مَتّی 22
22
مَثَل جشن عروسی
1عیسی هَنی وا مَثلا وا اونا صُوَت مِکِرد وُ مِگُفت: 2«پادشایی آسِمو، مِثِ پادشاییَ که وِرَ پسرش جشن عروسی بَرپا کِرد، 3او غلاما خُیِشِه فِرسا تا دَعوَتی آ نِه وِرَ جَشن خَور کُنن امّا اونا نَخواسِن بیان. 4غلاما دیَری فِرسا وُ گُفت: ”وِ دَعوتی آ بُئید سُفرۀ جشنِه حاضِر کِردِمَ وُ گُو وُ گُوسالا پروارِمِ سَر بُریمَ وُ همه چی حاضِرَ بیایید وِ جشنِه عروسی .“ 5امّا اونا اعتنا نَكِردِن وُ هر کامِشو وِ را خُیِشُو رفتِن یكی سَرِ زِمی وُ یکی وِرَ تِجارَتِ خُیِش . 6باقی هم غُلاما اونِه گِرفتِن وا بی شرمی رفتار کِردِن وُ کُشتِن. 7شاه اینِ شِنُفت خشمگین شد سپاهی فِرسا وُ او قاتلانِ كُشت وُ شَرِشُونِه وِ آتِش کَشی. 8اوسِه وِ غلاما گُفت: ”جشن عروسی حاضِرَ،امّا دعوتیا لایق نَوین. 9پَ بَرید مینِ شَر وُ هر کی نِه پیا کِردید وِ جَشنِ عروسی دعوت کنید.“ 10غلاما رفتِن وِ کوچِه آ وُ هر کی نِه پیا کِردِن چِه خُو وُ چِه بَد وا خیِشُو اُوُردِن، جوری که تالار عروسی پر شد اَ مِهمونا.
11امّا وَختی که شاه وِرِ دییِن مِهمونا آما مینِ مجلس مردی نِه دیی كه لِواسِ عروسی وَرِش نَوی. 12اَ او پُرسی: ”ای دُوس چِجور بدون لِواسِ عروسی آمییی اینچو؟“ او مرد جُواوی نَشتا. 13اوسِه پادشا وِ خادماش گُفت: ”دَس وُ پاشِه بَوَنید وُ اونِ بَنازید دَر دِ مینِ تاریكی جایی که گورگَه وُ دِنُو قِروچَیَه .“ 14وِرَ ایکه دعوت شیَ آ زیادَن، امّا برگزیدِآ كَم.»
خراج وِ قیصر روم
15علمای فِرقۀ فَریسی رفتِن دَر وُ شور کِردِن که چِجور اونِ نِه وا حَرفاِ خُیِش بَنازَن دِ دام. 16اونا شایِردا خُیِشُونِه واردِ هَوادارای هیرودیس وَرِ عیسی فِرسان وُ گُفتن: «استاد مِینیم كه تُو مرد دُرُسی هِسی وُ را خدانِه وِ دُرِسی تعلیم میی وُ اَ کسی تَرسی نَری وُ وِ ظاهر توَجه نِمُکنی. 17نظر خُیِتِه وِ ایما بُ؛ آیا خراج دیَن وِ امپراطور جایِزَ یا نه؟» 18اَما عیسی که اَ نیتِ بَدِشو خَور داشت وِشو گُفت: «ای ریاكارا چُنَ مَنِه امتحان مُکُنید؟ 19سکهاینِ که وا او مالیاتِ میید وِ مَه نِشُو بَئید.» اونا سکه یِه دیناریی وِش دان. 20عیسی پُرسی: «ایی نقش وِ اسم کیهَ رو ایی سِکَه؟» 21اونا وِ عیسی جَواو دان: «مال امپراطور.» عیسی وِشو گفت: «پَ مال امپراطورِ وِ امپراطور وُ مال خدا نِه وِ خدا بَئید.» 22اونا که اَ ایی جُواو حیرو شوئِن، وُریسان عیسانِه ترک کِردِن .
سوال دِبارَ قیامت
23دِ هَمو رو، علمای فرقه صَدّوقی كه منكرِ زِنَه شییَنِ مُردِآاَن وَرِ عیسی آمان وُ سؤالی اَ او پُرسیِن، 24گُفتِن: «استاد،موسی وِ ایما گُفتَه که اَیَر مردی بدون اولاد بَمیرَه، بِرارِش باید وا بیوَه او نکاح کُنَه تا اَ او زَ وِرَ بِرارِ خُیِش نسلی باقی بَلَهَ. 25راسِش، اَ مینِ اِیما، هَفتا بِرار بییِن برارِ اوَل زَنی خواسُ مُرد وُ وِرَ ایکه هوچ اولادی نَشت زنِ بیوَشِه وِرَ بِرارِش جا هَشت. 26هَمیجور دُومی وُ سِومی تا بِرارِ هفتِمی وِ ایی وَضع گِرفتار بییِن. 27آخِر سَر او زَنَم مُرد. 28پَ دِ روزِ قیامَت، او زَ، زنِ کامی اَ او هَفتا بِرار مِشَه وِرَ ایکه هَمَه شُو اونِ وِ زَنی گِرفتَه ویین؟»
29عیسی وِشو گُفت: «شما اشتبا مُکُنید وِرَ ایکه نه اَ نوشته آ مقدّس چیی مینید وُ نَه اَ قُدرتِ خدا! 30دِ قیامت کَسی نَه زَ ماخا وُ نَه شویَر مُکُنه بلکه هَمَه، مِثِ فرِشته آ آسِمُونَن. 31امّا دِبارَه زِنَه شییَنِ مُرداآ آیا دِ نوشته آ مقدس نَخُنید كه خدا وِ شما شی گُفتَه؟ 32او فرمایِش کِردَه:که ”مَنِم خدای ابراهیم وُ خدای اسحق وُ خدای یعقوب.“ او، خدای مُرداآ نیسا بلکه خدای زِنِه آاَ.» 33مَردِم وا شِنُفتن ایی حرفا اَ تعلیم او شگفت زیَه شوئِن.
بزرگترین حُکم
34امّا هَمی که علمای فِرقِۀ فَریسی شِنُفتن كه عیسی چِجور وا جُواو خُیِش دونِ علمای صَدّوقینِ بَسَه دور هم جمع شوئن. 35یکی اَ اونا فقیه بی، وا ایی نیّت که عیسانِه دِ دام بَنازَ اَ او پُرسی: 36«ای استاد کامینا اَ احکامِ شریعت اَ هَمَه بُزُرگتَرَ ؟» 37عیسی وِش جُواو دا: «”خداوند خدای خُیِتِه وا تَمام دل وُ تمامِ جُو وُ وا تَمام فکر خُیِت محبت کُ.“ 38ایی اولی وُ بزرگترین حُكمَ. 39دُومی حُکم هم هَموجورِ اَوَلیَ: ”هَمسایَتِ مِثِ خُیِت محبت کُ.“ 40تَمامی تورات وُ نوشته آ اَنبیا وِ رو ایی دوتا حکم استوارَ.»
مسیحِ موعود پسر كیَه؟
41هَمی که علما فریسی دورِ هم جمع شوئِن عیسی اَزِشو پُرسی: 42«نظر شما دِ موردِ مسیح موعود شیَ؟ او پسر کیَه؟» اونا جُواو دان: «پسر داوود.» 43عیسی اَ اونا پُرسی: «پَ وِرِ شی داوود وا الهام روح خدا اونِ خداوند مِخُونهَ؟ وِرَ ایکه مُوئَه:
44”خداوند وِ خداوندِم گفت:
دِ دَسِه راسِ مَه بَنیش،
تا زمانی که دُشمناتِ بَنازِم زیر پات.“»
45اَیَر داوود اونِه خداوند مِخُونهَ او چِجور مِتونهَ پسر داوود با؟ 46وِ ایی ترتیب هوشکَه نتونِس چیی دِ جواوِ عیسی بُئَه وُ اَ او وِ بعد هوشکَه جُرَت نَكِرد اَ او سؤالی بَپُرسَه.
Currently Selected:
مَتّی 22: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
