Jɔnə́ 2
2
Wuwə́ á nkí n Kána
1Ngə madû mábɛ̂ má túmbíní, wuwə́ wú bílí á nkí n Kána, á pɛsi ɛ mbú ɛ Gálilî. Nyǎ mú Yésuwə a bílí á wə́. 2Ti bá lə́bí pə́ Yésuwə ndúm na bawútú bá mɔ á wúwə́ bû. 3Á púndá ɛyə̌ mǐm má mɛ́ní, yɔ́ nyǎ mú Yésuwə a pílíní á mɔ́ ti a pɔŋí mɔ́ nána, “Mǐm má mə́.”
4Yésuwə a pushú mɔ́ nána, “A mâ, ɛ tíŋganiyǎ ɛ́ pɔŋ mî yǔm ɛ́yə́ n lɔlíní ɛ bwə. Púndá ɛ́ myə ɛ nan pílíyá wə́.” 5Nyǎ m mɔ a pɔŋí babwə bá ŋgandu ɛni nána, “Nyí bwə yǔm tɛ́ ɛ́yə́ a pɔŋíní nyə́ álí bwə.” 6Sɔnsɔ́nǎn mbə̌ ɛ́ malɛ́ ɛ́ bílí ntyǔ á wə́ á nsaŋ. Nyai ɛ́ mbə̌ ɛ́yî yɔ́ baʼ bá Ísrɛl bá bílíní ɛ bwəlan álí fá mádí átin álí wǔ bikisá bí nyǔ bí bɔ bifɔ́ á púndá ɛ́ makáni ɛ́ bɔ. Mbə̌ tɛ́ ɛ núŋákí madí mbúki ɛ́ líta. 7Ti Yésuwə a pɔŋí babwə bá ŋgandu á bâ nána, “Lwínjíyání madí á mbə̌ ɛ́yî.” Bá lwínjí madí á mbə̌ ɛ́yî ɛ́sə́sə̌n kə́ŋ ti á misu. 8Ti a pɔŋí bɔ́ nána, “Sɔnsɔ́nǎn kə̂, nyí bwə̌ duŋgu nyí kə̂ nyí bə̂ mɔʼ awə̌ a dí nlú álí kasí baʼ á wuwə́ bún.” Áfánikə̌ bá bwə́lí nâni. 9Ngə mɔʼ ani a wúlání madí m mâ ámə́ má mə́ ɛ tǐm mǐm, a sî m bíyá áfə́ mǐm mâ má fíní. (Ndé babwə ábə́ bá kǐ ɛ́ bwə̌ madí mâ bâ m bî.) Ti a bəŋí mɔʼ awə̌ a bílí ɛ wə́, 10ti a pɔŋí mɔ́ nána, “Mɔtɛ́ ǎ kɔ́sɛ́ ɛ́ kásí baʼ na mǐm má mbâ. Njí baʼ bá mə́ ɛ mwá jǐta, ti a bəkí bɔ́ mǐm ámə́ má lɔ́líyǎ. Ndé wə ɛ kɔŋgɔ́ní mǐm má mbâ kə́ŋ ta sɔnsɔ́nǎn.”
11Manyáká á mán ámə́ Yésuwə a bwəlíní á Kána á pɛsi ɛ mbú ɛ Gálilî mɔ́ má bílí ɛyəmblan ɛ́ mɔ ɛ́ wúsúsúwə. Áwə́ a lúfúní wulɔʼ wú mɔ, ti bawútú bá mɔ bá dúbɛ́ mɔ́.
12Á mbís ɛ púndá, Yésuwə na nyǎ m mɔ, bǎn-bá-nyǎ bá mɔ na bawútú bá mɔ bá kí áshí á nkí m Kapɛ́nahûmə. Bá dyɛ́ ngushu ɛ́ madû á wə́.
Yésuwə a naní baʼ ábə́ bá bílí ɛ bwə nyungá á Tɛ́mpɛl
(Mát 21:12,13; Mâk 11:15-17; Lûk 19:45,46)
13Á púndá ɛyə̌ ŋgandu ɛ Litúm Ámǐn ɛ baʼ bá Júda ɛ mə́ní ɛ wútan, yɔ́ Yésuwə a kǐní á nkí m Jerúsálɛmə. 14Ngə a pílíní áwə́ a kǐ á Tɛ́mpɛl. A tání baʼ bá bwəlá nyúŋgá. Bá bílí ɛ súm nyaʼ, mílɔ́ŋgi na mbingá. Baʼ bápə́pə̂ bá bílí ɛ pəlán ngáʼ. 15Yɔ̂ Yésuwə a bwəlíní ɛtaŋgá na nshinga, ti a naní baʼ básə́sə̌n na nyam ɛ́ bɔ pə́ á Tɛ́mpɛl. A páŋí pə́ ngáʼ ɛyə̌ baʼ bá bílíní ɛ́ pəlán, ti a wɛ́sí makwi má tíbili ɛ́yə́ bá bílíní ɛ pəlán ngáʼ á mǐn. 16A byábí á baʼ ábə́ bá bílí ɛ súm mbingá nána, “Nyí nyítan byə̌m bín á ɛ́búkatîn! Yán nyí tíŋgání ɛ bwə̂ ndáʼ ɛ́ Sáŋ m myə ngə fǔm bú mákíti!” 17Ngə bawútú bá Yésuwə bá míníní nâ, yɔ́ bá káníní á pɛsi ɛ kâti ɛ Dyǔ ɛyə̌ ɛ̌ byá nána, “Ǎ Dyǔ, nyɔ́ŋgí ɛyə̌ n wɔ́ŋíní á ɛ́tútú ɛ́ ndutu ɛ wə, ɛ́ búlú mî”
18Bajaniya bá baʼ bá Júda bá tímbí mbǐ á Yésuwə ti bá kɔ́ndɛ́ mɔ́ nána, “Ɛyəmblan ɛ́ manyáká ɛ́fə́ ɛ tiŋgání ɛ bwə álí lúfú sə́ nána ɛ wɔ́ŋí wunja álí bwə misam mínán mísə́sə̌n?” 19Yésuwə a pushú bɔ́ nána, “Nyí gbíti Tɛ́mpɛl ɛnínán, á madû málán nǎn lúŋ pə́ yɔ́.” 20Yɔ̂ baʼ á bâ bá byábíní nána, “Ndáʼ ɛnínán ɛyə̌ ɛ nuŋí mimbvú mûm mánîn na ntyǔ álí lúŋ, yɔ́ ɛ byábíní wə mú lúŋ á madû málán?” 21Ndé ndáʼ ɛyə̌ Yésuwə a bílíní ɛ byá, ɛ bílí nyǔ ɛ́ mɔ. 22Áfánikə̌, á mbís ɛ púndá ɛyə̌ Yésuwə a wúlíní ti Dyǔ lí púmúní mɔ́, yɔ̂ bawútú bá mɔ bá kání yə̌ ɛ́yə́ a m pɔŋní bɔ́. Bâ n dúbɛ́ yə̌ ɛ́yə́ bí tílání á kâti ɛ Dyǔ, ti bá dúbɛ́ biyala ábə́ Yésuwə a m byání.
Yésuwə a bí milə́m mí bâ básə́sə̌n átin
23Ngə Yésuwə a bílíní á Jerúsálɛmə á púndá ɛ ŋgandu ɛ Litúm Ámǐn, baʼ jǐta bá dúbɛ́ mɔ́ ngə bá míníní misam mí manyáká ámə́ a bwəlíní. 24Ndé Yésuwə a bíliyǎ ɛ́ fá nlə́m m mɔ á bɔ́ á ɛ́tútú nána, a m bí libá lí bɔ́ baʼ básə́sə̌n. 25Mɔʼ ká nfɔ́ a sî n lɔʼ álí pɔ̌ŋ mɔ́ yǔm na yǔm tɛ́ŋgɛnɛ mɔʼ ampə́pə̂ á ɛ́tútú nána mɔ́mə̌n a m mə̌ ɛ́ bí mílə́m mí bâʼ básə́sə̌n átin.
Currently Selected:
Jɔnə́ 2: bwt
Highlight
Copy
Compare
Share
Want to have your highlights saved across all your devices? Sign up or sign in
