Rômə 4
4
Dúbɛ lɔ́ lî n bwə ka Dyǔ lí kásí Ábrahâmə
1Yə̌ kə́ sí tíŋgání ɛ byá tɛ́ŋgɛnɛ sáŋ n sə a nyakə́ Ábrahâmə? Yə̌ ɛ̂ m bwəlan á púndá ɛ́ mɔ? 2Njí Ábrahâmə a n tyə́ sîm á wusú wú Dyǔ á ɛ́tútú ɛ́ misam ámə́ a m bwəní, ní a n wɔ́ŋ njɔm ɛyə̌ ɛ bwə́lákí mɔ́ a kfûm ɛ́kɛ́ á ngingi, ndé a sî wɔ́ŋ njɔm ɛyə̌ a kfumákíní ɛkɛ́ á ngingi á wusú wú Dyǔ. 3A púlakiyǎ ɛ́ bwə nâ. Ɛyala ɛ́ Dyǔ ɛ́ byábí nána, “Ábrahâmə a n dúbɛ́ Dyǔ, á ɛ́tútú ɛ́ dúbɛ lí mɔ, Dyǔ lî n nuŋ mɔ́ ngə mɔʼ awə̌ a tyə́bí sîm á wúsú wú mɔ.” 4Mɔʼ awə̌ ǎ bwə ɛbulú a lɔlí ɛ kwisí nsáwu m mɔ. Nsáwu mû n sɛ̌ ɛ́ bá ngə jabeya ndé ɛ dí yǔm ɛ́yə́ a lɔlí ɛ kwisi á ɛ́tútú nána a mə́ ɛ nyítí ɛdiʼ. 5Ndé njí mɔʼ a bwə́liyǎ ɛbulú, ti a bándí nlə́m m mɔ nána ngə a dúbɛ́ní Dyǔ yɔ̂ ǎ tyə́ní sîm á wusú wú Dyǔ, ní Dyǔ álə́ lí bwə́lí baʼ ábə́ bá bwə́lí wubî bá tyə́ sîm á wúsú wú mɔ, lí nuŋ mɔ́ ngə mɔʼ awə̌ a tyə́bí sîm á wusú wú mɔ á ɛ́tútú nána a dúbɛ́ mɔ́. 6Mulimlim nâ kə̂ŋ Devídə a m byání tɛ́ŋgɛnɛ wunam wú Dyǔ na baʼ bá Dyǔ na baʼ ábə́ bá tyə́bí sîm ká ngə bá bwə́liyaní ɛbulú ká ɛfɔ́. 7Kə̂ŋ Devídə a m byá nána, “Wunam wú bá na baʼ ábə́ Dyǔ lí mə́ní ɛ laksɛ́ mawusə́ má bɔ, ti a fyákú mawusə́ má bɔ. 8Wunam na mɔʼ awə̌ Sáŋgúwə́ Dyǔ lí sî pɔŋání pə́ wubî wú mɔ.”
9Nâ ɛ́ dí yə́ nána ɛ́ sikpú bâ ábə́ bá bwə́líní wulɛ́ná bɔ́ bá kwisí wunam ábə́ kə̂ŋ Devídə a byábíní, tɔ baʼ ábə́ bá bwə́líyání wulɛ́ná bɔ́ pə́ bá kwisí bɔ́? Sí mə̌ ɛ kɔ́sɛ́ ɛ́ byá nána kâti ɛ Dyǔ ɛ byábí nána, Ábrahâmə a n dúbɛ́ Dyǔ, na á ɛ́tútú ɛ́ dúbɛ lí mɔ, Dyǔ lî n kasí mɔ́ ngə mɔʼ awə̌ a tyə́bí sîm á wúsú wú mɔ. 10Njá púndá Dyǔ lî n bəŋní mɔ́ nána a dí mɔʼ awə̌ a tyə́bí sîm á wusú wú mɔ? Ɛ́yínán ɛ̂ m bwəlan ɛtî ɛ́yə́ bá sî m mə́ní mɔ́ ɛ bwə wulɛ́ná tɔ ɛtî ɛ́yə́ bá mə́ní mɔ́ ɛ bwə̂ wulɛ́ná? Ɛ́yínán ɛ̂ m bwəlan ɛtî ɛ́yə́ bá sî n bwə̂ mɔ́ wulɛ́ná. 11Bá bwə́lí mɔ́ wulɛ́ná ɛtî ɛ́yə́ Dyǔ lî n mə́ní mɔ́ ɛ kwisi. Wulɛ́ná wú mɔ wú bílí ɛyəmblan ɛ́yə́ ɛ́ mɛ́sí nána a tyə́bí sîm á wusú wú Dyǔ á ɛ́tútú nána a dúbɛ́, ká ngə ɛ díní nána, ɛtî ɛ́yə́ bâ n kufúní mɔ́ á wusú wú Dyǔ bá sî n mə mɔ́ ɛ bwə wulɛ́ná. Ɛ́yínán ɛ́ m bá nána Ábrahâmə a lɔlí ɛ bá sáŋ a baʼ básə́sə̌n ábə́ bá nan bwə́líyání wulɛ́ná, na baʼ ábə́ bá tyə́bí sîm á wusú wú Dyǔ á ɛ́tútú nána bá dúbɛ́ Dyǔ. 12Ɛ́yî ɛ́ bílí pə́ nána a lɔlí pə́ ɛ bá sáŋ á baʼ ábə́ bá bwə́líní wulɛ́ná ábə́ bá dúbɛ́ Dyǔ mulimlim ngə sáŋ n sə Ábrahâmə a n dúbɛ́ní ɛtî ɛ́yə́ bá sî m mɛ mɔ́ ɛ bwə wulɛ́ná.
Dúbɛ lɔ́ lí bwə́lí ka mɔʼ a kwísí yə̌ ɛ́yə́ Dyǔ lí fílíní likaʼ
13Á púndá ɛyə̌ Dyǔ lí fílíní likaʼ na Ábrahâmə na nja m mɔ nána lí bə bɔ́ nkínshíyə, ndé Dyǔ lí byábí nâni á ɛ́tútú nána Ábrahâmə a n dúbɛ́ mɔ́ na Dyǔ lî n nəŋ mɔ́ ngə mɔʼ awə̌ a tyə́ sîm á wusú wú mɔ. 14Njí yǔm ɛ́yə́ Dyǔ lí fílíní likaʼ nána lí bə̂, ɛ́ bəkan á baʼ ábə́ bá wú mbéndá, ní dúbɛ lí wɔ́ŋiyǎ njɔm na nána likaʼ lí Dyǔ lí shiyǎ ká yǔm. 15Ɛ́yínán ɛ́ dí nâ á ɛ́tútú nána, Mbéndá ɛ̌ panan bâ pí ɛ Dyǔ. Ndé á fǔm ábə́ mbéndá ɛ́ shiyaní, baʼ bá sɛ̌ ɛ́ kfún mbéndá. 16Áfánikə̌, Dyǔ lí bə̂ bâ likaʼ lî á ɛ́tútú ɛ́ dúbɛ. Lí bwə́lí nâ á ɛ́tútú nána ɛ́ bá nána nsimá m mɔ mɔ́ m bwə́lí ka lí pɔŋ jyá n Ábrahâmə ɛtî ɛfɔ́ na bitî bísə́sə̌n nána lí bə yə̌ ɛ́yə́ a fílíní likaʼ nána lí bə. Lí sî fá likaʼ wɔ̂ á baʼ ábə́ bá nan mbéndá. Lî n fá pə́ likaʼ á baʼ básə́sə̌n ábə́ bâ n dúbɛ́ Dyǔ ngə Ábrahâmə a n dúbɛ́ Dyǔ. Ábrahâmə a dí sáŋ n sɛ mɔʼ ansə́sə̌n. 17Ɛ́ tílání á kâti ɛ́ Dyǔ nána, Dyǔ lí pɔ́ŋí Ábrahâmə nána, “M mə́ wə ɛ bwə sáŋ a bikumbu jǐta.” Áfánikə̌ Ábrahâmə mɔ́ a dí sáŋ n sɛ á wusú wú Dyǔ. Dyǔ álə́ Ábrahâmə a dúbɛ́ní, lɔ́ lí dí Dyǔ álə́ lí bə̂ bâʼ ábə́ bá mə́ ɛ wá luŋgɛ́, na lɔ́ lí byá na byə̌m ábə́ bí shiyǎ bí bá. 18Ábrahâmə a m dúbɛ́ Dyǔ na a m bán nlə́m m mɔ́ á lɔ́, ká ngə á mǐ má mɔnyuŋ, yándá ká lífɔ́ lí sî n bá álə́ lí lúfú nána misam ámə́ Dyǔ lî m byá nána lí bwəlan, mí bwəlan. A n dúbɛ́ nána mɔ́ mú m bá, “Sáŋ a bikumbu jǐta” ngə Dyǔ lí pɔ́ŋíní mɔ́ nána, “Nja n wə m bwi átin ngə títí.” 19Ɛtî ɛ́yə́ Dyǔ lí pɔ́ŋíní Ábrahâmə nâ, Ábrahâmə a bílí ká mbúki ɛ mimbvú. A m bí na mú mə̌ ɛ́ jin. A m bí pə́ nána Sará a m bá ɛkumba ɛ́ mwalân. Ndé dúbɛ́ lí mɔ lí sî shul. 20Nlə́m mú Ábrahâmə m bíliyǎ ɛ́ kwəlí á likaʼ álə́ Dyǔ lî n bəní mɔ́. Ndé dúbɛ lí mɔ lí bwə mɔ́ a kpú, na a n kɛsí Dyǔ. 21A n dúbɛ́ bwǎm nána Dyǔ lí bwə̌ yə̌ ɛ́yə́ a fílíní likaʼ nána lí bwə. 22Áfánikə̌ dúbɛ lí Ábrahâmə, lí bwə́lí Dyǔ lí nuŋí mɔ́ ngə “Mɔʼ awə̌ a tyə́bí sîm á wusú wú mɔ” 23Ɛyala ɛ́yə́ ɛ́ tílání nána, “Dyǔ lí kwísí mɔ́ ngə mɔʼ awə̌ á tyə́bí sîm á wusú wú mɔ”, ɛ́ shiyǎ wɔ̂ á Ábrahâmə. 24Biyala bínán bí dí pə́ á sə́. Dyǔ lí kwisí pə́ sə́ ábə́ sí dúbɛ́ ngə baʼ bá mɔ lɔ́ lí púmú Yésuwə Sáŋgúwə́ n sɛ. 25Dyǔ lí bə́kí Krísto álí wá á wubî wú sə. Dyǔ lí púmú mɔ́ álí bwə nána sí wɔ́ŋ nji álí tyə́ sîm á wusú wú Dyǔ.
Currently Selected:
Rômə 4: bwt
Highlight
Copy
Compare
Share
Want to have your highlights saved across all your devices? Sign up or sign in
