Jɔnə́ 6
6
Yésuwə a dísí limuti
(Mát 14:13-21; Mâk 6:30-44; Lûk 9:10-17)
1Á mbís ɛ misam mínán mísə́sə̌n, Yésuwə na bawútú bá mɔ bá túmbí mbô ɛ Gálilî ɛyə̌ bá bəŋní mbô ɛ Tibɛ́riyasə. 2Ti limuti línə̂n lí bílí mɔ́ ɛ pɔ̌ŋ á mbís á ɛ́tútú nána, bá míní misam mí mányáká ámə́ a bwəlákíní ngə a pwisíyákíní baʼ bá nyambɛ̂. 3Yésuwə na bawútú bá mɔ bá kí á wúkul ámǐn ti bá shúmání áshí. 4Ŋgandu ɛ Litúm Ámǐn ɛ baʼ bá Júda ɛ mə̌ ɛ́ wútan. 5Á púndá ɛyə̌ Yésuwə a wɛnjíní nlú m mɔ ámǐn, a míníní limuti lí baʼ ngə lí paʼní liwútán mɔ́. Yɔ̂ a kɔndɛ́ní Fílipə nána, “Áfə́ sí tíŋgání ɛ yǎn lidyá álə́ limuti lî lí dyání?” 6A byábí nâ álí kukú mɔ́ á ɛ́tútú nána, mɔ́mə̌n a m bí yə̌ ɛ́yə́ a tíŋgání ɛ bwə.
7Fílipə a pushú mɔ́ nána, “Ɛ́ nǔŋ litúm ká kápan mbúki bikúlí bíbɛ̂ álí yǎn lidyá álə́ lí kuʼ bâ bán básə́sə̌n álí bwə nána mɔʼ na mɔtɛ́ á dyá ká mǎ pushi.”
8Muwútú nfɔ́ n Yésuwə, Ándruwə, mǎ nyǎ mú Sáyímɔnə Píta, a byábí á Yésuwə nána, 9“Mǎ ɛshɛ ɛfɔ́ ɛ dí fán ɛ́yə́ ɛ́ wɔ́ŋí mibúŋgá mí blɛ̂t mítân ábə́ bá bwə́líní na ngwi, ti a wálí midim mí shwî míbɛ̂. Ndé yán lídyá línán lí tíŋgání ɛ kúʼ limuti línán lísə́sə̌n.” 10Ti Yésuwə a pɔŋí bawútú bá mɔ nána, “Nyí pɔ̂ŋ baʼ ábâ bá shúman áshí.” Bishum bí bílí áwə́ jǐta. Áfánikə̌, baʼ ábâ básə́sə̌n bá shúmání áshí. Átitîn á limuti ɛ́lî bumân ábə́ bá bílí áwə́ bá bílí ká ngə bikúlí bítân. 11Ti Yésuwə a nuŋí blɛ̂t bî, a sákán Dyǔ, ti a bəkí bawútú bá mɔ nána bá kabí bɔ́ á baʼ bâ. A bwəlí pə́ mulimlim na shwî ɛ́yî. Mɔʼ ansə́sə̌n a dílí ngə a púlíní. 12Ngə mɔʼ ansə́sə̌n a m mə̌ ɛ́ kú, Yésuwə a pɔŋŋí bawútú bá mɔ́ nána, “Nyí laʼ lidyá álə́ lí búkɛ́ áshí. Lidyá ká lífɔ́ lí si fɛnjí.” 13Áfánikə̌, ngə bá málíní álí shwinj lidyá álə́ lí búkɛ́ áshí, bî n lwínjí bídfúŋ dyǔm na bíbɛ̂. 14Ngə baʼ bâ bá míníní manyáká ámə́ Yésuwə a bwəlíní, bá byábí nána, “Á mbálɛ, anín a dí nlakuwa-a-mudî awə̌ bâ m pɔŋní nána á paʼ á nkínshíyə.” 15Ngə Yésuwə a yəmbíní nána bá paʼ mɔ́ ɛ nuŋ na ngínya álí shum mɔ́ kə̂ŋ, a makú bɔ́ a timbí mbǐ á wúkul ámǐn.
Yésuwə a kǐ na makwi á ngu madí ámǐn
(Mát 14:22-23; Mâk 6:45-52)
16Ngə nkwi m pílíní, bawútú bá Yésuwə bá shúlí a nsaŋ ŋ mbô ɛ Gálilî. 17Bá kwílí á bwálu, bá túmbí madí ámǐn ti bá kǐ á Kapɛ́nahûmə. Bǔn bú m mə̌ ɛ́ fínj ɛ́yə́ Yésuwə a sî n mə̌ní ɛ́ paʼ áfə́ bá bílíní. 18Ɛkful ɛ́ bútí ɛ wan, ti ɛ́ bwə́lí madí má tátú. 19Á púndá ɛni, bawútú bá Yésuwə bâ m mə̌ ɛ́ kə ngə kilómɛ́ta ɛ́tân tɔ ntyǔ. Ti bá míní Yésuwə ngə ǎ kəní na makwi á ngu madí ámǐn álí kə̌ álí wútán nsaŋ m bwálu m bɔ, bɔ̌ŋ bú kúwí bɔ́. 20Yésuwə a pɔŋí bɔ́ nána, “Mî n dí nyí si báŋ.” 21Yɔ̂ bá núŋíní mɔ́ á bwálu átin na munyɛŋgɛ. Ngə a kwilíní á bwálu, ɛ́ dyɛ̌ bá pílí á nsaŋ m madí áfə́ bá bílíní ɛ kə.
Yésuwə mɔ́ a dí blɛ̂t ábə́ bí bə lúŋgɛ́
22Ngə bǔn bú yílíní, limuti álə́ lí bílí á pɛsi ɛ mbô ɛnínání áfə́ Yésuwə na bawútú bá mɔ bá bílíní, bá mínní nána á nkwi nkwi n mbísɛ, bwálu bufɔ́ bɔ́ na bɔ́ bú bílí á pɛsi ɛ mbô ɛni. Ti bâ m bí nána Yésuwə a kwílíyǎ á bwálu bû na bawútú bá mɔ. Baʼ á bâ bâ m bí nána bawútú bá Yésuwə bɔ́ na bɔ́ bá kí. 23Mabwálu mápə́pə̌ ámə́ má fí á nkí n Tibɛ́riyasə má pílí á nsaŋ m mbô álí wútan fǔm ábə́ limuti lî lî n dyá blɛ̂t á mbís ɛ púndá ɛyə̌ Sáŋgúwə́ a m mə̌ní ɛ sákán Dyǔ. 24Ngə limuti lí míníní nána Yésuwə na bawútú bá mɔ bá shiyǎ áwə́, bá kwílí á mabwálu, bá kí á Kapɛ́nahûmə álí saʼ Yésuwə.
25Ngə baʼ bâ bá pílíní á pɛsi ɛ mbô ɛnínání, bá míní Yésuwə. Bá kɔ́ndɛ́ mɔ́ nána, “Á mulɛ̂ njá púndá wə ɛ pilíní áfán?”
26Yésuwə a pushú bɔ́ nána, “Á mbálɛ nǎn pɔ̌ŋ nyə́ nána, nyí sa mî á ɛ́tútú nána nyí dílí blɛ̂t kə́ŋ nyí kúʼ, suká á ɛ́tútú nána nyí sɔ́ntání manyáká ámə́ m bwəlíní. 27Nyí si taʼ á lídyá álə́ lí yɔʼ. Ndé nyí tâʼ á lidyá álə́ lí bá ɛtîtɛ́ á luŋgɛ́ álə́ lí sə̌ ɛ́ mɛ. Lɔ́ lí bə̌ lúŋgɛ́ álə́ lí sə̌ ɛ́ mɛ. Lidyá lî, lɔ́ Mwǎn a Mɔnyuŋ ǎ bəní. Á mɔ́ Dyǔ, Sáŋ a bəkíní ɛyəmblan nána a bwə nâ.” 28Ti baʼ bâ bá kɔ́ndɛ́ Yésuwə nána, “Yə̌ sí tíŋgánní ɛ bwə, nána sí bwə misam ámə́ Dyǔ lí saʼní nána sí bwə?” 29Yésuwə a pushú bɔ́ nána, “Yǔm ɛ́yə́ Dyǔ lí saʼní nána nyí bwə ɛ dí nána, nyí dúbɛ́ mí awə̌ lɔ́ lí lúmíní.” 30Ti bá pushú Yésuwə nána, “Njá mányáká ámə́ ɛ́ bwəní, sí mín kadíni sí dúbɛ́ wə? Yə̌ yɔ́mə̌n ɛ tíŋgání ɛ́ bwə? 31Basáŋ bá sə bá nyákə́ bá dílí mána á ɛsínj ngə ɛ́ tílánní á kâti ɛ Dyǔ nána, ‘A bəkí bɔ́ blɛ̂t ábə́ bú fí á wudya wú Dyǔ na bá dyá.’” 32Ti Yésuwə a pɔŋí bɔ́ nána, “Á mbálɛ nǎn pɔ̌ŋ nyə́ nána, suká Mósisə a m bə nyə́ blɛ̂t ábə́ wú fí á wudya wú Dyǔ, ndé Sáŋ m myə mɔ́ a m bə nyə́ blɛ̂t ábə́ wú fí á wudya wú Dyǔ. 33Á ɛ́tútú nána mi n dí blɛ̂t ábə́ Dyǔ lí bə́kíní, ábə́ bú fí á wúdya wú Dyǔ, ábə́ lí bə̌ baʼ bá nkínshíyə luŋgɛ́ álə́ lí sə̌ ɛ́ mɛ.”
34Bá byábí á Yésuwə nána, “Sísə́, bəká sə́ blɛ̂t bî ɛtîtɛ́.” 35Ti Yésuwə a pɔŋí bɔ́ nána, “Mi n dí blɛ̂t ábə́ bú bə̌ luŋgɛ́ álə́ lí sə̌ ɛ́ mɛ. Ká njá awə̌ á paʼ á mi, njɛ ɛ sî kúwá pə́ mɔ́. Ká njá awə̌ a dúbɛ́ mî, sə́m ɛ sî bá pə́ mɔ́. 36Nǎn pɔ̌ŋ nyə́ nána, nyí mə́ mi ɛ mín ndé nyí dúbɛ̌ mî. 37Baʼ básə́sə̌n ábə́ Sáŋ m myə a bə́kíní mi, bá paʼ á mi. Ká njá awə̌ á paʼ á mi, n sî báŋá álí nuŋ mɔ́. 38N sî nána mɔ́ á ɛ́tútú nána m fíyǎ á wudya wú Dyǔ álí bwə ngə n nəŋíní álí bwə, ndé m mə̌ ɛ paʼ álí bwə ngə ɛ́ lɔ́líní á Sáŋ m myə awə̌ a lúmí mi. 39Ndé ɛ́yínán ɛ́ dí likani lí awə̌ a lúmí mi, na nána átítin á baʼ básə́sə̌n ábə́ a bə́kíní mi, n sî bɔ́lɔ́n ká nfɔ́, ndé álí bwə nána á bǔn bú shúkán m pumú bɔ́ baʼ básə́sə̌n. 40Áfánikə̌, yə̌ ɛ́yə́ Sáŋ m myə ǎ saʼní ɛ́ dí nána baʼ básə́sə̌n ábə́ bá míní Mwǎn m mɔ, ti bá dúbɛ́ mɔ́, bá lɔ́lí ɛ wɔ́ŋ luŋgɛ́ álə́ lí sə̌ ɛ́ mɛ. M pumú bɔ́ á bǔn bú shúkan.”
41Baʼ bá Júda á bâ bá bútí ɛ byɔʼ átin tɛ́ŋgɛnɛ Yésuwə á ɛ́tútú nána a m byá nána, “Mi n dí blɛ̂t ábə́ bú fí á wudya wú Dyǔ.” 42Áfánikə̌, bá byábí nána, “Nga Yésuwə, mwǎn mú Josɛ́fə mɔ́ ani, awə̌ sí bíní sáŋ na nyǎ m mɔ? Yán kə́ ɛ́ díní nána mɔ́ ǎ byá nána a fí á wudya wú Dyǔ?” 43Yésuwə a pushú bɔ́ nána, “Nyí máku álí byɔʼ átin. 44Mɔʼ ká nfɔ́ a sî púlá ɛ́ paʼ á mi ɛ́sibá nána Sáŋ awə̌ a lúmí mi a pánání mɔ́ á mi. Ti m pumú mɔ́ á bǔn bú shúkán. 45Ɛ́ tílání ngə balakuwa-bá-mudî bá byábíní nána, ‘Dyǔ lí lúfú baʼ básə́sə̌n.’ Ká njá awə̌ a wúkí ti a wúkú á Sáŋ, á paʼ á mi. 46Mɔʼ ká nfɔ́ a nan míníyǎ wə́ Sáŋ. Ani awə̌ a fí á Dyǔ, mɔ́mə̌n nfɔ́ a mə̌ ɛ́ mín Sáŋ. 47Á mbálɛ nǎn pɔ̌ŋ nyə́ nána, ká njá awə̌ á dúbɛ́ á wɔ́ŋ luŋgɛ́ álə́ lí sə̌ ɛ́ mɛ. 48Miyə́ n dí blɛ̂t ábə́ wú bə̌ lungɛ́. 49Basáŋ bá nyə bá dílí mána á ɛsínj, kánâwə̌ bá wúlí. 50Ndé blɛ̂t ábə́ bú fí á wudya wú Dyǔ bú dí nya ɛyə̌ ká njá mɔ́lə́ awə̌ a dílí bɔ́ a sə̌ ɛ́ wá. 51Miyə́ n dí blɛ̂t ábə́ wú bə luŋgɛ́ álə́ lí fí á wudya wú Dyǔ. Ká njá awə̌ a dílí blɛ̂t bî, a bá lúŋgɛ́ kə́ŋ ti á bwindeya. Blɛ̂t bínán ábə́ m bəní nyə́ wú dí nyǔ ɛ́ myə. M bəkí nyə́ álí bwə nána n kɔtɛ́ luŋgɛ́ lí nkínshíyə.”
52Ngə baʼ bâ bá wúkíní nâ, bá kwí, ti bá bútí ɛ táŋ na ngínya na bɔ́mə̌n, bá kɔndɛ́ nána, “Yán mɔʼ anín a tiŋgání sə́ ɛ bə̌ nyǔ ɛ́ mɔ na sí dyá?” 53Yésuwə a byábí á bɔ́ nána, “Á mbálɛ nǎn pɔ̌ŋ nyə́ nána, njí nyí díliyǎ nyǔ ɛ́ Mwǎn a Mɔnyuŋ, nyí mwá pə́ makǐ má mɔ, nyí sî kwisíyǎ luŋgɛ́ álə́ lí sə̌ ɛ́ mɛ. 54Ká njá awə̌ a dílí nyǔ ɛ́ myə, a mwá pə́ makǐ má myə á kwisí luŋgɛ́ álə́ lí sə̌ ɛ́ mɛ, ti n pumú mɔ́ á bǔn bú shúkán. 55Ɛ́ bá nâ á ɛ́tútú nána, nyǔ ɛ́ myə yɔ́mə̌n yɔ́ ɛ dí lidyá lí mbímbí, makǐ má myə mɔ́mə̌n pə́ má bá limwá lí mbímbí. 56Ká njá awə̌ a dílí nyǔ ɛ́ myə, a mwá pə́ makǐ má myə, a dí wə̂ na mi, mi pə́ n bá wə̂ na mɔ́. 57Ngə Sáŋ awə̌ a bwəlí baʼ bá bá á luŋgɛ́ mɔ́ a lúmí mi, ti mɔ́ a bwəlí ká m bá luŋgɛ́. Á mulimlim, ká njá awə̌ a dílí nyǔ ɛ myə, m bwə á bá lúŋgɛ́. 58Áfánikə̌, mi n dí blɛ̂t ábə́ wú fí á wudya wú Dyǔ. N shiyǎ ngə blɛ̂t ábə́ basáŋ bá nyə bá nyákə́ bá dílíní, kánâwə̌ bá wúlí. Ndé ká njá awə̌ á dyá blɛ̂t bín, á bá luŋgɛ́ kə́ŋ ta á bwindeya.”
59Yésuwə a byábí misam mínán mísə́sə̌n á púndá ɛyə̌ a bílíní ɛ lɛ́fu á ndáʼ ɛ makáni ɛ baʼ bá Júda á Kapɛ́nahûmə.
Biyala bí Yésuwə bí panán luŋgɛ́ álə́ lí sə́ ɛ́ mɛ
60Ngə baʼ bâ jǐta ábə́ bá bílí Yésuwə ɛ pɔ̌ŋ á mbǐ bá wúkíní misam ámî, bá byábí nána, “Jókwa línán lí kámbí ɛ punjun. Njá a tíŋgání ɛ kufú yǔm ngə ɛ́yî?” 61Ngə Yésuwə a yəmbíní nána bá byɔʼ tɛ́ŋgɛnɛ mɔ́, a byábí á bɔ́ nána, “Yə̌ ɛ́yə́ m byábíní ɛ́ kfwísí nyə́? 62Yán kə́ nyí bwəní njí nyí míní Mwǎn a Mɔnyuŋ ǎ fumuwa álí tǐm mbǐ ámǐn áfə́ a m fíní! 63Mudî n Dyǔ mɔ́ nán bə̌ lúŋgɛ́. Ngu nyǔ ɛ shiyǎ ká yǔm. Biyala ábə́ n pɔŋíní nyə́ bí dí mudî na luŋgɛ́. 64Ndé dungu lí nyə lí dí álə́ lí dúbɛ̌.” (Butya á púndá ɛyə̌ Yésuwə a butíní ɛ lɛ́fu, a m bí baʼ ábə́ bá sî n dúbɛ́, na a m bí mɔʼ awə̌ á súm mɔ́.) 65Yésuwə a bátí álí byá pə́ nána, “Yɔ̂ m pɔŋíní nyə́ nána mɔʼ ká nfɔ́ a sǐ púlá ɛ paʼ á mi kə́ŋ ti Sáŋ myə a bwə na a paʼ á mi.”
66Butya á púndá ɛni, ɛ́yî ɛ́ bwə́lí baʼ ábə́ bá bílí ɛ pɔ̌ŋ Yésuwə á mbǐ, bá m makú álí pɔŋ mɔ́ á mbǐ ti bá kə́ bɔ́. 67Ti Yésuwə a kɔ́ndɛ́ bawútú bá mɔ dyǔm na bábɛ̂ nána, “Nyə́ pə́ nyí sǎ ɛ́ tím mbǐ?”
68Sáyímɔnə Píta a pushú mɔ́ nána, “A Sáŋgúwə́, á njá sí kəní? Wə ɛ wɔ́ŋŋí biyala ábə́ wú bwə mɔʼ a wɔ́ŋ lúŋgɛ́ álə́ lí sə̌ ɛ́ mɛ. 69Sí mə́ ɛ dúbɛ, sí bî pə́ nána wə ɛ dí mɔʼ Ani-awə̌-a-Sáŋí awə̌ a fí á Dyǔ.”
70Ndé Yésuwə a pushú bɔ́ nána, “Nga mi m pwɛsí nyə́ dyǔm na bábɛ̂, ndé mɔʼ nfɔ́ áwútitîn wú nyə a dí dɛ́vəl?” 71Júdasə, mwǎn mú Sáyímɔnə Ískáriyɔtə, mɔ́ Yésuwə a bílíní ɛ byá nâ. Ká ngə a bílíní nfɔ́ á bawútú dyǔm na bábɛ̂, ndé mɔ́ a kǐ ɛ́ nǎŋ Yésuwə.
Currently Selected:
Jɔnə́ 6: bwt
Highlight
Copy
Compare
Share
Want to have your highlights saved across all your devices? Sign up or sign in
