کارا رسولا 8
8
شائول کلیسا نِه عِذاو مییَه
1وَ شائول رَأیِش وِ کُشتَن اِستیفان بی. دِ او روز عِذاو سختی، وِ رو کلیسای اورشلیم آما،جوری که بِغِیرِ رسولا، همَه وِ وُلاتِ یهودیَه وُ سامِرَه فِرار کِردَن وُ پراکَندَ شوئِن. 2عده ای مرد دیندار اِستیفانِه هَشتِن دِ قَبر وُ پُرسِ خوئی وِرَش گرفتِن. 3اما شائول سخت وِ کلیسا مِتاخت وُ خونَه وِ خونَه میَشت، وُ زَنا وُ مردا نِه مِکَشی دَر وُ مناختِشو زندان.
فیلیپُس دِ سامِرَه
4اما اونایی که پراکندَ شیَ وین هَر جا که مِرَفتِن، کَلام خدا نِه تعلیم مِدان. 5فیلیپُس هَم وِ یکی اَ شَرا سامِرَه رَفت وَ مسیحِ نِه وِرَ مردمِ اونچو موعظَه کِرد. 6دَسَه دَسَه مَردِم همی که حَرفا فیلیپُسِه شِنُفتِن وُ نِشونِه آیی نِه که اَنجام مِدا مِدین همَشو یِه دِل، وِ هَر شیی که مِگفت خو گوش مِدان. 7وِرِ ایکه ارواح بَد وا دُنگی بُلن نَعرَه مِکَشین وُ اَ خیلیا که گرفتارِ ایی ارواح شیَ وییِن میامان دَر وَ عدِۀ زیادی اَ اِفلیجا وُ شَلا شفا میرفتِن. 8وِ ایی خاطِر شادی زیادی او شَرِ نِه گِرِفت دِ وَر.
شَمعونِ جادوگر ایمان میارَه
9اما دِ او شَر مردی زِنِهئی مِکرد وِ نام شَمعون که اَ زوتَر مردمِ سامِرَه نِه وا سِحر وُ جادوآش حِیرُو کِرده وی وَ ادعا مِکرد آیِمِ بزرگیَ. 10همَه اَ کُوچوک وُ بزرگ، قَوولِش داشتِن وَ مِگُفتن: «ایی مرد همو قدرتِ خداَ که وِش مُوئَن عظیم.» 11اونا قوولِش داشتِن وِرِ ایکه خیلی وَخت بی که وا جادوآش، اونانِ حیرَت زیَه مِکِرد. 12اما هَمی که وِ بشارت فیلیپُس دِبارَه پادشاییِ خدا وَ اسم عیسی مسیح ایمان اُوُردِن همه شو اَ مرد وُ زَ تعمید گرفتِن. 13حتّی خُودِ شَمعونَم ایمان اُوُرد وُ بعد تعمید گرفتِن هَمیشَه واردِ فیلیپس بی، وَ وا دییِن نِشُونِه آ وُ معجزِآ بزرگی که مِشُد مات و مبهوت بی.
14همی که رسولا دِ اورشلیم واخور شوئِن که مَردِم سامِرَه کَلام خدا نِه قَوول کِردَن،پطرس وُ یوحنا نِه فِرسان وَرِشو. 15اونا هَر دوتاشو آمان وِ سامِرَه، وِرَ ایماندارا دعا کِردَن تا روحالقدُسِ نِه دَریافت کُنَن، 16وِرِ ایکه هَنی روحالقدُس وِ رو هوچ کامِشو قِرار نگرفتَه وی، بَلکه فقط وِ اسم عیسی خداوند تعمید گرفته وییِن وُ بَس. 17اوسِه پِطرُس وُ یوحنا دَسا خُیِشُو نِه هَشتِن رو اونا وَ اونا روحالقدُسِ نِه گرفتِن.
18وَختی که شَمعون دیی که وا دَس هَشتَن رسولا رو مَردِم، روحالقدُس وِ مردِم عطا مِشَه مقداری پول اُوُرد وُ 19وِ رسولا گُفت: «وِ مَنِم ایی اِقتِدارِ نِه بَیید تا وِ رو هَر که دَس مَلِم، روحالقدُسِ نِه بیرَه.»
20اما پِطرُس گُفت: «خُیِت وُ پولِ نُقرَهت نابود بَشید وِرِ ایکه گُمو کِردی عطای خدا نِه مِشَه وا پول بَسُونی! 21تو دِ ایی خدمت هوچ قِسمت وُ سهمی نَری وِرِ ایکه دِلِت وا خدا رو راس نیسا. 22اَ ایی شِرارتِ خُیِت توبه کُ وَ اَ خداوند باخا اَیَر مِشهَ ایی فکرِ دِلِتِ بَخشیَه با، 23وِرِ ایکه مُویینِم که پر اَ زهر تَلخ وُ اسیرِ بَندای شِرارتی.»
24شَمعون گُفت: «شما وِرَ مَه وَرِ خداوند دعا کنید تا اوچیایی که گُفتِید وِ سرِم نیا .»
25پِطرُس وُ یوحنا بَعدِ شهادت دییَن وَ اِعلام کلام خداوند، وُریشتِن وِ اورشلیم وَ دِ مینِ را دِ خیلی اَ داهاتا سامِرَه خَوَرِ خُوشِه نجاتِه موعظَه مِکِردَن.
فیلیپُس وَ خَزانَه دارِ حَبَشی
26اوسِه یِه فرشته خداوند وِ فیلیپُس گُفت: «وُری یِه راس بَرو وِ طرف جنوب، وِ رایی که اَ اورشلیم مِرَ وِ طرف غَزَه،هَمو راءِ بیاوُونی.» 27پَ وُرِیسا وُ اِفتا را که یِیهو دِ را بَرخُورد وِ خواجه سَرای حَبَشی که اَ بزرگا دَربارِ ’کَنداکَه‘ مَلَکَه حَبَشَه وَ خَزانَهدارِ او بی، وَ وِرَ عبادت آمیَ وی وِ اورشلیم. 28او دِ را وُریَشتِن وِ سرزِمینِش، نِشِسَه وی رو دُرِشکَهش وُ کِتاوِ اِشعَیا نبی نِه مِخُن. 29اوسِه روحالقدُس وِ فیلیپُس گُفت: «بَرو نَزیک، وُ واردِ او دُرِشکَه بَرو.»
30فیلیپُس دُئِس وِ طرف دُرِشکَه وَ شِنُفت که خزانَه دار حَبَشی کِتاوِ اِشعَیا نبی نِه مِخُونَه. پَ وِش گُفت: «یعنی او چیی که مِخُونی، مِفَمی؟»
31گُفت: «چطور مِتونِم بَفَمِم، اَیَر کِسی رانَماییم نَکُنَه؟» پَ اَ فیلیپُس خواس که سُوآرِ بَشَه وُ بنیشهَ کنارش. 32جائی اَ نوشتۀ مقّدس نِه که مِخُون، ای بی:
«مِثِ گوسوَنی که مُورَنِش وِرَ قروُنی
وُ مِث بَرِهای که پَشماشِه چَرَه مُکُنَن ساکت وُ هَموجور دُونشِ وا نِمُکُنَه.
33دِ خوارِ زاریش ، عدالت ازِش دریغ شد،
چه کِسی مِتُونَه اَ نسلِ او صحبت کُنَه؟
وِرِ ایکه حیاتِ او اَ رو زِمی وِرچِنِس.»
34خواجه سرا وِ فیلیپُس گُفت: «ازِت ماخام وِم بُئی که نبی اینچو، دِبارَ چه کِسی صحبت مُکُنَه؟ اَ خُیِش یا دیَری؟» 35اوسِه فیلیپُس شروع کِرد وِ صحبت کِردَن وَ اَ هَمو جا نوشتَه مقّدس شروع کِرد،دِبارَ عیسی وِش خَوَرِ خُوشِ نجاتِه بشارت دا.
36هموجور که داشتِن مِرفتن رَسِسِن وِ اُویی. خواجه سرا گُفت: «سِیل کُ ایسه اُو آمادَس! یعنی چه چیی مِتُونهَ جِلو تعمید گِرفتَن مَه نِه بیرَه؟» 37فیلیپُس گُفت: «اَیَر وا تمام دِل ایمان اُوُردِی چیی نِمِتُونَه جِلو تعمید گِرِفتَنِتِه بیرَه.» خواجه سرا گُفت: «ایمان دارِم که عیسی مسیح پسر خداَ»
38پَ خواجه سرا دستور دا دُرِشکَه نِه نیا دارَن، وُ فیلیپُس وُ خواجه سرا، هَر دوتاشو رفتِن مینِ اُو وُ فیلیپُس اونِه تعمید دا. 39هَمی که اَ مینِ اُو دِرامان روحِ خداوند فیلیپُسِ نِه وُرداشت وُ بُرد وَ خواجَهسَرا او نِه نَدی اما وا شادی راشِ گِرِفت وُ رَفت. 40فیلیپُس خُیِشِه دیی که دِ اَشدودَ. او دِ مینِ تمام شَرا او منطقَه میَشت وَ خَوَرِ خُوشِ نجاتِ بشارت مِدا تا رَسِس وِ قیصَریَه.
Currently Selected:
کارا رسولا 8: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
