Jɔnə́ 17
17
Yésuwə a kání á mɔ́mə̌n
1Á mbís ɛ púndá ɛ́yə́ Yésuwə a mə́ní ɛ byá misam mínán mísə́sə̌n nâ, a tátí ámǐn á wudya wú Dyǔ ti a byábí nána, “Sáŋ, púndá ɛ mə́ ɛ paʼ. Lúfú baʼ wulɔʼ wú Mwǎn n wə nána Mwǎn n wə pə́ a lúfu wulɔʼ wú wə. 2Ɛ mə́ mɔ́ ɛ bə wunja álí janiya baʼ básə́sə̌n, álí bwə nána a bə luŋgɛ́ álə́ lí sə̌ ɛ́ mɛ á baʼ básə́sə̌n ábə́ ɛ bə́kíní mɔ́. 3Luŋgɛ́ álə́ lí sə̌ ɛ́ mɛ lí dí naná baʼ bá bî wə, wə awə̌ ɛ dí Dyǔ lí mbálɛ, na álí bí Yésu Krísto, awə̌ ɛ lúmíní. 4M mə́ ɛ lúfú wulɔʼ wú wə á nkínshíyə, á ɛ́tútú nána m mɛsí ɛbulú ɛ́yə́ ɛ bə́kíní mi álí bwə. 5Sáŋ, sɔnsɔ́nǎn bə mî wulɔʼ wú wə á wusú wú wə, mulimlim m wúlɔʼ ábə́ n wɔ́ŋíní na wə byáná nkínshíyə nán butí.”
Yésuwə a kání á bawútú bá mɔ
6M mə́ ɛ bwə baʼ bá nkínshíyə ábə́ ɛ bə́kíní mi bá bí wə. Bá bílí bá wə, wə pə́ ɛ bəkí mi bɔ́, ti bá bwə ngə ɛ pɔŋíní na bá bwə̂. 7Sɔnsɔ́nǎn bá bí nána yǔm na yǔm tɛ́ ɛ́yə́ ɛ bə́kíní mi ɛ́ fí á wə. 8M mə́ bɔ́ ɛ pɔ̌ŋ misam mísə́sə̌n ámə́ ɛ pɔŋíní mi na m pɔ̂ŋ bɔ́, na bá dúbɛ́ misam mî. Á mbálɛ bá bí na á wə m fíní, ti bá dúbɛ́ nana wə̂ ɛ lúmí mî. 9Nǎn kání á bɔ́. N sə̌ ɛ́ kání á baʼ bá nkínshíyə. Ndé nǎn kání á baʼ ábə́ ɛ bə́kíní mi, á ɛ́tútú nána bá dí bá wə. 10Baʼ básə́sə̌n ábə́ bá dí bá myə bá dí bá wə, na bá wə pə́ básə́sə̌n bá dí bá myə. Na bɔ́ bá lúfú wulɔʼ wú myə. 11Sɔnsɔ́nǎn, á mǎ púndá n sî bá pə́ á nkínshíyə, ndé bɔ́ bá dí wə̌ á nkínshíyə. Nǎn paʼ á wə. Sáŋ awə̌ a Sáŋí kɔŋgɔ́ bɔ́ á ngínya ɛ dǐn lí wə, dǐn álə́ ɛ bə́kíní mi. Ngínya ɛyə̌ ɛ bə́kí mí nána bá bá mɔʼ nfɔ́ mulimlim ngə sí wə pə́ sí díní mɔʼ nfɔ́. 12Á púndá ɛyə̌ m bílíní na bɔ́, n kɔŋgɔ́ bɔ́ á ngínya ɛ dǐn lí wə, dǐn álə́ ɛ bə́kíní mi. N kɔŋgɔ́ bɔ́, na ká nfɔ́ a si gbɛ́, ɛ́sitúm mɔʼ awə̌ ɛ̌ n mə́ní ɛ bá nána á gbɛ́ nána ɛ bá ngə ɛ́ tílání á kâti ɛ Dyǔ. 13Sɔnsɔ́nǎn nǎn paʼ á wə. Ndé nǎn byá misam mín ngə n díní wə̌ á nkínshíyə, álí bwə nána bá wɔ́ŋ munyɛŋgɛ ámə́ n lwínjí á milə́m mí bɔ, mulimlim ngə munyɛŋgɛ m myə n lwínjíní á nlə́m m myə. 14M mə́ bɔ́ ɛ pɔ̌ŋ misam mísə́sə̌n ámə́ ɛ pɔ́ŋíní mi nána m pɔ̂ŋ bɔ́. Baʼ bá nkínshíyə bá kfwɛ bɔ́ á ɛ́tútú nána bá shiyǎ pə́ baʼ bá nkínshíyə, mulimlim ngə mi pə́ n shiyaní mɔʼ a nkínshíyə. 15N sɛ̌ ɛ́ byá nána ɛ fúl bɔ́ á nkínshíyə ndé nǎn byá nána ɛ kɔ́ŋgɔ bɔ́ álí bwə nána Mɔʼ a Mbî a si bwə bɔ́ wubî. 16Bá shiyǎ baʼ bá nkínshíyə, ngə mi pə́ n shiyaní mɔʼ a nkínshíyə. 17Bwəlán mbálɛ ɛ́ wə nána bá púl wə ɛ bwəlí, ɛyala ɛ́ wə ɛ́ dí mbálɛ. 18Ngə wə ɛ lúmíní mi á nkínshíyə, mulimlim nâ pə́ n lúmíní bɔ́ á nkínshíyə. 19Á ɛ́tútú ɛ́ bɔ, m bəkí nyǔ ɛ́ myə álí bwəlí wə nána bɔ́ pə́ bá bə̌ nyǔ ɛ́ bɔ́ álí bwəlí wə̂ na mbálɛ.
Yésuwə a kání á baʼ básə́sə̌n ábə́ bá sî n dúbɛ́ mɔ́
20N sə̌ ɛ́ kání wə̂ á bawútú bá myə, ndé nǎn kání pə́ á baʼ ábə́ bá dúbɛ́ mî á ɛ́tútú ɛ́ misam ámə́ bá wúkíní á bɔ́. 21Nǎn kání nána bɔ́ baʼ básə́sə̌n bá bá mɔʼ nfɔ́. Sáŋ, bɔ́ baʼ básə́sə̌n bá bá mɔʼ nfɔ́ mulimlim ngə sî wə sí díní. Bá bá mɔʼ nfɔ́ nána nkínshíyə n dúbɛ́ nána wə́ ɛ lúmí mî. 22M mə́ bɔ́ ɛ bə́ wulɔʼ ábə́ ɛ bə́kíní mi. N bəkí bɔ́ nána bá tíŋgání ɛ bá mɔʼ nfɔ́ mulimlim ngə sî wə sí díní. 23N dí mɔʼ nfɔ́ ná bɔ́, na wə pə́ ɛ dí mɔʼ nfɔ́ na mi. Ɛ́yínán ɛ́ bwə nána bá bá mɔʼ nfɔ́ na mbálɛ. Bá bá mɔʼ nfɔ́ na mbálɛ nána nkínshíyə n bî nána wə́ ɛ lúmí mi, na bá bí pə́ nána ɛ nə́ŋí bɔ́ mulimlim ngə ɛ nəŋíní mi. 24“Sáŋ m myə, ɛ bəkí mi bɔ́, bá bá áfə́ n díní nána bá mín wulɔʼ wú myə. Ɛ bəkí mi wulɔʼ á ɛ́tútú nána ɛ nəŋí mi byáná á bibutílí lí nkínshíyə. 25Sáŋ, wə̌ ɛ tyə́bí sîm, ká ngə nkínshíyə m bíyaní wə, m bí wə, á bán pə́ bá bí nána wə̌ ɛ lúmí mi. 26M mə́ ɛ bwə bá bí wə, m bá wə́ pə́ ɛ bwə nána ɛniŋgán ɛ́yə́ ɛ́ dí mî átin ɛ́ bá pə́ bɔ́ átin, na mi pə́ m bá na bɔ́.”
Currently Selected:
Jɔnə́ 17: bwt
Highlight
Copy
Compare
Share
Want to have your highlights saved across all your devices? Sign up or sign in
