Tic 26

Pido a Paulo i nyim Aguripa

1Aguripa te kobbi Paulo ni, “Doŋ oye ni ikob koppi piri keni.” Paulo te ryeyo bade te pido ni, 2“An kena kena aparo ni atye kede winyo me pido pidona tin i nyimi yin abaka Aguripa, pido ame gudo kop luŋ a yam Ojudaya opida pire, 3akato mere, pien yin iŋeo kite Ojudaya luŋ karacel kede koppogo me pyem. En omio akwayi me diyo cunyi, winyo koppa.

4“Kite me kwona, cakere i tinona gin Ojudaya luŋ ŋeo, pien abedo iyi akina rokka kede i Jerucalem cakere i ageyi. 5#Tic 23.6; Pil. 3.5Gin doŋ oŋeo pi kare alac, ka ce gin ye, gin twero tuco ni rik an abedo Aparicayo, kun alubo eryoŋet me diniwa ame cikkere tek meicel. 6Aman acuŋ kan apida pi gen atye kede ni Obaŋa bino cobo gin a rik ociko baŋ kwariwa. 7Gennono, atekerewa apar wie aryo luŋ geno ni obino nwoŋo, kun oketo cunygi i woro Obaŋa dyeceŋ kede dyewor. Pi gennono gire, en omio Ojudaya tye apida, ama abaka! 8Piŋo wun Ojudaya mogo itamo wunu ni mannono kop a mom oromo ye, ni Obaŋa cero jo oto?

9 # Tic 8.3; 22.4-5 “An ikoma daŋ onwoŋo yam atamo ni myero atim gigi mogo apopol ame lweny i nyiŋ Yecu me Najaret. 10Daŋ ate timo amannono i Jerucalem; anwo Ŋo twer i baŋ olamdog adoŋo ate ke to jo Obaŋa apol i buc. Ka rik oŋolligi to, an daŋ abolo kwirra me nekogi. 11Tyen apol ata atimogi cucu i kacokere luŋ, kun adiyogi me yeto nyin Yecu. Rik aŋo i komgi atek meicel, omio awapogi tuno naka i boma Orok pi wunogi.

Paulo otito pi lokere mere me doko Akricitayo

(Nen daŋ Tic 9.1-19; 22.6-16)

12“Pi ticcono onwoŋo rik atye awot Damaciko kun onwoŋo anwoŋo twer kede or i baŋ olamdog adoŋo. 13I cuny dyeceŋ, abaka, ame onwoŋo atye i waŋa yo, ate neno acara moro ame oya i polo, ame ryennyere kato cen oko, te menya twoda dyere, kede jo a rik tye awot keda. 14Ame doŋ wan luŋ oony piny oko, ate winyo dwon ŋattoro a penya i leb Eburania ni, Taulo, Caulo, piŋo kara itye ka wuna? Bedo tek yin igweyo leb ecipet. 15An ate gamo ni, ‘Kara yin iŋa, Rwot!’ Rwot te gamo ni, ‘An a Yecu, en ame yin giri itye ka wuno-nono. 16Aco ya doŋ malo, icuŋ i tyeni, An doŋ anen baŋi me keti bedo aticca kede cadenna i kom gin ame ineno i koma, kede i kom en ame ibino neno ka dok anyutte baŋi. 17Abino lari i baŋ jo meri Icrael kede i baŋ Orok ame abino cwayi baŋgi. 18Yin ibino yabo waŋgi, me imigi oya oko i colpiny odwog i lero, dok oya oko i te twer a Catan odwog baŋ Obaŋa, me wek pi ye Yecu, Obaŋa wek balgi oko, onwoŋ daŋ kabedo i akina jo ame olonyo obedo acil.’

Paulo obedo caden baŋ Ojudaya kede baŋ Orok

19“Pi mannono, abaka Aguripa, an rik mom akwero lubo gin onyutta iya i polo, 20#Tic 9.20, 28-29ento ageo rabo kop baŋ jo i Damaciko, kede doki i Jerucalem, anaka atot i lobo Judaya luŋ, kede baŋ Orok daŋ. Arabbigi ni mano, myero gin oŋut, olokere baŋ Obaŋa, eka ote tiyo tic ame jo oŋut porre tiyo. 21Man en kop omio Ojudaya omaka i ot Obaŋa, ote temo neka. 22Cite Obaŋa obedo konya tuno naka i nino a tin-ni, omio acuŋ kan kun amio caden baŋ jo adoŋo kede atino, kun mom akobo gira kopporo, kono ka en a rik odwarpiny kede Muca okobo ni bino timere; 23#Ica. 42.6; 49.6; 1 Kor. 15.20en ene ni, Kricito myero to, dok daŋ ni, en koŋ bino geyo cer iyi akina a jo oto, eka te rabo kop me lero baŋ Ojudaya kede baŋ Orok.”

Paulo omito waya tam Aguripa i kom iyee

24A doŋ Paulo onwoŋo tye apido amannono, Fesito te redo i dwon aloŋo ni, “Lo-ni Paulo yin apoa. Pwonyereni atek ateka omio aloki oko idoko apoa.” 25Paulo te gamo doge ni, “Adwoŋ won kwogo Fesito, an gira mom apo. An akobo kop me ateni dok daŋ me ryeko a tere tye. 26Abaka gire ŋeo kop magi; i nyime an atwero kop i tekcuny, pien aŋeo aber ni en mom kwia kopporo i kom kop magi, pien gin-ni luŋmom tye moro iye ame otimere i muŋ. 27Abaka Aguripa, yin iye odwarpiny? An aŋeo ni iyegi.” 28Aguripa te kobbi Paulo ni, “Itamo ni itwero loka adoko Akricitayo pi kare anonokkoro-ni?” 29Paulo te gamo ni, “Kadi pi kare anonokkoro onyo abor, akwao Obaŋa ni kono mom yin keken ibedo calo an, ento anaka jo luŋ ame tye awinya tin, cite mom i jegere-ni.”

30Abaka te ya oko malo gin i aloc kede Berenike, kede jo a rik obedo kedgi. 31Ame gin doŋ owoto oko ote kop kengi kengi ni, “Lonnono gire mom otimo ginnoro a mio oromo neke kadi tweye.” 32Aguripa te kobbi Fesito ni, “Lo-ni gire onwoŋo otwero gonyo oko, kono rik en mom ojuro baŋ Kaicari.”

Currently Selected:

Tic 26: La79

Highlight

Copy

Compare