Jɔnə́ 20
20
Yésuwə a pumú
1Mushú pilílí á bǔn bú Sɔ́ndi, ɛfínjan ɛ́ bílí wə̂, Meríyə́ Mádálɛnə́ a kí á ndim ámə́ bá wúshíní Yésuwə. Ngə a pílíní á wə́ a tání ngə bá fúlíní lilɛ́ ɛ́lə́ bá n kfútíní. 2Áfánikə̌, a kǐ nfílí álí kə ɛ́ tán Sáyímɔnə Píta na muwútú ampə́pə̂ awə̌ bú mɔ́ bá bílí. Muwútú ani a bílí muwútú awə̌ Yésuwə a n nəŋní. Ti Meríyə́ a pɔŋí bɔ́ nána, “Bá mə́ ɛ fúl mbimba n Sáŋgúwə́ á ndim, sí bíyǎ áfə́ bá mə́ní mɔ́ ɛ kə̌ ɛ́ lə́.” 3Áfánikə̌ Píta bû muwútú ani bá nyítí ti bá kí á ndim. 4Bɔ́ básə́sə̌n bá búŋgú mifílí ndé muwútú anínání a búŋgú litúm Píta. Áfánikə̌, a kɔ́sɛ́ ɛ paʼ á ndim. 5Ngə a nyɔŋíní áshí, a tátí á ndim átin, a míní mbɔ́m ɛyə́ bá pílíní Yésuwə ndé a kwíliyǎ átin. 6Sáymɔnə Píta a bílí ɛ paʼ á mbís ɛ muwútú ani. Ngə a pílíní, mulimlim n púndá a kwilí á ndim. A tání wɔ̂ mbɔ́m ɛyə́ bá pílání Yésuwə. 7A tání pə́ libaʼ álə́ bá pílání Yésuwə á nlú. Libaʼ lî lí bíliyǎ fǔm bufɔ́ na mbɔ́m ɛni. Lí pílání á nsaŋ nfɔ́. 8Muwútú aníní awə̌ a n kɔ́sɛ́ ɛ paʼ á ndim, mɔ́ pə́ a kwilí á wə́. A m mín byə̌m bî ti a dúbɛ́. 9Ká ngə bá sí n sɔ́ntání yə̌ ɛ́yə́ ɛ́ tílání á kâti ɛ Dyǔ nána Yésuwə a lɔlí ɛ pumu á liwá. 10Ti bawútú bá tímbí mbí á ndáʼ ɛ́ bɔ.
Yésuwə a lúfú nyǔ ɛ́ mɔ á Meríyə́ Madalɛnə
11Ndé Meríyə́ a bukɛ́ á nsu mú ndim á jiya. Ngə a bílíní ɛ ji, a nyɔŋí áshí á tátíyá á ndim átin. 12Ngə a tátíní á ndim átin, a míní áŋgɛl ɛ́bɛ̂. Áŋgɛl ɛ́yî ɛ́ fílí miku mí púwǎ, ɛ́ shúmání áfə́ bâ n nanjíní mbimba m Yésuwə. Nfɔ́ a shumání á pɛsi ɛ makwi, aníní a pɛsi ɛ nlú. 13Áŋgɛl ɛ́ yî ɛ́ kɔ́ndɛ́ Meríyə́ nána, “Á mwalân, yə̌ ɛ̌ jiní?” Meríyə́ a pushú bɔ́ nána, “Nǎn ji ɛ́tútú nána bá mə́ ɛ nǔŋ mbimba m Sáŋgúwə́ m myə, na m bíyǎ áfə́ bá lə́kíní mɔ́.” 14Ngə a malíní álí byá nâ, a wɛ́sí nyǔ, a míní ngə mɔʼ a tyə́bíní á fâ. Mɔʼ ani a bílí Yésuwə, ndé a sí n bí na Yésuwə mɔ́ a dí nâ. 15Yésuwə a kɔ́ndɛ́ mɔ́ nána, “Mwalân, yə̌ ɛ̌ jiní? Njá ɛ̌ saní?” Meríyə́ a kaní nána mɔʼ awə̌ ǎ bwə ɛbulú á ndukú ɛni mɔ́ ani. Áfánikə̌ a pɔŋí mɔ́ nána, Áshí njí wə́ ɛ núŋí mbimba m mɔ, pɔ̌ŋ mî á fə́ ɛ lə́kíní mɔ́ álí bwə nána n kə n núŋ mɔ́. 16Yɔ̂ Yésuwə a bəŋní mɔ́ nána, “Á Meríyə́!” Meríyə́ a wɛ́sí nyǔ á mɔ́ ti a byábí n Híbru nána, “Rábɔ́ni” (ɛyə́ yándá lí díní nána, “Mulɛ̂”.) 17Yésuwə a pɔ́ŋí Meríyə nána, “Ɛ si nyɔtí mi á ɛ́tútú nána n nan tímbíyá wə́ á Sáŋ. Ndé kə̌ á bawútú bá myə, bǎn-bá-nyǎ bá myə, ɛ pɔ̂ŋ bɔ́ nána nǎn tǐm mbí á Sáŋ m myə, awə̌ pə́ a dí Sáŋ n nyə. A dí Dyǔ lí myə, a bá pə́ Dyǔ lí nyə.” 18Meríyə́ Magdalɛ́nə a kǐ a pɔŋí bawútú bá Yésuwə nána, “M mə́ ɛ mín Sáŋgúwə́!” Ti a pɔŋí bɔ́ misam mísə́sə̌n ámə́ Yésuwə a pɔŋíní mɔ́.
Yésuwə a lúfú nyǔ ɛ́ mɔ á bawútú bá mɔ
19Mulimlim m bwǐn bú Sɔ́ndi bû, á nkwi, bawútú bá Yésuwə bá shwínjání á ndáʼ ti bá kɔ́lí ɛku á ɛ́tútú nána bá bílí ɛ báŋ baʼ bá nə̂n bá Júda. Ti Yésuwə a pilí a tyə́bí átitîn wú bɔ, ti a byábí á bɔ́ nána, “Musaŋgu m bá na nyə́” 20Ngə a byábíní nâ, a lúfú bɔ́ makɛ́ má mɔ na nsán n bɛnj m mɔ, ti bawútú bá wúkí munyɛŋgɛ ngə bá míníní Sáŋgúwə́. 21Yésuwə a byábí pə́ á bɔ́ nána, “Musaŋgu m bá na nyə́. Ngə Sáŋ m myə a lúmíní mi, mulimlim nâ pə́ n lúmní nyə́.” 22Ngə a byábíní, nâ a fúŋí pəmi á nyǔ ɛ bɔ ti a pɔŋí bɔ́ nána, “Nyí nǔŋ Mudî ámə́ n Sáŋí. 23Ká njá awə̌ nyí laksɛ́ní wubî wú mɔ́, ní wubî bû wú mə́ ɛ laksan. Ká njá awə̌ nyí láksɛní wubî wú mɔ, ní wubî bû wú láksɛniyǎ.”
Yésuwə a lúfú nyǔ ɛ́ mɔ á Tɔ́masə
24Tɔ́masə muwútú nfɔ́ á bawútú bá Yésuwə dyǔm na bábɛ̂ awə̌ bá bílíní ɛ bə̌ŋ lifɛ̂, a bíliyǎ na bɔ́ á púndá ɛyə̌ Yésuwə a pilíni. 25Áfánikə̌, ngə a pílíní, bawútú ábání bá pɔ́ŋí mɔ́ nána, “Sí mə́ ɛ mín Sáŋgúwə́.” Ndé Tɔmasə a pɔŋí bɔ́ nána, “Kə́ŋ m mín ndfuwɛ á makɛ́ má mɔ ɛ́yə́ bá búmíní na tɔni ti n bándí wumuɛ wú myə á ndfuwɛ ɛni, ti n bándí pə́ wumuɛ á nsaŋ m bɛnj ɛ́ mɔ, n sî n dúbɛ́ tǒm.”
26Madû wam má túmbíní, bawútú bá Yésuwə bá shwínjání pə́ á ndáʼ. Tɔ́masə pə́ a bílí á wə́. Bá n kɔ́ bikuʼ, ndé Yésuwə a pilí, a tyə́bí átitîn m bɔ ti a pɔŋí bɔ́ nána, “Musaŋgu m bá na nyə́.” 27Yésuwə a byábí á Tɔmasə nána, “Fá wumwɛ wú wə á ndfuwɛ ɛ́ yínán, ɛ mín makɛ́ má myə, sám ɛkɛ́ ɛ́ wə ɛ bán yɔ́ á nsaŋ mbɛn m myə. Ɛ sí bá mɔʼ a pénda ndé dúbɛ́.” 28Tɔ́masə a pushú mɔ́ nána, “A Sáŋgúwə́ m myə na Dyǔ lí myə.” 29Ti Yésuwə a pɔŋí mɔ́ nána, “Ɛ dúbɛ́ á ɛ́tútú nána ɛ míníní mi? Wunam na baʼ ábə́ bá míniyǎ ndé bá dúbɛ́.”
Yándá álə́ kâti ɛnín ɛ́ tílání
30Yésuwə a bwəlí misam mí mányáká mípə́pə̂ jǐta ámə́ bawútú bá mɔ bá míníní ndé mí tíliyaníyǎ á kâti ɛnín. 31Ndé misam mínán mísə́sə̌n mí tílání nána nyí dúbɛ́ nána Yésuwə Mɔ́ á dí Ani awə̌ bá Wɔ́kílíní, Mwǎn a Dyǔ. Na wə̌ti ɛ dúbɛ́ mɔ́, ní nyí kwisí luŋgɛ́ álə́ lí sɛ̌ ɛ́ mɛ.
Currently Selected:
Jɔnə́ 20: bwt
Highlight
Copy
Compare
Share
Want to have your highlights saved across all your devices? Sign up or sign in
