Mabwəlan 19
19
Pɔ̂lə a kǐ á Ɛ́fɛ́sɔsə
1Apólosə a bílí wɔ̂ á Kɔ́rintə, yɔ̂ Pɔ̂lə a túmbíní á pɛsi ɛ mbú ɛni ti a pilí á Ɛ́fɛ́sɔsə. A n tán ngushu ɛ́ bâ á wə́ ábə́ bá dúbɛ́ Yésuwə. 2Pɔ̂lə a n kɔndɛ́ bɔ́ nána, “Nyî n kwisí Mudî ámə́ ŋ Sáŋí á púndá ɛyə̌ nyí dúbɛ́ní?” Bá púshú mɔ́ nána, “Ǎyi, sí nan wúkíyá nána Mudî ámə́ ŋ Sáŋí n dí.” 3Áfánikə̌, Pɔ̂lə a kɔndɛ́ bɔ́ nána, “Nyə ɛ dubsɛ ɛ fə́ nyî n kwisíní?” Bá púshú mɔ́ nána, “Nyə ɛ dumsɛ ɛyə̌ Jɔnə́ a bílíní ɛ byá.” 4Pɔ̂lə a byábí nána, “Nyə ɛ dumsɛ ɛyə̌ Jɔnə́ a bílíní ɛ byá ɛ́ bílí á baʼ ábə́ bâ m maku álí bwə̌ wubî. Jɔnə́ a bílí ɛ pɔ̌ŋ baʼ bá Ísrɛl nána bá dúbɛ ani awə̌ ǎ paʼ á mbís ɛ́ mɔ, nâni ɛ dí Yésuwə.” 5Ngə baʼ á bâ bá wúkíní nâ, bá dúmsɛ́ bɔ́ á dǐn lí Sáŋgúwə́ Yésuwə. 6Pɔ̂lə a bándí bɔ́ makɛ́ á nlú, ti Mudî ámə́ n Sáŋí n kwílí á bɔ́. Ti bá bútí ɛ byá mibyá mípə́pə̂ ámə́ baʼ bá bíliyaní ɛ sɔ́ntan ti bá pɔ̌ŋ ndúm ɛ Dyǔ. 7Baʼ á bâ básə́sə̌n bá bílí ká ngə bumân dyǔm na bábɛ̂.
8Pɔ̂lə a n dyɛ na bɔ́ ngɔn ɛ́lán. Á púndá ɛnín a bílí ɛ kə á ndáʼ ɛ makáni ɛ baʼ bá Júda. A bílí ɛ byá á baʼ a si wúká bɔ̂ŋ. Búwabɔ́ bá bílí ɛ shǔm pénda, á wanáníyá álí bwə nána bá dúbɛ nána yə̌ ɛ́yə́ ǎ byá tɛ́ŋgɛnɛ janiya lí Dyǔ ɛ́ dí mbálɛ. 9Ndé dungu lí bɔ lî n kpú milú bá pushuwǎ álí dúbɛ. Á wusú wú ɛpipá ɛ́sə́sə̌n bá byábí misam míbî tɛ́ŋgɛnɛ Nji ɛ́ Sáŋgúwə́. Áfánikə̌, Pɔ̂lə a makú bɔ́ a kanán baʼ ábə́ bá dúbɛ́. Bǔn tɛ́ búwabɔ́ bá bílí ɛ shǔm pénda á ndáʼ ɛ jókwa á mulɛ̂ Tiránusə. 10Pɔ̂lə a bwəlí nâ á mibvfú míbɛ̂. Ɛ́yínán ɛ̂ m bwə baʼ bá Júda na baʼ bá Grîkə ábə́ bá bílí ɛ dyɛ á pɛsi ɛ Ésiya, bá wú ɛyala ɛ́ Sáŋgúwə́.
Bǎn bá Skɛ́va bá wanan álí nyítí midî míbî á baʼ
11Dyǔ lí bwə́lí Pɔ̂lə a bílí ɛ bwə misam mí manyáká ámə́ baʼ bá sî n lúŋúní ɛ mín. 12Baʼ bá bílí ɛ nǔŋ ká bɔ́kili-ɛ-ntundú na bɔ́kili-ɛ-nlú ɛ́yə́ Pɔ̂lə a m mə́ní ɛ bwəlan, bá kánán á baʼ bá nyámbɛ̂, bá bwə́lan álí mɛsí nyambɛ̂ m bɔ, ti bá bwə́lání yɔ́ álí fúl midî mí bî átinə́ a baʼ. 13Duŋgu lí baʼ bá Júda ábə́ bá bílí ɛ yə́ŋ á mábú na mabú bá fúlá midî míbî átinə́ a baʼ, bɔ́ pə́ bâ n wanan álí bwəlán dǐn lí Yésuwə álí bwə̌ ɛ́bulú ɛ́yín. Bá bílí ɛ pɔ̌ŋ mídî míbî nána, “Nǎn bə nyə́ ndaki á dǐn lí Yésuwə, awə̌ Pɔ́lə ǎ pɔŋní bâ nána, nyí nyíta átinə́ ɛ mɔʼ anín.” 14Prísə a nə̂n a nə̂n a baʼ bá Júda a bílí awə̌ bá bílíní ɛ bə̌ŋ Skɛ́va, a n yɛ́ bǎn bá bumân shyǎmbɛ. Bǎn bâ bɔ́ bá bwə́lákíní nâ. 15Ndé bǔn bufɔ́ mudî m bî m pɔ́ŋí bɔ́ nána, “M bí Yésuwə, m bí pə́ Pɔ̂lə, ndé nyə́ pə́ nyí dí bá njá?” 16Mɔʼ ani awə̌ mudî m bî m bílíní átin, a kfúndí bɔ́ á nyǔ na mataʼ másə́sə̌n ti a tfwɛmí bɔ́. Byáná bá kə mifílí, a bə́kí bɔ́ shi a nyǎ pə́ bɔ́ miku á nyǔ. 17Baʼ bá Júda na baʼ ábə́ bá shíyǎ baʼ bá Júda básə́sə̌n ábə́ bá bílí ɛ dyɛ á Ɛ́fɛ́sɔsə bá wúkí nkala mún. Bâ n lwínj na bɔŋ na bâ n bə̌ ɛ́dúbɛ́ ɛ́nə̂n á dǐn lí Sáŋgúwə́ Yésu Krísto. 18Badúbedi jǐta bá pílí á tandándâ ti bá púlísɛ́, bá byábá misam míbî ámə́ bâ m məní ɛ bwə. 19Baʼ jǐta ábə́ bá bílí ɛ́ bwə̌ wúdúŋgá bá núŋí kâti ɛ́ bɔ ɛ wúdúŋgá, bá pánán yɔ́, bá wɔ́kí yɔ́. Kâti ɛ́sə́sə̌n ɛ́yə́ bâ n wɔkíní ɛ m bá ngáʼ ká míliyɔnə mûm matân. 20Misam mínán mísə́sə̌n ámə́ mí bílí ɛ bwəlan, mî m bwə baʼ jǐta bá dúbɛ́ ɛyala ɛ́ Sáŋgúwə́ ti ndúm ɛ bílí wɔ̂ ɛ́ kɔlɔ na ngínya ɛ́ kə á wǔm másə́sə̌n.
Mpungú m pílí á nkí n Ɛ́fɛ́susə
21Ngə misam mínán mísə́sə̌n mí mə́ní ɛ bwəlan, Pɔ̂lə a fílí á nlə́m m mɔ nána mú túm á pɛsi ɛ Masɛdóniya na Akáya álí kə á Jerúsálɛmə. A m byá nána, “Njí n falú á Jerúsálɛmə, n lɔlí ɛ kə á Rómə.” 22A lúmí bawúnjan bábɛ̂ ábə́ bá bílí mɔ́ ɛ wúnjan, Tímótiyə na Ɛrástusə álí kə á wúsú á Masɛdóniya ndé mɔ́ ǎ dikɛ á pɛsi ɛ Ésiya, na ǎ dyɛ pə́ á mǎ púndá.
23Á púndá ɛni yɔ́ mpungú n nə̂n m bílíní á Ɛ́fɛ́sɔsə tɛ́ŋgɛnɛ Nji ɛ Sáŋgúwə́ ɛyə̌ baʼ bá bílíní ɛ nan. 24Mɔʼ nfɔ́ a bílí awə̌ bá bílíní ɛ bə̌ŋ Dɛmɛ́trisə. A bílí ɛ bwə̌ byə̌m na biki. A bílí ɛ bwə̌ byə̌m ábə́ bí wátání byə̌m bí ndáʼ ɛ dyǔ awə̌ bá bə́ŋákíní Átɛ́misə. Ɛbulú ɛ́yínán ɛ́ bílí ɛ bə̌ baʼ bá ndutu bá mɔ nsə́ŋ jǐta. 25A shwinjí baʼ bá ndutu bá mɔ, na baʼ bápə́pə̂ ábə́ bá bílí ɛ́ bwə nyə ɛbulú ɛ́ yî, ti a pɔŋí bɔ́ nána, “Basún bá myə nyí bí nána wudi wú sə wúsə́sə̌n wú fí á ɛbulú ɛ́yín ɛyə̌ sí bwəní. 26Sɔnsɔ́nǎn, nyə́mə̌n nyí mín, nyí wúká pə́ yə̌ ɛ́yə́ Pɔ̂lə anín ǎ bwəní. Ǎ byá nána madyǔ ámə́ bá bwə́líní na makɛ́ má shiyǎ madyǔ tɛyí tɛyí. Na a mə́ ɛ bwə baʼ jǐta ábə́ bá dí á Ɛ́fɛ́sɔsə na á wǔm másə́sə̌n á pɛsi ɛ Ésiya, bá dúbɛ́ nána yə̌ ɛ́yə́ ǎ byání ɛ́ dí mbálɛ. 27Áfánikə̌, nǎn báŋ nána, dǐn lí nyúŋgá ɛ́ sə lí fɛnji. Suká nâ wɔ̌ na wɔ̌, nǎn báŋ pə́ nána ndáʼ ɛ dyǔ línə̂n, Átɛ́misə ɛ sî wɔ́ŋá pə́ ká yǔm ɛli bwəlan. Baʼ bá sî mindíyá pə́ mɔ́ ngə yǔm, ɛ́yə́ bá bílíní mɔ́ ɛ mindi ngə dyǔ álə́ baʼ básə́sə̌n á Ésiya na á nkinshiyə nsə́sə̌n bá bwəlíní.”
28Ngə limuti lí wúkíní biyala bínán, bá bílí ɛkaŋ jǐta na bá bútí ɛ bún nána, “Átɛ́misə, dyǔ dí Ɛ́fɛ́sɔsə lí dí ngvumə litúm madyǔ másə́sə̌n.” 29Mpuŋgú m mû, mû ŋ kə á nkí nsə́sə̌n. Limuti lî n wálí Gáyɔsə bû Arístákusə na matáʼ ábə́ bâ n fí á Masɛdóniya ábə́ bá bílí ɛyɔyɔ na Pɔ̂lə. Bá kánání bɔ́ na mifílí, bá kwísán bɔ́ á ndáʼ ɛ mbum ɛ baʼ bá nkí. 30Pɔ̂lə mɔ́mə̌n a m bunsan álí kə á wusú wú limuti lî ndé baʼ ábə́ bá dúbɛ́ Yésuwə bá púshuwǎ nána a kə̂ʼ. 31Ngushu ɛ́ bâ ábə́ bá bílí ɛ byá á dǐn lí mbúʼ, ɛyə̌ bû Pɔ̂lə bá bílí ɛyɔkɔ, bɔ́ pə́ bâ n lúm mɔ́ ndúm na mayɔ́mbɔ́ nána, a si kəkí álí kə ɛ tyə́ á fə́ bá búmíní.
32Á púndá ɛni, mpungú n kwílí á limuti átin. Duŋgu lí bâ bá bá á nsam nfɔ́, ábání pə́ bá búná nsam mpə́pə̂, á ɛ́tútú nána bɔ́ baʼ jǐta bá sî n bí yándá álə́ bá búmíní áfâ. 33Ngə ɛ́ bílíní nána Alɛsánda mɔ́ baʼ bá Júda bá fílíní á wúsú, duŋgu lí baʼ bá bílí ɛ pɔŋ mɔ́ nána mɔ́ a lɔlí ɛ tɛ́lɛ́ misam. Yɔ̂ Alɛsánda á pɛpíní na makɛ́ nána baʼ bá dyɛ kpiʼ. A bílí ɛ sa álí panji á baʼ á bâ nána, suká bû baʼ á bâ bá bwə́lí ka mpungú m bá. 34Ndé ngə baʼ á bâ bá yəmní nána Alɛsánda a bílí mɔʼ a Júda, bɔ́ básə́sə̌n bá bútí ɛ bún nána, “Átɛ́misə dyǔ lí Ɛ́fɛ́sɔsə a dí ngvum, litúm madyǔ másə́sə̌n.” Bá búní nâ lipaʼ háwa pɔ́. 35Álí shúʼ, mɔʼ nfɔ́ á mbúʼ mɔʼ a bwəlí bɔ́ bá dyɛ̂ kpiʼ. Á byábí á bɔ́ nána, “Baʼ bá myə bá Ɛ́fɛ́sɔsə, mɔʼ ansə́sə̌n a bí nána nkí n Ɛ́fɛ́sɔsə mɔ́ nǎn tátí ndáʼ ɛ makáni ɛ́ Átɛ́misə dyǔ lí nə̂n lí sə. Na mɔʼ ansə́sə̌n a bí nána nkí múnán mɔ́ nǎn tátí lilɛ́ lí nkí álə́ lí fí á mǐn. 36Ngə nyí bíní nána, mɔʼ ká nfɔ́ a tíŋganiyǎ ɛ́ nyísán misam mínán, ɛ́ lɔ́liyǎ nána nyí panan mpungú ká nfɔ́. 37Ká ngə nyí mə́ní ɛ panán baʼ á bánán á fán, bá nan jíbíyá ká yǔm á mandáʼ madyǔ, na bá nan byábíyá mbyá m bî ká nfɔ́ álí tɛ́ŋgɛ́n dyǔ lí sə, Átɛ́misə. 38Áfánikə̌, wə̌ti Dɛmɛ́trisə bû baʼ bá ndutu bá mɔ bá wɔ́ŋí kɔkɔ na mɔ̂ʼ, bá lɔ́lí ɛ bí nána bǔn bú líkáyisi lí dí na baʼ bá mbúʼ bá dí ábə́ bá káyisi. Bá tíŋgání mɔʼ ani ɛ sɔ́mɔn á wə́. 39Njí yǔm ɛ́pə́pə̂ ɛ́ dí yɛkɛtɛ́ ɛ́yə́ nyí saʼní, mbum m baʼ bá nkí m mbum álí tyə́sí yɔ́ ngə mbéndá ɛ byábíní. 40Nǎn byá nâ á ɛ́tútú yə̌ ɛ́yə́ ɛ́ bwə́lání wúyə́ á ɛ́tútú nána gɔ́vɔ́nɔ ɛ Rómə ǎ byá nána sí mə́ ɛ panán mpuŋgú. Yándá ká lífɔ́ líshiyǎ álə́ sí panání mpuŋgú mún, na yándá ká lífɔ́ lí mbímbí líshiyǎ álə́ sí tíŋgání bɔ́ ɛ bə á ɛ́tútú mpungú mún.” 41Ngə a malíní álí byá nâ, a pɔŋí limuti nána mɔʼ na mɔtɛ́ a tîm á ndáʼ ɛ́ mɔ.
Currently Selected:
Mabwəlan 19: bwt
Highlight
Copy
Compare
Share
Want to have your highlights saved across all your devices? Sign up or sign in
