Jɔnə́ 19
19
1Ti Páyílɛtə a byábí nána bá kə bá lá Yésuwə. 2Basója bá núŋí bikaʼ bí mayɔ̌, bá mɔ́kí ɛpkútú ɛ́yə́ ɛ bílí ngə ɛpkútú ɛ́ kə̂ŋ, bá fá mɔ́ yɔ́ á nlú, bá fílí mɔ́ nku n túnǎ, ámə́ n wátání nku n kə̂ŋ. 3Ti bá pílí li wútán mɔ́ bá byábí nána, “A kə̂ŋ ɛ baʼ bá Júda, ɛdúbɛ́ ɛ́ bá na wə.” Bá bílí pə́ mɔ́ ɛ lá mábɛ́yn. 4Páyíletə a nyítí pə́ á ɛbúka, a byábání limuti lí baʼ nána, “Tátíyání, nyítání mɔ́ á ɛbúka á nyə́ álí bwə na nyí bí na mi míniyǎ liwusɛ́ ká lífɔ́ álə́ a bwəlíní álí kɔksɛ́ mɔ́.” 5Áfánikə̌, Yésuwə a nyítí á ɛbúka na ɛkpútú ɛ mayɔ̌ á nlú, nkú n túnǎ pə́ n bílí wə mɔ́ á nyǔ. Páyíletə a pɔŋí bɔ́ nána, “Tátíyání, mɔʼ awə̌ mɔ́ nín!” 6Ngə baprîsə bá nə̂n na babwə bá Tɛ́mpɛl bá míníní mɔ́ bá bútí ɛ́ bún nána, “Bumí mɔ́ á mbásá! Bumí mɔ́ á mbásá!” Páyíletə a byábání bɔ́ nána, “Nyə́mə̌n nyí nǔŋ mɔ́ nyí bumí mɔ́ a mbásá, á ɛ́tútú nána m míniyǎ yándá álí kɔ́ksɛ́ mɔ́” 7Limuti lî lí tímbí Páyílɛtə byá nána, “Sí wɔ́ŋí mbéndá ɛyə́ ɛ byábí nána a lɔlí ɛ wá á ɛ́tútú nána, ǎ byá na mɔ́ mú dí Mwǎn a Dyǔ.”
8Ngə Páyíletə a wúkíní nâ, bɔ̌ŋ wú kúwí mɔ́ jǐta, 9a timbí pə́ á ɛbúka ti a kɔndɛ́ Yésuwə nána, “Áfə́ wə ɛ fǐní?” Ndé Yésuwə a púshuwǎ mɔ́. 10Payletə a byábí pə́ nána, “Ɛ sî pushúwǎ mi? Ɛ bíyǎ na n wɔ́ŋí wunja álí pɔŋ nána bá máku wə, na n wɔ́ŋí wunjá álí pɔŋ nána bá bumí wə á mbásá?.” 11Yésuwə a pushú mɔ́ nána, “ɛ wɔ́ŋiyǎ wunja ká lífɔ́ á mi ɛ́sibá na Dyǔ lí bə́kí wə wunjá á mi. Áfánikə̌, mɔʼ awə̌ a bəkí mî á makɛ́ má wə a bwəlí wubî wú nə̂n litúm lí wə.” 12Ngə Payiletə a wúkíní nâ, a wanání álí sa mwanu álí makú Yésuwə. Ndé limuti lí búní nána, “Njí ɛ makú mɔʼ anínán, ní ɛ shiyǎ nsú mú Káysa. Ká njá awə̌ ǎ byá nána a dí kə̂ŋ, ní ǎ tɛ́ŋgɛ́n Káyísa.”
13Ngə Páyíletə a wúkíní nâ, a nyítání Yésuwə á ɛ́bú ti a shúmaní á ɛbuŋ ɛ́ janiya. Áfə́ a n shumání nâ, bá bílí bɔ́ ɛ bəŋ bá, Ɛbúka ɛ́yə́ bá támbúní na Malɛ́. Á mbyá mú Híbru bá bílí bɔ́ ɛ bə̂ŋ bá Gabáta. 14Sɔnsɔ́nǎn ɛ́ bílí ká ngə́ŋ dyǔm na ɛ́bɛ̂ á bǔn ábə́ bá bílíní ɛ bunsan bǔn bú Ŋgandu ɛ Litúm Ámǐn. Páyíletə a pɔŋí baʼ bá Júda bâ nána, “Kə̂ŋ ɛ nyə mɔ́ a dí nán!” 15Ndé baʼ bâ bá búní nána, búlú mɔ́! Búlú mɔ́! Bumí mɔ́ á mbásá! Páyíletə a kɔndɛ́ bɔ́ nána, “Nyí sa nána m búmi kə̂ŋ ɛ́ nyə á mbásá?” Baprîsə bá nə̂n bá pushú mɔ́ nána, “Kə̂ŋ pɔ́ ɛyə́ sí wɔ́ŋíní yɔ́ á dí Káyísa n sə.” 16Áfánikə̌, Páyílɛtə a bəkí Yésuwə á makɛ́ má bɔ na bá búmi mɔ́ á mbásá.
Bá búmí Yésuwə á mbásá
Áfánikə̌ bá nyítí na Yésuwə. 17Yésuwə mɔ́mə̌n a pə́mbí mbásá ɛ́ mɔ butya á nkí átin kə́ŋ ti áfə́ bá bəŋní bá “Fǔm bú Ɛkpɔ́kpɔ́ ɛ́ Nlú,” fǔm ábə́ bá bəŋní á mbyá mú Híbru nána Gólgóta. 18Á wə́ bá búmí mɔ́ á mbásá. Bá n búmí pə́ baʼ bápə́pə̂ bábɛ̂ á wə́, nfɔ́ á pɛsi ɛ nín, ampə́pə̂ á pɛsi ɛ nínání, ti Yésuwə a bílí á wútitîn.
19Páyíletə a tilí á ɛkúm nána, Yésuwə, mɔʼ a nkí n Názarɛtə, Kə̂ŋ ɛ baʼ bá Júda, ti a bándí yɔ́ á mbásá ɛ́ Yésuwə á mǐn. 20Baʼ jǐta bá láŋí yɔ́ á ɛ́tútú nána áfə́ bá búmíní Yésuwə á mbásá wú bílí liwútán Jɛrúsálɛmə. Yǔm ɛ́yə́ a n tilní ɛ́ bílí á mbyá mú Híbru, a tilí yɔ́ á mbyá n Látin na mbyá n Grîkə. 21Baprîsə bá nə̂n bá pɔ́ŋí Páyíletə nána, “Ɛ si tǐl nána, ‘Kə̂ŋ ɛ baʼ bá Júda,’ tǐl nána, ‘Mɔʼ anín a byábí nána miyə n dí kə̂ŋ ɛ baʼ bá Júda.’” 22Páyíletə a pushú bɔ́ nána, “Yə̌ ɛ́yə́ m mə́ní ɛ tǐl m malí álí til.”
23Ngə basója bá málíní álí bumí Yésuwə á mbásá, bá núŋí nku m mɔ, bá kábí mɔ́ muŋgu mánǐn, mɔtɛ́ a nuŋí likaʼ lí mɔ. Bá núŋí pə́ liba álə́ a fílíní átin. Liba lî bá sî jǔm lɔ́ ká fǔm. Butya ámǐn ta áshí bá sî n jǔm lɔ́. 24Basója bá byábí na bɔ́mə̌n nána, Sí si nya lɔ́. Sí shwá bambá, sí mín mɔʼ awə̌ á núŋ lɔ́. Ɛ́yî ɛ́ bwə́lání álí lwínjí ɛyala ɛ́yə́ ɛ́ tílání á kâti ɛ Dyǔ nána,
“Bá kábí mabaʼ má myə na bɔ́mə̌n.
Bá shwátí bambá álí ka kúti ɛ́ myə.”
Áfánikə̌, nâ sója ɛ́yî ɛ́ bwə́líní. 25Baʼ ábə́ bá tyə́bí á nsaŋ m mbásá ɛ́ Yésuwə bá bílí nyǎ n Yésuwə, mǎ-nyǎ-mú nyǎ m mɔ, Meríyə́ awə̌ a bílí mwalân n Klópasə na Meríyə́ Magdálɛnə. 26Yésuwə a míní nyǎ m mɔ na muwútú awə̌ a nəŋíní ngə bá tyə́bíní áfâ, yɔ́ a pɔŋíní nyǎ m mɔ nána, “Amâ, mwǎn n wə mɔ́ nín.” 27Ti a pɔŋí pə́ muwútú ani nána, “Nyǎ n wə mɔ́ ni.” Butya púndá ɛni, muwútú ani a nuŋí nyǎ mu Yésuwə a kanání mɔ́ á ndáʼ ɛ́ mɔ.
Yésuwə a wúlí
28Ɛ́ mə̌ wə̂ ɛ túm nâ, Yésuwə a n yəmb nána misam mísə́sə̌n mí mə́ ɛ bwəlan álí lwínjí ngə ɛ́ tílání á kâti ɛ Dyǔ nána, “Sə́m ɛ kúwí mi.” 29Ɛkfu ɛ́ bílí á wə́, ɛ́ lwínjí na ɛkpɛ́ntí ɛ́ mǐm. Áfánikə̌, bá júbí kushá á mǐm mâ átin, bá pɛ́ní yɔ́ á ɛlâʼ ɛ́ hísɔp bá sɔ́ŋí mɔ́ á nsu. 30Ngə Yésuwə a mwílíní ɛkpɛ́ntí ɛ́ mǐm ɛ́yî, a byábí nána, “Ɛ́ mə́.” Áfâ a sɛmí nlú ti a wúlí.
Bá sɔ́ŋí Yésuwə na ɛlɔ̂ʼ á nsaŋ n mbɛn
31Sɔnsɔ́nǎn ɛ́ bílí bǔn bú lí bunsán bú bǔn bú Líkɔ́mbɛ. Baʼ bá nə̂n bá Júda bá, bá sîn sa na mbimba m bá wə́ á mbásá á bǔn bú Líkɔ́mbɛ, ngə bǔn bú Líkɔ́mbɛ bû, bû wɔ́ŋ ɛdúbɛ́ jǐta. Áfánikə̌, bá tání Páyíletə nána a bə bɔ́ wunja álí bú makwi má baʼ ábə́ bá búmíní á mbásá na álí fúl bɔ́ á mbásá. 32Áfánikə̌, basója bâ bá kǐ bá búkí makwi má baʼ ábə́ bá búmíní á mbásá á misáŋ mí Yésuwə. Bá kɔ́sɛ́ ɛ bú makwi má nfɔ́ ti anínání pə́. 33Bá lâ ɛ paʼ á Yésuwə bá míní nána a mə́ ɛ wá. Áfánikə̌, bá búkiyǎ mɔ́ makwi. 34Kánâwə̌, sója pɔ́ a sɔŋí Yésuwə á nsaŋ n mbɛn na ɛlɔ̂ʼ ɛ́ mɔ. Áfâ áshí áshí maki na madí má nyítí. 35Mɔʼ awə̌ a míní ngə nsam mû m bwə́lání, a tyə́bí mbúŋ ti mbúŋ ɛ́ mɔ ɛ dí mbálɛ. A bí nána ǎ byá mbálɛ, na ǎ byá mísam mínán nána nyə́ pə́ nyí dúbɛ. 36Misam mínán mí bwə́lání álí lwínjí biyala ábə́ bí tílání á kâti ɛ Dyǔ nána, “Bá sî búká ɛfis ɛ́ mɔ ká ɛfɔ́.” 37Ɛ́ tílání pə́ á kâti ɛ Dyǔ nána, “Bá tátí ani awə̌ bá sɔ́ŋíní ɛlɔ̂ʼ.”
Bá wúshí Yésuwə
38Ngə misam mínán mí mə́ní ɛ túm, Josɛ́fə awə̌ a fí á nkí n Arímatáyasə, a kɔndɛ́ Páyíletə nána a bə̂ mɔ́ wunja álí nǔŋ mbimba m Yésuwə. Josɛ́fə a bílí muwútú mú Yésuwə a wusɔmɔ́nə ɛ́tútú nána a bílí ɛ báŋ baʼ bá nə̂n bá Júda. Páyíletə a bəkí mɔ́ wunja álí nǔŋ mbimba mú Yésuwə. Áfánikə̌ Josɛ́fə a kí a nuŋí mbimba mú Yésuwə. 39Nikodémusə, awə̌ a n kɔsɛ́ ɛ́ kə álí mín Yésuwə wudû, bú Josɛ́fə bɔ́ bá kí. Byáná bá kə, a n lə́ bilúŋgísán ábə́ bá tambúní mbimba m Yésuwə, ábə́ bá bwə́líní na míya na alɔsə. Yǔm ɛ́ liwɔ́ ɛ́yî ɛ́ bílí ká ngə kílo mûm málán na ɛ́tân. 40Bá núŋí mbimba m Yésuwə bá pílí na mbɔ́m na bilúŋgísán ɛ́ bî. Nâ ɛləm ɛ́ baʼ bá Júda ɛ́ bílíní álí tambú mbimba. 41Sɔnsɔ́nǎn ndukú ɛ bílí áfə́ bá búlúní Yésuwə. Ndim nkɔnə n bílí á ndukú ɛni m mə́ bá sî n məní ɛ fá mɔʼ átin tǒm. 42Ngə bǔn bû wú bílíní bǔn bú lí bunsan á bǔn bú Líkɔ́mbɛ, ndim m mû m bílí á nsaŋ, bá nanjí mbimba mú Yésuwə áwə́ átin.
Currently Selected:
Jɔnə́ 19: bwt
Highlight
Copy
Compare
Share
Want to have your highlights saved across all your devices? Sign up or sign in
