Mabwəlan 16
16
Tímótiyə a wungɛ́ na Pɔ̂lə bû Sáyílasə
1Pɔ̂lə bâ n kə á mikí mí Dɛ́bɛ na á Lístriya. Á nkí n Lístriya, mɔʼ nfɔ́ a bílí á wə́ awə̌ a n dúbɛ́ Krísto awə̌ dǐn lí bílí Tímótiyə. Nyǎ awə̌ mɔ́ pə́ a bílí mwalân awə̌ a dúbɛ́ Krísto a bílí mwalân a Júda. Ndé sáŋ m mɔ ka a bílí mɔʼ a Grîkə. 2Badúbedi básə́sə̌n á mikí mí Lístriya na Ikóniyumə bâ m byá mísam mí mbâ tɛ́ŋgɛnɛ Tímótiyə. 3Pɔ̂lə a n wɔ́ŋ nlə́m álí kanán Tímótiyə na mɔ́, áfánikə̌, a bwəlí mɔ́ wulɛ́ná. A bwəlí nâ á ɛ́tútú nána baʼ bá Júda ábə́ bá bílí ɛ dyɛ á mabú mâ bǎ n bí nána sáŋ mú Tímótiyə a bílí mɔʼ a Grîkə. 4Pɔ̂lə bû Tímótiyə bá bílíní ɛ kə á nkí na nkí, bá bílí ɛ pɔ̌ŋ bâ ábə́ bá dúbɛ́ Krísto misam ámə́ bawútú bálí-lúm na baʼ ábə́ bá dyɛ́lɛ́ mwémbá n Jerúsálɛmə bá tyə́síní, na bá bílí bɔ́ ɛ pɔŋ nána bá nána misam mî. 5Áfánikə̌, bá bwə́lí dúbɛ́ lí mwémbá lí kpúʼ ti mwembá mí kɔlɔ á mísɔngí bwintɛ́.
Pɔ̂lə a kfúndí biyúŋgu á Trówasə
6Pɔ̂lə bû basún bá túmbí á pɛsi ɛ Frígiya na Galátiya á ɛ́tútú nána Mudî ámə́ ŋ Sáŋí m mákuwa bɔ́ bá pɔ̂ŋ ndúm ɛ Dyǔ á pɛsi ɛ Ésiya. 7Ngə bá pílíní á pɛsi ɛ Mísiya, bá kə́kí álí kwili á pɛsi ɛ Bitíniya ndé Mudî n Yésuwə m púshuwǎ nána bá kwíli. 8Áfánikə̌, bá túmbí á pɛsi ɛ Mísiya bá shúlí ti bá pílí á nkí n Trówasə. 9Wudû bû, Pɔ̂lə a kfúndí biyúŋgu. Á biyúŋgu bî a míní mɔʼ á pɛsi ɛ Masɛdóniya a tyə́bí, a yɔ́mbí mɔ́ nána “Pǎ á Masɛdóniya ɛ wúnjan sə́” 10Pɔ̂lə a mə́ní ɛ kfún biyúŋgu bî, sí búnsání ti sí kî á pɛsi ɛ Masɛdóniya, á ɛ́tútú nána sí mɛ́sí nána Dyǔ lí mə́ sɛ́ ɛ bəŋ álí pɔ̌ŋ Ndúm ɛ Mbâ á baʼ ábə́ bá dí á wə́.
Mwalân nfɔ́ awə̌ bá bəŋní Lídiya a dúbɛ́
11Sí kwílí bwálu wú nə̂n á Trówasə, sí kǐ á Samótriyasə sí si tyə́ á mbuka. Bǔn búní sí kí á Niyápólisə. 12Sí fálú áwə́ sí kə̂ á Filípi. Filípi ɛ dí nkí n wúsúwə n nə̂n á pɛsi ɛ Masɛdóniya, m bílí pə́ nkí m mə́ mabéndá má baʼ bá Rómə mɔ́ na mɔ́ bá bílíní ɛ bwəlan. Sí dyɛ́ áwə́ ngushu ɛ́ mádû. 13Á Bǔn bú Líkɔ́mbɛ, sí nyítí á nkí m mû sí kǐ á nsaŋ ŋ madí. Sí bílí ɛ kaní nána sí mín fǔm ábə́ baʼ bá Júda bá káníní. Sí bílí á wə́ na balân ábə́ sí táníní ábə́ bâ n shwinjan á wə́. Síyabɔ́ sí pɔŋá pɔli 14Á ndíŋgí m balân bâ, nfɔ́ a bílí á wə́ awə̌ dǐn lí mɔ lí bílí Lídiya awə̌ a n fí á nkí n Tiyatíra. A bílí ɛ bwə nyungá á súmbá mabaʼ mátúnǎ ámə́ má kpútí nkfun. Mwalân ani a bílí ɛ bwəlí Dyǔ. Ngə a bílíní ɛ wúkán Pɔ̂lə Sáŋgúwə́ a pú mɔ́ nlə́m álí wúlán yə̌ ɛ́yə́ Pɔ̂lə a bílíní ɛ byá. 15Bá dúmsɛ́ mɔ́ na ndáʼ ɛ́ mɔ ɛ́sə́sə̌n. Á mbís ɛ púndá, a n lə́bí sə́ á ndáʼ ɛ́ mɔ. A m byá nána, “Njí nyí bí á mbálɛ nána m mə́ ɛ dúbɛ Sáŋgúwə́ Yésuwə, nyí pâʼ nyí dyɛ̂ á ndáʼ ɛ́ myə.” A byábí kə́ŋkə́ŋ sí kí.
Bá kɔ́lí Pɔ̂lə bû Sáyílasə á bibuwa
16Bǔn bufɔ́ ngə sí bílíní ɛ kə á fǔm bú mákáni, yɔ̂ ntáŋ a wukɔn nfɔ́ a táníní sə́. Mudî m bî m bílí átinə́ m mɔ, m mbwəlâ ǎ pɔŋá bâ misam ámə́ mí bwəlan á wúsú wú púndá. Wudúngá ábə́ á bílíní ɛ bwə, wû m bwə baʼ ábə́ bâ n yan mɔ́ ngə ntáŋ bá kwisíyá ngáʼ jǐta. 17Yɔ̂ a butíní sə́ na Pɔ̂lə á búna nána, “Baʼ á bán bá dí babwə bá Dyǔ lí Ngvum. Bá pílí álí pɔŋ nyə́ ngə nyí lɔ́líní ɛ kwisí líshuŋgɛ.” 18A bwəlí nâni madû jǐta kə́ŋ kə́ŋ Pɔ̂lə a n kfwí ti a wɛ́sí nyǔ a byábí á mudî m bî ámə́ m bílíní átinə́ ɛ wukɔn bû nána, “Á dǐn lí Yésu Krísto, nǎn bə wə̂ ndaki nána nyítá átinə́ m wúkɔn bún!” Á mulimlim m púndá mudî m bî mû n nyítí átinə́ ɛ́ wúkɔn bû. 19Ngə basísə́ ábə́ bâ n yân wukɔn bû ngə ntáŋ bá yə́mbíní nána nji ɛ́ bɔ ɛ li bwə̌ ngáʼ ɛ́ mə́ ɛ kə, bá tɔ́lí Pɔ̂lə bû Sáyílasə, bá dfúlí bɔ́, bá kánání bɔ́ á wútitîn wú nkí. 20Bá kánání bɔ́ á wusú wú bajaniya bá Rómə, ti bá pɔ́ŋí bɔ́ nána, “Baʼ á bán bá dí baʼ bá Júda, na bá pánan mpɔtí á nkí n sə. 21Bá lɛ́fú bilɛm bíbî ábə́ mambéndá má sə má sákiyani. Sə́ sí dí baʼ bá Rómə, sí tíŋganiya ɛ́ pushu nâni, ná si tíŋganiyǎ yɔ́ ɛ nan.” 22Ti limuti lí látání álí tásán Pɔ̂lə bû Sáyílasə. Ti Bajaniya bá nyábí mikuʼ mí Pɔ̂lə na Sáyílasə ti bá fúlí mɔ́ á nyǔ ɛ́ bɔ. Bá bə́kí ndaki nána bá shwɛ́nji bɔ́. 23Bá mə́ní bɔ́ ɛ sɔ́ksɛ́ mbɛ́ti, bá kɔlí bɔ́ á bibuwa, ti bá bə́kí ndaki á mɔʼ awə̌ ǎ tátí bibuwa nána a tátiya bɔ́ bwǎm álí bwə nána bá si búngú. 24Ngə awə̌ ǎ tátí bibuwa a kwisíní ndaki, a lúmí bɔ́ á tfúŋ ɛ ndáʼ ɛ malɛ́ ɛyə̌ ɛ dí á bibuwa átin. A kɔ́lí bɔ́ makwi á ɛ́pɔn á bibámbú. 25Bɛbɛ kɔsi á wudû, Pɔ̂lə bû Sáylasə bá bílí ɛ káni na bá bílí ɛ kɔ́n mikɔ́ni álí kɛsí Dyǔ. Baʼ bá bibuwa bápə́pə̂ bá bílí ɛ wú bɔ́. 26Áfâ áshí áshí, ndɔʼ ɛ butí ɛ sa jǐta, ɛ sákí na ngínya kə́ŋ kə́ŋ nkenjá n ndáʼ ɛ bibuwa n sákí. Ɛtîfɔ́ bikuʼ bísə́sə̌n bí ndáʼ ɛ bibuwa bí dfúwání, mgbɔkɔbí bí baʼ bá bibuwa bí kákú. 27Á púndá ɛyə̌ mɔʼ awə̌ ǎ tátí bibuwa a wúmúní á wúyɔ́, a míní nána bikuʼ bísə́sə̌n bí bibuwa bí dfúwání. A n kaní nána baʼ bá bibuwa bá mə́ ɛ búʼ, áfánikə̌ a dfulí pɛ́ ɛ misu míbə̂ álí sɔ̌ŋ nyǔ m mɔ. 28Ndé Pɔ̂lə a búní á ngɔli ɛnə̂n nána, “Ɛ si búlú nyǔ ɛ́ wə á ɛ́tútú nána sə básə́sə̌n sí dí wə̂ á fán!” 29Mɔʼ awə̌ ǎ tátí bibuwa a bə́ŋí nána bá pánan mɔ́ ɛtrúkán. A búŋgú a kwilí á bibuwa átin, á kfúndí á makwi má Pɔ̂lə bû Sáyílasə sáká na bɔŋ wú nə̂n. 30A nyítí na bɔ́ á ɛ́búka ɛ́ bibuwa, ti a kɔndɛ́ nána, “Basísə́, yə̌ n lɔlíní ɛ bwə álí kwisí lisungɛ?” 31Bá púshú mɔ́ nána, “Dúbɛ́ Sáŋgúwə́ Yésú Krísto, ti ɛ̌ kwisí lisungɛ. Ǎ shuŋgɛ́ pə́ túmbá lí wə.” 32Ti bá pɔ́ŋí Ndúm ɛ Mbâ tɛ́ŋgɛnɛ Sáŋgúwə́ á mɔ́ na á baʼ básə́sə̌n ábə́ bá bílí á ndáʼ ɛ́ mɔ. 33Á mulimlim m púndá mû á wudû átin, mɔʼ ani awə̌ a bílí ɛ tátí bibuwa a nuŋí bɔ́ ti a wǔ shǐ ɛ́ bɔ. Áfâ áshí áshí bawútú-bálí-lúm bá dúmsɛ́ mɔ́ na túmbá lí mɔ lísə́sə̌n. 34A n kánán Pɔ̂lə bû Sáyílasə á ndáʼ ɛ́ mɔ, ti a bəkí bɔ́ yǔm álí lídyá. Mɔ́ na túmbá lí mɔ bâ n lwínj na munyɛŋgɛ á ɛ́tútú nána bâ m mə̌ dúbɛ́ Dyǔ.
35Mushú mú bǔn bú kɔ́nə́ baʼ bá nə̂n bá Rómə bá lúmí bapolîs na ndaki nána, “Nyí máku bumân bâ bá kə̂.” 36Mɔʼ awə̌ ǎ tátí bibuwa a pɔŋí Pɔ̂lə nána, “Bajaniya bá nkí bá lúmí ndaki nána m maku nyî Sáyílasə. Áfánikə̌, nyí nyít, nyí kə na musaŋgu.” 37Ndé Pɔ̂lə a pɔŋí baʼ bá pólis nána, “Bá shwɛ́njí sə́ á tandádâ ɛ́yə́ sí bwə́liyǎ ká yúmə́ ti bá fílí sə́ á bibuwa ɛyə̌ sí díní baʼ bá Rómə. Sɔnsɔ́nǎn bá sa sə́ ɛ makú á másɔmɔ́n? Ɛ́ tíŋganiyǎ ɛ́ bá nâ. Bajaniya bá Rómə bâ bɔ́mə̌n bá lɔ́lí ɛ paʼ álí fúl sə́.” 38Bapolîs bá kǐ ɛ pɔ̌ŋ bajaniya bá Rómə ngə Pɔ̂lə a m byání. Ngə bá wúkíní nána Pɔ̂lə bû Sáylasə bá bílí baʼ bá Rómə, bɔŋ wú kwíli bɔ́ átin. 39Áfánikə̌, bá kǐ ɛ pɔŋ Pɔ̂lə bû Sáylasə nána bá láksɛ bɔ́, ti bá fúlí bɔ́ á bibuwa, ti bá yɔ́mbí bɔ́ nána bá máku nkí m bɔ. 40Ngə Pɔ̂lə bû Sáyílasə bá fálúní á bibuwa, bá kǐ á ndáʼ ɛ́ Lídiya. Ngə bá pílíní á wə́, bá tání badúbedi. Pɔ̂lə bû Sáyílasə bá fílí bɔ́ makpâ ti bá kǐ.
Currently Selected:
Mabwəlan 16: bwt
Highlight
Copy
Compare
Share
Want to have your highlights saved across all your devices? Sign up or sign in
