Mabwəlan 18
18
Pɔ̂lə a kǐ á nkí n Kɔ́rintə
1Á mbís ɛ mínán, Pɔ̂lə a falúní á nkí n Átɛns a kǐ á nkí n Kɔ́rintə. 2Ngə a pilíní á Kɔ́ríntə a tání mɔʼ a Júda awə̌ bá bəŋní Akwíla. Bâ n yə́ Akwíla á Pɔ́ntusə. Á púndá ɛni yɔ̂ bû mwalân m mɔ Prísíliya bâ n fíní á Ítáli. Bâ n falú á Ítáli á ɛ́tútú nána Káyísa a Rómə, Kládiyusə a m mə̌ bə̂ ndaki nána baʼ bá Júda básə́sə̌n bá fálu á Rómə. Pɔ̂lə a n kə álí mín Akwíla na Prisíliya. 3A n dyɛ na bɔ́ bá bwəlá ɛ́bulú. Bɔ́ pə́ bá bílí ɛ bwə̌ tɛ́ntə álí wɔ́ŋ ngáʼ álí búngú nyǔ mulimlim ngə Pɔ̂lə pə́ a bílíní ɛ bwə. 4Bǔn bú Líkɔ́mbɛ tɛ́, Pɔ̂lə a bílí ɛ kə á ndáʼ ɛ makáni, á byábá á baʼ bá Júda na baʼ bá Grîkə álí bwə nána bá dúbɛ yə̌ ɛ́yə́ ǎ pɔŋní bɔ́.
5Á púndá ɛyə̌ Sáyílasə bû Tímótiyə bá fíní á Masɛdóniya ti bá tání Pɔ̂lə, Pɔ̂lə a m bwəlan púndá ɛ́ mɔ ɛ́sə́sə̌n álí pɔ̌ŋ Ndúm ɛ Mbâ. A bílí ɛ tyə́ mbúŋ á baʼ bá Júda nána Yésuwə a dí Ani-awə̌-Bá-Wɔ́kílíní. 6Ndé baʼ bá Júda bâ n tɛ́ŋgɛ́n mɔ́ na byábá misam míbî tɛ́ŋgɛnɛ mɔ́. Ɛ́yínán ɛ̂ m bwə Pɔ̂lə a pápú mpupú n ndɔʼ á nyǔ m mɔ álí lúfú bɔ́ nána likɔ́ksɛ lí Dyǔ lí sin bɔ́. Ti a pɔŋí bɔ́ nána, “Wə̌ti nyí gbɛ́ ní nyə́mə̌n nyí sákí. N shiyǎ á wə́. Butya sɔnsɔ́nǎn, nǎn kə̌ ɛ́ pɔ̌ŋ ndúm ɛ mbâ á baʼ ábə́ bá shíyǎ baʼ bá Júda.” 7Áfánikə̌, Pɔ̂lə a m makú bɔ́ a kə̂ ɛ dyɛ na mɔʼ nfɔ́ awə̌ bá bílíní ɛ bəŋ nána Táyitus Jústusə. Táyítusə a bílí ɛ bwəlí Dyǔ na ndáʼ ɛ́ mɔ ɛ bílí bɛbɛ na ndáʼ ɛ makáni ɛ baʼ bá Júda. 8Kríspusə awə̌ a bílí nlú mú ndáʼ ɛ makáni ɛ baʼ bá Júda mɔ́ pə́ a n dúbɛ́ Sáŋgúwə́. Mɔ́ na baʼ básə́sə̌n á túmbá lí mɔ bâ n dúbɛ́ Sáŋgúwə́. Baʼ jǐta ábə́ bá bílí á nkí n Kɔríntə bâ n wú ndúm ɛni, bá dúbɛ́ ti bá kwísí dumsɛ.
9Wudû wufɔ́, Pɔ̂lə a kfúndí biyúŋgu. Á biyúŋgu bî, Sáŋgúwə́ a byábí á mɔ́ nána, “Ɛ si báŋ, bá wɔ̂ álí byá, ɛ si dǐ nsu. 10Á ɛ́tútú nána n dí na wə. Mɔʼ ká nfɔ́ a tíŋganiyǎ wə̂ ɛ bwə wúbî á ɛ́tútú nána n wɔ́ŋí baʼ jǐta á nkí mún.” 11Áfánikə̌, Pɔ̂lə a n dyɛ á Kɔ́rintə mbú nfɔ́ na ɛpɛʼ. A bílí ɛ lɛ́fú baʼ á bâ ɛyala ɛ́ Dyǔ.
12Á púndá ɛyə̌ Káyísa á bwə́líní Gályo gɔ́vɔ́nɔ á pɛsi ɛ Akáya, baʼ bá Júda ábə́ bá bílí á wə́ bá látání, bá kúbí Pɔ̂lə ti bá kánání mɔ́ á kúti. 13Bâ m byá nána, “Mɔʼ anínán ǎ wanan álí bwə nána baʼ bá bwə́li Dyǔ á nyə ɛyə̌ ɛ̌ tɛ́ŋgɛ́n mbéndá.” 14Ngə Pɔ̂lə a pɛpɛ́ní ɛ butí álí byá, gɔvɔnɔ Gályo a byábí á baʼ bá Júda nána, “Njí nsam múnán mû m bá liwusɛ́ tɔ̌ yǔm ɛ́ bî ɛ́yə́ mɔʼ a bwəlíní, ní n wɔ́ŋí yándá álí wúkán nyə́ baʼ bá Júda. 15Ndé ngə ɛ́ díní penda tɛ́ŋgɛnɛ biyala, mǐn, na mambéndá má nyə, nyə́mə̌n nyí támbu yɔ́. N sə̌ ɛ́ káyísí ɛ́bú míká ngə mín.” 16Ɛ́yínán ɛ́ bwə́lí Gályo a nání bɔ́ a ndáʼ ɛ kúti. 17Ti bɔ́ básə́sə̌n bá kúbí na mataʼ mɔʼ awə̌ a bílí nlú a ndáʼ ɛ makáni awə̌ bá bəŋní Sɔsténɛsə ti bá lábí mɔ́ á wúsú wú kúti. Ndé ɛ́yínán ɛ́ sî n takí Gályo.
Pɔ̂lə a timbí mbǐ á Ántiyɔkə
18Pɔ̂lə a n dyɛ̌ madû jǐta á Kɔ́rintə na badúbedi. Yɔ̂ a makúní bɔ́ ti a kwilí á stíma, a túmbí mbô ɛ nə̂n ɛ nə̂n ti a kǐ á pɛsi ɛ Síriya. A n kə na Prisíliya bû Akwíla. A lâʼ ɛ falu á nkí n Sɛ́nkriya, a n lɛ́n nyuŋ á ɛ́tútú ɛ́ nguʼ ɛyə̌ a m məní ɛ mwi. 19Ngə bá pílíní á nkí n Ɛ́fɛ́sɔsə, Pɔ̂lə a m makú Prisíliya bû Akwíla á wə́. A n kə á ndáʼ ɛ makáni ti bû baʼ bá Júda bá pɔŋá pɔ́li. 20Baʼ á bâ bâ m pɔ̌ŋ mɔ́ nána a dyɛ̂ na bɔ́ á ɛ́tfûm ɛ́ púndá, ndé a n sî m pushu. 21Ndé ngə a bílíní ɛ kə a m pɔŋ bɔ́ nána, “N tǐm bí njí ɛ́ dí nde ɛ Dyǔ nána n tǐm.” Áfánikə̌, a kwilí á stíma ti a nyítí a Ɛ́fɛ́sɔsə. 22Ngə a m paʼ ní á nkí n Kayísaríya, a kǐ á Jerúsálɛmə, a kǐ ɛ sambán baʼ bá mwémbá ti a kǐ á Ántiyɔkə. 23A mə́ní ɛ fɛ̌nj mǎ púndá á wə́, Pɔ̂lə a falú ti a kǐ á pɛsi ɛ Galátiya na Frígiya á bəká máleyá á baʼ ábə́ bá dúbɛ́ Yésuwə álí kpútí bɔ́ milə́m á libum.
Apólosə a panjí ɛyala ɛ́ Dyǔ á mikí mí Ɛ́fɛ́sɔsə na Kɔ́rintə
24Á púndá ɛni, mɔʼ a Júda a bílí awə̌ dǐn lí mɔ́ lí bílí Apólosə. Bâ n yɛ́ mɔ́ á nkí n Alɛsánda. A m paʼ á nkí n Ɛ́fɛ́sɔsə. A bílí mɔ́ʼ awə̌ ɛyə́m ɛ̌ n lɔʼ ní átin na a n wɔ́ŋ libyɛ́ lí mbâ á ɛyala ɛ́ Dyǔ. 25A ŋ wúkú mísam mí Nji ɛ Sáŋgúwə́. Na ɛwíyɛ́ ɛ́sə́sə̌n, a bílí ɛ lɛ́fú bâ misam tɛ́ŋgɛnɛ Sáŋgúwə́ á nyə ɛyə̌ ɛ tɛ́ŋgɛ́ní. Ndé a m bí wɔ̂ lidumsɛ lí Jɔnə́. 26Apólosə a bílí ɛ byá tɛyí tɛyí a si wúká bɔ̂ŋ á ndáʼ ɛ makáni. Ngə Prisíliya bû Akwíla bá wúkíní misam ámə́ a bílíní ɛ byá, bâ núŋí mɔ́ bá kanán mɔ́ á fə́ bá bílíní ɛ dyɛ. Na á wə́ bá lúfúní mɔ́ misam mí Nji ɛ Dyǔ á nyə ɛyə̌ ɛ tɛ́ŋgɛ́ní. 27Apólosə a mɛsí ná mû n kə á Akáya. Áfánikə̌, badúbedi á Ɛ́fɛ́sɔsə bâ n wúnján mɔ́. Bâ n til kâti á baʼ ábə́ bá dúbɛ́ Yésuwə á Akáya nána, wə̌ti bá pílí, bá kási bɔ́. Ngə a pilíní áwə́, á mbálɛ a n wúnján bâʼ jǐta ábə́ bâ n dúbɛ́ Yésuwə á ɛ́tútú ɛ́ nsimá n Dyǔ ámə́ bâ n kwisiní. 28Na penda ɛnə̂n a n tombwán baʼ bá Júda á tandándâ. A bílí ɛ bwəlan mátɔti ámə́ má fí á kâti ɛ Dyǔ álí lúfú nána Yésuwə mɔ́ a dí Ani-awə̌-Bá-Wɔ́kílíní.
Currently Selected:
Mabwəlan 18: bwt
Highlight
Copy
Compare
Share
Want to have your highlights saved across all your devices? Sign up or sign in
