Ovaefeso 4
4
Oukumo womOmbepo Ondhilikwa
1Ame ndjinkwatwa mena lyokutya ndji undapela Muhona, me mu kumbu mu ende ngahi mwa thele okweenda paithano ndimwa ithanenwa, 2mu kale ovalinunupiki novanankenda, ovalikambulithili mohole.#Kol. 3:12-13 3Kalen̯i nehalo lyokukaleka po oukumo womOmbepo Ondhilikwa, ouwa u mu kute kumo. 4Pe na olutu lumo nOmbepo imo ngahi pe na eliun̯iko limo ndimwa ithanenwa. 5Muhona yuumo, eitavelo ilimo, etjatjo ilimo, 6Kalunga yuumo, Ihe yovantu avehe, nguu li kombanda yovantu avehe, nguu undapetha ovantu avehe, nguu li movantu avehe. 7Omuntu auhe wa pewa et̯ilonkenda otjali ndyee mu yeleka, Kristus ngahi e mu pa. 8Iya omusonekwa ngahi mau tyaa: “Hiaa londa kombanda, wa twaelela odhonkwatwa odhingi, ye wa yandja otjali kovantu.”#Eps. 68:18 9Iya napano okulonda huka okwatji, andaa nan̯i hahiaa heluka wo, ha i mohi yohi? 10Iya ngwaa heluka, oye a londa wo, ha i kokule kombanda yeulu alihe, opo a ule okuhwithila po ovipuka avihe. 11Kristus oye a twaa po okutya vamo va kale ovayapostoli, vamo ovaprofeti, vamo ovaevaengeliste, vamo ovat̯ita, vamo ovalongethi, 12opo ovantu ovadhilikwa va longekedhwe, va kale ava hwile po okuundapa otjilinga tjokupopila okutunga olutu lwaKristus 13katee atuhe matu i moukumo womeitavelo nokwiiwa OmunwaKalunga, tu ile ovantu ovanene, tu kale naa atwa hwile po ngaKristus. 14Iya kaatu ngala uke odhondele mbava tjindwa kodhombepo kwalukele dhomalongo nodhomatutu ovantu okulilungametha novineya vyokukemba. 15Iya okupopya nawa otjatjili, ngatu kule muye movipuka avihe, Kristus nguu li omutwe. 16Muye olutu aluhe lwa tuwa kumo, halu kambulilwa kumo komithipa avihe. Malu kulu, halu litungu mohole, otjin̯ipo atjihe hatji undapa ngahi tja thele okuundapa.#Kol. 2:19
Omwenyo omupe muKristus
17Iya hehi me mu heele tjo mena lyaMuhona. Hámu ende uke ngovapaani mbahave liun̯ikile muKalunga, mbava enda mouhima wodhondunge dhawo. 18Odhondunge dhawo dha dhiwela, kave na tja omwenyo mboka Kalunga mbwaa yandja mena lyokuhaiwa nokulikukutika omitima vyawo. 19Ve liyetha ovene, kave liyungu. Ve litwaa movilinga avihe vyokuhelitjaela movihulo vyolwiho. 20Iya soka hatjo mwe lilonga ouhunga naKristus. 21Ngahi mwa tyaa ouhunga naKristus, mwa longwa otjatjili hitji li muJesus, 22lidhulen̯i onkalo ndjimu kala nayo, mu lidhule omuntu omukulu nguu lilundha nolwiho lwokulungamena.#Kol. 3:9 23Iya ilen̯i ovape mombepo ndjimai tumine omalipulo en̯i, 24mu dhale omuntu omupe ngwaa utwa e lithe kuKalunga mouvyuuki nomoudhilikwa watjatjili.#Gen. 1:26; Kol. 3:10 25Iya yethen̯i ovithithi, omuntu auhe nga heele omukwawo otjatjili, mena lyokutya nt̯e atuhe tuun̯ipo wolutu lwaKristus.#Sak. 8:16 26Okuyumana mamu yumana, atjaa oluyuma lwen̯i hálu mu twala mokulundha. Hámu yetha etango li hite amu na omadhinge.#Eps. 4:4 27Hámu pa omudiapoli oluvedhe. 28Nguu vaka, há vaka uke, nga undape ovipuka oviwa nomawoko e omwene, opo a kale ae na tja okuyandja kovathona. 29Movinyo vyen̯i hámu dhi odhondaka odhombi, iya ngamu dhe odhondaka odhombwa ndhimadhi tungu nawa, ndhaa nyetetha okuteelelwa. 30Iya Ombepo Ondhilikwa yaKalunga, hámu i ningitha omutima omuvi, muyo n̯e mwa tuwa otjilimbo tjOmbepo Ondhilikwa katee etango lyeyowoko mali ya. 31Hámu kala nonya, ovinkumba noluyuma, olutangu, okutukana, okulikuminina, nouvi auhe ngau kale kokule nan̯e. 32Kalen̯i nolweembya nokankenda, ithilen̯i po ovakwen̯i odhonkali dhawo, ngaKalunga wo hiee mu ithila po odhonkali mena lyaKristus.#Kol. 3:13
Dhimba New Testament © Bible Society in Namibia, 2010.