DEUTERONOMY 14
14
Araɖea Sekelea Gu Nwa Loisekele
1Mose ɔɣere Israel mabi sɔ: Mi ne Bosate mi Ɣaa, mabi miɖe. Midaatu so ɣee mikparɛ̃ iti katɔ̃ pɔlɔpɔlɔ ala kpise ɔso.#14.1 Nɖebi mɛ loki milɔ Israel mabi ɔla maɔbara ngbɔ, matutu so mabara ara igbã ala kpise ɔso. 2Ala kaɖe sekelea miɖe mitã Bosate mi Ɣaa ɔso. Bosate loɔɖi mi ɔtã so i kayiiso maturi ɔɖuɖu ame, sɔ miaɖe ɔ̃ maturi nyaare.
3Midaaɖe kuira nɛ nɖe inyanyara. 4Mabɔi ma miawo ɔɖe i ngbe ne: nantsuĩ gu sɛrɛrerɔ̃ gu sɛrɛtepu gu 5kuɔ igbã biara gu sɛrɛrerɔ̃ igbã biara gu kuɔ ɔwɛ̃ igbã gu kapututepuĩ gu kasɔlɔ igbã biara. 6Miawo mabɔi ma mba apuɛtsɛ ndɛ̃ fiɛ masɛ mayira araɖea mawe ɔɖe. 7Ɣɛɛ, mabɔi ma nsɛ mayira araɖea mawe ɣee maba apuɛtsɛ ndɛ̃ pelepele ne, midaaɖe kapuipɔngɔ, afɔmizi ɣee miɛĩ. Atoasɔ masɛ mayira araɖea mawe ne, mana apuɛtsɛ ndɛ̃ ɔso maisekele matã mi. 8Kparako ana iisekele atoasɔ ɔba apuɛtsɛ ndɛ̃ ne, ɔ̃isɛ ɔyira araɖea ɔwe. Midaaɖe mabɔi magbe sina ɣee midaapɛgu ma makpia.
9I afara agbã biara wa i ndu ame ne, miɖe karere ga mba abue gu awoloba. 10Ɣɛɛ karere ga mpia i ndu ame fiɛ kana abue gu awoloba ne, midaaɖe alasɔ kaisekele katã mi.
11Miawo ɔɖe karodzai karere ga losekele. 12Ɣɛɛ nwagbe nɖe kurodzai gɔ miibaɖe ne: finikpo gu ikolomo gu kamamaakpo 13kakpekpeyu rɛtɛa, kakpekpeyu kpinakpina gu kagbererodzai igbã biara, 14kakparodza igbã biara, 15akurumu igbã biara gu ɔpoikurumu gu kakpekpeyu igbã biara gu 16ikurumu kosoi gu ikurumu siare gu ikurumu fudza gu 17fafuĩame ikurumu gu faraiɖefinikpo gu ɔpotukɔkɔ, 18nyakpɛĩrodzai igbã biara gu katisarodzai gu ako gu isaga.
19Kubɔibi ɔɖuɖu gɔ nsɛ kufɛrɛrɛ i ikuri ame iisekele, midaaɖe kɔ̃. 20Ɣɛɛ miawo kubɔibi ku abue gɔ losekele ɔɖe.
21Midaaɖe ira irere nɛ loɔkpi koko.#14.21 Ngbe ne Israel maturi mmara miɖe. Miawo su ɔtã mafɔ ma mpia i mi kɔrɛ i ɔmagɛ̃ ame maɖe. Ɣee mirɔdɛ̃ mitã mafɔ mama. Ɣɛɛ mi ne maturi sekelea miɖe mitã Bosate mi Ɣaa.
Daawa sɛrɛtepu ibi ɣee sɛrɛrerɔ̃ ibi i nɛ ɔnyi inyɛndu ame.#14.21 Kubarara gɔgbe ɔɖe ma Kanaanse kure, mala maɔbara awara ku ɔwiɔ i Kanaan karɔ̃ iso.
Ikaweova Itã Mmara.
22Nyɔ sɔ aɖi fɔ ɔraɖui ikaweova i nwɔ ana abɔrɛgu i fɔ kakpɛkɔ̃ ame, i ikɔ biara ame asɛ ise. 23Ɖe fɔ geɖebu ɔraɖui ikaweova, ndã gu nnɔĩ gu nantsuĩ ibi ɖeakatɔ̃ gu sɛrɛ ibi ɖeakatɔ̃ i Bosate fɔ Ɣaa anɔ, i kakɔi ga ɔ̃aɖi lɛ ɔ̃ Iyere kawekɔ̃. Si asu asuã kumɛgɔ aapia Bosate mi Ɣaa kuwarɛ ku kunigã ku ɔwi biara. 24Si sɔ ngbegɔ Bosate mi Ɣaa aaɖi ɔsɛ ɔfe idzorogu fɔ kawekɔ̃ fiɛ aibawo fɔ ara wa i Bosate ɔfere-ɔ kusɛkusɛ ana ikaweova ɔsore ɔkɛlɛgu ne, 25iyɔ rɔdɛ̃ wã si asu sikãfudza ala akɛlɛgu kakɔi ga i Bosate mi Ɣaa aaɖi. 26Su sikãfudza dzɛmɔ si aɣa ira nɛ igbã aɖuɛ, nantsuĩ gu sɛrɛrerɔ̃ gu ndã ɣee ndã mɛ mba ɔle ɣee irere nɛ abie. Iyɔ mi gu fɔ iyomaturi si miɖe, mina isoɣɔ i mmɔ i Bosate mi Ɣaa anɔ. 27Ɣɛɛ midaanyuã ma Levise ma i mi simagɛ̃ ame misɛ ikunu alasɔ mana ma mɔmɔ kaɖekɔ̃ kukawɛ̃.
28Ikɔ tɛarɛ biara kawirikɔ̃ ne, misu mi ɔraɖui ikaweova mibɔ si maledza wã masɛ i mi simagɛ̃ ame, 29si ma Levise (ma nna ma mɔmɔ kaɖekɔ̃) gu mafɔ gu masekpibi gu makpisere ma mpia i mi simagɛ̃ ame aaba maaɖe fiɛ maami. Si Bosate mi Ɣaa aafere mi kusɛkusɛ i mi nrɔɔ̃ karabara iso.
Currently Selected:
DEUTERONOMY 14: AKP
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics, Literacy and Bible Translation
