Jo Pilipi 4

Lel wunu i Rwot

1Pi mannono, cuŋ wunu atek i Rwot amanno, omegona ame amaro dok ame aparo meicel, pien ibedo wunu yomcunya kede tokka me kwogo, owotena.

2Yin Eudia kede yin Cuntuke, akwaowu ba, bed wunu i cuny acel i Rwot. 3Yin atic wadwa me ateni daŋ, kony mon-ni ba, pien gin oromo karacel keda pi amut aber, karacel kede Kelementi daŋ kede otic wadwa ocele luŋ, ame nyiŋgi doŋ ocoo oko i buk me kwo.

4Lel wunu i Rwot kare luŋ. Dok anwoo ni, Lel wunu. 5Weku jo luŋ ŋe mwolowu. Rwot doŋ ceggi. 6Kur ipar wunu ginnoro, cite i kop ducu mi kwacwu ŋeye baŋ Obaŋa i lega kede i bako dog, karacel i pwoc daŋ. 7Mio kuc Obaŋa ame kato ŋec a jo luŋ bino gwoko cunywu kede tamwu aber i Kricito Yecu.

Ket wunu tamwu i kom kop acalo magi

8Me agikki mere, omegona, ket wunu tamwu i kom kop acalo magi: gin ducu a tye ateni, gin ducu a romo awora, gin ducu a tye atira, gin ducu ame cil, gin ducu amwonya, gin ducu ame opwoo, ginnoro keken ame ber meicel, ame porre apaka. 9Ti wunu gin a nwaŋ ipwonyo wunu, igamo wunu, iwinyo wunu dok ineno wunu i baŋa: eka Obaŋa won kuc bino bedo kedwu.

Pwoyo mot ame jo Pilipi ocwao

10An alelo atek meicel i Rwot pien aman dok iparo wunu pira kit a yam con. Kono iyi ateni mere mom iweko wunu paro pira, ento kare me konya en obedo peyiwu. 11Dok daŋ pe akoko can, pien an doŋ apwonyere ni, gin ame atye kede roma gire. 12Aŋeo bedo i gin anok kede bedo i gin abup. Adonyo i dul a jo a ŋeo bedo i ginnoro a binnigi i kare moro keken, yeŋ atek ateka onyo kanyo kec, bedo i lonyo abup onyo bedo kede can. 13Atwero jami luŋ aluŋa pi Kricito ame mia teko.

14Ento wun rik itimo wunu ber me notte keda i peko ame odia. 15#2 Kor. 11.9Dok wun jo Pilipi iŋeo wunu aber ni, ka rik aya i Makedonia i ageyi rabo amut aber, mom tye Iwakkoro i akina jo oye Rwot ame onotte keda i yo man me miyo kede gamo mot, kono ka wun keken. 16#Tic 17.1Anaka i kare ame atye i Tecalonika icwaya wunu kony a mitte kom tyen aryo twal. 17Mom ni mano cunya tye i kom mot, ento atamo pi nyayo agoba ame obino kwanniwu. 18#Yaa 29.18Agamo gin imia wunu ducu, kun dwoŋ ame okato kare. Oromo doŋ aber, pien Epaprodito otyeko miya mot ame icwao wunu. Obedo gin a ŋwece kur, acalo gin ame oŋolli Obaŋa, a en ojolo, a yomoro yie. 19Obaŋana bino miyowu gin luŋ ame orem i baŋwu, kun kwanyo iyi lonyo mere me kwogo adwoŋ a en tye kede i Kricito Yecu. 20Kwogo bed baŋ Obaŋa Papawa nakanaka. Amen.

Amot me giko kop

21Mot wunu jo Obaŋa luŋ i Kricito Yecu. Omegowa a tye karacel keda daŋ omotowu. 22Jo Obaŋa luŋ omotowu, akato mere jo me ot a Kaicari. 23Winyo a Rwotwa Yecu Kricito bed kede cunywu.

Currently Selected:

Jo Pilipi 4: La79

Highlight

Compare

Copy