Jɔnə́ 21
21
Yésuwə a lúfú pə́ nyǔ ɛ́ mɔ á bawútú bá mɔ
1Á mbís ɛ́ mínán mísə́sə̌n, Yésuwə a lúfú pə́ nyǔ ɛ́ mɔ́ á bawútú bá mɔ á nsaŋ m mbû ɛ Tibɛ́riyasə. Nâ ɛ̂ m bwəlání. 2Bǔn bufɔ́ Sáymɔn Píta, Tɔmasə (awə̌ bá bəŋní Lifɛ̂), Natániɛl (awə̌ a n fí á nkí n Kána á pɛsi ɛ mbú ɛ Gálilî), bǎn bá Zɛ́bɛdiyə, na bawútú bápə́pə̂ bá Yésuwə bábɛ̂ bá shwínjání á fǔm bufɔ́. 3Sáymɔnə Píta a byábí á bání nána, “Mi nán kə álí lú shwî.” Bá pɔ́ŋí mɔ́ nána, “Sɛ́ pə́ sí pɔŋ wə á mbí.” Áfánikə̌ bá nyítí bá kə bá kwílí á bwálu átin. Ndé wudû bû wúsə́sə̌n bá wáliyǎ ká yǔm.
4Mushú mushú ngə dúlu lí bílíní ɛ nyí, Yésuwə a tyə́bí á nsaŋ m madí, ndé bawútú bá mɔ bá sîn bí nána Yésuwə mɔ́ ni. 5Ti a byábání bɔ́ nána, “Basún bá myə nyí wáliyǎ ká yǔm?” Bá pushú mɔ́ nána, “Ǎ yě, sí wáliyǎ.” 6Yésuwə a byábání bɔ́ nána, “Nyí shwá mbúnjá ɛ́ nyə́ á pɛsi ɛ ɛkɛ́ ɛ́ mbâ wú bwálu, nyí wálí duŋgu lí shwî.” Áfánikə̌ bá shwátí mbúnjá á pɛsi ɛni. Bá púliyǎ mbúnjá ɛni ɛ dvul á ɛ́tútú nána shwî ɛ́ bílí átin jǐta. 7Ti muwútú awə̌ Yésuwə a n nəŋní a byábí á Píta nána, “Sáŋgúwə́ mɔ́ a dí.” Ɛtî ɛ́yə́ Sáyímɔ́nə Píta a wúkíní nána Sáŋgúwə́ mɔ́ a dí nâ, a fílí kúti á nyǔ (á ɛ́tútú nána a n mə̌ ɛ́ fúl mabaʼ á nyǔ.) Ti a pyə́mí á madí átin. 8Ndé bawútú á bání bá pílí á nsaŋ n madí á bwálu átin bá dfulá mbúnjá. Shwî ɛ́ lwínjí á mbúnjá ɛni. Libú álə́ bá fíní na bwálu álí paʼ á nsán n madí wú sî n yaban. Ɛ́ bílí ngə mbúki ɛ́ mɛ́ta. 9Ngə bá pílíní á nsaŋ m madí bá tání makákan má mwǐ. Shwî na blɛ̂t ɛ́ bílí á mákákan má mwǐ ámǐn. 10Ti Yésuwə a byábání bɔ́ nána, “Nyí pánan duŋgu lí shwî álə́ nyí wálíní nâ.” 11Sáymɔnə Píta a kwilí á bwálu átin a dfvúl mbúnjá ɛni á nsaŋ n madí. Shwî ɛ́ nə̂n ɛ́ lwínjí á mbúnjá ɛni átin. Ɛ́ bílí shwî mbúki, mûm mátán na ɛ́lán. Ká ɛ́ m bwiní átin nâ, mbúnjá ɛni, ɛ n sî nyabi. 12Yésuwə a byábání bɔ́ nána, “Nyí paʼ nyí dyá lidyá.” Ká muwútú n mɔ ká nfɔ́ á bawútú á bâ a kəkiyǎ álí kɔ́ndɛ́ mɔ́ nána, “Wə ɛ dí njá?” Bá bí nána Sáŋgúwə́ mɔ́ a dí. 13Ti Yésuwə a nɔŋí blɛ̂t a bə́kí bɔ́. A bwəlí mulimlim na shwî. 14Ɛ́yínán ɛ́ bílí bitî bílán ábə́ Yésuwə a lúfú nyǔ ɛ́ mɔ á bawútú bá mɔ a púndá ɛ́yə́ a mə́ní ɛ pumúní.
Yésuwə a kɔndɛ́ní Píta njí a níŋi mɔ́
15Ngə bá málíní álí dyá, Yésuwə a kɔndɛ́ Sáymɔ́nə Píta nána, “A Sáymɔ́nə, mwǎn mú Jɔnə́, wə ɛ nəŋí mi litúm bawútú á bánán?” Píta a pushú mɔ́ nána, “Iŋ, a Sáŋgúwə́, wə ɛ bí nána mi nəŋí wə.” Yésuwə a byábí á mɔ́ nána, “Kúmbɛ́ bǎn bá mílɔngi mí myə” 16Yésuwə a byábí pə́ á Píta ɛtî ɛ́yə́ ɛ́ lwínjání bitî bíbɛ̂ nána, “A Sáyímɔ́nə, mwǎn mú Jɔnə́, wə ɛ nəŋí mi?” Píta a pushú mɔ́ nána “Iŋ, a Sáŋgúwə́, wə ɛ bí nána mi nəŋí wə.” Yésuwə a byábí á mɔ́ nána, “Búngú mílɔngi mí myə.” 17Yésuwə a kɔ́ndɛ́ pə́ Píta bitî ábə́ bí lwínjání bitî bílán nána, “Á Sáymɔ́nə, mwǎn mú Jɔnə́, wə ɛ nəŋí myə?” Nyǔ ɛ fúwə́ Píta átin a kɔndɛ́ní mɔ́ bitî ábə́ bí lwínjání bitî bílán nána, “Ɛ nəŋí mi?” Áfánikə̌ a pɔŋí Yésuwə nána, “A Sáŋgúwə́, ɛ bí misam mísə́sə̌n. Ɛ bí nána mi nəŋí wə.” Yésuwə a byábí á mɔ́ nána, “Búngú mílɔŋgi mí myə” 18Á mbálɛ nǎn pɔŋ̌ wə̂, ɛtî ɛ́yə́ ɛ bílíní kɔ́l-ɛ-mɔʼ, ɛ bílí ɛ bunsan ɛ kə́ ká fə́ ɛ wɔ́ŋíní álí kə. Ndé ɛtî ɛ́yə́ ɛ̌ jindí, ɛ́ sám makɛ́ má wə, mɔʼ ampə́pə̂ á tfúl wə̂ sanji a kánán wə̂ áfə́ ɛ nə́ŋiyǎní ɛ kə. 19(Yésuwə a n byá nâ álí lúfú nya ɛ liwá ɛ́yə́ Píta á wání, álí lúfú wulɔʼ wú Dyǔ.) Á mbís ɛ púndá yɔ̂ Yésuwə a pɔŋíní á mɔ́ nána, “Pɔ̌ŋ mí á mbís.”
Yésuwə na muwútú awə̌ a niŋíní
20Ngə Píta a tátíní á mbí, a míní muwútú ampə́pə̂ á pɔŋá bɔ́ á mbí. Muwútú ani a bílí muwútú awə̌ Yésuwə a n nəŋní. Mɔ́ a n shuman á nsaŋ n Yésuwə á púndá ɛyə̌ bá bílíní ɛ dyá lidyá li nkwi, ti a kɔ́ndɛ́ Yésuwə nána njá á naŋ mɔ́. 21Ngə Píta a míníní mɔ́, a byábí nána, “A Sáŋgúwə́, yán ná mɔʼ a nín?” 22Yésuwə a pushú mɔ́ nána, “Njí mi n sa na mɔ́ a bá á luŋgɛ́ kə́ŋ ti púndá ɛyə̌ n paní, yán ɛ́ yî ɛ́ tátí ní wə? Pɔ̌ŋ mi á mbí.” 23Ti ndúm ɛni ɛ kǐ á mabú másə́sə̌n á baʼ ábə́ bá bílí Yésuwə á pɔŋ á mbí na muwútú ani a sí wá, ká ngə Yésuwə a sí n pɔŋní nána a sǐ wá. A n byábí wɔ̂ nána, “Njí mi n sa na mɔ́ a bá á luŋgɛ́ kə́ŋ ti púndá ɛyə̌ n paní, yán ɛ́ yî ɛ́ tátíní wə?”
24Muwútú ani mɔ́ ǎ tyə́ mbúŋ a misam ɛ́ mínán, na mɔ́ a tilí mɔ́ áshí. Ti sí bî na yə̌ ɛ́yə́ a n byábíní ɛ́ dí mbálɛ.
Shú lí kâti ɛ́ Jɔnə́
25Misam mípə́pə̂ jǐta mí dí ámə́ Yésuwə a bwəlíní. Njí bá pɔŋí nána bá tíli mɔ́ mísə́sə̌n áshí nfɔ́ nfɔ́, n kaní nána nkínshíyə̌ n sî kukíyǎ álí fá kâti ɛ́ yî ɛ́sə́sə̌n átin.
Currently Selected:
Jɔnə́ 21: bwt
Highlight
Copy
Compare
Share
Want to have your highlights saved across all your devices? Sign up or sign in
