Mabwəlan 21
21
Pɔ̂lə a kǐ á Jerúsálɛmə
1Sí pɔ́ŋí bɔ́ ɛ tuwakə sí kǐ. Sí kwílí á stíma. Sî n túm madí á mǐn ɛ́yə́ sí tyɛ́biyaní ká fǔm kə́ŋ ta sí pâ á Kɔ́sə. Ngə bǔn wúyílíní, sí pílí á nkí m Ródɛsə. Sí fálúní á wə́, sí kǐ á nkí m Patára. 2Á wə́ sí tání stíma ɛ́yə́ ɛ bílí ɛ kə á pɛsi ɛ Fonísiya. Sî n kwili ti sí bútí ɛ kə. 3Sí pílí áfə́ sî n mín ní Sáyíprɔsə ɛyə̌ madí má kámbúní. Sí shúlí á mbəŋ ti sí kí á pɛsi ɛ Síriya. Sí tyə́bí á Táya, áfə́ stíma n sə ɛ n lɔní álí fúl masaŋ. 4Áfâ sí tání duŋgu lí bâʼ ábə́ bá dúbɛ́ Yésuwə sí dyɛ na bɔ́ madû shyǎmbɛ. Mudî ámə́ n Sáŋí n dyɛ́lɛ́ bɔ́ álí pɔ̌ŋ Pɔ̂lə nána a si kə̌ á Jerúsálɛmə. 5Ndé ngə púndá ɛ́ sə álí dyɛ na bɔ́ ɛ məní ɛ mɛ̌, sí mákú bɔ́ ti sí kánán ɛkə ɛ́ sə á wusú. Badúbedi básə́sə̌n, balân bá bɔ na bǎn bá bɔ bá kǐ sə́ ɛ díkí kə́ŋ kə́ŋ sí nyítí á nkí ti sí pílí á nsaŋ m madí. Sə́ básə́sə̌n sí nyɔ́kí mabɔ́ŋ áshí ti sí kání. 6Ngə sí málíní álí káni, sî n kwili á stíma ti bá tímbí mbǐ á mandáʼ má bɔ.
7Sí fálú á nkí n Tírɛ sí kánán ɛkə á wúsú, sí pá á nkí m Tólɛ́mas. Ngə sí pílíní á wə́, sí sámbání badúbedi ti sí dyɛ́ na bɔ́ bǔn bufɔ́. 8Bǔn búní, sî n falu á Tólɛ́mas ti sí pílí á nkí m Kayísaríya. Ngə si pílíní áwə́, sí kǐ á ndáʼ ɛ pɔŋâ-a-ndúm ɛ mbâ awə̌ bá bílíní ɛ bə̌ŋ nána Fílipə. Fílipə a bílí mɔʼ nfɔ́ á baʼ shyǎmbɛ ábə́ bâ m pwɛní álí wúnján baʼ bá Jerúsálɛmə. 9A ŋ wɔ́ŋ bǎn bá balân bánîn ábə́ bá sî n mə̌ ɛ́ wə́. Bá bílí ɛ byá mísam ámə́ mí fí á Dyǔ. 10Ngə sí bílíní á wə́ ngushu ɛ́ madû, yɔ̂ nlakuwa-a-mudî nfɔ́ awə̌ bá bəŋní Agábusə á fí á pɛsi ɛ Judéya. 11A pilí á sɛ́, a núŋ ngúli ɛ́ Pɔ̂lə, a tfúlí makwi na makɛ́ má mɔ́ ti a byábí nána, “Mudî ámə́ ŋ Sáŋí m byábí nána, nâ baʼ bá Júda bá tfúlní mɔʼ awə̌ a wɔ́ŋí ngúli ɛnín á Jerúsálɛmə ti bá bə mɔ́ á mákɛ́ má baʼ ábə́ bá shiyǎ baʼ bá Júda.” 12Ngə sí wúkíní nâ, sɛ́ na baʼ ábání ábə́ bá bílí á wə́ sî n yɔ́m Pɔ̂lə nána a si kə á Jerúsálɛmə. 13Ndé Pɔ̂lə a pushú sə́ nána, “Yə̌ nyí bwəní nâ, nyí bíyǎ nána ngə nyí bwəní nâ, nyí fɛnj mî nlə́m á libum? N mbumsaniyǎ wɔ̌ nána bá tfûl mi á Jerúsálɛmə, m mbumsání ká á líwá á wə́ á ɛ́tútú ɛ́ dǐn lí Sáŋgúwə́ Yésuwə.” 14Sí sî n púl álí bwə a pə́lan nlə́m m mɔ. Áfánikə̌ sí mákú sí byábí nána, “Ɛ́ bwə́lan ngə Dyǔ lí tyɛ́síní.”
15Sí dyɛ́ á Kayísaríya sî m búnsan ti sí kí á Jerúsálɛmə. 16Duŋgu lí baʼ ábə́ bá dúbɛ́ Yésuwə ábə́ bá fí á Kayísaríya bɔ́ pə́ bâ n wungɛ na sə́. Bá kánání sə́ á ndáʼ ɛ mɔʼ nfɔ́ á fə́ sí lɔ́líní ɛ dyɛ. Bá bílíní ɛ bə̌ŋ mɔʼ ani nána Naásinə. A n fí á nkí n Sáyíprɔsə, na a bílí mɔʼ nfɔ́ á baʼ ábə́ bá kɔ́sɛ́ ɛ́ dúbɛ́.
Pɔ̂lə a kǐ ɛ mín Jémsə
17Á púndá ɛyə̌ sí pílíní á Jerúsálɛmə, badúbedi bá kásí sɛ́ na munyɛŋgɛ. 18Bǔn búní, Pɔ̂lə a kǐ na sə́ álí mín Jémsə. Milú mí mwembá mí bílí á wə́. 19Pɔ̂lə a sambání bɔ́ ti a tɛ́lɛ́ bɔ́ misam mísə́sə̌n ámə́ Dyǔ lí mə́ní ɛ bwə átinə́ á baʼ ábə́ bá shiyǎ Baʼ bá Júda tombwanɛ ɛbulú ɛ́yə́ mɔ Pɔ̂lə a mə́ní ɛ bwə. 20Ngə bá málíní álí wú yə̌ ɛ́yə́ Pɔ̂lə a pɔŋíní bɔ́, bá kɛ́sí Dyǔ. Ti bá pɔ́ŋí Pɔ̂lə nána, “Mwǎn-n-nyǎ n sə, Pɔ̂lə, wə́mə̌n ɛ mə́ ɛ mín ngə misam mí díní áfánán á Jerúsálɛmə. Bikúlí na bikúlí bí bâ bá Júda bá dúbɛ Dyǔ sɔnsɔ́nǎn. Na bá nǎn mbéndá ɛ́ Mósisə na ɛwíyɛ́ ɛ́sə́sə̌n. 21Na bá bílí bɔ́ ɛ pɔŋ nána, ɛ̌ lɛ́fú baʼ bá Júda básə́sə̌n ábə́ bá bí á bikumbu bípə́pə̂ nána bá si nǎn mbéndá ɛ́ Mósisə. Bá ɛ̌ pɔŋ bɔ́ nána bá si bwə bǎn bá bɔ wulɛ́ná, na nána bá si nǎn bilɛm bí sə. 22Na bá lɔ́lí ɛ wú nána ɛ mə́ ɛ paʼ. Yə̌ kə́ sí bwəní sɔnsɔ́nǎn? 23Áfánikə̌, bwə̌ yə̌ ɛ́yə́ sí pɔ́ŋíní wə nána ɛ bwə̂. Baʼ bánîn bá dí áfán ábə́ bá mə́ ɛ mwǐ nguʼ ɛ Dyǔ. 24Nan bɔ́, nyíyabɔ́ nyí kə̂ álí wusan, ɛ́ sáwú á bɔ́ ká yə̌ ɛ́yə́ bá kɔ́ndɛ́ní nyə́. Á púndá ɛni yɔ̂ bá tíŋgání ɛ lɛ́n nyûŋ. Ɛ́yínán ɛ́ bwə mɔʼ ansə́sə̌n á bí nána, ká yə̌ bá byábíní tɛ́ŋgɛnɛ wə, ɛ́ shiyǎ mbálɛ. Na bá bí pə́ nána wɔmə̌n ɛ́ mə́ ɛ bwə mísam ngə Mbéndá ɛ́ Mósisə ɛ byábíní. 25Ndé á baʼ ábə́ bá shiyǎ baʼ bá Júda ábə́ bá dúbɛ Krísto, sí mə́ bɔ́ ɛ lúm kâti ɛyə̌ ɛ́ byá nána si dyá lidyá álə́ bá mə́ní ɛ bə á madyǔ mápə́pə̌ ngə jabeya, bá si mwyá makǐ, bá si dyá nyam ɛ́yə́ bá shɛ́liyaní libɔ na nána bá si bwə̌ misam mí ɛkɛ́-shiyə̂.” 26Áfánikə̌, bǔn búní Pɔ̂lə a nuŋí baʼ á bâ búwabɔ́ bá kə á líwusan. Yɔ̂ a kwilíní á tɛ́mpɛl, a byábí nsɔŋgí ɛ́ mádû ámə́ liwusan lí nuŋní. Á mbís ɛ púndá yɔ̂ bá bəní jabeya á nlú m mɔtɛ́.
Bá kúwí Pɔ̂lə
27Ndé ngə lishúʼ li madû á mâ shyǎmbɛ má liwusan má bílíní bɛbɛ, dungu lí baʼ bá Júda ábə́ bá fí á pɛsi ɛ Ésiya bá míní Pɔ̂lə á tɛ́mpɛl. Bá púngú milə́m mí limuti ti bá kúbí Pɔ̂lə. 28Bá bútí ɛ bún nána, “Baʼ bá Ísrɛl, nyí wúnjan sə́. Mɔʼ anín mɔ́ ǎ kə á mabú na mabú, á lɛ́fúwá baʼ nána baʼ bá Ísrɛl, mbéndá ɛ́ Mósisə, na tɛ́mpɛl bí shiyǎ ká yúm. Sɔnsɔ́nǎn a mə́ ɛ panán duŋgu lí baʼ ábə́ bá shiyǎ baʼ bá Júda á Tɛ́mpɛl na ɛ́yínán ɛ́ bwə́lí ndáʼ ɛ Dyǔ ɛnín ɛ sáŋiyǎ pə́.” 29(Bá byábí nâ á ɛ́tútú nána bâ m mə̌ ɛ́ mín Pɔ̂lə na Trofímosə mɔʼ awə̌ a fí á nkí n Ɛ́fɛ́sɔsə, bû Pɔ̂lə bá bílí ɛ yə́ŋ á nkí átin. Áfánikə̌, bâ n kani nána Pɔ̂lə a m mə mɔ́ ɛ kwisan á Tɛ́mpɛl.)
30Mpuŋgú m páŋílí á nkí nsə́sə̌n, baʼ bá fí na mifílí á mábú másə́sə̌n. Bá shúkání Pɔ̂lə, bá dfúlí mɔ́ bá nyítán mɔ́ á Tɛ́mpɛl. Áfâ áshí áshí bá kɔ́ʼ bikuʼ bí Tɛ́mpɛl. 31Ngə limuti lî lí bílíní ɛ kəki álí búlú Pɔ̂lə, yɔ̂ baʼ bafɔ́ bá kǐ ɛ pɔ̌ŋ mɔʼ a nə̂n a sója a Rómə nána, mpungú n dí á nkí n Jerúsálɛmə nsə́sə̌n. 32Áfâ áshí áshí, mɔʼ nə̂n a sója ani a fɛ́njiyǎ púndá. A m pwɛʼ sója a nə̂n na a ntə́kə̂n a shûl na bɔ́ á nkí átin á fə́ limuti lí bílíní. Ngə baʼ á bâ bá míníní mɔ́ ǎ panáníyá sója, yɔ̂ bá mákúní álí láʼ Pɔ̂lə. 33Yɔ̂ mɔʼ a nə̂n a sója a kǐ á nsaŋ áfə́ Pɔ̂lə a bílíní, a kúbí mɔ́ ti a byábí nána, bá fá mɔ́ mgbɔ́kɔbí ɛ́bɛ̂. Ti a kɔ́ndɛ́ nána, “Njá mɔ́lə́ anín? Yə̌ á bwə́líní?” 34Duŋgu lí bâʼ á limuti lî bá bútí ɛ bún. Duŋgu lí byá nsam nfɔ́, bání pə́ bá byábá nsam mpə́pə̂. Mpungú m bílí á nyə ɛyə̌ mɔʼ nə̂n a sója a sî n púl ɛ́ sɔ́ntán yə̌ ɛ́yə́ ɛ́ bwə́lání. Áfánikə̌, a m pɔ̌ŋ baʼ sója bá mɔ nána bá kánan Pɔ̂lə á ndáʼ ɛ malɛ́. 35Bá kánání mɔ́ kə́ŋ kə́ŋ bá pílí á nsu n ndáʼ mú ɛkuʼ ɛ́ ndáʼ ɛ malɛ́. Ngə bá pílíní álí kwili, bá pə́mbí mɔ́ wɔ̂ á ɛ́tútú nána limuti lî bâ m mə̌ ɛ́ bɛ́ny. 36Baʼ á bâ básə́sə̌n bá bílí bɔ́ ɛ pɔ̌ŋ á mbís bá búná nána, “Bá búlu mɔ́!”
Pɔ̂lə a lúfú nána a kfúndiyǎ mukaʼ
37Ngə basója bá bílíní ɛ kanán Pɔ̂lə á ndáʼ ɛ malɛ́, Pɔ̂lə a byábí á mɔʼ a n nə̂n nána mú wɔ́ŋí yǔm álí pɔŋ mɔ́. Yɔ̂ mɔʼ a nə̂n a sója a byábíní nána, “Nânə ɛ dí nána ɛ̌ byá mbyá n Grîkə? 38Nânə ɛ dí suká wə̂ ɛ dí mɔʼ a Íjiptə ani awə̌ a m paʼ fán ɛtî fɔ́ a pánán mpungú. A n shwǐnj basója bikúlí bínîn, babúluwa-bá-bâ, a kánán bɔ́ á ɛsínj.” 39Ti Pɔ̂lə a pushú mɔ́ nána “N dí mɔʼ a Júda awə̌ a fí á nkí n Tásɔsə á pɛsi ɛ Silísiya. Mɔʼ awə̌ a fí á nkí m mbímbí. Sûn bə mî ɛpúlu m byában baʼ á bán.” 40Mɔʼ a sója a n nə̂n a bəkí Pɔ̂lə wunja nána a byá yǔm. Áfánikə̌, Pɔ̂lə a tyə́bí á nsú-ndáʼ, ti a pə́pí ɛkɛ́ ti wǔm má dyɛ́ kpǐ. Ngə bá dyə́ní kpiʼ, ti a butí bɔ́ ɛ byában á mbyá n Híbru.
Currently Selected:
Mabwəlan 21: bwt
Highlight
Copy
Compare
Share
Want to have your highlights saved across all your devices? Sign up or sign in
