Mabwəlan 17
17
Pɔ̂lə bû Sáyílasə bá kǐ á Tɛssalóníka
1Pɔ̂lə bû Sáyílasə bá pɔ́ŋí mikí mí Amfípólisə na Apolóniya ti bá pílí á nkí n Tɛssalóníka. Ndáʼ ɛ makáni ɛ baʼ bá Júda ɛ bílí á wə́. 2Pɔ̂lə a bílí ɛ kə á ndáʼ ɛ makáni ɛtîtɛ́, áfánikə̌, a n kə á wə́. A dyɛ̌ á wə́ Sɔ́ndi ɛ́lán. Á Bǔn bú Líkɔ́mbɛ tɛ́ a bílí ɛ pɔ̌ŋ bâ ndúm ngə ɛ fíní á Dyǔ. 3A bílí ɛ panji misam ámə́ a bílíní ɛ pɔŋ bɔ́, á lúfúwá bɔ́ nána Ani-awə̌-Bá-Wɔ́kílíní a n lɔ̌ʼ ɛ́ taʼ ti a pumú á líwá. A m pɔŋ bɔ́ nána, “Yésuwə anín awə̌ nǎn pɔŋní nyə́ mɔ́ a dí Ani-awə̌-Bá-Wɔ́kíliní.” 4Duŋgu lí baʼ bá Júda bâ n dúbɛ nána yə̌ ɛ́yə́ Pɔ̂lə a bílíní ɛ byá mí bílí mbálɛ. Áfánikə̌, bá tímbí á Pɔ̂lə bû Sáylasə. Balân bá mbímbí jǐta na baʼ bá Grîkə jǐta ábə́ bâ n dúbɛ́ Dyǔ bɔ́ pə́ bâ n tim á Pɔ̂lə bû Sáyílasə. 5Ndé duŋgu lí baʼ bá Júda bâ n wú Pɔ̂lə bû Sáyílasə ŋgɔŋgí. Áfánikə̌, bá shwínjí duŋgu lí baʼ bá mpungú ábə́ bá bílí á nkí. Baʼ bá mpungú bâ bâ m bwi, bá bwəlá pə́ ntɔkɔku jǐta. Bâ n panán mpungú á nkí nsə́sə̌n, bá kwílí na litaʼ á ndáʼ ɛ Jásɔn álí bwə nána bá kúʼ Pɔ̂lə bû Sáylasə álí bwə nána bá nyítan bɔ́ á ntandádâ. 6Ndé ngə bá sákíní Pɔ̂lə bû Sáyílasə bá si mín bɔ́, bá dfúlí Jásɔn na badúbedi bápə́pə̂ bá kánání bɔ́ á wusú wú bajaniya bá nkí. Bá bílí ɛ bún, “Baʼ á bánán bá mə́ ɛ panán mpungú á wǔm másə́sə̌n. Sɔnsɔ́nǎn bá mə́ ɛ paʼ á nkí n sə. 7Ti Jásɔn a shwɛlí bɔ́ á ndáʼ ɛ́ mɔ. Bɔ́ baʼ básə́sə̌n bá mə́ ɛ kfún mbéndá ɛ́ Káyísa. Bá byábá nána kə̂ŋ ɛpə́pə̌ ɛ dí awə̌ bá bəŋní Yésuwə.” 8Ngə bá málíní álí byá ɛ́yín, mbyá mún m fɛ́njí limuti na bajaniya milə́m ti m pánání mpungú á nkí. 9Bajaniya bá bwə́lí Jásɔn na bání ábə́ bá dúbɛ́ ábə́ bâ n kúní álí sáwú ngáʼ álí bwə nána bá máku bɔ́ ti bá mákú bɔ́.
Pɔ̂lə na basún bá mɔ bá kwísí mutakaʼ á Bɛríya
10Ngə wudû wú pílíní, badúbedi bá lúmí Pɔ̂lə bû Sáyílasə á nkí m Bɛríya. Ngə bá pílíní á wə́, bá kí á ndáʼ ɛ makáni ɛ baʼ bá Júda. 11Baʼ bá Bɛríya bâ n wɔ́ŋ milə́m ámə́ mí púwání álí wú ɛyala ɛ́ Dyǔ litúm mí Baʼ bá Tɛsalóníka. Bá láŋákí ɛyala ɛ́ Dyǔ bǔntɛ́ álí sɔ́ntan njí yə̌ ɛ́yə́ Pɔ̂lə bû Sáyílasə bá byábíní ɛ́ bílí mbálɛ. 12Bâ jǐta bâ n dúbɛ. Balân bá mbímbí na bumân bá Grîkə jǐta bɔ́ pə́ bâ n dúbɛ. 13Ngə Baʼ bá Júda ábə́ bá bílí á Tɛsalóníka bá wúkíní nána Pɔ̂lə a pɔŋí ɛyala ɛ́ Dyǔ pə́ á nkí m Bɛríya, bá kí á wə́ pə́ bá fɛ́njí milə́m mí bâ ti bá bútí mpungú. 14Mulimlim m púndá, baʼ ábə́ bá dúbɛ́ Yésuwə bá lúmí Pɔ̂lə á nsaŋ mbô ɛ nə̂n ɛ nə̂n, ndé Sáyílasə bû Tímótiyə bá díkɛ́ á Bɛríya. 15Baʼ ábə́ bá kí ɛ díkí Pɔ̂lə bá kí na mɔ́ kə́ŋ ta á nkí n Átɛns, ti bá tímbí mbí á Bɛríya. Ngə bá bílíní ɛ tǐm, Pɔ̂lə a dísání bɔ́ nána bá pɔ̂ŋ Sáyílasə bû Tímótiyə nána bá pâʼ bá tán mɔ́ á Átɛns shám shám.
Pɔ̂lə a lakú á baʼ bá Átɛns
16Ngə Pɔ̂lə a bílíní ɛ sǐnj Sáyílasə bû Tímótiyə á nkí n Átɛns, ɛkfwíya ɛ́ bílí mɔ́ á nlə́m á ɛ́tútú nána, a m mín nána nkí m mû n lwínjí na bíkpekâ. 17Áfánikə̌, a kí á ndáʼ ɛ makáni ti a fətáníyá pɔ́li na baʼ bá Júda na baʼ ábə́ bá shiyǎ baʼ bá Júda ábə́ bá bílí ɛ bwəlí Dyǔ. A bílí pə́ ɛ kə á wútitîn bǔn tɛ́ á fətáníyá pɔ́li na mɔtɛ́ awə̌ a bílí ɛ paʼ á wə́. 18Baʼ ábə́ bá bílí á ɛ́pipá ɛ́ Ɛpikóriyanə na baʼ ábə́ bá bílí á ɛ́pipá ɛ́ Stóyikə bá bútí ɛ táŋ na Pɔ̂lə. Dungu lí bɔ bâ n kɔndɛ́ nána, “Yə̌ mɔʼ anín awə̌ a bíyání á wǔm másə́sə̌n ǎ byání ɛ́yə́ a bíyaní ká yǔm?” Á bání bá bílí ɛ byá nána, “Ɛ bwəla fâ ǎ byá tɛ́ŋgɛnɛ madyǔ mápə́pə̌.” Bâ n byá nâ á ɛ́tútú nána, Pɔ̂lə a bílí ɛ pɔ̌ŋ Ndúm ɛ Mbâ tɛ́ŋgɛnɛ Yésuwə na lipumu lí mɔ á líwá. 19Ti bá kánání Pɔ̂lə á wúsú wú ɛyə́ŋgə́ ɛ́ nkí ɛyə̌ bá bəŋní nána Aríyópágusə. Bá byábí nána, “Sí nəŋ álí sɔ́ntán lilɛ́fu lí kɔ́nə́ lín álə́ ɛ̌ lɛ́fúní baʼ? 20Misam mifɔ́ ámə́ ɛ̌ byání mí dí mí kɔ́nə́ á matwî má sə. Sí nəŋ álí sɔ́ntán mɔ́.” 21Baʼ bá Átɛns básə́sə̌n na bakən ábə́ bá bílí ɛ dyɛ a wə́ bâ n nəŋ álí fɛ̌nj púndá ɛ́ bɔ ɛ́sə́sə̌n álí pɔ̌ŋ na álí wú ndúm ɛ kɔ́nə́.
22Pɔ̂lə a tyə́bí á wusú wú baʼ bá ɛyə́ŋgə́ ɛ́ Aríyópágusə ti a byábí á bɔ́ nána, “Baʼ bá Átɛns m míní nána nyí bwəlí madyǔ bápə́pə̂ jǐta. 23Nǎn byá nâni á ɛ́tútú nána, ngə m bílíní ɛ yə́ŋ á nkí n nyə átin, n shwátá mǐ á mábú ámə́ nyí kɛsíní madyǔ, mi mi mín libú lifɔ́ álə́ nyí bəní jabeya bá tílí á wə́ nána, ‘Libú á DYǓ ÁLƏ́ LÍ BÍYANIYǍ.’ dyǔ lî, álə́ nyí bwəliní ká ngə nyí bíyaní lɔ́, yɔ̂ nǎn pɔ̌ŋní nyə́ sɔnsɔ́nǎn tɛ́ŋgɛnɛ lɔ́. 24Dyǔ álə́ lí wíkí nkínshíyə na byə̌m bísə́sə̌n ábə́ bí dí á wə́, lɔ́ lí dí Sáŋgúwə́ a nkíminyə́ na nkínshíyə̌. Lí sɛ̌ ɛ́ dyɛ á ndáʼ ɛ madyǔ ɛyə̌ bǎnyûŋ bá lúŋíní na makɛ́. 25Álí bán, Dyǔ lí sákiyǎ yǔm ɛ́yə́ sí tíŋgání lɔ́ ɛ bə ngə sí bwəlíní lɔ́. Á ɛ́tútú nána lɔ́mə̌n lɔ́ lí bə̂ mɔʼ na mɔtɛ luŋgɛ́, lí bə̂ ɛfiʼ na yǔm ɛ́yə́ sí sa ní. 26Mɔʼ nfɔ́ mɔ́ lí kɔ́sɛ́ní ɛ wiki, ndé matúmbá másə́sə̌n á nkínshíyə̌ má nyítí tombwanɛ mɔʼ nfɔ́ ani. Lí mə́ ɛ bwə bá dyɛ á nkínshíyə nsə́sə̌n. Byáná lí wikí bɔ́, lî m mə̌ ɛ́ tyə́sí púndá. 27Dyǔ lî n bwə nâni álí bwə nána, baʼ bá sâʼ lɔ́, na wə̌ti bá sákí lɔ́, bá tíŋgání lɔ́ ɛ mín ngə bá wúní lɔ́ á nyǔ. Ká ngə Dyǔ lí shiyǎní kfwáŋ na sə́ mɔʼ ká nfɔ́. 28Ɛ́ dí ngə mɔʼ nfɔ́ a byábíní nána,
‘Ngə sí díní na mɔ́ sí dí luŋgɛ́, sí yə́ŋ,
na sí dí yə̌ ɛ́yə́ sí díní.’
Ɛ́ dí pə́ ngə baʼ bá ŋganú bá byá nána,
‘Sə́ pə́ sí dí bǎn bá mɔ.’
29Ngə sí díní bǎn bá Dyǔ, sí si kaní nána Dyǔ lí dí ngə yǔm ɛ́yə́ bá bwə́líní na gôl tɔ sílíva tɔ lilɛ́ ɛ́yə́ bǎnyûŋ bá bwə́lání libyɛ́ ti bá bwə́lí na makɛ́. 30Á púndá ɛyə̌ baʼ bá sî n bíní Dyǔ, Dyǔ lí sî n nǔŋ wubî wú bɔ ngə yǔm ɛ́ mbímbí. Ndé sɔnsɔ́nǎn lí pɔ̌ŋ mɔʼ na mɔtɛ́ á wǔm másə́sə̌n nána bá máku wubî wú bɔ. 31Lí mə́ ɛ tyə́sí bǔn ábə́ lí káyísíní mɔʼ na mɔtɛ́ á nkínshíyə̌ á nyə ɛ́yə́ ɛ́ tɛ́ŋgɛ́ní. Lí mə́ ɛ pwɛ ani awə̌ ǎ káyísí mukáʼ m mû. Lí mə́ ɛ lúfú mɔʼ na mɔtɛ́ nána mɔʼ ani a kúkí ngə lí púmúní mɔ́ á líwá.”
32Ngə baʼ á bâ bá wúkíní ngə Pɔ̂lə a byábí tɛ́ŋgɛnɛ lipumu á líwá, dungu lí bɔ bá bílí mɔ́ ɛ nyasi na bafɔ́ bá bílí ɛ byá nána, “Sí sa nána ɛ pɔ̌ŋ pə́ sə́ ndúm ɛni”. 33Áfánikə̌, Pɔ̂lə a falú á mbum m mû. 34Baʼ bafɔ́ bâ bá tímbí á Pɔ̂lə ti bá dúbɛ́ Yésuwə. Á wútitǐn wú baʼ bâ, mɔʼ nfɔ́ a bá bílí bá bə́ŋákíní Diyónísusə, a bílí mɔʼ a ɛyə́ŋgə́ ɛ́ Aríyópágusə. Mwalân nfɔ́ a bílí áwə́ awə̌ dǐn lí mɔ lí bílí Damárisə na baʼ bápə́pə̂.
Currently Selected:
Mabwəlan 17: bwt
Highlight
Copy
Compare
Share
Want to have your highlights saved across all your devices? Sign up or sign in
