbanayi ɔɖuɖu ame. 4Inyagɛ̃kua kukuwɛ̃ daawe i mi kuwɛ̃ kɔrɛ i karɔ̃ ɔɖuɖu iso i ayi akɔdzɛ ame. Midaatã iyi ɖeakatɔ̃ kutsuɛ isɔrɛ sina kusiwɛ̃ si sise kaɖesɛã.
5Iikote sɔ miaɖue Kukpi ɔtakuwarabo bɔi i ɔmagɛ̃ ɔrere wɔ i Bosate mi Ɣaa ɔsu ɔtã mi ame 6iɖo i kakɔi kawɛ̃ ga i Bosate mi Ɣaa to ɔ̃aɖi lɛ ɔ̃ Iyere kawekɔ̃ pɛ. Mmɔ ikote sɔ miasɔrɛ Kukpi ɔtakuwarabo bɔi ku kutsuɛ ne, si kuɣɛ̃ kato kubo i iyo ku iyiɖea iso, i ɔwi wɔ igbã mirui i Egipte karɔ̃ iso. 7Mifɛ̃ ne si miɖe ne i ngbegɔ i Bosate mi Ɣaa aaɖi. Iyɔ kaɖesɛã kaya ne, si mikpese mikɛlɛ mi akpayo ame. 8Miɖe boɖoboɖo wɔ maipia inyagɛ̃kua ayi akuɔ, iyi kɔdzɛva iso ne misakanya si misumu Bosate mi Ɣaa. Midaabara karabara kukawɛ̃.
Ɔraɖui Isasa Iyiɖea
9Mika siɖapɛ ikɔdzɛ ita i ɔwi wɔ mipia ɔnyɔĩ misɛ kamɔ irui karɔ̃. 10Iyɔ si miɖe Ɔraɖui isasa Iyiɖea mitã Bosate mi Ɣaa si misu kuɖuɛ ame karatã mitã Bosate mi Ɣaa, i kumɛgɔ kanya ɔfere mi kusɛkusɛ. 11Mi mɔmɔ gu mi mabibirɛrɛĩ gu mabibirɔ̃gomi gu mi maɖaborɛrɛ̃ gu maɖaborɔ̃go gu ma Levise ma lobɔrɛ i mi simagɛ̃ ame gu mafɔ gu masekpibi gu makpisemare ma mpia i simagɛ̃ ame si mina isoɣɔ i Bosate mi Ɣaa anɔ ame, i kakɔi ga ɔ̃aɖi fiɛ ɔ̃ Iyere aawe. 12Minyigi sɔ miɔɖe masande i Egipte karɔ̃ iso minya, si mimɔɛ̃ asɛ̃ra wagbe mila kukaakɔ si mibara i wã iso.
Kukpakɛ Ame Iyiɖea
13Miɖe Kukpakɛ Ame Iyiɖea itã ayi akɔdzɛ si miɔsa mi ɔraɖui kanya i imɔtu fiɛ miɔɖi ndã. 14Mina isoɣɔ i Iyiɖea ame - mi mɔmɔ gu mi mabibirɛrɛĩ gu mi mabibirɔ̃gomi gu mi maɖaborɛrɛ̃ gu maɖaborɔ̃go gu ma Levise gu mafɔ gu masekpibi gu makpisemare ma nsi i mi simagɛ̃ ame. 15Miɖe iyi nɛgbe ayi akɔdzɛ mitã Bosate mi Ɣaa i ngbegɔ Bosate aaɖi. Ala Bosate mi Ɣaa to ɔ̃afere mi ɔraɖui isasa gu mi nrɔɔ̃ karabara ɔɖuɖu kusɛkusɛ, iyɔ mi isoɣɔ aayi pelepele.
16Ikote sɔ mi marɛrɛ̃ ɔɖuɖu aaba i Bosate mi Ɣaa anɔ, ikpɛ itɛ i ikɔ ame i kakɔi ga i Bosate mi Ɣaa aaɖi: ku Boɖoboɖo Wɔ Loita Iyiɖea ɔwi gu Ɔraɖui Isasa Iyiɖea ɔwi gu Kukpakɛ ame Iyiɖea ɔwi ame. Ɔrɛrɛ̃ kuwɛ̃ daaba i Bosate anɔ ku nrɔɔ̃ kunu. 17Mi ɔbiara si ɔbɔ karatã i kumɛgɔ kanya i Bosate mi Ɣaa ɔfere wũ kusɛkusɛ.
Matɔ̃meɣɛdze
18Miɖi matɔ̃meɣɛdze gu makpakpa i kamele biara i ɔmagɛ̃ biara wɔ i Bosate mi Ɣaa to ɔ̃atã mi ame, si maaɣɛ maturi atɔ̃me i ɔri iso maibanyɔ kuwɛ̃ anɔ. 19Midaaɣɛ atɔ̃me si mifirikira itɔ̃meɣɛiriso si midaaya i ɔturi kama. Midaafɔ kawɛrɛra karatã alasɔ kawɛrɛra karatã sɛ kaku, ta mawolai anɔmi fiɛ maturi bɔlɔlɔa atɔ̃me sɛ agɔgɔlɔ. 20Misiai itɔ̃meɣɛiriso si misiai itɔ̃meɣɛiriso kere, si miawe ngbã fiɛ miafɔ karɔ̃ ga i Bosate mi Ɣaa to ɔ̃atã mi.
Maɣaa Mama Isumu
21Daasu Asera kuɣɔrɔ̃go ɔdziri itera aɣedza i isɔrɛkasege ga apɛ atã Bosate mi Ɣaa kɔrɛ. 22Daaɣedza ita sekelea, ala Bosate mi Ɣaa ɔtsiri nwagbe.
Currently Selected:
DEUTERONOMY 16: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
