Rômə 3
3
Dyǔ lí bwə̂ yə̌ ɛ́yə́ lí byábíní nána lí bwə
1Njá nsə́ŋə́ n dí álí bá mɔʼ a Júda? Tɔ̌ njá nsə́ŋə́ n dí álí bwə̂ wulɛ́na álí lúfú nána a dí mɔ a Júda? 2Iŋ nsə́ŋ n dí jǐta. Ɛ wusúsúwə ɛ dí nána, Dyǔ lî m bə̌ ndúm ɛ́ mɔ á baʼ bá Júda. 3Ngə ɛ̂ m bání nána duŋgu lí bɔ lí bíliyǎ ɛ́ bwə ngə Dyǔ saʼní nána bá bwə, ɛ́yî ɛ́ dí yə̌ nána Dyǔ lí sî bwəlá yə̌ ɛ́yə́ lí tyɛ́síní likaʼ álí bwə̂? 4Tǒm, ká ngə mɔnyuŋ ansə́sə̌n ǎ byání matúm, ndé Dyǔ lí dí mbálɛ ɛtîtɛ́. Ɛ́ tílání á ɛ́yala ɛ́ Dyǔ nána,
“Njí ɛ byábí yǔm, baʼ bá lɔ́lí ɛ sɔ́ntán nána yə̌ ɛ́yə́ ɛ byábíní ɛ́ dí mbálɛ.
Njí ɛ̌ káyísí wə, káyísí á nyay ɛyə̌ ɛ tɛ́ŋgɛ́ní.”
5Ndé njí misam míbî mí sɛ ámə́ sí bwəní mí lúfú tɛyí tɛyí nána Dyǔ lí sə̌ tyə́ mɔ̂ʼ ká nfɔ́ á mbí, yə̌ kə́ sí byání? Sí tíŋgání ɛ byá nána Dyǔ lí bwə́lí liwusɛ́ álí kɔ́ksɛ́ sə́ á wubî ámə́ sí bwə́líní? (Libyɛ́ lí mɔnyuŋ lɔ́ nǎn byábán nyə́ nâ.) 6Tǒm! Njí ɛ̂ m bá nána likáyisi lí Dyǔ lí tyə́bíyǎ, ní yán Dyǔ lí tíŋgání ɛ káyísí bâ bá nkínshíyə? 7Ndé njí ɛ́ dí nána yǔm ɛ́ matúm ɛ́yə́ mi m byábíní ɛ́ lúfú ngə Dyǔ lí díní mbálɛ á nyai ɛyə̌ baʼ bá bəní mɔ́ wulɔʼ, ní yə̌ kə́ ɛ́ bwə́lí ka Dyǔ lí bá wɔ̂ mî ɛ káyísi ngə mɔʼ awə̌ a bwəlí wubî? 8Yán sí tíŋgániyǎ ɛ́ byá nána, “Sí bwə̌ wubî álí bwə nána wulɔʼ wú míndi?” Duŋgu lí bâ bá byá tɛ́ŋgɛnɛ sə́ na sí mə́ ɛ byá nsam mû. Dyǔ lí kɔ́ksɛ́ baʼ bâ á nyai ɛyə̌ ɛ tɛ́ŋgɛ́ní.
Mɔʼ ká nfɔ́ a tyə́biyǎ sîm á wusú wú Dyǔ.
9Yə̌ sí byání? Nyí kání nána sə́ baʼ bá Júda sí túmbí baʼ ábə́ bá shiyǎ baʼ bá Júda? Tǒm! M mə́ ɛ lúfú nána ngínya ɛ wubî ɛ̌ janiya baʼ ábə́ bá dí baʼ bá Júda na baʼ ábə́ bá shiyǎ baʼ bá Júda mulimlim. 10Ɛ́ tílání á ɛyala ɛ́ Dyǔ nána,
“Mɔʼ ká nfɔ́ a shiyǎ awə̌ a tyə́bí sîm á wusú wú Dyǔ.
11Mɔʼ ká nfɔ́ a shiyǎ awə̌ a sɔ́ntání mbálɛ tɛ́ŋgɛnɛ Dyǔ,
mɔʼ a shiyǎ awə̌ ǎ wanan álí bí Dyǔ.
12Baʼ básə́sə̌n bá báŋ Dyǔ á nyǔ.
Bɔ́ básə́sə̌n bá wɔ́ŋí wɔ̂ ɛləm ɛ́ bî.
Bɔ́ mɔʼ ká nfɔ́ a shiyǎ awə̌ ǎ bwə yǔm ɛ́yə́ ɛ́ tɛ́ŋgɛ́ní. Bɔ́ mɔʼ ká nfɔ́ a shiyǎ.
13Biyala ábə́ bí fí bɔ́ á nsu bí ndí ngə midim ámə́ m púwání.
Bá bwəlán bíyə́m bí bɔ álí sə̌ŋ bâʼ. Mibyá ámə́ mí fí bɔ́ á nsu mí dí ngə njɔŋ m pî-nyɔ̌ʼ.
14Bilwíya na mbyá m mbî bɔ́ bí nyí bɔ́ á nsu.
15Makwi má bɔ má fə́ŋí bɔ́ áshí álí sǔ makǐ.
16Fǔm tɛ́ ábə́ bá túmbíní wubî na mutakaʼ bá makúní.
17Bá bíyǎ musaŋgu.
18Bá sə̌ ɛ́ báŋ Dyǔ.”
19Sɔnsɔ́nǎn sí bí nána yǔmtɛ́ ɛ́yə́ ɛ́ tílání á kâti ɛ mambéndá ɛ́ míndí baʼ básə́sə̌n ábə́ bâ m bəní mbéndá ɛni. Áfánikə̌ mɔʼ ká á tíŋganiyaní ɛ pú nsu nána a wɔ́ŋí njɔm. Ká ɛ dí yə́ mɔʼ a Júda tɔ̌ mɔʼ awə̌ a shiyǎ mɔʼ a Júda. Mɔtɛ́ ǎ tyə́ á wusú wú Dyǔ. 20Mɔʼ ká nfɔ́ a tíŋganiyǎ ɛ́ tyə́ sîm á wusú wú Dyǔ á ɛ́tútú nána ǎ nan mbéndá ɛ́ Mósisə. Mbéndá ɛ dí wɔ̂ álí lúfú bâʼ nána bá bwə̂ wubî.
Dúbɛ́ lɔ́ lí bwə̂ bâʼ bá tyə́ sîm á wusú wú Dyǔ
21Sɔnsɔ́nǎn, Dyǔ lí mə́ sə́ ɛ lúfú nji álí tyə́ sîm á wusú wú mɔ. Nji ɛnínán ɛ wɔ́ŋiyǎ ká yǔm li bwəlán mbéndá ɛ́ Mósisə. Mambéndá mâ na balakuwa-bá-mudî bâ m mə̌ ɛ́ tyə́ mbúŋ tɛ́ŋgɛnɛ nji ɛni ɛtfûm. 22Nji ɛni ɛ dí nána, mɔtɛ́ awə̌ a dúbɛ́ Yésu Krísto, mɔ́ ǎ tyə́ sîm á wusú wú Dyǔ. Mapəlán má shiyǎ á mɔʼ awə̌ a dí mɔʼ a Júda tɔ mɔʼ awə̌ a shiyǎ mɔʼ a Júda. 23Mɔʼ ansə́sə̌n a mə́ ɛ bwə̌ wubî na bá tíŋganiyǎ ɛ́ kwisí wulɔʼ wú Dyǔ. 24Ndé, Dyǔ á ɛ́tútú jabeya lí nsimá m mɔ, lí núŋí baʼ ngə bá tyə́bíní sîm á wusú wú mɔ. Lí bə́kí nsimá mû ngə́ŋgə̂n. Dyǔ lí bwə́lí nâni á Yésu Krísto álí kɔtɛ baʼ ábə́ dúbɛ́ mɔ́. 25Dyǔ lí bə́kí mɔ́ ngə jabeya álí wá á mílú mí sɛ. Na baʼ bá wɔ́ŋ lilaksɛ lí wubî á ɛ́tútú nána bá dúbɛ́ mɔ. Dyǔ lí bwə́lí nâni, álí lúfú baʼ básə́sə̌n nána lí tyə́bí sîm. Á púndá ɛ nyakə́ Dyǔ lî n wɛnsán bâʼ, lí kɔ́ksɛ̌ baʼ ábə́ bá bílí ɛ́ bwə wubî. 26Ndé ɛ́tɛ̂n Dyǔ lí lúfú baʼ nána lí tyə́bí sîm. Ti lí lúfú bâʼ nána lí kwisi ká njá awə̌ a dúbɛ́ Yésuwə.
27Ngə ɛ́ díní nâ, yán sí lɔ́líní ɛ kfǔm mákɛ́ á ngingi? Sí kfǔm mákɛ́ má sɛ á ngingi á ɛ́tútú nána sí nǎn mbéndá? Ǎyi. Sí kfǔm mákɛ́ má sɛ á ngingi á ɛ́tútú nána, dúbɛ álə́ sí dúbɛ́ní Yésu Krísto lɔ́ lí bwə́lí ka sí kwísí líshuŋgɛ. 28Áfánikə̌, sí mɛ́sí nána mɔʼ ǎ tyə́ sîm á wúsú wú Dyǔ wɔ̂ á ɛ́tútú nána a dúbɛ́ Yésuwə, suká á ɛ́tútú nána ǎ nǎn mbéndá. 29Tɔ nyí kaní nána Dyǔ lí dí wɔ̂ Dyǔ lí baʼ bá Júda? Nga lí dí pə́ Dyǔ lí baʼ ábə́ bá shiyǎ baʼ bá Júda? Á mbálɛ lí dí Dyǔ á baʼ ábə́ bá shiyǎ baʼ bá Júda. 30Dyǔ lí dí Dyǔ lifɔ́ wɔ̌. Áfánikə̌ lí nǔŋ baʼ ábə́ bá bwə́lí wulɛ́na ngə baʼ ábə́ bá tyə́ sîm á wusú wú mɔ njí bá dúbɛ́ Yésu Krísto. Mulimlim nâ pə́ lí nuŋní baʼ ábə́ bá bwə́liyaní wulɛ́ná álí tyə́ sîm á wusú wú mɔ njí bɔ́ pə́ bá dúbɛ́ Yésu Krísto. 31Sɔnsɔ́nǎn yə̌ sí byání? Ɛ́yî ɛ́ dí yə̌ nána sí byá nána, ngə Dyǔ lí núŋíní baʼ ngə baʼ ábə́ bá tyə́bí sîm á wúsú wú mɔ á ɛ́tútú nána bá dúbɛ́ Yésu Krísto ɛ́ lúfú nána baʼ bá sə̌ pə́ ɛ nǎn mambéndá? Ǎyi, ɛ́ shiyǎ nâ. Ndé yə̌ ɛ́yə́ mbéndá ɛ̌ byání yɔ́ sí bándíní makɛ́ á wə́.
Currently Selected:
Rômə 3: bwt
Highlight
Copy
Compare
Share
Want to have your highlights saved across all your devices? Sign up or sign in
