Mabwəlan 22
22
1“Bǎn-bá-nyǎ bá myə na basáŋ bá myə, nyí lám matwî. Nǎn sa nyə́ ɛ lúfú nána n kfúndiyǎ muká.”
2Ngə bá wúkíní Pɔ̂lə á byábání bɔ́ á mbyá n Híbru, bâ n tim ɛ́ dyɛ̌ pǐ. Ti Pɔ̂lə a byábí nána, 3“N dí mɔʼ a Júda awə̌ bá yɛ́ní á nkí n Tásɔsə á pɛsi ɛ Sɛlísiya. Ndé n kɔlí áfán á nkí n Jerúsálɛmə. M bílí mwǎn a ɛ́shukúlu mú Gamáliɛl. A mɔ́ m wúkúní misam mí mambendá ámə́ basáŋ bá sə bá nyákə́ bá bílíní ɛ nan. Mi mi wɔ́ŋ nyɔ́ngí ɛ li bwəlí Dyǔ mulimlim ngə nyə́ pə́ nyí bwəliní lɔ́. 4Mi mi taʼ kí baʼ ábə́ bá bílí ɛ nǎn Nji ɛ Krísto kə́ŋ kə́ŋ dungu lí wúlí. M bílí ɛ kú bumân na balân n fá bɔ́ á bibuwa. 5Prísə a n nə̂n a n nə̂n na ɛyə́ŋgə́ ɛ́ baʼ bá nə̂n básə́sə̌n ɛ́ tíŋgání ɛ tyə́ mbúŋ nána nǎn m pɔ̌ŋ mbálɛ. Mi mi kwisí kâti á mákɛ́ má bɔ álí kanán á bǎn bá nyǎ bá sə ábə́ bá dí á Damáskɔsə. Áfánikə̌, mi mi kə á Damáskɔsə álí kə bɔ́ ɛ́ kúʼ, álí tfúl bɔ́, na li panán bɔ́ mbís á Jerúsálɛmə álí bwə nána bá kɔ́ksɛ́ bɔ́.”
Pɔ̂lə a byábí yán a bwə́líní ka a dúbɛ́ní Yésuwə
6Ngə m bílíní ɛ kə, “Á púndá ɛyə̌ m bílíní bɛbɛ na nkí n Damáskɔsə, álí paʼ kɔsi ɛ lisín, ɛməmə ɛ́ ngínya ɛ́ fí á mǐn təlí, ɛ́ mwáŋí á nyǔ m myə ɛ́sə́sə̌n. 7Yɔ̂ n kfúndíní á ndɔʼ n wúká ngɔli ɛ́ pɔŋá mi nána, ‘Sɔ̂lə, Sɔ̂lə, yə̌ ɛ̌ takíní mi?’ 8Yɔ̂ n kɔndɛ́ní mɔ́ nána, ‘Sáŋgúwə́ wə ɛ dí njá?’ A pushú mi nána, ‘Miyə́ n dí Yésuwə a Názárɛtə awə̌ ɛ̌ takíní.’ 9Baʼ ábə́ síyábɔ́ sí bílí ɛ kə, bâ m mín ɛməmə ɛyî ndé bá sî n wú ngɔli ɛ mɔ awə̌ a bílí mi ɛ byában. 10Ti n kɔndɛ́ nána, ‘Sáŋgúwə́ yə̌ n tiŋgání ɛ bwə?’ Ti Sáŋgúwə́ a pɔŋí mi nána, ‘Falú áshí ɛ kə̂ á nkí n Damáskɔsə átin. Wə̌ti ɛ pilí á wə́, bá pɔ̌ŋ wə̂ misam mísə́sə̌n ámə́ Dyǔ lí mə́ní ɛ tambú nána ɛ̌ bwə.’ 11Li mwaŋ lí ɛ́məmə ɛ́ yî, lí bwəlí mi n si míná wǔm. Áfánikə̌, baʼ ábə́ síyabɔ́ sí bílíní, bá wálí mi á ɛkɛ́ bá kánání mi á nkí n Damáskɔsə átin.
12Mɔʼ a bílí á Damáskɔsə awə̌ bá bílíní ɛ bəŋ nána Ananíyasə. A bílí mɔ awə̌ a bílí ɛ́ bwəlí Dyǔ na a bílí pə́ ɛ nan mambéndá má sə má baʼ bá Júda. Baʼ bá Júda básə́sə̌n ábə́ bá bílí ɛ dyɛ á Damáskɔsə bá bílí mɔ́ ɛ bə̌ ɛdúbɛ́ jǐta. 13Ananíyasə a pílí á mi, a tyə́ mî á nsaŋ n nyǔ ti a byábí á mi nána, ‘Mwǎn-n-nyǎ m myə Sɔ̂lə, butí pə́ ɛ mín wǔm.’ Áfâ áshí áshí m butí pə́ ɛ mín wǔm, m mindiya mɔ́. 14A m byá nána, Dyǔ lí basáŋ bá sə bá nyákə́ lí mə́ wə ɛ pwəʼ álí bí nde ɛ́ mɔ. Lí mə́ wə ɛ pwəʼ álí mín Mbwəlâ-a-Ndutu m mɔʼ awə̌ a dí sîm na álí wú Mbwəlâ-a-Ndutu ani ǎ byábá na ngɔli ɛ́ mɔ. 15Ɛ́ bá mɔ́ mbúŋ álí pɔ̌ŋ mɔʼ ansə́sə̌n yə̌ ɛ́yə́ ɛ mə́ní ɛ wú na yə̌ ɛ́yə́ ɛ mə́ní ɛ mín. 16Sɔnsɔ́nǎn, yə̌ kə́ ɛ̌ sin ní? Falú áshí ɛ púshu nána Yésuwə mɔ́ a dí Sáŋgúwə́ n wə ti bá dúmsɛ wə̂. Ɛ́yínán ɛ́ bwə Dyǔ lí wû wubî wú wə.”
Pɔ̂lə a byábí nána Dyǔ lí lúmí mɔ́ á baʼ ábə́ bá shiyǎ baʼ bá Júda
17“Mi mi tǐm mbǐ á Jerúsálɛmə. Ngə m bílíní ɛ káni á Tɛ́mpɛl, mi mi kfún biyúŋgu. 18Á biyúŋgu bî, mi mi mín Sáŋgúwə́. A m pɔ̌ŋ mi nána, ‘Bwə shám shám ɛ fálu á Jerúsálɛmə á ɛ́tútú nána baʼ ábə́ bá dí á fán á Jerúsálɛmə bá sî pushúwǎ yǔm ɛ́yə́ ɛ́ byání tɛ́ŋgɛnɛ mi.’ 19Yɔ̂ m pushúní Sáŋgúwə́ nána, ‘Sáŋgúwə́, baʼ á bánán bá bí bwǎm nána mi mi kə á ndáʼ ɛ makáni ɛ baʼ bá Ísrɛl. Mi mi kúʼ, n shwə́nji baʼ ábə́ bá dúbɛ́ wə. 20Á púndá ɛyə̌ bá búlúní Stífɛnə, awə̌ a bílí ɛ́ byá misam tɛ́ŋgɛnɛ wə, mimə̌n m bílí á wə́. Mi mi pushú nána bá búlu mɔ́, na miyə́ mi mi wálí kúti ɛ́ baʼ ábə́ bâ m búlú mɔ́.’ 21Yɔ̂ Sáŋgúwə́ a pɔ́ŋíní mi nána, ‘Kə̌ á ɛ́tútú nána, n lúm wə̂ kfwáŋ á baʼ ábə́ bá shiyǎ baʼ bá Júda.’”
22Baʼ á bâ bá bílí wɔ̂ ɛ́ wú Pɔ̂lə kə́ŋ kə́ŋ á púndá ɛyə̌ a m byání tɛ́ŋgɛnɛ likə lí mɔ á baʼ ábə́ bá shiyǎ baʼ bá Júda. Ti baʼ á bâ bá bútí ɛ bún nána, “Nyí másan mɔ́! Nyí búlu mɔ́, a lɔ́liyǎ álí bá lúngɛ́.” 23Bá bílí ɛ bún ámǐn bá pəpiyǎ mábaʼ má bɔ ámǐn, na bá pumbá mpupú ndɔʼ ámǐn. 24Yɔ̂ mɔʼ a nə̂n a sója a pɔŋí basója á bâ nána bá kánan Pɔ̂lə á ndáʼ ɛ malɛ́. A pɔŋí bɔ́ nána bá shwɛ́nji Pɔ̂lə álí bwə nána á byá yándá álə́ baʼ bá Júda bá bún ní nâ tɛ́ŋgɛnɛ mɔ́. 25Ndé á púndá ɛyə̌ bâ n tfúlní mɔ́ álí shwɛ́njí mɔ́, yɔ̂ Pɔ̂lə a kɔndɛ́ní sója awə̌ a bílí bɛbɛ na mɔ́ nána, “Mbéndá ɛ bəkí wunja nána bá shɛ́nji mɔʼ awə̌ mbéndá ɛ Rómə ɛ bwəlíní mɔ́ mɔʼ a Rómə ɛ́yə́ bá káyísiyaní mɔ́?” 26Ngə mɔʼ a sója ani a wúkíní nâ, a kǐ a mɔʼ a nə̂n a sója a kɔndɛ́ mɔ́ nána, “Yə̌ wə ɛ̌ bwəní nâ? Mɔʼ ani a dí mɔʼ a Rómə.” 27Áfánikə̌, mɔʼ a sója a nə̂n a kǐ á Pɔ̂lə a kɔndɛ́ mɔ́ nána, “Pɔ̌ŋ mî, ɛ dí yə̌ mɔʼ a Rómə?” Pɔ̂lə a pushú mɔ́ nána, “Îŋ.” 28Yɔ̂ mɔʼ a sója a nə̂n a byábíní nána, “N nsáwú ngáʼ jǐta byáná gɔ́vɔ́nɔ a Rómə a pushú nána m bá mɔʼ a Rómə.” Yɔ̂ Pɔ̂lə a byábíní nána, “Ndé mi n yátání mɔʼ a Rómə.” 29Ngə baʼ ábə́ bá bílí ɛ bunsan álí shwɛ́njí Pɔ̂lə bá wúkíní nâ, áfâ áshí áshí bá mákú mɔ́ bá mǎnyǔ á mbǐ. Bɔŋ wû kwílí mɔʼ a nə̂n a sója ani ngə a yə́mbíní nána Pɔ̂lə a bílí mɔʼ a Rómə na nána mú fílí mɔ́ mgbɔ́kɔbí ɛ́yə́ a sî n lɔʼ álí fá á mɔ́.
Pɔ̂lə a tyə́bí á mukáʼ á wúsú wú ɛ́yə́ŋgə́
30Mɔʼ a nə̂n a sója a bílí ɛ wasi álí sɔ́ntán tyɛ̌tyɛ̌ yə̌ ɛ́yə́ baʼ bá Júda bá byábíní nána Pɔ̂lə a bwə́lí. Áfánikə̌, ngə bǔn wúyílíní, a m pɔŋ nána bá fúl Pɔ̂lə mgbɔ́kɔbí á mákɛ́ na a n lúm ndúm á baprîsə bá nə̂n na ɛyə́ŋgə́ ɛ́sə́sə̌n nána búwabɔ́ bá wáli mbum. Yɔ̂ a núŋí Pɔ̂lə a bwəlí mɔ́ a tyə́ á wúsú wú bɔ.
Currently Selected:
Mabwəlan 22: bwt
Highlight
Copy
Compare
Share
Want to have your highlights saved across all your devices? Sign up or sign in
