Nyut a Lakana 21

Polo anyen kede lobo anyen

1 # Ica. 65.17; 66.22; 2 Pet. 3.13 Dok ate neno polo anyen kede loba anyen, pien polo me agege kede lobo me agege onwoŋo doŋ orwenyo oko, anaka nam-gu mom doŋ tye. 2#Ica. 52.1; 61.10; Nyut 3.12Eka ate neno boma acil, Jerucalem anyen, kun abino piny iya i polo baŋ Obaŋa, ame okwogo bala atera ame oruko pi cware. 3#Ejek. 37.27; Olev. 26.11, 12Eka dwonnoro aloŋo te pello iyi kom loc ame kobo ni, “Nen, kabedo Obaŋa doŋ tye baŋ jo. En doŋ bino bedo karacel kedgi, gin daŋ bino bedo jo mere. Obaŋa ikome bino bedo baŋ jo, kun bedo Obaŋagi. 4#Ica. 25.8; 35.10; 65.19En bino weyo pig waŋgi oko ducu. To doŋ bino bedo pe, kadi kumo onyo koko, onyo rem, pien jami acon doŋ orwenyo oko atwal.”

5Ŋat ame obedo i kom loc te kobo ni, “Nen, aketo jami luŋ tye anyen.” En dok okobo ni, “Co kop man, pien man en kop ame genne, dok me ateni.” 6#Ica. 55.1Eka te kobba ni, “Doŋ otimere oko! An Alufa kede Omega, an ageyi kede agikki. Ŋat ame oryo ociro, abino miye mato pii akoŋ me kwo, aboŋo culloro. 7#2 Cam. 7.14; Jab. 89.26-27Gat ame oloo, mannono en mot ame en bino nwoŋo, kun an abino bedo Obaŋa mere, en daŋ bino bedo atinna. 8Ento jo a lwor, a mom ogen, otim timmogo me kwer, onek jo, otim tim me coco, otim tim jojok, owor cal jogi, kede ogoba ducu, gin obino nwoŋo megi i nam a tye a lyel i mac kede gweŋ calufa; mannono en to me aryo.”

Jerucalem anyen

9Amalaika acel i kin omalaika abiro ca ame rik tye i tabbi abiro ame pwodo abiro me agikki opoŋ iye te bino baŋa, te kobba ni, “Biye, anyutti Atera, dako Atin romo.” 10#Ejek. 40.2Otina, otera oko i twon kidi moro abor meicel, kun onwoŋo Cuny Acil oyuto tamma oko, eka te nyutta Jerucalem anyen ame abino piny iya i polo baŋ Obaŋa, 11kun tye kede kwogo Obaŋa. Ryeny bala gweŋ a wellere dwon a mom nen ata ta, bala jacipa, dok cil bala gweŋ amimila. 12#Ejek. 48.30-35Apama cellere dwon, oyido malo, doge tye apar wie aryo. Omalaika apar wie aryo tye i dogcel, i dogcel daŋ ocoo iye nyiŋ atekere apar wie aryo li jo Icrael. 13Dogcel adek obedo tuŋ kide, dogcel adek obedo tuŋ anyarodi, dogcel adek obedo tuŋ anyarolum, dogcel adek obedo tuŋ to. 14Aco apama cel me boma onwoŋo tye kede kiddi apar wie aryo ame ocibo i acakki tere, ame ocoo i komgi nyiŋ okwena Atin romo apar wie aryo.

15 # Ejek. 40.3 Ŋat ame okobo keda onwoŋo tye i lut me jabu me pimo kede boma, kede dogcel, kede apama cel ducu. 16Boma mere rik tye i twoke aŋwen arorom, borrere rom aroma i laccere. En te pimo boma kede luttere, te romo mairo tutumia acel kede mia abic; borrere kede laccere kede borrere malo ducu obedo rom. 17En te dan pi mo apama cellere, te nwoŋo romo futi mia aryo kede apar wie abicel, ka opimo i bat dano, acalo amalaika opimo. 18#Ica. 54.11-12Apama cel onwoŋo ogero kede jacipa, kun boma otio i jabu agili keken, ame cil bala gilaci. 19Kiddi me acakki te apama cel rik odeo i kit gweŋe alilia apapat. Me agege obedo en ame olwono ni jacipa, me aryo capir, me adek agat, me aŋwennere emeradi, 20me abic onik, me abicel kamelio, me abiro kuricolit, me aboro berul, me aboŋwen topaj, me apar kuricoparac, me apar wie acel jacint, me apar wie aryo ameticito. 21Gi-geŋo dogcel apar wie aryo obedo tiggi atar me wel apar wie aryo, gi-geŋo dogcel acel acel obedo kodi tigo-nu acel keken; yo ducu me yi boma otio kede jabu agili, ame cil bala gilaci.

22Mom ate neno ottoro me woro Obaŋa i boma-nono, pien ot woro Obaŋa i kuno en Rwot Obaŋa Won Twer Ducu ikome, kede Atin romo. 23#Ica. 60.19-20Ceŋ onyo dwe mom mitte i bomanono me ryeny iye, pien kwogo Obaŋa en ame menyo, tara mere en Atin romo. 24#Ica. 60.3Rok luŋ bino wowota i lero mere, obakki me lobo luŋ bino kela kwogogi iye. 25#Ica. 60.11Dogcel mere mom obino ce go dyeceŋ, gin ame olwono ni dyewor mom bino nen kuno. 26Obino tero iye kwogo kede lonyo a rok luŋ, 27#Ica. 52.1; Ejek. 44.9ento ginnoro me kwer mom bino donyo iye, onyo ŋattoro ame timo tim me kwer, onyo me goba, kono ka jonono keken ame nyingi doŋ ocoo oko i buk me kwo Atin romo.

Currently Selected:

Nyut a Lakana 21: La79

Highlight

Copy

Compare