Rômə 8
8
Lungɛ́ álə́ Mudî n Dyǔ nǎn bəní
1Sɔnsɔ́nǎn, Dyǔ lí sî bwəlá mɔ̂ʼ ká nfɔ́ awə̌ a dí na Yésu Krísto a kfún muka. 2Mbéndá ɛ Mudî ɛyə̌ ɛ̌ panán sə́ luŋgɛ́ ngə sí díní wɔ̂ na Yésu Krísto, ɛ kákú mi á litfúl álə́ mbéndá ɛ tfúlíní mi ti ɛ fúlí mi á makɛ́ má líwá. 3Mbéndá ɛ sî n púl ɛ́ ma wubî á ɛ́tútú nána bǎnyûŋ bá sî ŋ wɔ́ŋ ngínya álí dúbɛ́ yɔ́. Áfánikə̌, Dyǔ lí bwə́lí yə̌ ɛ́yə́ mbéndá ɛ púliyaní ɛ bwə. Lí lúmí Mwǎn m mɔ na ngunyǔŋ ɛ mɔnyuŋ ɛyə̌ ɛ̌ bwə wúbî, ti a mɛsí ngínya ɛ wubî. Ngə Dyǔ lí bwə́líní nâ, ɛ́yínán ɛ́ mɛ́sí wubî litúm ngunyǔ ɛ mɔ̌nyuŋ. 4Dyǔ lí bwə́lí nâni nána baʼ ábə́ bá sɛ̌ ɛ́ nǎn misam á ngínya ɛ mɔ̌nyuŋ ndé bá bwə misam wɔ̂ na ngínya ɛ Mudî n Dyǔ, bá bwə misam á nyay ɛyə̌ ɛ tɛ́ŋgɛ́ní mulimlim ngə mbéndá ɛ pɔŋíní nána bá bwə. 5Baʼ ábə́ bá bwə̌ misam ngə ngunyǔ ɛ pɔŋíní bɔ́ na bá bwə̌, bá bán milə́m mí bɔ wɔ̂ á mísam mí ngunyuŋ. Ndé baʼ ábə́ bá bwə̌ misam ngə Mudî n Dyǔ n pɔŋíní bɔ́, bá bán milə́m mí bɔ á Mudî n Dyǔ. 6Njí mɔʼ a bándí nlə́m m mɔʼ á misam mí ngunyǔ á wá. Ndé njí mɔʼ a bándí nlə́m m mɔ á misam mí Mudî n Dyǔ á wɔ́ŋ luŋgɛ́ álə́ lí sɛ̌ ɛ́ mɛ na musaŋgu. 7Njí sə́m ɛ misam mí ngunyǔ ɛ́ dyɛ́lɛ́ mɔ̂ʼ, mɔʼ ani ǎ bá ɛ́kfwɛyí na Dyǔ á ɛ́tútú nána a sɛ̌ nǎn mbéndá ɛ Dyǔ, na a sɛ̌ yɔ́ ɛ nan tǒm. 8Ɛ́yínán yɔ̂ ɛ́ lúfú nána, baʼ ábə́ bá nǎn sə́m ɛ misam mi ngunyǔ, bá tíŋgániyǎ ɛ bə Dyǔ munyɛŋgɛ.
9Ndé á nyə́, nyí sə̌ ɛ́ bwə̌ misam ngə ngunyǔ ɛ̌ saʼní nána nyí bwə̂. Nyí bwə̌ wɔ̂ ngə Mudî m pɔŋní nyə́ nána nyí bwə, njí ɛ díní nána á mbálɛ, Mudî n Dyǔ n dí nyə́ átin. Ká njá awə̌ Mudî n Krísto n shiyǎní mɔ́ átin, a shiyǎ na Krísto. 10Ndé njí Krísto a dí nyə́ átin, nyí dí luŋgɛ́ á ɛ́tútú Krísto a mə́ ɛ bwə nyí tyə́bí sîm á wusú wú Dyǔ ká ngə ngunyǔ n nyə ɛ́ wání á ɛ́tútú ɛ́ wúbî ábə́ nyí bwə́líní. 11Njí Mudî n Dyǔ ámə́ m púmú Yésuwə á líwá n dí nyə́ átin, ni ká ngunyǔ ɛ́ wə ɛyə̌ ɛ̌ wá ɛ m mə̌ ɛ́ wá, ní Dyǔ álə́ lí púmú Krísto lí púmú ngunyǔ ɛni. Lí bwə nâni na ngínya ɛ Mudî ɛyə̌ ɛ dí nyə́ átin.
12Áfánikə̌, bǎn-bá-nyǎ bá myə, sí wɔ́ŋí nsam ámə́ sí lɔ́líní ɛ bwə ndé suká álí bwə misam ámə́ libá lí ngunyǔ lí saʼní. 13Á ɛ́tútú nána njí nyí dyɛ á nyay ɛyə̌ libá lí nguʼ nyǔ lí saʼní nána nyí dyɛ̂, ní nyí wá. Ndé njí nyí dyɛ ngə Mudî n Dyǔ lí saʼní nána nyí dyɛ̂, nyí búlú mabwəlan mábî má ngunyǔ ɛ́ nyə, na nyí kwisí luŋgɛ́. 14Á ɛ́tútú nána baʼ ábə́ Mudî n Dyǔ nǎn dyɛ́lɛ́ní bá dí bǎn bá Dyǔ. 15Mudî ámə́ Dyǔ lí bə́kíní nyə́ n sə nyə́ ɛ bwə nyí bá ngə batáŋ, nyí pə́ á bɔ̂ŋ átin. Ndé, nyí mə́ ɛ kwisí Mudî n Dyǔ ámə́ nǎn bwə nyə́ nyí bá bǎn bá Dyǔ. Á ngínya ɛ Mudî n Dyǔ, sí bə̌ŋ Dyǔ nána, “A Sáŋ! Sáŋ m myə.” 16Mudî n Dyǔ m mə́ sə́ ɛ bwə sí bî á milə́m mí sɛ nána sí dí bǎn bá Dyǔ. 17Sɔnsɔ́nân, ngə sí díní bǎn bá Dyǔ, sə́ pə́ sí kwisí wunam ábə́ lí kɔ́ŋgɔ́ní á baʼ bá mɔ. Na sə́ pə́ sí kwisí byə̌m ábə́ Dyǔ lí kɔ́ŋgɔ́ní mɔ́, a mbálɛ njí sə́ pə́ sí kúfú mutaka n Krístó, ɛ́ bwə sə́ pə́ sí kwísí wulɔʼ ábə́ Dyǔ lí bəní mɔ́.
Wulɔʼ ábə́ bǎn bá Dyǔ bá kwisíní
18Mi nǎn mín nána, mutaka ámə́ sí mín ní sɔnsɔ́nǎn n tíŋganiyǎ ká ɛ́ bá ɛlaŋgán na wulɔʼ ábə́ Dyǔ lí lɔ́líní sɛ́ ɛ lufú á púndá ɛyə̌ ɛ̌ kə̌ ɛ́ paʼ. 19Byə̌m bísə́sə̌n ábə́ Dyǔ lí wíkíní á nkínshíyə, bí sinj na sə́m ɛnə̂n álí mín púndá ɛyə̌ Dyǔ lí lúfúní bǎn bá mɔ. 20Suká byə̌m bî bɔ́ bî n wiki na ɛ́ bá nâ, Dyǔ lɔ́ lî n wíkí nâ. Lî n bwə nâ na libán lí nlə́m na bǔn bú paʼ ábə́ 21lí fúlní byə̌m bî á ngínya ɛyə̌ ɛ̌ bwə byə̌m bí yɔʼ, na bɔ́ pə́ bá kwisí mulimlim mú wulɔʼ ábə́ Dyǔ lí bəní bǎn bá mɔ. 22Á ɛ́tútú nána sí bí na kə́ŋ ta sɔnsɔ́nǎn, biwekedi bísə́sə̌n bí nkínshíyə bí kfwən átin á wuwa ábə́ bá wúní ábə́ wú dí ngə mwalân awə̌ saʼ ɛ́ yɛ́. 23Ndé suká biwekedi bí nkínshíyə bɔ́ na bɔ́ bí wɔ́ŋí kfwɛ́n átin. Sə́ ábə́ sí wɔ́ŋí Mudî ngə jabeya lí wusú wú Dyǔ, sə́ pə́ sí wɔ́ŋí kwfɛ́n á mílə́m mí sɛ. Sí mə́ ɛ bán milə́m mí sɛ mísə́sə̌n álí sinj púndá ɛyə̌ Dyǔ lí bwəní ka sí bá bǎn bá mɔ na mbálɛ. Á kákú nyǔ ɛ́ sɛ ɛsə́sə̌n á litfúlan ɛ́yə́ sí díní ti lí bə́kí sə́ nyǔ ɛ kɔ́nə́. 24Ngə sí mə́ní ɛ wɔ́ŋ lishuŋgɛ, sí bándí milə́m nána Dyǔ lí bwə̂ yə̌ ɛ́yə́ lî m məní ɛ fá likaʼ. Ndé, njí sí míní byə̌m ábə́ sí bándíní nlə́m na sí kwisí, ní suká libán lí nlə́m lɔ́ lî. Njá ǎ bán nlə́m á yǔm ɛ́yə́ a mə́ní ɛ kwisi? 25Ndé wə̌ti sí bándí nlə́m á byə̌m ábə́ sí nan míníyání, sí sinj bɔ́ na litfúl lí nlə́m.
26Mulimlim nâ pə́ Mudî n Dyǔ nǎn wúnján sə́ ká ngə sí díní wupyə. Sí bíyǎ ngə sí lɔ́líní ɛ káni, ndé Mudî n Dyǔ nǎn káni á sɛ́ na likwɛn átin álə́ lí túmbí mbyá n nsu. 27Dyǔ lí tátí milə́m mí sə átin, na lí bí likani lí Mudî á ɛ́tútú nána Mudî nǎn káni á baʼ bá Dyǔ á nyay ɛyə̌ Dyǔ lí saní. 28Sí bí nána ká yə̌ ɛ́yə́ ɛ́ bwəlan, Dyǔ lí bwə yɔ́ á wulɔʼ wú baʼ ábə́ bá nə́ŋí mɔ́, ábə́ lí bəŋíní álí bwə ngə lí saʼní. 29Dyǔ lî n mə̌ ɛ́ tyə́sí nána baʼ ábə́ a m məní ɛ tyə́sí, bilɛm bí bɔ bí bá ngə bilɛm bí Mwǎn m mɔ nána Mwǎn m Mɔ ani, á bá Mwǎn a wukɔndə átítin na badúbedi. 30Áfánikə̌, baʼ ábə́ Dyǔ lî m məní ɛ pwɛsi, lî m bə̌ŋ bɔ́ álí bá baʼ bá mɔ́. Ábə́ lî m bəŋní, lî m pɔŋní nána, bá tyə́bí sîm á wusú wú mɔ ti lí bə́kí bɔ́ wulɔʼ wú mɔ́.
Dyǔ lí nə́ŋí sɛ́ á Yésuwə Krísto
31Yə̌ sí tígŋání ɛ byá tɛ́ŋgɛnɛ misam mí manyáká mín? Njí Dyǔ lí dí na sə́, njá a tíŋgání sɛ́ ɛ tɛ́ŋgɛn? 32Njí Dyǔ lí sî n báŋ álí bə̂ Mwǎn m mɔ álí wá á milú mí sɛ́ mɔʼ ansə́sə̌n, yán kə́ lí sî bəkání pə́ sɛ́ yǔm tɛ́ ɛ́yə́ sí kɔ́ndɛ́ní mɔ́ á ngə́ŋ ngə̂ŋ? 33Njá a tiŋgání ɛ byá nána baʼ ábə́ Dyǔ lí mə́ní ɛ pwə bá kfúndí mukáʼ? Dyǔ lɔ́ lí bwə bâ bá tyə́ sîm á wusú wú mɔ. 34Njá a tiŋgání ɛ́ byá nána a kfúndí mukáʼ? Yésu Krísto á gvúlí, a púmú, ti a shumání á ɛkɛ́ ɛ́ mbâ ɛ́ Dyǔ na áwə́ ǎ káníní sə́. 35Njá a tiŋgání ɛ bwə ká Krísto a makú álí nəŋ sɛ́? Misam ámə́ mí kpútí á sə́, tɔ ndutu, tɔ baʼ álí takí sɛ? Njɛ, tɔ ngə sí wɔ́ŋiyǎní mabaʼ? Tɔ ngə baʼ bá kfúmní sə́? Tɔ ngə baʼ bá sa sɛ́ ɛ búlú? 36Ɛ́ tílání á kâti ɛ Dyǔ nána,
“Á ɛ́tútú ɛ́ wə, baʼ bá búlú sɛ́ bǔntɛ́.
Bá mín sɛ́ ngə mílɔŋgi ámə́ bá lɔ́líní ɛ búlu.”
37Ǎyi, á misam mín mísə́sə̌n mí bwəlan ndé, sí túmbí bɔ́, á Krísto, awə̌ a nəŋí sɛ́ na ǎ wúnján sɛ́. 38Mi bí bwǎm nána yûm ká ɛfɔ́ ɛ́ tíŋganiyǎ sə́ ɛ kaban á ɛniŋgán ɛ́yə́ Krísto a wɔ́ŋání sɛ́. Ká liwá tɔ luŋgɛ́. Ká bá áŋgɛl, ká bajaniya, tɔ mangínya mápə́pə̌ ámə́ má dí ámǐn. Suká púndá ɛyə̌ ɛ dí sɔnsɔ́nǎn tɔ púndá ɛyə̌ ɛ̌ paʼ. 39Ká mangínya má wudya wú Dyǔ, tɔ mangínya má nkínshíyə. Yǔm ká ɛfɔ́ ɛ́ shiyǎ á biwekedi bísə́sə̌n ábə́ bí tíŋgání sɛ ɛ kaʼ á ɛniŋgán ɛ́yə́ Dyǔ lí wɔ́ŋání sɛ́ á Sáŋgúwə́ n sɛ Yésuwə Krísto.
Currently Selected:
Rômə 8: bwt
Highlight
Copy
Compare
Share
Want to have your highlights saved across all your devices? Sign up or sign in
