Jɔnə́ 18
18
Bá kúbí Yésuwə
1Ngə Yésuwə á málíní álí káni, mɔ́ na bawútú bá mɔ bá mákú fǔm bû, bá túmbí mǎ pɛ́ a Kídrɔnə ámǐn. Ndfukú ɛ bílí áwə́, bá kwílí átin. 2Júdasə, awə̌ a n naŋ Yésuwə, a m bí fǔm bû á ɛ́tútú nána Yésuwə na bawútú bá mɔ bá bílí ɛ bum áwə́. 3Yɔ́ Júdasə a túmbíní na ndíngí n sója na babwəla-bá-Tɛ́mpɛl ábə́ Baprîsə bá nə̂n na Bafárisî bá lúmíní, bá kǐ áfə́ Yésuwə a bílíní. Bâ n lə́ byə̌m bí njum na bitrúkán na bikaʼ. 4Yésuwə a m mə̌ ɛ́ bí misam mísə́sə̌n ámə́ mî wɔ́ŋ álí bwəlán á mɔ́, kánâwə̌, a lúfú nyǔ ɛ́ mɔ, a kɔndɛ́ bɔ́ nána, “Njá nyí saʼní?” 5Bá púshú mɔ́ nána, “Sí sa Yésuwə, mɔʼ” a nkí n Názárɛtə. Yésuwə a tímbí bɔ́ nána, “Miyə́ n dí mɔ́.” Júdasə awə̌ a naŋŋí Yésuwə a bílí á wə́ na baʼ á bâ. 6Ngə Yésuwə a pushúní bɔ́ nána “Miyə́ n dí mɔ́”, bá mákí nyǔ á mbí, ti bá kfúndí áshí. 7Ti Yésuwə a kɔndɛ́ pə́ bɔ́ nána, “Njá nyí saʼní?” Bá púshú mɔ́ nána, “Yésuwə, mɔʼ a nkí n Názárɛtə,” 8Yɔ̂ Yésuwə a pushúní bɔ́ nána, “N pɔŋí nyə́ nána, myɛ́ n dí mɔ́. Áfánikə̌, njí nyí sa mi, nyí máku baʼ ábə́ bá dí na mi bá kə̌.” 9Ɛ́yínán ɛ́ bwə́lání álí lwínjí biyala ábə́ a byábíní nána, “Sáŋ, m bɔ́lɔniyǎ ká nfɔ́ átítin a baʼ ábə́ ɛ bə́kíní mi” 10Sáymɔnə Píta a n kə na pɛ́ ɛ misu míbɛ̂. Yɔ̂ a dfulíní pɛ́ ɛni, ti a shə́lí ɛtwî ɛ ɛkɛ́ ɛ́ mbâ ɛ́ mbwəlâ m prísə a n nə̂n. Dǐn lí mbwəlâ ani lí bílí Málkusə. 11Yésuwə a byábí á Píta nána, “Timbí pɛ́ ɛ́ wə á mbaʼ. Ɛ̌ kaní nána n sî n túmbá á mutakaʼ ámə́ Sáŋ m myə a mə́ní ɛ wiki na mi, n kwisi?”
Bá kánání Yésuwə á Ánásə
12Yɔ̂ ndíŋgí n sója mû na nlú m bɔ, na babwə bá baʼ bá Júda, bá kúbíní Yésuwə, bá tfúl mɔ́. 13Bá kɔ́sɛ́ mɔ́ ɛ kanan á Ánásə. Ánásə a bílí sáŋ m mwalân mú Káyífasə, awə̌ a bílí prísə a nə̂n á mbú ɛni. 14Káyífasə mɔ́ a m bə̌ milú mí baʼ bá Júda maléyá nána ɛ́ lɔ́lí nána mɔ nfɔ́ a wá á milú mí baʼ básə́sə̌n.
Píta a báŋí Yésuwə
15Ngə sója ɛ́yî ɛ́ bílíní Yésuwə ɛ kanan, Sáymɔnə Píta na muwútú ampə́pə̂ bá bílí Yésuwə ɛ pɔŋ á mbís. Prísə a nə̂n a m bí muwútú ani, áfánikə̌, muwútú ani a n kwilí á ɛ́búka ɛ́ prísə a nə̂n áfə́ bá kwísání Yésuwə. 16Píta ka á búkɛ́ á ɛ́bú álí wútán ɛkuʼ ɛ́ wúkâ. Muwútú anín awə̌ prísə a nə̂n a bíní, a timbí á ɛku ɛ́ wukâ, ti a byábí á wukɔn ábə́ wú bílí ɛ mindí ɛkuʼ ɛ́ wukâ, ti a kwísí Píta á ɛbúka. 17Á mbís ɛ púndá, wukɔn bû wú kɔ́ndɛ́ Píta nána, “Nga wə pə́ ɛ dí muwútú nfɔ́ m mɔ ani?” Píta a pushú mɔ́ nána, “Ǎyi, n shiyǎ.” 18Sɔnsɔ́nǎn, ɛfiʼ ɛ́ bílí. Áfánikə̌, babwəla bá prísə a nə̂n na babwəla bá Tɛ́mpɛl bá búndí mwǐ, bá kámbú mwǐ bá wɔ́kɔʼ. Ti Píta pə́ a kǐ á wə́, mɔ́ pə́ a tyə́ á wɔ́kɔ.
Prísə a nə̂n a káyísí Yésuwə
19Prísə a nə̂n a kɔndɛ́ Yésuwə tɛ́ŋgɛnɛ bawútú bá mɔ na jókwa lí mɔ. 20Yésuwə a pushú mɔ́ nána, “Misam mísə́sə̌n ámə́ m bílíní baʼ ɛ pɔŋ, m bílí mɔ́ ɛ byá á tandándâ. Jókwa lí myə lísə́sə̌n lí bílí á mandáʼ má makáni má baʼ bá Júda, na á Tɛ́mpɛl, áfə́ baʼ bá Ísrɛl básə́sə̌n bá bílíní ɛ shwinjan. N nan byábiyǎ ká yǔm á kfun átin. 21Yán kə́ ɛ̌ kɔndɛ́ní pə́ mi? Kɔndɛ́ baʼ ábə́ bá wúkí misam ámə́ m pɔŋíní bɔ́. Bá bî misam ámə́ m byábíní.” 22Ngə Yésuwə a byábíní nâ, mbwəlâ nfɔ́ a lábí mɔ́ libɛ́yn. Ti a kɔndɛ́ mɔ́ nána, “Njá a bəkí wə wunja álí byábán prísə a nə̂n a nyay ɛni?” 23Yésuwə a pushú mɔ́ nána, “Njí m byábí yə̌ ɛ́yə́ ɛ tɛ́ŋgɛniyǎ, pɔŋ yɔ́ baʼ básə́sə̌n bá wú. Ndé njí m byábí yə̌ ɛ́yə́ ɛ́ tɛ́ŋgɛ́ní, yán kə́ ɛ lábíní mi?” 24Ti Ánasə a byábí nána bá kánan Yésuwə á Káyífasə, Prísə a nə̂n. Bá ntfúl Yésuwə.
Píta a báŋí pə́ Yésuwə
25Á mbís ɛ púndá, Píta a bílí wɔ̌ ɛ́ tyə́ á fâ. Ti baʼ ábə́ bá bílí á wə́ bá kɔ́ndɛ́ pə́ mɔ́ nána, “Ɛ shiyǎ muwútú nfɔ́ á mɔʼ ani?” Ndé Píta a táŋí nána, “Ǎ yě, n shiyǎ.” 26Mbwəlâ-a-ndutu nfɔ́ m prísə a nə̂n, mǎ nyǎ m mɔʼ awə̌ Píta a shə́líní ɛtwî a pusí ŋgɔli ɛ́ mɔ á mǐn a byábí á Píta nána, “Iŋ nga m míní nyí mɔ́ á ndukú?” 27Píta a táŋí pə́. Mulimlim m púndá, njúm-má-kfú a kɔ́ní.
Páyílɛtə a káyísí Yésuwə
28Baʼ bá nə̂n bá Júda bá nyítání Yésuwə á ndáʼ ɛ Káyífasə, bá kánání mɔ́ á ɛbúka ɛ́ mɔʼ a janiya a nə̂n. Ɛ́yínán ɛ́ bílí mushú pilílí. Bɔ́mə̌n bá kwíliyǎ á ndáʼ átin, nána bá si mín bɔ́ ngə baʼ bá mbindu á wusú wú Dyǔ álí bwə nána bá dyá ŋgandu ɛ Litúm á Mǐn. 29Páyílɛtə, janiya lí nə̂n lí baʼ bá Rômə, a nyítí á ɛbúkatîn álí kə bɔ́ ɛ tán ti a kɔndɛ́ bɔ́ nána, “Yə̌ nyí byání nána mɔʼ anínán a bwə́líní?” 30Bá púshú mɔ́ nána, “Njí a sî m bá mɔʼ a mbî, ní sí pánaniyǎ mɔ́ á wə.” 31Yɔ̂ Páyílɛtə a pɔŋíní bɔ́ nána, “Nyə́mə̌n nyí nǔŋ mɔ́, nyí bwə́lan mbéndá ɛ́ nyə álí káyísí mɔ́.” Ti baʼ bá Júda bá pɔ́ŋí mɔ́ nána, “Sí wɔ́ŋiyǎ wunja álí búlú mɔʼ ká nfɔ́.” 32Ɛ́ yî ɛ́ bwə́lání álí lwínjí biyala ábə́ Yésuwə a byábíní álí lúfú nyai ɛ liwá álə́ á wání. 33Páyílɛtə a timbí mbǐ á ndáʼ, a bəŋí Yésuwə, ti a kɔndɛ́ mɔ́ nána, “Ɛ dí kə̂ŋ ɛ baʼ bá Júda?” 34Yésuwə a pushú mɔ́ nána, “Wəmə̌n ɛ byábí nâ, tɔ̌ baʼ bápə́pə̂ bɔ́ bá pɔ́ŋí wə tɛ́ŋgɛnɛ mi?” 35Páyílɛtə a pushú Yésuwə nána, “N dí yə́ mɔʼ a Júda? Baʼ bá wə na baprîsə bánə̂n bɔ́ bá pánání wə̂ á mi. Yə̌ ɛ bwəlíní?” 36Yésuwə a pushú mɔ́ nána, “Janiya lí myə lí shiyá á nkínshíyə. Njí janiya lí myə lí n bá áfánán á nkínshíyə ní babwə bá myə bá wan nána baʼ bá si bə mi á makɛ́ má baʼ bá Júda. Ndé janiya lí myə lí shiyǎ á nkínshíyə.” 37Yɔ́ Payílɛtə a kɔndɛ́ní mɔ́ nána, “Ɛ́ dí na ɛ dí kə̂ŋ?” Yésuwə a pushú mɔ́ nána, “Wə̌ ɛ byábí nána n dí kə̂ŋ. Yándá álə́ lí bwə́lí ka bá yɛ́ mi, ti m paʼ á nkínshíyə lí dí álí tyə́ mbúŋ ɛ mbálɛ. Ká njá awə̌ a dí mɔʼ a mbálɛ ǎ wúkán mi.” 38Páyílɛtə a kɔndɛ́ mɔ́ nána, “Yə̌ ɛ́ dí mbálɛ?”
Bá nyítí mbakú nána bá búlu Yésuwə
Ngə Páyílɛtə a kɔ́ndɛ́ní mɔ́ nâ, a nyítí pə́ á ɛbúka álí kə ɛ́ tán baʼ bá Júda. A pɔŋí bɔ́ nána, “M míniyǎ yándá ká lífɔ́ álə́ n tiŋgání ɛ bwəlan álí pɔŋ nána bá búlu mɔ́.
39Ndé ngə ɛləm ɛ nyə ɛ́ díní na, n lɔ́lí ɛ fúl nyə́ mɔʼ nfɔ́ á bibuwa á púndá ɛ ŋgandu ɛ Litúm Ámǐn. Nyí sa nána n fúl nyə́ kə̂ŋ ɛ baʼ bá Júda?” 40Bá púshú Páyílɛtə na ŋgɔli ɛ nə̂n nána, Ǎ yə̌! Suká mɔ́. Fúl sə́ Barábasə. (Barábasə a bílí njíb a nə̂n).
Currently Selected:
Jɔnə́ 18: bwt
Highlight
Copy
Compare
Share
Want to have your highlights saved across all your devices? Sign up or sign in
