Mátyo 26
26
Baʼ bá nə̂n bá Ísrɛl bá wíkí mwánu álí búlú Yésuwə
1Ngə Yésuwə a malíní álí lɛ́fú mísam mínán mísə́sə̌n, yɔ́ a byábíní á bawútú bá mɔ nána, 2“Nyí lɔ́lí ɛ bí nána á mbís ɛ madû mábɛ̂ ŋgandu ɛ Litúm á Mǐn ɛ́ bá. Á bǔn bû, yɔ̂ bá bəní Mwǎn a Mɔnyuŋ á mákɛ́ má baʼ ábə́ bá bumí mɔ́ á mbásá.” 3Ndé bá prísə bá nə̂n na bankúmə́ bá búmí á ndáʼ ɛ́ Káyífasə, Prísə a nə̂n. 4Áfâ bá bílíní ɛ wikí mwánu álí wálí Yésuwə á wúsɔmɔ́n átin, álí búlú mɔ́. 5Ndé bá byábí nána, “Sí si bwə̌ nâ á bǔn bú ŋgandu á ɛ́tútú nána baʼ bá panán mpungú.”
Mwalân nfɔ́ a wɔ́kílí Yésuwə á nkí m Bɛ́táni
6Á mbís ɛ púndá, Yésuwə a bílí á Bɛ́táni á ndáʼ ɛ́ Simɔ́nə, mɔ awə̌ a mə̌ ɛ́ wɔ́ŋ nyámbɛ̂ a akúnyə. 7Ngə Yésuwə a bílíní ɛ dyá lídyá, mwalân nfɔ́ a pílí á mɔ́ na mbam ɛyə̌ a n lwínj na labínda ɛ́yə́ ɛ n wɔ́ŋ ɛ́shwinj ɛ mbâ, ɛ́ kpú pə́ nkfun. Ti a kfú yɔ́ á nlú n Yésuwə. 8Ndé ngə bawútú bá mɔ bá míníní nâ bá kfwí, ti bá kɔ́ndɛ́ nána, “Yán mwalân ani ǎ fɛn ní labínda ngə ɛni? 9Ní bá súmbí labínda á nkfun m mbímbí, bá wúnján bâʼ bá líban.” 10Yésuwə a m bí yə̌ ɛ́yə́ bá bílíní ɛ byá. Áfánikə̌ a pɔŋí bɔ́ nána, “Yə̌ nyí takíní mwalân ani? Yə̌ ɛ́yə́ a bwəlíní mi ɛ dí nsam m mbâ. 11Baʼ bá líban bá bá na nyə́ ɛtîtɛ́, ndé n sî m bá na nyə́ ɛtîtɛ́. 12A kfú labínda á nlú m myə álí busán mî álí wushí mî. 13Á mbálɛ nǎn pɔ̌ŋ nyə́ nána, ká áfə́ bá pɔŋní ndúm ɛ mbâ á nkínshíyə nsə́sə̌n, bá byá yə̌ ɛ́yə́ mwalân ani a bwəlíní álí kaní mɔ́.”
Júdasə a pushú álí súm Yésuwə
14Á mbís ɛ púndá muwútú nfɔ́ átitîn na bawútú bá Yésuwə dyǔm na bábɛ̂, awə̌ bá bəŋní Júdasə Ískáryɔtə, á kǐ ɛ tán baprîsə bá nə̂n. 15Ti a byábí nána, “Yə̌ nyí bəní mi njí m bəkí nyə́ Yésuwə ngə nyí kúní mɔ́?” Áfánikə̌, bá laŋí kápa mûm málán ti bá bə́kí mɔ́. 16Butya á púndá ɛni, a butí ɛ wikí mwánu álí súmbí bɔ́ Yésuwə.
Yésuwə a dílí lidyá lí Litúm á Mǐn na bawútú bá mɔ
17Á bǔn bú wusúwə wú ŋgandu ɛ blɛ̂t ábə́ wú wɔ́ŋiyǎ ɛfulan, bawútú bá pílí álí kɔndɛ́ Yésuwə nána, “Áfə́ wə ɛ̌ saní nána sí búnsan wə lidyá lí Litúm á Mǐn?” 18Ti Yésuwə a lúmí bɔ́ á nkí átin á mɔ nfɔ́ nána bá pɔ̌ŋ mɔ́ nána mulɛ̂ a byábí nána, “Púndá ɛ́ myə ɛ mə́ ɛ paʼ. Á ndáʼ ɛ́ wə mi na bawútú bá myə sí dyání lidyá lí Litúm á Mǐn. 19Áfánikə̌, bawútú bá bwə́lí ngə Yésuwə a m pɔŋní bɔ́, ti bá búnsání lidyá lí Litúm á Mǐn. 20Ngə nkwi m pílíní, Yésuwə na bawútú bá mɔ bá shúmání álí dyá lídyá lî. 21Ngə bá bílíní ɛ dyá, Yésuwə á pɔŋí bɔ́ nána, Á mbálɛ nǎn pɔ̌ŋ nyə́, mɔ nfɔ́ á wútitîn wú nyə á bə mî á mákɛ́ má baʼ bá ɛkfwɛyí.” 22Ɛ́yî ɛ́ bwə́lí bawútú bá mɔ bá wɔ́ŋ ndutu á mílə́m jǐta. Bá bútí mɔ́ ɛ kɔndɛ nfɔ́ nfɔ́ nána, “A Sáŋgúwə́ n dúbɛ́ nána suká mî.” 23Yésuwə a pushú, “Mɔ awə̌ sî mɔ́ sí jub blɛ̂t á pán átin á mulimlim m púndá mɔ́ á súm mî. 24Mwǎn a Mɔnyuŋ á wá ngə ɛ́ tílání, ndé bwemba wú bá ná mɔ awə̌ á súm mɔ́. Ní ɛ̂ m bá bwǎm nána bá si yɛ́ mɔ́.” 25Júdasə, awə̌ á súm mɔ́ á byábí nána, “Á mulɛ̂ mǐ?” Yésuwə a pushú nána, “Ngə ɛ byábíní.”
Lidyá lí Sáŋgúwə́
26Ngə bá bílíní ɛ dyá, Yésuwə a nuŋí blɛ̂t, a bəkí masákan á Dyǔ, ti a kabí bɔ́, a bəkí á bawútú bá mɔ, ti a byábí nána, “Nyí kú nán, nyí dyá, nyǔ ɛ́ myə yɔ́ ɛnín. 27Á mbís ɛ púndá a nuŋí mbwindí ɛ mǐm, a bə̂ masákan á Dyǔ, a bə́ bɔ́, ti a byábí nána, Nyə́ mɔ nsə́sə̌n nyí mwá. 28Makî má myə mɔ́ mán. Makî mán má dí nguʼ ɛ kɔ́nə́. Makî mán má súwání á mílú mí baʼ jǐta nána Dyǔ lí láksɛ wubî wú bɔ. 29Nǎn pɔ̌ŋ nyə́ nána, n sǐ mwá pə́ mǐm mán kə́ŋ ta á bǔn ábə́ m mwání mǐm má kɔ́nə́ na nyə́ á wúdya wú Sáŋ m myə.” 30Bá kɔ́ní mikɔ́ni mí másákan. Ngə bá málíní álí kɔ́n, bá kí á wúkul wú Ólifə.
Yésuwə á byábí ngə Píta á báŋní mɔ́ á nyǔ
31Ngə bá pílíní á wúkul ámǐn Yésuwə á pɔŋí bawútú bá mɔ nána, “Wudû wúnán nyə́ baʼ básə́sə̌n nyí kə mifílí, nyí makú mî. Nyí kə mífilí á ɛ́tútú ɛ́ yǔm ɛ́yə́ ɛ́ bwəlán mî. Ɛ́ tílání á kâti ɛ Dyǔ nána, ‘M búlú ntátiya a mílɔŋgi ti mílɔŋgi mí mɔ mísə́sə̌n mí páŋili. 32Ndé wə̌ti Sáŋ m myə a pumú mi á líwá, n kə nyə́ á wusú á Gálilî, áwə́ nyí tán ní mi.’” 33Ngə Yésuwə a malíní álí byá nâ, ti Píta a byábí nána, “Ká baʼ básə́sə̌n bá báŋí wə á nyǔ, mi n sî púlá wə̂ ɛ maku ká bwín.” 34Yɔ̂ Yésuwə a byábíní á Píta nána, “Á mbálɛ nǎn pɔ̌ŋ wə̂ nána, wudû bún byáná njúm-á-kfú ǎ kɔ́n, ɛ́ báŋ mî á nyǔ bitî bílán.” 35Píta a pushú mɔ́ nána, “Ká ɛ́ dí nána n lɔlí ɛ wá na wə, n tíŋganiyǎ wə̂ ɛ báŋ á nyǔ ká bwín.” Ti bawútú ábání básə́sə̌n bá byábí mulimlim m nsam.
Yésuwə a kání á Gɛtsɛ́máni
36Á mbís ɛ púndá Yésuwə na bawútú bá mɔ bá kí a fǔm ábə́ bá bəŋní Gɛtsɛ́máni. Ngə bá pílíní áwə́ Yésuwə á byábí á bawútú bá mɔ nána, “Nyí shúmán áfánán, mi pə́ n kə á wusú mǎ yǔm álí káni.” 37A kanání Píta, na bǎn bábɛ̂ bá Zɛ́bɛdíyə. Nlə́m m bílí mɔ́ ɛ taʼ átin, ndutu na mutakaʼ pə́ m bílí mɔ́ á nlə́m. 38Ti a pɔŋí bɔ́ nána, “Ndutu ɛyə̌ ɛ dí mî á nlə́m ɛ tíŋgání mi ɛ búlu. Nyí búkɛ fán, nyí dyɛ̂ ɛpin na mi.” 39Ti Yésuwə a maki pə́ nyǔ á wusú mǎ yǔm, a dfúŋgí nlú m mɔ áshí. A bílí ɛ káni nána, “A Sáŋ myə, njí ɛ́ lɔ́lɔ́ní wə nuŋán mî mutakaʼ mún. Ndé kánâwə̌, bwə ngə ɛ́ lɔ́lɔ́ní wə, suká ngə ɛ́ lɔ́lɔ́ní mi.” 40Ngə Yésuwə a malíní álí káni, a timbí a tání bawútú bâ bálán bá nalí wuyɔ́. Ti a byábí á Píta nána, “Yán nyí tíŋganiyaní ɛ tfúl mílə́m álí dyɛ́ ɛ́pin na mi ká háwa pɔ́? 41Nyí dyɛ̂ ɛpin, nyí káni nána Dyǔ lí si pushú nána makiksan má tán nyə́. Nlə́m n nə́ŋí ndé ngunyǔ ɛ̌ báŋ.” 42Yésuwə a timbí pə́ álí káni, ti a byábí nána, “A Sáŋ m myə, njí ɛ́ dí nána ɛ tíŋganiyǎ ɛ nuŋán mi muná m mútakaʼ mún, bwə̌ ngə ɛ́ lɔ́lɔ́ní wə.” 43Ngə a timbíní pə́, á tání bawútú bâ, bá bá wə́ ɛ nali á ɛ́tútú nána wuyɔ́ wú bílí bɔ́ á mǐ jǐta. 44Yésuwə a timbí pə́ álí káni ɛtî ɛyə̌ ɛ́ lwínjání bitî bílán á bwəlaní pə́ mulimlim m bíyala. 45A timbí á bawútú bá mɔ́, ti a byábí nána, “Nyí dí wə̌ ɛ́ nalí na álí kɔ́mbɛ? Nyí táti, púndá ɛ mə́ ɛ paʼ ɛyə̌ bá bəní Mwǎn a Mɔnyuŋ á mákɛ́ má baʼ bá bî. 46Nyí fálu áshí sí kə̂. Tátíyáni, mɔ awə̌ a súmbí mî, mɔ́ ǎ paʼ nâ.”
Baʼ bá nə̂n bá Ísrɛl bá kúbí Yésuwə
47Ngə Yésuwə a bílíní wə̌ ɛ́ byá, Júdasə awə̌ a bílí muwútú m mɔ nfɔ́ á bawútú dyǔm na bábɛ̂, a pilí áfə́ Yésuwə a bílíní. A pilí na limuti álə́ lí lə́kí pɛ́ ɛ́ misu míbɛ̂ na ngámbá. Baprîsə bánə̂n, balɛ̂ bá mbéndá na bankúmə́ bɔ́ bá lúmí bɔ́ álí kú Yésuwə. 48Mɔʼ awə̌ a ŋ wɔ́ŋ álí naŋ Yésuwə a m mə̌ ɛ́ bə límuti ɛyəmblan nána, “Mɔ awə̌ n kátání, ní mɔ́ nyí saní. Nyí kú mɔ́.” 49Ngə Júdasə a pilíní áfə́ Yésuwə á bílíní, a kǐ á Yésuwə, a sambání mɔ́ nána, “Á mulɛ̂, musaŋgu m bá na wə.” Ti a kátání mɔ́. 50Yésuwə a pushú mɔ́ nána, “Áshí, bwə̌ yə̌ ɛ́yə́ ɛ lɔlíní ɛ bwə shámshám.” Yɔ̂ baʼ a bâ bá mákíní nyǔ á wusú, ti bá kúbí mɔ́, bá wálí mɔ́ kpáŋ. 51Yɔ̂ mɔ nfɔ́ á baʼ ábə́ bá bílí ná Yésuwə, a wubíní pɛ́ ɛ misu míbɛ̂ á mbáʼ ɛ pɛ́ ɛ́ mɔ, a shɛ́lí ɛtwî ɛ́ ntáŋ m prísə a nə̂n a nə̂n. 52Yésuwə a pɔŋí mɔ́ ani nána, “Timbí pɛ́ ɛ misu míbɛ̂ ɛ́ wə ɛni á mbáʼ, á ɛ́tútú nána ká njá awə̌ ǎ wan na pɛ́ ɛ misu míbɛ̂, bá bwəlan pɛ́ ɛ misu míbɛ̂ álí búlú mɔ́. 53Ɛ bíyǎ nána, njí n kɔndɛ́ liwújan á Sáŋ m myə, áfâ áshí áshí, á lúm mî limuti na limuti lí áŋgɛl álí wúnján mî? 54Ndé njí m bwəlí nâni, ní yán kâti ɛ Dyǔ ɛyə̌ ɛ̌ byá nána ɛ́yí ɛ́ lɔ́lí ɛ bwəlan ɛ́ lwínjání?” 55Yɔ̂ Yésuwə a kɔndɛ́ní limuti lî nána, “N dí yə̌ njíb ɛ́yə́ nyí pílíní na pɛ́ ɛ misu míbɛ̂, na ngámbá álí kú mî? N bílí á Tɛ́mpɛl bǔn tɛ́ n lúfúwá baʼ ndé nyí kúbiyǎ mî. 56Ndé misam mínán mísə́sə̌n mí bwəlan álí lwínjí yə̌ ɛ́yə́ balakuwa bá múdî bá tílíní á kâti ɛ Dyǔ.” Ti bawútú bá mɔ básə́sə̌n bá makú mɔ́ bá kǐ mifílí.
Bá kánání Yésuwə á Kúti
57Limuti álə́ lí kúbí Yésuwə lí kanání mɔ́ á ndáʼ ɛ́ Káyífasə, awə̌ a bílí prísə a nə̂n a nə̂n. Á wə́ balɛ̂ bá mbéndá na baʼ bá nə̂n bápə́pə̂ bá Ísrɛl bá búmíní. 58Ngə bá bílíní ɛ kanán Yésuwə, Píta a bílí mɔ́ ɛ pɔŋ á mbís, ndé a bíliyǎ kfwáŋ, kə́ŋ ta bá paʼ liwútán ɛbúka ɛ́ Káyífasə. Ngə bá pílíní áwə́ a kwilí á ɛbúka átin, a shumání áshí na batátiya-bá-Tɛ́mpɛl, álí bwə nána a bî mbakú ɛ mukaʼ n Yésuwə. 59Baprîsə bánə̂n, na ngvwa ɛsə́sə̌n bá bílí ɛ sa baʼ ábə́ bá tyə́ mbúŋ ɛ́ matúm á nlú n Yésuwə ngə bá búlúní mɔ́. 60Ká ngə baʼ jǐta bá pílíní ɛ tyə́ mbúŋ ɛ matúm á nlú m mɔ, bá kúwiya mɔ́ na liwusɛ́ ká lifɔ́. Kə́ŋ ta á shúl, yɔ̂ mbúŋ ɛ́bɛ̂ ɛ́ nyítíní, ti bá byábí nána, 61“Mɔ ani a byábí nána á gbítí Tɛ́mpɛl, ti a lúŋ pə́ yɔ́ li paʼ madû málán.” 62Ngə Prísə a nə̂n a nə̂n a wúkíní nâ, a tyə́bí ámǐn ti a kɔndɛ́ Yésuwə nána, “Ɛ wɔ́ŋiyǎ yálabɛ́ á míbyá mínán ámə́ bá byábíní tɛ́ŋgɛnɛ wə?” 63Na nguʼ á dǐn lí Dyǔ álə́ lí dí á lúŋgɛ́, pɔ̌ŋ sə́ mbálɛ, wə́ ɛ dí Awə̌ bá Wɔ́kílíní, Mwǎn a Dyǔ? 64Yésuwə a pushú nána, “Ngə ɛ byábíní.” Yésuwə a bándí álí byá pə́ nána, “Á mbálɛ nǎn pɔ̌ŋ nyə́ nána, butya á púndá ɛnín, nyí mín ngə Mwǎn a Mɔnyuŋ a shumání á pɛsi ɛkɛ́ ɛ́ mbâ ɛ Dyǔ lí ngvum. Nyí mín ngə á shumání á libáŋ ámǐn, á shula á nkínshíyə 65Prísə a nə̂n a nə̂n a nyatí mábaʼ má mɔ álí lúfú nána pí ɛ bílí mɔ́ átin. Ti a pɔŋí baʼ ábə́ bá bílí á kúti nána, Ǎ lwí Dyǔ! Mbúŋ ɛ fə́ kɛ́ pə́ sí saní? Nyə́ baʼ básə́sə̌n nyí wúkí ngə a lwíní Dyǔ sɔnsɔ́nǎn.” 66Ti a kɔ́ndɛ́ bɔ́ nána, “Yə̌ nyí kaníní?” Yɔ̂ bá púshúní nána, “A kfúndí mukaʼ a lɔlí ɛ wá.” 67Bɔ́ baʼ bafɔ́ bá bútí ɛ pɛ́njí bikfwɛn á nyǔ ɛ́ Yésuwə, bá lábá mɔ́. Bápə́pə̂ bá bílí mɔ́ ɛ lá mabɛ́yn, 68Bá byábá nána, “Wə mɔ anín awə̌ ɛ byábí nána mɔ́ mú n dí Krísto, pɔ̌ŋ sə́ mɔ awə̌ a lábí wə̂.”
Píta a Báŋí Yésuwə á nyǔ
69Á púndá ɛni, Píta a shumání á ɛbúka átin. Yɔ́ mbwəla-a-ndutu a wukɔn wufɔ́ m prísə a nə̂n a nə̂n a pílíní á mɔ́, ti a byábí nána, 70Wə anínán ɛ dí nfɔ́ awə̌ a bílí ɛ́ wuŋgɛ na Yésuwə, mɔ ani awə̌ a fí á pɛsi ɛ mbú ɛ Gálilî. Ndé Píta a nyísání á wusú wú baʼ a bâ básə́sə̌n nána, “M bíyǎ yǔm ɛ́yə́ ɛ̌ byání.” 71Ngə a malíní álí byá nâ, a kǐ á nsu mú ɛbúka ɛ́ kúti. Á wə́ mbwəlâ-a-ndutu wukɔn wúpə́pə̂ wú míníní mɔ́, ti a pɔŋí baʼ ábə́ bá bílí á wə́ nána, “Mɔ anín á bílí ná Yésuwə, mɔ a n nkí n Názárɛtə.” 72Ndé Píta a nyísání pə́, ti a byábí nána, “Nân mwá nguʼ nána m bíyǎ mî mɔ ani.” 73Á mbís ɛ púndá, baʼ ábə́ bá tyə́bí á nsaŋ bá bútí ɛ byá á Píta nána, “Ɛ́ dí mbálɛ. Ɛ dí mɔ nfɔ́ á baʼ ábə́ bá pɔŋ Yésuwə á mbís. Ɛyə́m ɛ́ mbyá ɛ́ wə ɛ́ sámbú wə nána ɛ fí á pɛsi ɛ Gálilî.” 74Yɔ̂ Píta a mwilíní nguʼ nána, “Dyǔ lí kɔ́ksɛ mi njí nân pɔ̌ŋ matúm! M bíyǎ mi mɔ ani!” Ngə a malíní álí byá, áfâ áshí áshí njúm-a-kfú a kɔ́ní. 75Yɔ̂ Píta a kaníní yə̌ ɛ́yə́ Yésuwə a m pɔŋní mɔ́ nána, “Byáná njúm-má-kfú á kɔ́n, ɛ́ báŋ mî á nyǔ bitî bílán.” Yɔ̂ Píta a nyítíní á ɛbúkatîn a fə́mí liji. A jǐ jǐta.
Currently Selected:
Mátyo 26: bwt
Highlight
Copy
Compare
Share
Want to have your highlights saved across all your devices? Sign up or sign in
