کارا رسولا 3
3
شَفا گدا شَل
1یِه رو پِطرُس وُ یوحنا ساعتِ سِه بَعَظُر که وَختِ دعا بی، مِرفتن طرف معبد خداوند. 2دِ او مِوقَع،عده ایی،مردی که مادرزاد شَل بی میاوُردِن اونا هَر رو اونِ دِ وَرِ دَروازَه معبد کِه اسمِش «دروازَه زیبا» بی مِیزاشتِن تا اَ مردِمی که میامان مینِ معبد صِدَقَه بِیرَ. 3همی که او مرد پِطرُس وُ یوحنا نِه دیی که ماخان بیان مینِ معبد اَ اونا صِدَقَه خواس. 4پِطرُس وُ یوحنا وِش خیرَه شوئِن پِطرُس گُفت: «سِیلِمُو کُ بُویینِم!» 5اوسِه او مرد سِیلِشُو کِرد وُ منتظِر بی تا چیی وِش بَیَن.
6اما پِطرُس وِش گُفت:«مَه طِلا وُنقرَه نَرِم، اما اَ اوچی که دارِم وِت مییِم! وِ اسم عیسی مسیحِ ناصری وُری وُ را بَرو!» 7اوسِه دَسِ راسِ مرد نِه گِرِفت وُ او نِه بُلَن کِرد.دَرجا ساقِ پاآش وُ مُچ پاآش قُوَت گِرِفت. 8اَ جا پِرِس وُ وایسا وُ قَدَم وُرداشت. اوسِه شروع کِرد وِ جَستُ خیز وُ خدا نِه شکر مِکرد وُ واشُو رَفت مینِ معبد. 9تمام مردِم او نِه دییِن که را مِرَ وُ خدا نِه شکر مُکُنَه 10وَ اِشناختِنِش که همونَیَ که قبلِ ایی وِرَ گِرفتَن صِدَقَه دِ وَرِ دَروازَه زیبا مِنیشِس، پَ اَ او چیی که وِرَش اتفاق افتیَ وی غرق تعجب وُ حیرت شوئِن.
تعلیمِ پِطرُس دِ اِیووُن سلیمان
11هَمو وَخت که او مرد واردِ پِطرُس وُ یوحنا مِرَفت وَ اَزِشو سَوا نِمِشُد، تمام مردِم هَموجور حیرت زیَه دِ اِیوُونِ سلیمان وِ طرفشو دُوئِسِن. 12همی که پِطرُس ایی نِه دیی، رو کِرد وِ جمعیت گُفت: «مَردای اسرائیلی، چُنَ اَ ایی کار تعجب مُکُنید؟ چُنَ چینی خیرَه سیلُمو مُکُنید جوری که مَری وا نیرو وُ دینداری خُیِمُو، کاری کِردِیم تا ایی مرد بَتُونَه را بَرَ؟ 13خدای ابراهیم، خدای اسحق، خدای یعقوب، خدای بُواَآ ایما، خادم خُیِش عیسی نِه جَلال دا.هَمو که شما تسلیمِش کِردِید وَ دِ حضورِ پیلاتُس اونِ حاشا کِردِید هَر چَن که پیلاتُس نَظَرِش ایی بی که آزادِش کُنَه. 14شما بیید که دَس رَد وِ سینَه او قدوسِ عادل زَیید وُ خواسید دِ عَوَض قاتِلی وِتو بَخشیَ با. 15شما سَرچَشمَه حیاتِ نِه کُشتِید، اما خدا او نِه اَ مینِ مُردِآ زِنَه کِرد وَ اِیما شاهِدِ ایی هِسیم . 16وَ وِ خاطر ایمان وِ اسمِ عیسی، اسمِ عیسی ایی مردِ نِه که مُویینید وُ مِشناسید، جو بَخشیَ، وِ یَقین او ایمانی که تَوَسُطِ عیسی خداوندَ ایی مرد نِه دِ وَرِ چِشِتُو سالم و سِلامت کِردَ.
17وَ ایسه بِرارا، مینِم کارِ شما اَ رو نادونی بی، دُرُس هَموجور که بزُرگاتونَم کِردَن . 18اما خدا اَ ایی را اوچی نِه که وِ زِوونِ تمام پِیغَمَرا گُفتَه وی وِ اَنجام رَسُن: اینِ نِه که مسیحِ او میا تا عِذاو بَکَشَه. 19پَ توبَه کُنید وُ وُریَردید وِ طرف خدا تا گُناآتو پاک بَشَه وُ روزا فِراغت وُ شادی اَ حضورِ خداوند وِرَتو بَرَسَه. 20تا خدا، مسیحِ موعودِ نِه که اَ جِلوتَر وِرَتو انتخاب کِردَ وی، بَفِرسَ ینی هَمو عیسی، 21که باید آسمُو پذیراش مِشُد تا زِمانی که هَمَه چی بنا وِ او چی که خدا اَ قَییم وِ زِوونِ تمام انبیایِ مقدسِ خُیِش گُفتَ. زِنَه بَشَه. 22موسی گفتَ: ”خداوند خدا، اَ مینِ بِراراتو، پِیغمَری مِثِ مَه وِرَتو مِفِرسهَ، وَ شما وِ هَر چیی که وِتُو مُوئَه خو گوش بَیید. 23هَر کَه اَ او پیغَمَر اطاعت نَکُنَه باید اَ مینِ قُوم نابود با.“ 24سموئیلِ نبی وَ تمام انبیا اَ سموئیل وِ بَعد هَم، همه شو یِه صدا دِ بارَه ایی روزا گُفتِنَ. 25شما اولادایِ انبیا هِسید وَ وارثا او عَهدی که خدا وا بُواِآتو بَس.وِ خاطر او زِمانی که وِ ابراهیم گُفت: ”اَ نسلِ تو تمام قُوما رو زِمی برکت مِیرَن.“ 26زِمانی که خدا خادم خُیِش عیسی نِه انتخاب کِرد، اول او نِه وَرِ شما فِرسا تا شما نِه برکت بَیَه تا هَر کامِتونِ اَ را شَرِگَر خُیِتو وُریَردونَه.»
Currently Selected:
کارا رسولا 3: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
