Mátyo 27
27
Bá kánání Yésuwə á Páyíletə
1Mushú pilílí, baprîsə bá nə̂n na bankúmə́ básə́sə̌n bá bútí ɛ wikí myánu ngə bá búlúní Yésuwə. 2Ti bá fílí mɔ́ mgbɔ́kɔbi, bá kánání mɔ́ á Páyíletə, awə̌ kə̂ŋ ɛ ɛkumbu ɛ́ Róma ɛ shumíní álí janiyá baʼ bá pɛsi ɛ mbú ɛ Judéya á púndá ɛni.
Liwá lí Júdasə
3Á púndá ɛyə̌ Júdasə, mɔ awə̌ a súmbí Yésuwə, a wúkíní nána bá nyítí mbakú álí búlú Yésuwə, a wúkí wubî á nlə́m m mɔ́ átin jǐta, á lífəŋgə̌ álə́ a bwəlíní. Ɛ́yî ɛ́ bwə́lí mɔ́ a núŋí kápa ɛ́yî mûm málán, ɛ́yə́ baprîsə bá nə̂n na bankúmə́ bá bə́kíní mɔ́, a kǐ yɔ́ ɛ timbi á bɔ́. 4Ti a byábí nána, “M bwəlí wubî álí súm mɔ awə̌ a bwə́liyǎ ká yǔm, awə̌ bá búlúní ngɛ̂ŋ ngɛŋ.” Bá pushú mɔ́ nána, “Yán ɛyî ɛ́ míndíní sə́? Mbúŋ ɛ wə yɔ́ ni” 5Ngə Júdasə a wúkíní nâ, a shwátí bɔ́ ngáʼ ɛni áshí áfə́ bá bílíní á Tɛ́mpɛl. Ngə a shwátíní yɔ́, a nyítí, ti a kǐ ɛ kəlan. 6Ti baprîsə bá nə̂n bá shwínjí ngáʼ ɛni, ti bá byábí nána, “Ngáʼ ɛnín ɛ dí ngáʼ ɛ ɛbɛnj. Áfánikə̌, mbéndá ɛ bə́kiyǎ wúnja nána bá pútan ngáʼ ɛni na ngáʼ ɛ Tɛ́mpɛl.” 7Ngə bá tɔ́njɔ́ní tɛ́ŋgɛnɛ ngáʼ ɛni, bá núŋí ngáʼ ɛni ti bá yándí libú lí ndɔʼ á mɔ́ awə̌ a bílí ɛ bwə̌ mbə̌ ɛ́ ndɔʼ. Bá yándí lɔ́ álí wushí bakən áwə́. 8Á ɛ́tútú ɛ́yî bá bə̌ŋ fǔm bû bá “Libú lí ndɔʼ lí makǐ” kə́ŋ ta wúyə́. 9Ɛ́yî ɛ́ bwə́lání álí lwínjí biyala ábə́ nlakuwa a mudî Jɛrɛmáya a byábíní nána, “Bá nǔŋ kápa mûm málán ɛ́yə́ n dí nsɔŋgí n ngáʼ ámə́ baʼ bá Ísrɛl bá púshúní álí sáwu á nlú m mɔ, 10ti bá bwəlan ngáʼ ɛni álí yǎn libú lí ndɔʼ lí mɔ awə̌ ǎ bwə mbə̌ ɛ ndɔʼ. Nâ Dyǔ lí m pɔŋní mi nána m bwə.”
Páyíletə a káyísí Yésuwə
11Á púndá ɛni, Yésuwə a tyə́bí á múkáʼ á wúsú wú Páyílɛtə awə̌ a bílí ɛ janiyá pɛsi ɛ mbú ɛ Júda. Ti Páyílɛtə a kɔndɛ́ mɔ́ nána, Wə̌ ɛ dí kə̂ŋ ɛ baʼ bá Júda? Yésuwə a pushú mɔ́ nána, “Ngə ɛ byábíní.” 12Ndé Yésuwə a byábiyǎ ká yǔm tɛ́ŋgɛnɛ misam ámə́ baprîsə bá nə̂n na bankúmə́ bá bándíní mɔ́ á nlú. 13Yɔ́ Páyílɛtə a kɔndɛ́ní mɔ́ nána, “Ɛ wúkiyǎ mísam mínán mísə́sə̌n ámə́ baʼ bánán bá byání tɛ́ŋgɛnɛ wə?” 14Kánâwə̌ Yésuwə a byábiyǎ ɛ́yala ká ɛfɔ́. Ɛ́yî ɛ́ bwə́lí Páyílɛtə a bílí manyáká jǐta.
Bá túmbí mbakú álí búlú Yésuwə
15Mbú tɛ́ á ŋgandu ɛ Litúm á Mǐn tɛ́, ɛ́ bílí ɛləm ɛ́ Páyíletə álí fúl mɔ nfɔ́ á bíbuwa awə̌ baʼ bá sákíní nána a fúl. 16Mɔ a bibuwa nfɔ́ a bílí áwə́ á púndá ɛni, Jísos Barábasə. Mɔ ani mɔ a nsə́sə̌n a m bí mɔ́ á ɛ́tútú ɛ́ mísam míbî ámə́ a bílíní ɛ bwə. 17Áfánikə̌, ngə limuti lí búmíní á fǔm bú Páyíletə, ti a kɔ́ndɛ́ bɔ́ nána, “Njá nyí saʼní nána n fúl á bíbuwa, Barábasə tɔ̌ Yésuwə awə̌ bá bəŋní bá Krísto?” 18Páyíletə a bwəlí nâ á ɛ́tútú nána, a m bí bwǎm nána bajaniya bá bə́kí Yésuwə a mákɛ́ má mɔ á ɛ́tútú nána bá bílí mɔ́ ɛ wú ŋgɔŋgí. 19Ngə Páyíletə a shumání á ɛ́buŋ ɛyə̌ a bílíní baʼ ɛ káyísí, mwalân m mɔ a lúmí ndúm nána, “Ɛ si fá ɛ́kɛ́ ɛ́ wə á múkáʼ m mɔ ani awə̌ a bwə́liyǎ ká yǔm. M míní mɔ́ á nlú m wuyɔ́ ámə́ n tákí mi jǐta wudû wú yánə́.” 20Bá prísə bá nə̂n na bankúmə́ bá púŋgú baʼ milə́m á mábum álí pɔ̌ŋ Páyílɛtə nána a máku Barábasə, ndé a nyíti mbakú nána bá búlu Yésuwə. 21Áfánikə̌, Páyílɛtə a kɔndɛ́ baʼ bâ, “Á baʼ bánán bábɛ̂ njá nyí saʼ ní nána n fúl á bíbuwa?” Bɔ́ baʼ básə́sə̌n bá púshú mɔ́ nána, “Barábasə” 22Ti Páyíletə a kɔndɛ́ bɔ́ nána, “Yán kə́ nyí saní nána m bwə na Yésuwə awə̌ bǎ bəŋní Krísto?” Bá púshú mɔ́ nána, “Bumí mɔ́ á mbásá” 23Ndé Páyíletə a kɔndɛ́ pə́ bɔ́ nána, “Á yə̌? Wubî wúfə́ a bwəlíní?” Ti limuti lí tímbí ɛ kán nána, “Bumí mɔ́ á mbásá!” 24Á púndá ɛyə̌ Páyíletə a míní nána a tíŋgániyǎ ɛ́ pɛlán líkani lí bɔ tɛ́ŋgɛnɛ mbakú ɛ mukáʼ n Yésuwə, álí báŋ nána baʼ bâ bá tíŋgání ɛ panán mpungú, yɔ́ a núŋí madí, a wú makɛ́ má mɔ á wusú wú baʼ bá, á byábá nána, “Makɛ́ má myə má shíyá á líwá lí mɔ anínán. Mbúŋ ɛ nyə yɔ̂ni.” 25Limuti lí púshú nána, Sí púshú nána makǐ má líwá lí mɔ má bá sə́ á mílú mí sə́ na nja n sə. 26Ti Páyíletə a fúlí Barábasə á bíbuwa. A bəkí wunjá nána sója ɛ́ shwɛ́nji Yésuwə, nána bá kə̂ bá bumí mɔ́ á mbásá.
Sója ɛ́ nyásí Yésuwə
27Sója ɛ́ Páyíletə ɛ́ núŋí Yésuwə, ɛ́ kánání mɔ́ á ɛbúka ɛ́ janiya, ti bá látí sója ɛ́yíní ɛ́sə́sə̌n áwə́. 28Bá fúlí Yésuwə mabaʼ á nyǔ, ti bá fílí mɔ́ nku n túnǎ á nyǔ ámə́ n wátání nku n kə̂ŋ. 29Bá núŋí milâʼ mí máyɔ̌ bá támbú mɔ́ ɛkpútú ɛ́yə́ ɛ́ bílí ngə wulâʼ wú kə̂ŋ, bá fílí mɔ́ yɔ́ á nlú. Bá fílí mɔ́ ntfúm á ɛ́kɛ́ ɛ́ mbâ, bá tɔ̌ mabɔ́ŋ á wusú wú mɔ álí nyasí mɔ́. Bá bílí ɛ byá nána, “Ɛdúbɛ́ ɛ́ bə́kání wə ǎ kə̂ŋ ɛ baʼ bá Júda.” 30Ti bá bútí ɛ pɛ́njí bikfwɛn á nyǔ ɛ́ mɔ, ti bá núŋí ntfúm m mû bá lábá mɔ́ á nlú. 31Ngə bá málíní álí nyasi mɔ, bá fúlí mɔ́ nku mû á nyǔ, ti bá fílí pə́ mɔ́ mabaʼ má mɔ á nyǔ. Ti bá nyítání mɔ́ álí kə mɔ́ ɛ bumi á mbásá.
Bá búmí Yésuwə a mbásá
32Ngə sója ɛ́ bílíní ɛ nyítán Yésuwə á nkí, yɔ̂ bá búmání mɔ nfɔ́ awə̌ a fí á nkí n Sirínə, awə̌ dǐn lí mɔ lí bílí Sáyímɔnə. Sója ɛ́ bwə́lí mɔ́ a pə́mbí mbásá ɛ́ Yésuwə, nána a pɔ̂ŋ mɔ́ á mbís. 33Bá pílí á fǔm ábə́ bá bəŋní bá Gólgóta, fǔm ábə́ yándá lí mɔ lí dí nána, “Fǔm bú Ɛfis ɛ́ Nlú.” 34Áwə́ bá bə́kí Yésuwə mǐm ámə́ bá pútání na yǔm ɛ́yə́ ɛ́ ywi álí mwá. Ndé ngə a wúlání mɔ́ á nsu, a báŋí álí mwá mɔ́. 35Á púndá ɛyə̌ bá mə́ní mɔ́ ɛ bumí á mbásá, bá wáŋgú mbambá álí kaʼ mabaʼ má mɔ. 36Ngə bá málíní álí kǎ mabaʼ má mɔ, bá shúmání áshí bá tátíyá mɔ́. 37Á nlú m mɔ ámǐn, á mbásá, bá tílí yándá álə́ bá búlúní mɔ́ áwə́, nána, “Yésuwə mɔ́ anín, kə̂ŋ ɛ baʼ bá Júda,” 38Ti bá búmí bajíb bábɛ̂ á mbásá á fǔm bû, nfɔ́ a ɛ́kɛ́ ɛ́ mbâ ɛ́ Yésuwə, aníní á ɛ́kɛ́ ɛ́ mwɛ ɛ́ mɔ. 39Baʼ ábə́ bá bílí ɛ túm á pɛsi ɛni bá míní Yésuwə, bá pə́kí mílú ti bá shwátí mɔ́ biyə 40nána, “Ɛ pɔŋí nána ɛ́ gbí Tɛ́mpɛl ɛ bwə́lán madû málán álí lúŋ yɔ́. Njí ɛ dí mbálɛ nána ɛ dí Mwǎn a Dyǔ shuŋgɛ́ nyǔ ɛ́ wə! Shǔl áshí á mbásá ɛni.” 41Bá prísə bá nə̂n, balɛ̂ bá mbéndá na bankúmə́ bá bílí ɛ nyasí Yésuwə nána, 42“Ǎ shuŋgɛ́ baʼ bápə́pə̂, ndé a púliyǎ ɛ́ shuŋgɛ́ mɔ́mə̌n. Njí á mbálɛ ɛ dí kə̂ŋ ɛ baʼ bá Júda shǔl áshí á mbásá ɛni sɔnsɔ́nǎn, áfâ sí dúbɛ́ní nána ɛ dí Awə̌ bá Wɔ́kílíní.” 43A dúbɛ́ nána Dyǔ lí dí na mɔ́, na nána a dí Mwǎn a Dyǔ. Sí mín kə́ njí Dyǔ lí shuŋgɛ́ mɔ́ sɔnsɔ́nǎn. 44Bajíb ábə́ bá búmíní á nsaŋ m mbásá ɛ́ mɔ bɔ́ pə́ bá shwátí mulimlim mú mbyá á Yésuwə.
Yésuwə a wúlí
45Á kɔsi ɛ lisín, ɛfínjan ɛ́ kfútí wǔm másə́sə̌n kə́ŋ ta ngə́ŋ ɛ́lán. 46Ngə ngə́ŋ ɛ́lán ɛ́ pílíní, Yésuwə a búní na ŋgɔli ɛnə̂n nána, “Ɛlɔ́yí, Ɛlɔ́yí, lámá sábák táni”, ɛ́yə́ yándá lí díní nána “Dyǔ lí myə, Dyǔ lí myə, yə̌ ɛ́ bwə́lí ka ɛ mákú mî?” 47Ti baʼ bafɔ́ ábə́ bá tyə́bí fâ á nsaŋ, ngə bá wúkíní nâ, bá byábí nána, “Wúkání ngə ǎ bəŋní Ɛlayja nána a pâ a wúnjan mɔ́” 48Ti mɔ nfɔ́ a kǐ mifílí, á núŋí ntfúm a sɔŋí kushá, a júbí yɔ́ á mǐm ámə́ má kpɛ́n, ti a fílí yɔ́ á nsú m Yésuwə nána a mwá. 49Baʼ á bání bá bílí ɛ byá nána, “Nyí lám nyǔ, sí mín njí Ɛláyíja á paʼ mɔ́ ɛ wúnjan” 50Ti Yésuwə a búní ɛsakí ɛ́ líjiʼ na ngɔli ɛnə̂n, ti nlə́m m pátílí mɔ́. 51Áfâ áshí áshí sanji ɛyə̌ ɛ kabí Tɛ́mpɛl átin, ɛ nyabí átin muŋgu mábɛ̂, butya ámǐn ta áshí. Ndɔʼ ɛ sákí, malɛ́ má gbílí, 52midim mí púwání. baʼ jǐta ábə́ bá n dúbɛ́ Dyǔ ábə́ bá m mə̌ ɛ́ wá, bá púmú á luŋgɛ́, 53bá nyítí á mídim mí bɔ, ti á púndá ɛyə̌ Yésuwə a məní ɛ pumú bá kí á nkí n Jerúsálɛmə átin. Áwə́ á nkí átin, baʼ jǐta bá míní bɔ́. 54Nlú n sója na sója ɛ́pə́pə̌ ɛ́yə́ ɛ́ bílí ɛ́ tátí Yésuwə, ngə bá míníní ngə ndɔʼ ɛ sákíní, na misam mísə́sə̌n ámə́ mí bwə́lání, bɔ̌ŋ wú kúbí bɔ́ jǐta. Bá byábí nána, “Á mbálɛ, mɔ anín a bílí Mwǎn a Dyǔ!” 55Balân jǐta ábə́ bá bílí ɛ pɔŋ Yésuwə á mbís butya á Gálilî, ábə́ bá bílí pə́ mɔ́ ɛ wúnjan, bá tyə́bí mǎ kfwáŋ bá tátíyá mísam mísə́sə̌n ámə́ mí bílí ɛ́ bwəlan. 56Á ndíngí m bɔ, bá bílí Meríyə́ Magdalɛnə, Meríyə́ nyǎ mú Jémsə na Jósɛfə na nyǎ m bǎn bá Zɛ́bɛdíyə.
Lidímí lí Yésuwə
57Ngə nkwin m pílíní, ndi-a-mɔ nfɔ́ awə̌ a fí á nkí mú Arímatáyasə a pílí. A bílí mɔ nfɔ́ á baʼ ábə́ bá bílí ɛ pɔŋ Yésuwə á mbís. Dǐn lí mɔ lí bílí Josɛ́fə. 58Josɛ́fə a kǐ ɛ mínán Páyíletə nána a bə̂ mɔ́ wunja álí nǔŋ mbimba m Yésuwə. Páyíletə a bəkí mɔ́ wunja nána bá bə́ mɔ́ mbimba m Yésuwə. 59Ti Josɛ́fə a núŋí mbimba m Yésuwə, a pílání mɔ́ na mbɔ́m ɛ kɔ́nə́. 60A dímí mɔ́ a ndim ámə́ bá shəlíní á lílɛ́ átin. Ndim mû m bílí ndim n kɔ́nə́ ámə́ Josɛ́fə mɔ́mə̌n a n wɔ́ŋní. Ngə a málíní, a mákí lilɛ́ línə̂n álí kɔ́l nsu mú ndim, ti a kǐ mɔ́. 61Meríyə́ Magdalɛ́nə na Meríyə́ awə̌ a yɛ́ Jémsə na Josɛ́fə, bá búkɛ́ á wə́ á nsaŋ mú nsú m ndim.
Páyílɛtə a lúmí sója álí kə ɛ́ tátí ndim m Yésuwə
62Mushú m bǔn bú kɔ́nə́, ábə́ bú bílí Bǔn bú Líkɔ́mbɛ wú baʼ bá Ísrɛl, baprîsə bá nə̂n na Bafárisî bá búmí ti bá kí ɛ mínán Páyílɛtə. 63Ti bá pɔ́ŋí mɔ́ nána, “A sísə́, sí dí wə̌ ɛ kani nána á púndá ɛyə̌ m pɔŋa a matúm ani a bílíní wə̌ luŋgɛ́, a byábí nána, á pumu á luŋgɛ́ á mbís ɛ madû málán. 64Áfánikə̌, bə̌ ndaki nána bá míndiya ndim m mɔ kə́ŋ kə́ŋ madû málán má lwínjí. Ɛ́yî ɛ́ bwə nána bawútú bá mɔ bá si púlá ɛ́ jíb mbimba m mɔ, ngə bá pɔ̌ŋní baʼ nána a pumu á luŋgɛ́. Ní matúm mâ má bá mánə̂n litúm ámə́ a n kɔsɛ́ní ɛ byá.” 65Ti Páyíletə a pɔŋí bɔ́ nána, Núŋáni mɔ a sója nyí kánán mɔ́ á ndim, a dyɛ á wə́ a míndíyá ndim álí bwə nána yǔm ɛ́ si bwəlan. 66Yɔ̂ baprîsə bá nə̂n na Bafárisî bá mákúní fǔm bú Páyíletə, bá kí á ndim bá fílí ɛyəmblan lilɛ́ álə́ bá bwə́lání álí kɔ́ nsu n ndim, ti bá mákú sója áwə́ álí bwə nána bá si jíb mbimba n Yésuwə.
Currently Selected:
Mátyo 27: bwt
Highlight
Copy
Compare
Share
Want to have your highlights saved across all your devices? Sign up or sign in
