Jɔnə́ 5
5
Yésuwə a pwisí ɛlə́ŋkə́
1Á mbís ɛ misam mínán mísə́sə̌n, Yésuwə a kǐ á Jerúsálɛmə á ŋgandu ɛ baʼ bá Júda. 2Áfâ á Jerúsálɛmə, álí wútán Ɛkuʼ ɛ́ Wukâ wú Mílɔ́ŋgi, ɛgbɛny ɛ́ bílí á wə́. Bá bílí ɛ bə̌ŋ ɛgbɛny ɛ́yî á mbyá mú baʼ bá Ísrɛl nána Bɛtzáta. Ɛ ŋ wɔ́ŋ mabɛpɛ́ mátân. 3Á mabɛpɛ́ mâ, baʼ bá nyambɛ̂ jǐta bá bílí áwə́, baʼ na bidímtí bí mǐ, baʼ bá libyə́ŋ, bibə́ŋtí. Baʼ bá nyambɛ̂ á bâ bá bílí ɛ sinj nána madí mâ má púngu. 4Ɛ́ bílí nána áŋgɛl ɛ Dyǔ ɛ bílí ɛ shul á ɛgbɛny ɛ́yî ti ɛ pungú madí mâ átin. Ngə áŋgɛl ɛ puŋgúní madí mâ, mɔʼ awusúwə awə̌ á kwilí á wə́ átin, ká njá nyámbɛ̂ awə̌ a dí mɔ́ á nyǔ, á pwi.#5:4 Dungu lí kâti ɛ́ wúsúsuwə ɛ́ wɔ́ŋiyǎ ŋjɔŋ 3 baʼ 4. 5Mɔʼ nfɔ́ a bílí áwə́ awə̌ a m mə̌ ɛ́ kfulu á míbú mûm málán na wam. 6Ngə Yésuwə a pílíní áwə́ a míní ngə mɔʼ ani a nalíní áshí, ti a bí nána nyambɛ̂ a m mə̌ mɔ́ ɛ dyɛ á nyǔ. Yɔ̂ a kɔndɛ́ní mɔʼ a nyambɛ̂ ani nána, “Ɛ̌ sa ɛ́ pwî?” 7Mɔʼ a nyambɛ̂ ani a pushú mɔ́ nána, Sísə́, mi wɔ́ŋiyǎ mɔʼ ká nfɔ́ awə̌ a tiŋgání mi ɛ wúnjan álí kwisí mi á ɛbɛny átin. Á púndá ɛyə̌ áŋgɛl ɛ mə̌ní ɛ púŋgú madí, ngə nǎn wananí álí kwili áwə́, mɔʼ ampə́pə̂ ǎ kɔ́sɛ́ a kwíli áwə́ átin. 8Ti Yésuwə a pɔŋí mɔ́ nána, “Falú áshí, nǔŋ ngushú ɛ́ wə ɛ kə̂.” 9Áfâ áshí áshí mɔʼ ani a pwǐ, a pílí ngushú ɛ́ mɔ a bútí ɛ kə.
Bǔn ábə́ nsam m mû m bwəlání m bílí Bǔn bú Líkɔ́mbɛ. 10Áfánikə̌, ngə bajaniya bá baʼ bá Júda bá míníní mɔʼ awə̌ Yésuwə a pwisíní, ti bá pɔ́ŋí mɔ́ nána, “Wúyə́ wú dí bǔn bú líkɔ́mbɛ, na njí sí pɔ́njɔ́ní mambéndá má sə, ɛ tíŋganiyǎ ɛ pə́m ngushú ɛ́ wə ɛ́ yə́ŋáníyá yɔ́.” 11A pushú bɔ́ nána, “Mɔʼ awə̌ a pwisí mi a pɔŋŋí mi nána, ‘Nǔŋ ngushú ɛ́ wə ti ɛ kə̂.’” 12Áfánikə̌ bá kɔ́ndɛ́ mɔ́ nána, “Njá mɔ́lə́ ani awə̌ a pɔŋí wə álí nǔŋ ngushú ɛ́ wə ɛ kə̂?” 13Ndé mɔʼ awə̌ bâ m pwisíní a n sî m mbí mɔʼ awə̌ a pwisí mɔ́, á ɛ́tútú nána, Yésuwə a m mə̌ ɛ kwili á limuti álə́ lí bílí á wə́.
14Á mbís ɛ púndá Yésuwə a míní mɔʼ ani á Tɛ́mpɛl ti a byábí á mɔ́ nána, “Tátí, ɛ si bwə pə́ wubî ní ɛ́ túm álí taʼ ngə wə ɛ m məní ɛ taʼ.”
15Ti mɔʼ ani a kǐ á pɔŋá bajaniya bá baʼ bá Júda nána Yésuwə mɔ́ a pwisí mɔ́. 16Áfánikə̌, ngə Yésuwə á bílíní ɛ bwə misam mî á Bǔn bú Líkɔ́mbɛ lí baʼ bá Júda bá bútí mɔ́ ɛ lə́mbi. 17Yésuwə a pushú bɔ́ nána, “Sáŋ m myə ǎ bwə ɛbulú ɛtîtɛ́ mi pə́ n lɔlí ɛ bwə ɛbulú.”
18Yǔm ɛ́yə́ Yésuwə a byábíní nâ ɛ́ bwə́lí bajaniya bá baʼ bá Júda bá wánání kə́ŋ álí búlú mɔ́. Bá pə́pə́ mɔ́ ɛ búlu nâ suká nána a gbí mbéndá ɛ bǔn bú líkɔ́mbɛ yɔ́ na yɔ́, ndé á ɛ́tútú nána a byábí nána Dyǔ lí dí Sáŋ m mɔ, ɛ́yə́ ɛ́ lúfú nána mɔ́ na Dyǔ bá dí mulimlim.
Ngínya ɛ́ Mwǎn a Dyǔ ɛ fí a Dyǔ
19Yésuwə a pushú bɔ́ bajaniya bá baʼ bá Júda bâ nána “Á mbálɛ nǎn pɔ̌ŋ nyə́ nána, Mwǎn a Dyǔ a tíŋgániyǎ ɛ bwə yǔm na mɔ́mə̌n, a bwə wɔ̂ yǔm ɛ́yə́ a míníní Sáŋ m mɔ ǎ bwəní, á ɛ́tútú nána, Mwǎn ǎ bwə ká yə̌ Sáŋ ǎ bwəní. 20Ngə ɛ́ díní nána Sáŋ a nəŋí Mwǎn m mɔ, mɔ́ a lúfú mɔ́ misam mísə́sə̌n ámə́ ǎ bwəní. Ti á lúfú mɔ́ misam mínə̂n ámə́ mí túmbí ɛ́mínán nána nyí bá manyáká. 21Ngə Sáŋ a pumúní baʼ ti a bəkí bɔ́ luŋgɛ́, nâ pə́ Mwǎn ǎ bəní luŋgɛ́ á baʼ ábə́ a nəŋíní álí bə. 22Á mulimlim, Sáŋ a sə̌ ɛ́ káyísí mɔʼ ká nfɔ́ á ɛ́tútú nána a mə́ ɛ bə ngínya á mákɛ́ má Mwǎn m mɔ álí káyísí baʼ básə́sə̌n. 23A bwəlí nâni á ɛ́tútú nána mɔ ansə́sə̌n bá bə Mwǎn ɛdúbɛ́ mulimlim ngə bá bə́kíní Sáŋ ɛdúbɛ́. Ká njá awə̌ a bə́kiyǎ Mwǎn ɛdúbɛ́, nâ pə́ a bə́kiyaní Sáŋ awə̌ a lúmí Mwǎn ɛdúbɛ́.
24Á mbálɛ nǎn pɔ̌ŋ nyə́ nána, ká njá awə̌ a wúkí ɛyala ɛ́ myə ti a dúbɛ́ mɔʼ awə̌ a lúmí mi, ǎ wɔ́ŋ luŋgɛ́ álə́ lí sə̌ ɛ́ mɛ ti bá sî káyísíyá mɔ́. A m mə̌ túm liwá a kwilí á luŋgɛ́ átin. 25Á mbálɛ nǎn pɔ̌ŋ nyə́ nána, púndá ɛ̌ paʼ, na ɛ mə̌ yî ɛ paʼ, ɛ́yə́ baʼ ábə́ bá mə́ ɛ́ wá bǎ wú ngɔli ɛ Mwǎn a Dyǔ, ti baʼ á bâ ábə́ bá wúkí ngɔli ɛni bá bá lúŋgɛ́. 26Ngə luŋgɛ́ lí fíní á Sáŋ, mulimlim nâ pə́ a bwəlíní luŋgɛ́ lí fí á Mwǎn. 27A bəkí Mwǎn ngínya álí káyísí baʼ á ɛ́tútú nána Mwǎn a dí ani awə̌ bá bəŋní Mwǎn a Mɔnyuŋ. 28Misam mínán mí si nyákí nyə́ á ɛ́tútú nána púndá ɛ̌ paʼ ɛ́yə́ baʼ básə́sə̌n ábə́ bá mə́ ɛ wá bá wú ngɔli ɛ́ mɔ. 29Njí bá wúkí ngɔli ɛ́ mɔ, bá nyít á midim mí bɔ. Ti baʼ ábə́ bá bwə́lí misam mí mbâ bá pumu ti bá bá lúŋgɛ́. Ndé á baʼ ábə́ bá bílí ɛ bwə misam míbî bá pumu ti bá kwisí kɔ́ksɛ.”
Mbúŋ tɛ́ŋgɛnɛ Yésuwə
30N tíŋganiyǎ ɛ bwə ká yǔm á wunja wú myə, nǎn káyísí ngə Dyǔ lí pɔŋíní mi nána m bwə. Áfánikə̌ mbakú ɛ́ myə ɛ́ tɛ́ŋgɛ́ní á ɛ́tútú nána, n sə̌ ɛ́ káyísí ngə mimə̌n n nəŋíní, ndé nǎn káyísí yə̌ ɛ́yə́ awə̌ a lúmmí mi ǎ saʼní.
31Njí n tyə́bí mbúŋ tɛ́ŋgɛnɛ mimə̌n, ní mbúŋ ɛni bá sî kfufúwá yɔ́. 32Mɔʼ ampə́pə̂ a dí awə̌ a tyə́bí mi mbúŋ, ndé mi mbí na mbúŋ ɛnínán ɛ tɛ́ŋgɛ́ní. 33Nga nyí mə̌ lúm baʼ á Jɔnə́ ti a pɔŋí nyə́ mbálɛ tɛ́ŋgɛnɛ mi. 34Suká nána mɔnyuŋ a lɔlí mi ɛ tyə́ mbúŋ. Ndé m pɔŋ nyə́ tɛ́ŋgɛnɛ mbúŋ ɛ́ Jɔnə́ nána njí nyí dúbɛ́ mi nyí kwísi lishuŋgɛ. 35Jɔnə́ a bílí ngə ɛtrúkán ɛ́yə́ ɛ́ bə mwíli. Nyí bá múnyɛŋgɛ álí pɔ̌ŋ mwíli mû á mbís ɛ mǎ púndá. 36Ndé n wɔ́ŋí mbúŋ ɛ́yə́ ɛ́ túmbí mbúŋ ɛyə̌ Jɔnə́ a n tyə́ní. Bibulú ábə́ Sáŋ m myə a bəkíní mi álí bwə, bɔ́mə̌n bí tyə́ mbúŋ nána Sáŋ m myə mɔ́ a lúmí mi. 37Ti Sáŋ m myə awə̌ a lúmí mi mɔ́ pə́ á tyə́ mbúŋ tɛ́ŋgɛnɛ mi. Nyí nan wúkíyá mɔ́ ngɔli na nyí nan míniyǎ wə̂ mɔ́. 38Nyí sə̌ ɛ kɔŋgɔ ndúm ɛ́ mɔ á milə́m mí nyə á ɛ́tútú nána nyí dúbɛ̌ á awə̌ mɔ́ a lúmíní. 39Nyí fá milú mí nyə álí wúkú ɛyala ɛ́ Dyǔ á ɛ́tútú nána nyí kaní nána nyí kwisi luŋgɛ́ álə́ lí sə̌ ɛ́ mɛ. Ɛyala ɛ́yî yɔ́mə̌n yɔ́ ɛ́ byá tɛ́ŋgɛnɛ mi. 40Ndé nyí nə́ŋiyǎ álí paʼ á mi álí kwisí luŋgɛ́ álə́ lí sə̌ ɛ́ mɛ.
41N sákiyǎ álí wɔ́ŋ ɛdúbɛ́ á mɔnyuŋ. 42Ndé mi mbí nyayɛ ɛ́ baʼ ábə́ nyí díní, mi mbí nána nyí wɔ́ŋiyǎ ɛ́niŋgán ɛ́ Dyǔ á milə́m mi nyə. 43M pilí á dǐn lí Sáŋ ŋ myə nyí kásiyǎ mi, ndé njí mɔʼ ampə́pə̂ a pilí á dǐn lí mɔ, nyí kásí mɔ́. 44Nyí nəŋí ɛ kɛsi nyə́mə̌n, nyí sə̌ ɛ́ bwə misam ámə́ Dyǔ lɔ́mə̌n lí kɛsíní nyə́. Yán kə́ nyí dúbɛ́ní mi? 45Ká ngə nyí kásiyaní mi, ndé nyí si kaní nána, mi nǎn pɔ̌ŋ Sáŋ m myə ná nyí kásiyǎ mi. Mósisə, awə̌ nyí bándíní milə́m mí nyə mɔ́mə̌n mɔ́ a dí awə̌ á byá nána nyí bwə́lí wubî. 46Á mbálɛ njí nyí n dúbɛ́ Mósisə, ní nyí n dúbɛ́ mi, á ɛ́tútú nána, a n til tɛ́ŋgɛnɛ mi. 47Ndé ngə nyí púshuwaní álí dúbɛ́ yə̌ ɛ́yə́ a tílíní, yán kə́ nyí dúbɛ́ní yə̌ ɛ́yə́ mi nǎn byání?
Currently Selected:
Jɔnə́ 5: bwt
Highlight
Copy
Compare
Share
Want to have your highlights saved across all your devices? Sign up or sign in
